بلوچ بلوچ انت….. میجرمجید

پُلیں مہرگڑھءِ پولکاراں

زند ءُُ زانشءِ زانتکاراں

راجی دپترءِ سوجکاراں

آشکار کت بلوچءِ دپتر

بلوچ بلوچ انت….. میجرمجید

Oct 14, 2017, 4:21 pm

پُلیں مہرگڑھءِ پولکاراں
زند ءُُ زانشءِ زانتکاراں
راجی دپترءِ سوجکاراں
آشکار کت بلوچءِ دپتر
مانیت دائما تاں مہشر
پیش چہ دہ ہزارے سالاں
زانگ بیت بلوچءِ دودمان
کْوہنیں مہرگڑھءِ ڈیوالاں
دست کپتگ بلوچی دوچے
ٹِک ءُُ سَے ٹٹ ءُُ جالاریں
کُنڈی گُل اجب ڈولداریں
دوچ اِش کرمز ءُُ زیبداریں
سنگانی سرا نکش بیتگ
کُلیں عالمءَ ہم دیستگ
سک کْوہن اِنت بلوچءِ دودمان
دستکاری کلنڈ ءُُ کاسگ
زہم ءُُ اسپر ءُُ بورتاچی
راجانی سْرپاں چکاسگ
مہمان دار میار جلّیں راج
ہچ راجءَ نہ بُرت چہ تو باج
بْراہ انت حاکمی تہت ءُُ تاج
تنگویں بیلاں! گْوستگیں روچاں ماں سوشل ، پرنٹ ءُُ الیکٹرونک میڈیاءَ یک کم زانگےءَ فرعون ءَ را بلوچے گْوشتگءُُ زامران سْیاہ گِسیءِ جہمنند ہم گْوشتگ۔ ہمے وتگڑ ءُُ نابلدیں دپتری پولکارءَ وتی ناسرجمیں پولکاری ماں کُلیں رسانکدراں شنگ ءُُ تالان کتگ ات۔ چدو پیش ہم ڈنی راجدپتری پولکاراں ءُُ مئے لہتیں بلوچ پولکارءَ بلوچءَ راعرب، فارسیءُُ افغانی ہم گْوشتگ، بلے راستی ءُُ گْواچن پہ لگت کنگءَ گار ءُُ بیگْواہ نہ بنت۔ تچکیں گپ ایش انت کہ بلوچ بلوچ اِنت، چہ کرناں ہمے حاکءِ جہمنند اِنت۔ چونائیءَ ہم فرعون یک فردےءِ یا قومےءِ نام نہ انت۔ آ دہرءَ ہرکس کہ مصرءِ حاکم بیتگ، آئیءِ نام ءِ دیما فرعون نبشتہ کنگ بیتگ۔ انچو کہ ہرکس کہ ایرانءِ حاکم بیتگ آئیءِ نامءِ دیما شہنشاہ نبشتہ کنگ بیتگ۔ اگاں برطانیہءِ حاکم بیتگ، مردیں آدمے بیتگ آئیءِ دیما کنگ (King)ءُُ جنین آدمے بیتگ، گُڑا آئیءِ نامءِ دیما کوئین (Queen)نبشتہ بیتگ۔ فرعون یک انچیں لقبے، منصبے یا پنّامے۔ فرعون بلوچے نہ بیتگ۔ بلوچ بلوچ انت:
بلوچ بلوچانی زات ءُُ زُریات انت
نَے بلوچ نمرود انت ناں کہ فرعون انت
حمزہءِ اولاد، نہ سامءِ پدریچ انت
نَے کہ قحطانءُُ نَے عرب جرات انت
نَے کہ فارسی ءُُ نیکہ افغان انت
نَے جنید بغدادی نَے نوح ءِ اولاد انت
اصل بلوچ میریں آرین نسل انت
کرد ءُُ بلوچانی رشتگ سک کْوہن انت
