بلوچ راجدوست سیاست ہژدہ سال اِنت مزاحمتی و آشوبی جنگےءِ دیمپان اِنت۔ اے بری جنگا داشتگ، بلے اے جنگ تنیگا چہ مُہکمیں سیاسی لبزانکےءَ زبہر اِنت۔

اِشیئے مستریں سبب اِش اِنت کہ تنیگا بلوچ واہیں تَوان چرے ہبرا سرپد نہ اَنت کہ سیاسی زبان کجام بہ بیت؟ چوں بہ بیت؟

اے گِلّہ و زنگ ہم دیما آہگا اَنت کہ بلوچی زبان آ درجہا سر نہ اِنت کہ سیاسی زبانے جوڑ بہ بیت، بلوچی زبان چَڑو پہ چار گال ئے سازگ و دو کسہ ئے نبشتہ کنگا کارا کیت، دگہ ہچ درد نہ وارت۔ اے حسابا بلوچ راجی جنگ ئے سیاسی زبان اگاں بلوچی بہ بیت تہ چون بہ بیت؟

اے ہبرا بُنے نیست، زبان زبان اِنت، زانشت زبان ئے تہا نئیت، زبان ئے گُشوک کہ زانتکار بیت، زبانا چہ وتی زانت و بُودا زانشتی زبانے جوڑ کنت، میڈیکل بہ بیت یا نفسیات، ادب بہ بیت یا سیاست، سائنس بہ بیت ٹکنالوجی، زندئے ہر کجام پِڑا کہ دیمروی کت، آ وتی زبانا وت سازیت۔

Oct 10, 2018, 11:05 pm

بلوچ راجدوست سیاست ہژدہ سال اِنت مزاحمتی و آشوبی جنگےءِ دیمپان اِنت۔ اے بری جنگا داشتگ، بلے اے جنگ تنیگا چہ مُہکمیں سیاسی لبزانکےءَ زبہر اِنت۔

اِشیئے مستریں سبب اِش اِنت کہ تنیگا بلوچ واہیں تَوان چرے ہبرا سرپد نہ اَنت کہ سیاسی زبان کجام بہ بیت؟ چوں بہ بیت؟

اے گِلّہ و زنگ ہم دیما آہگا اَنت کہ بلوچی زبان آ درجہا سر نہ اِنت کہ سیاسی زبانے جوڑ بہ بیت، بلوچی زبان چَڑو پہ چار گال ئے سازگ و دو کسہ ئے نبشتہ کنگا کارا کیت، دگہ ہچ درد نہ وارت۔ اے حسابا بلوچ راجی جنگ ئے سیاسی زبان اگاں بلوچی بہ بیت تہ چون بہ بیت؟

اے ہبرا بُنے نیست، زبان زبان اِنت، زانشت زبان ئے تہا نئیت، زبان ئے گُشوک کہ زانتکار بیت، زبانا چہ وتی زانت و بُودا زانشتی زبانے جوڑ کنت، میڈیکل بہ بیت یا نفسیات، ادب بہ بیت یا سیاست، سائنس بہ بیت ٹکنالوجی، زندئے ہر کجام پِڑا کہ دیمروی کت، آ وتی زبانا وت سازیت۔

اولی ہبر اِش اِنت کہ تو اے جنگ چوں بِنا کتگ؟؟
کجام کوہ و کوچگاں نشتگ و جنگی زانشت دربرتگ؟؟
تئی ڈیہہ و دمگ ئے نام کجام زبانا،زانگ و پجّارگ بنت؟؟
کئی سکین و کُجام سوک ئے پدا تو اے جنگ بہا زُرتگ؟؟
اگاں اے رنگیں جستانی جواب گوں تو است اَنت، گُڑا ترا پہ سیاسی زبانا بَہہ و بَکّڑ بئیگی نہ اِنت، تئی ہمک روچیگیں زبان کہ تو ہبر کنئے، تئی سیاسی زبان بوت کنت۔۔۔

انچو کہ تئی سیاست، تئی جنگ و تئی واہگ گوں ہمے گلزمینا ہمگرنچنت، گوں تئی دیم ہونی و قربانیاں بندوک اَنت، ہمے رنگا تئی سیاسی زبان ہم چہ ہمے گلزمینا بہ تْرُکّیت، چمدا ردوم بہ زوریت، گڑا تو اے جنگا پہ مردی جت کنئے۔

تانکہ تو پہ بدل زرتگیں سیاسی ٹرم و اصطلاحاں دگہ زبانے ئے منّتوار بئے، زیردست و ایرجیگ بئے، اردو و انگلش ئے مہتاج و واستیگ بئے، بزاں تو ہردُکیں پاداں شپادئے، پہ تو ہچ پَشت نہ کپتگ۔

