وتن مئے سرمچارانی دیاریں



وتن مئے سرمچارانی دیاریں
وتن شیر ءُ مزارانی دواریں
وتن یکے مَئِے چه سد هزاریں
وتن گیمرتگیں زرد ءِ کراریں
وتن مئے تْیاب لمب ءُ چابَهاریں
وتن نیلیں زر ءُ چئول ءِ تواریں


وتن مئے سرمچارانی دیاریں
وتن شیر ءُ مزارانی دواریں
وتن یکے مَئِے چه سد هزاریں
وتن گیمرتگیں زرد ءِ کراریں
وتن مئے تْیاب لمب ءُ چابَهاریں
وتن نیلیں زر ءُ چئول ءِ تواریں
وتن داز ءُ چگرد ءُ ریدگیں پیشّ
وتن جگر ءُ کلیر ءُ کونر ءُ کیشّ
وتن بور ءُ ٹَٹ ءُ زه، پیتّ ءُ جالار
وتن کید ءُ جوکّ ءُ کیمتی هار
وتن اسپکه ءُ گنداوگ ءُ گِه
وتن مئے هست ءُ نیست ءُ بهت ءُ تاله
وتن اهدی میار جلیّ ءُ باهوٹ
وتن شستون ءُ کیچ ءُ پهره ءِ کوٹ
وتن کیشکئور ءُ پیردان ءُ کُزوریں
وتن کلیں جهان ءَ مئے گروریں
وتن ناز بو ءُ میسک ءُ شب بو ءِ بو
وتن کانیگ ءُ کئور ءُ کهن ءُ شهجو
وتن پنوچ ءُ بنت ءُ چانپ ءُ هینچان
وتن بمپور ءِ زید ءُ کوه ءِ بزمان
وتن هر نیمگ ءَ باگ ءُ بهاریں
وتن گورانی ءِ اجگیں کشاریں
وتن سنگان ءُ ڈکّ ءُ کچّ ءُ سیسّاد
وتن کُلّانی ءُ ڈُور ءُ مزنپاد
وتن ایرندگان ءُ دامن ءُ واش
وتن چانگال ءُ پیرزالانی بٹ ماش
وتن کولواه ءُ هَبّ ءُ دشت ءُ کاشاپ
وتن نرمیں سِک ءُ آپواریں دزّاپ
وتن بیله، مری، کُزدار ءُ نال ایں
وتن چاگی، چمن، بولان ءُ شال ایں
وتن پنجگور ءُ تمپ ءُ سرمگیں مند
وتن سرباز ءُ لاشار ءُ کَسِرکند
وتن مئے واهگانی مادنیں راه
وتن مئے کلکش ءُ استال ءُ مئے ماه
وتن اورماڑه ءُ هنگول ءِ دربند
وتن مئے، پسّنیّ ءُ سائجی ءِ بند
وتن مئے جیوّنیّ ءُ بریس ءِ بندر
وتن مئے پیشُّکان ءُ گنز ءُ گوادر
وتن آشار ءُ ایرپشان ءُ اپشان
وتن مستونگ ءُ آواران ءُ خاران
وتن کاروان ءُ زرّاباد ءُ جُهلو
وتن کبگ ءُ کپوت ءُ چرز ءُ گولو
وتن مئے شائریّ ءِ برزیں گنبد
وتن جام دُرّک ءُ پازل ، روانبد
وتن مئے مهزب ءُ دنیا ءُ دین ایں
وتن بن پیرکی مئے سرزمین ایں
وتن کُرد ءُ تمندان ءُ تمین ایں
وتن دں لیردپ ءُ جاسک ءُ جگین ایں
وتن کیّا ءِ دل په بےکراری
زریت په باهو ءُ په دشتِیاری
وتن تپتان ءِ سر دں آزِمان ایں
وتن سرهدّ ءُ زرّیں مکّران ایں
وتن روایرکپیّ ءَ دانکه بشکِرد
بلوچستان ءِ چاریں چپ ءُ چاگرد
وتن زهیروک ءُ لیلو، موتک ءُ لولی
وتن زگریں بلوچی گپ ءُ بولی
وتن مُچّی ، مراگاه، مجلس ءُ تران
وتن پاگ ءُ کمرزانیّ ءُ دیوّان
وتن پیریں پت ءُ ، همگنگلیں برات
وتن چونائی مئے ، مکهیں مات
وتن مئے لاڑکیں گوار ءِ گشان ایں
وتن ارواه ءُ گینّ ءُ جسمءُ جان ایں
وتن مید ءُ مَزور ءُ سیم ءُ زرگِر
وتن جُگ تراش ءُ دهکان کار ءُ بزگِر
وتن کوڈال ءُ رَمبی مهر ءِ داس ایں
وتن مئے چیلّک ءُ جَتک ءُ سواس ایں
وتن پات ءُ کپات ءُ ناه ءُ آمین
وتن باگ ءُ ڈگار ءُ هلک ءُ هنکین
وتن دود ءُ ربیدگ داد ءُ بجار
وتن میریں بلوچ ءِ نام ءُ پجار
وتن مردانی لئیب ءُ جنگ جاه ایں
وتن مئے گَیرت ءُ لجّ ءُ مڑاه ایں
وتن مئے اِلْم ءِ درچکیں دین ءِ باگ ایں
وتن دلگان ءُ شاهیں شئے چراگ ایں
وتن پُر زهرگ ءُ شیرمردیں همّل
وتن چو کمبرئیگ ءَ زهم جنیں یل
وتن ماهیں سدوّ ءِ یات گیر ایں
وتن گُرّانی ءُ بَرّ ءِ کهیر ایں
وتن دریا دلیں جودانی دلبند
وتن گرانماولیں زالانی بچکند
وتن کَرگینّ ءُ توپّ ءُ گورگیں کُل
وتن پادینک ءُ تینّ ءُ تاپگ ءُ چُل
وتن مئے آزمان ءِ سنج ءُ درین ایں
وتن مئے جلگه ءُ پراهیں زمین ایں
وتن ، مئے زندگیّ ءِ رنگ ءُ بْرْاه ایں
وتن پلیں شهید ءِ هون بهائیں
وتن مئے پهر ءُ شان ءُ ننگ ءُ نام ایں
وتن ! ما درست تئی نام ءِ گلام ایں
وتن هر نیمگ ءَ مئے دشت ءُ تَلّ ایں
گوشنت ناپگ منی شیرگواز ءَ کَلّ ایں
وتن شالا بباتے سبز ءُ آباد
وتن برز تر بباتْ تئی کدّ ءُ بالاد
وتن! واهگـــــ مدامی کنت کوکار
وتن ، واے وتن ، تئی هشتگیں دار

————————

ولید واهگـــــ ـ ولی محمد ملک زری

A K Baloch:

@BalochistanNews

twitter
Youtube
Facebook