مئے بلوچ راجءِ دپتراں مان انت
پیش چہ اسلام ءُُ چہ مسلماناں
زرتشت بلوچانی دین ءُُ ایمان ات
ایمنی، امن ءُُ حق ءِ شوندات ات
مہر ءُُ دوستی ءُُ پُر کرامات ات
پیش چہ موسیٰ ءُُ مہتر عیسیٰءَ
بلوچ بلاشکانءِ پُل ءُُ سوگات ات
بلوچک بلوچانی قومءِ نام بیتگ
بلوچک بلاشکانءِ زہم جنیں سانڈ اَت
گُڈّء چہ بازیں کرن ءُُ باریگاں
ہمے لبز بلوچک نی بلوچ بیتگ
چہ بلاشکانءَ لڈّ ءُُ بوج کرتگ
(اولی لڈوبوج بلوچانی چہ بلاشکانءَ بنگیج کتگ)
بلاشکان ماں کرمان ءُُ نْیامء سیستانءَ
لنجیں ریگزارے کہ دشت ء لوط گْوشتگ
(دشتء لوط کرمان ءُُ سیستانءِ نیامءَ بلاہیں ریگستانے)
جنگی پازگاہ اِش دشتء لوط بیتگ
ہر گْورا مُہریں سنگر اِش بستگ
عزت ءُُ لج ءُُ ننگءِ پاسداراں
کرت اِش دُز جنگی گوں فوجاں ایرانی
(دُزجنگی بزاں گوریلا جنگ)
کُشتگ اِش بازیں فارسی، سیستانی
کوہء البرزءِ دامن اِش گپتگ
مدتے دْراجیں پہ جنگ ءُُ مِڑ گْوستگ
لِک کُت انت مید بندیں گدان پُلیں
بگ ءُُ بگپان ءُُ لیڑہ مید کونڈیں
ہلکوءِ بگ جت ءُُ شپانک سانڈیں
بُزگل ءُُ اِیرت ءُُ میہڑ ءُُ میہگ
(میہگ گامیشانی رُمبءَ گْوشنت)
تْردگ بورانی زہمء شیرازی
مرد مزن مرّ ءُُ زہم جنیں غازی
رہبند ءُُ دستور اِش وتی بیتگ
پُچ ءُُ پوشاک ءُُ زبان وتی بیتگ
دپترءُُ آمیدگِس وتی بیتگ
بلوچ وتی ہندءِ حاکم وت بیتگ
حاکماں دہرءِ سک نہ وش بیتگ
نوشیروان عادل چو ملکمیت گشتگ
آ وہدءَ ایرانءِ حاکم نوشیروان عادل بیت کہ پہ دگراں عادلے بیتگ، بلے بلوچءِ مستریں قاتل بیتگ۔ چہ بلوچاں سک نہ وش بیت، پرچا کہ بلوچ وتی شناختءُُ پجارءَ برجاہ داریت، دہرءِ حاکمءِ کاسگ چٹ ءُُ دزبوج جوڑ نہ بیت، بلوچ دہرءِ حاکمءَ مالیت، چِلّ یک، دہ یک، گٹّو ءُُ بیگار ہم نہ دات، بلے ماں ایرانءَ وتی ہندءُُ دمگاں چہ دہکان، مالدارءُُ اَزگاراں مالیت ، چِل یک، دہ یک، گٹّوءُُ بیگار گیپت۔ بلوچءِ اے عملءَ گوں نوشیروان عادل سک نہ وش بیت ءُُ بلوچءِ نسل کشیءِ حکمءَ دات:
نوشیروان عادل حاکم ات دہرءَ
گوں بلوچاں سک دلءَ زہرءَ
داتگ ءِے پرمان لشکرءِ مرداں
ایرانی زوراکیں سپاہیگاں
کوش بلوچانی سنت ءُُ فرضیں
چُک چینی بندات بیت بلوچانی
گْوانزگی طفل ءُُ زالبول پیریں