انچو کہ پہ سیاسی و آشوبی جنگا ترا تئی گلزمین ئے زید و بوماں کُمک کتہ، کوہ و ڈرّاں پناہ داتگ، ہمے دابا اے جنگ ئے دیما برگ و جْوانیں آسرےءَ  سر کنگا ہم ترا بلوچ گلزمین ئے زبان و گالوار مَدت کننت، اگاں تو دلا پُرّ کت بہ کنئے، کُلیں گالوارانی لبز و اصطلاحاں کار بگرئے۔

پہ سیاسی زبانا کوہے پْروشگی نہ اِنت، آزمانے روجگی نہ اِنت، زمین دِرّگی نہ اِنت، ہما زبان و گالوارا ہبر کنگی اِنت، نبشتہ کنگی اِنت کہ تو زانئے یے۔ 

پرے گپّا شرمندہ بئیگی نہ اِنت کہ منی زبان پہک و پلگار نہ اِنت، من گْرانیں بلوچی لبز نہ زاناں، من بلوچی زبانا نبشتہ کت نہ کناں، بلوچی سیاہگ ئے اڑ و جیڑہ و گِر و بند منا نبشتہ کنگا نیلنت، چرے ترسا ہم دراہگی اِنت کہ منی نبشتہ کتگیں بلوچی باریں وانگ بنت یا ناں۔۔

چرے کُلّیں گِر و بنداں کہ آجو بوتئے، کلمّا چست کن، وتی ھیالاں، وتی فکراں، وتی لیکہاں بلوچی بکن، بلوچے بُبو بہ جیڑ، بلوچیا فکر بکن، بلوچی زبان پہ نبشتہا ترا کُمک کنت۔

وانئے انگلش، جیڑئے اردو، نبشتہ کنگ ئے جُہدا کنئے بلوچیا، اے وڑا تو گولو بئے، یک لبزے ہم نبشتہ کت نہ کنئے۔۔

بیا مرچی پہ ایمانداری گوں وت عہد کنیں کہ بلوچ راجی آجوی پہ بلوچا گِرگی اِنت، گُڑا جُہدئے زبان چیا بلوچی مہ بیت۔۔
گُڑا پرچا بلوچی ٹرم و اصطلاح، سّڈ و مِنّ، دود و ربیدگ، رسم و رواج و بلوچ ئے تب و مئیل دیما کنگ و نبشتہ کنگ مہ بیت۔۔

تناوہدے وتی جیڑہ و جنجالاں، وتی راہ و رہبنداں وتی راجی یا ماتی زبانا نبشتہ نہ کنئے، تئی ہبراں تام مان نہ بیت، تئی ہبر تُری آزمانی آیات بہ بنت، چہ سیاسی ٹرم و اصطلاحا سرّیچ بہ بنت، تانکہ تئی جندئےزبان ئے شیرکنیں گال و بولیاں مہ بنت، کسی گوش ئے پُشتا نہ گْوزنت، ہچ اثر اِش مان نہ بیت۔۔

پہ سیاسی زبانا ترا حُدایا شاہگانیں گال و بولی داتگ، زبان و گالوار داتگ، تو بلوچی، براہوی، جدگالی، سرائیکی و ایدگہ کِرّ و گْوری کسان و مزنیں زبان و بولیانی لبز و اصطلاحاں وتی سیاسی زبان سازی ئے دَرارگ و درّیچگا کار گپت کنئے۔۔

پہ سیاسی زبانا الّم نہ اِنت کہ تو آزمانا زمینا بیارئے، کوہ بہ پْروشئے، پہ سیاسی زبانا ترا لس مہلوکئے زبانا ہبر کنگی اِنت، گُشتانک بیت یا نبشتانک، انچیں آسان و روانیں زبانے بہ بیت کہ شپانکےءَ بگر تاں چوریگےءَ، گنوکےءَ بگر تاں زانوگرےءَ، پہ آسانی تئی ہبرا سرپد بہ بیت۔، بزاں تو سوبین ئے۔۔

زبان ترا است، بس رہ گِرگی اِنت، کار کنگی اِنت۔۔۔

بلوچ راجی سیاست چہ چوریگ و سرداری کست و کینگانی سببا جت و پَت اِنت، پرْشت و پروشانی آماچ اِنت، شنگ و تالان اِنت، نُو ہما حد و سیمسر اِنت کہ بائد بالغیں سیاسی دیدے بئیت، سوہویں  سیاست کلما چست بکنت، نبشتہ کنگ وہدئے مستریں لوٹ اِنت، جنگ و نظریہ ہم پَلّو کنگی اَنت، ہرکس سرء وت اِنت۔

 بلوچ نبشتہ کار ہر کجا اِنت گیشء وت نہ اِنت، ہرکس ساہا زُرتگ، واری و بزگی اِنت، کسے گیشء لاپا نہ اِنت، کسے گیشء جنگا نہ اِنت، ہما سنگت کہ دراں ڈیہہ و دراں دست اَنت، آ بائد نبشتہ بہ کننت۔۔ 

(جَہانی رنگ و شَہماں بازینے ئے چم تیری میری کُتگنت، آ گندگا نہ اَنت۔۔ چہ تہاریءَ یکپارگی کسے روچ ئے سرا بئیت آ تاں دیرا ہچ میم نہ کنت۔۔)

سیاسی زبان پہ بے سری رواج داتگیں سیاہگ و راست نبیسی ئے پابند کنگ مہ بیت۔۔

زگریں زبان ئے رندا کپگی نہ اِنت۔۔

جِنّی ٹرم و اصطلاح سازگی نہ اِنت۔۔

بلوچ ئے سیاسی زبان بلوچی بہ بیت۔۔ 

کُلیں بلوچستان ئے دْراہیں گالوارانی جہگیریءَ بکنت۔۔

بلوچ سیاست چو مکران ئے لہتیں ”چات پُگلیں” نبشتہ کار و ناوانندہیں زبان زانتا ”الف بے و لبزانی” سرا جاک و جلّڑی مہ کنت کہ کجام حرف بلوچی یے، کجام لبز درامدے۔۔

ہر کجام لبز ہرکسا ہما رنگا کہ ونتگ، ہما دْروشما کہ آئیے دلا جْوان اِنت، نبشتہ ے بہ کنت۔ 

کُلّیں بلوچستان ئے زبان، گالوار و لبز و حرف بلوچ ئے سیاسی زبان ئے تہا کارمرد بہ بنت۔  

ٹرم و اصطلاحے کہ بلوچی، براہوی یا دگہ ہَندی گالوار و زبانےءَ دست مہ کپیت، ہما زگریں اصطلاح نبشتہ کنگ بہ بیت۔۔

اے ھسابا تو سیاسی زبانے رواج دات کنئے۔۔

چہ مروچیگا ہرچ بلوچے کہ بلوچ راجی سیاست ئے منّو گِر و واہگدار اِنت، اے زنگ و گِلّہا یک کِرّا ایر بہ کنت کہ بلوچ شاعر، ادیب، نبشتہ کار و زبانزانت مارا سر و سوج نہ کننت یا بہ کننت۔ اے رنگیں لاگریں عُذر و نیمون، ہیلہ و بہانہ تہنا جان بڈی و بہیائی ئے نشانی زانگ بنت۔۔

زبان کُلّانی اِنت، سیاست ہرکسی اِنت، کلم و کاگد ہرکسی کِرّا است، گُڑا اِینگو آنگو چے چارئے؟؟ پاکستانی چکّاس جاہےءَ نہ نشتگ ئے، نقل ئے ودارا مکن، اے تَہل و نہ وشیں زندگی کہ تئی گْورا ہم لوپ اِنت، ہمے درد و تیرُکانی نبشتہ کنگ سیاست اِنت۔۔

زبانے ترا ہار و پَتاریں دپا، کار ے بگر، گِر و بنداں یک کِرّ کن، کسی مُرید و مُنجار مہ بُو، وتا کسی پابند مکن، بس وتی فکر و لیکہ ئے دراَنگازی و درشان کنگ ئے فکرا بکن۔۔
وتی زبانا۔۔۔
وتی گالوارا۔۔۔
وتی نبشتہ رہبندا۔۔۔
آزات کن وتا۔۔۔

بچار تئی قلم ہار کنت۔

چینچو سرھال است پہ تو۔۔

بلوچ زالبولانی چست کنگ۔۔

بلوچ راجی سروکانی ناتپاکی۔۔

بلوچ سرمچارانی بے دردی شہید بیئگ۔۔

بلوچ سیاسی گل و جنگی سومچارانی ٹولی بازی۔۔

آزاتی چون گرگ بیت،، چتور برجاہ دارگ بیت

و دگہ بازین۔۔۔

بلوچی راجی سیاست و راجی زبان کہ ہمدست و ہمگْرنچ بنت، آجوی ئے بام ٹِکّ کنگا دیر نہ کنت۔

(اے نبشتانک من پہ زانت یک رہبندی٘ئا نبشتہ نہ کتگ،، تاکہ رہبند نابلدیں نبشتہ کار دلا مہ ورنت)

نبشتہ کار ءِ ھیال ءُ لیکہ ءَ چہ ادارہ ءِ تپاکی المی نہ اِنت۔(ادارہ سنگر)

http://    dailysangar.com/home/page/13601.html