کاڑ خمار چمیں، ورنا نوک سیریں
بگی جت پان ءُُ بزگر ءُُ دہکان
گووال ءُُ شْوانگ میر بلوچانی
راجی سرخیل ءُُ شیرزال شدریں
مادگ ءُُ میش ءُُ بزگل ءُُ میہڑ
کلگ ءُُ بستانی کشار اَجگیں
شہر ءُُ بازار ءُُ ہلک بلوچانی
تہت ءُُ تاراج کت فوجاں ایرانی
چہ ایرانی حاکمءِ زُلمءُُ زوراں بلوچ سک تنگ بیت۔ بلوچانی چُک چینیءَ ایرانی حاکم ءُُ واکدار وتی مذہبی ذمہ واری یے سرپد بیت انت، بلے بلوچ نوشیروان عادلءِ فوجءِ دیما لگور نہ بیت، تاں آخری وہدءَ مقابلہ اِش کت۔ چدو پد بلوچانی جنگی ازباب ءُُ توشگ ہلاس بیت انت، بلے زورگیرءِ لشکرءِ دیما پیش سلام نہ بیت انتءُُ نی بلوچا ں وتی اولی لڈ ءُُ بوج چہ کوہء البرز، سیستان، کرمان ءُُ دشت ء لوطءَ بنگیج کت۔
پند ءُُ منزل اِش بُرّان کت
چو نرشیرءَ یلاں گُرّاں کت
آپ ءُُ آپسراں داراں کت
مسکیں کاہ چراِ ش چاراں کت
زید ءُُ کوچگ ءُُ شہکوراں
ہنکین اِش وتی پولاں کت
کیچ تاں درّہ ء بولانءَ
ڈاڈر سیبی ءُُ شورانءَ
دِزّک تاں گِہہءِ دربندءَ
نامانی مگس گنداوگ
لاشار کچڑو نامانی
دُزاپ ءُُ جگین، مینانءَ
کسرکند، پہرگ ءُُ ہیچانءَ
وش اَت زید مئے سْرادانی
مولاءِ دپءِ شہجواں
کیل انت دائما سبزاپ انت
شنگ انت کوچگ ءُُ مِیتاپاں
چرتگ گورم ءُُ گامیشاں
راہ ءُُ رہ سر اِش گولاں کت
شنگ بیت انت بلوچ اے ہنداں
گوں شیری گُرّگ ءُُ گْورگنداں
پرگول داتگ ات بامرداں
نی بلوچانی ہما دہیں ٹک پدا ماں بلوچستانءَ واتر بیت انت، بلے چہ ایشانی آہگءَ ساری بلوچستانءَ بلوچ پیشءَ ہم آباداتنت، پرچا کہ اے لڈءُُ بوج ءَ کساس دو ہزار سال انت، مہرگڑھءِ دودمانءَ کساس دہ ہزار سال انت۔ مہرگڑھءِ پٹ ءُُ پولءَ ثابت کت کہ بلوچءِ دودمانءِ نشانی مہرگڑھ بیتگ۔
چرے لڈ ءُُ بوج ءَ پد بلوچستانءِ نام ایر کنگ بیت۔ لبزء بلوچک کہ اشاں چہ بنداتءَ گون ات، ہمے لبزء بلوچک لبزء بلوچءَ بدل بیت۔ اشاں وتی ملکءِ نام بلوچستان ایر کت۔ بلوچستان نوکیں نامے نہ انت، آ دگہ گپے کہ دہرءِ زوراکاں وڑوڑیں ہیلہ بازی کتگ ءُُ بلوچءِ گار ءُُ بیگْواہ کنگءِ جہد کتگ، بلے بلوچاں مدام چہ بنداتءَ وتی شناختءُُ پجار برجاہ داشتگ ءُُ زوراکانی مقابلہ کتگ۔ بلوچانی یک بہرے ماں بلوچسانءَ سر بیت، ہمودا جہمنند بیت۔ اسلامءِ دہرءَ عرباں 150سال ایرانءِ سرا حاکمی کتگ۔ اے دہرءَ عرب ءُُ فارسءِ نْیامءَ سک باز جنگ بیتگ، سک باز ہونریچی بیتگ۔ اے جنگءَ بلوچاں اسلامءِ نامءِ سرا عربانی ہمراہ داری کتگ۔ 150سال ءَ پد عرباں چہ ایرانءَ درکپگءِ فیصلہ کتگ، گُڑاعرباں بلوچءَ را گوں وت آہگءِ شور داتگ۔ بلوچءِ دہ ٹک ءَ گوں جنگی لاہ ءُُ لشکرءَ عربستانءَ درکپگءِ فیصلہ کت۔ اے بلوچءِ دومی لڈ ءُُ بوج بیت:
درکپت انت عرب چے ہندءَ
پتّ اِش گوں بلوچءَ بستگ
مہر ءُُ دوستیءِ سوگندے
لڈ اِش مان کتگ یکمُشتءَ
دیم پہ بصرہ ءُُ بغدادءَ
چیزے کرن پدا پرگْوستگ
زُلم کت یوسفء حجاجءَ
(یوسف بن حجاج بصرہءِ حاکم اَت)
زہر زُرتگ بلوچءِ راجءَ
گنجانی حلب آباد اَت
سیمی لڈءُُ بوج: بصرہءِ حاکم یوسف بن حجاج ات کہ اے حاکم بلوچءِ سرا غضب ات، پہ بلوچءَ حدائی کہرے ات، زلم ءِے کت بلوچءِ سرا۔ ہمے دہیں ٹکاں لڈءُُ بوج بنگیج کت ءُُ دیم پہ حلبءَ شت انت:
گنجانی حلب آباد اَت
آ وہدءَ حسینءِ راج ات
(حضرت امام حسین رسولءِ نماسگ ات)
وادیء بلوش بازار اَت
مئے راجءِ مہترانی جاہ ات
دہ میریں بلوچءِ ٹک ات
لانک اِش بستگ ءُُ یکمُشت ات
راجانی سْرپاں ہم دْرست ات
پیروزء گلو نامانی
راجءِ حاکم ءُُ سردار اَت
جنگے مَچّ اِتگ سرداری
حکم ءُُ حاکم ءُُ نامداری
یک دیمے یزید گوں فوجاں
یک دیمے حسین ات غازی
گرمیں کربلاءِ ڈنءَ
پدریچ اِش رسولءِ کُشت انت
دینءِ ہاترا زہر زرتگ
دہ میریں بلوچءِ ٹکءَ
چہ گنجانی حلب درکپت انت
نی ہما دہیں بلوچ ٹکاں کہ ماں حلبءَ یک ہلکے کہ نام ءِے تاں روچء مروچ وادیء بلوش اِنت، جہمنند اِتنت۔ چہ حضرت امام حسین ءِ شہادتءَ پد ایشاں چہ حلبءَ زہر زُرتءُُ دیم پہ وتی بنکی ہنکین بزاں کہ بلوچستانءَ شت انت۔ ملافاضل گْوشیت:
مہپلے پُلیں دْرم گْوریں کاڑاں کَجّ اِتگ
آ حلب گنجیں برسرء دینءَ سر کتگ
مں جگین سالے نشتگ ءُُ زید اِش سیل کتگ
دیم اِش پہ کچّ ءُُ ڈاڈر ءُُ سیبیءَ کتگ
ملا فاضل ءِ پٹ ءُُ پول راست انت، بلے ملا فاضلءَ ماں وتی شعرءَ بلوچءِ راجدپتر چہ بُن دوچءَ نہ زُرتگ۔ آئیءَ وتی شعر چہ بلوچءِ چارمی لڈءُُ بوجءِ بابتءَ زرتگ۔ بزاں چہ حلبءِ لڈءُُ بوجءَ وتی شعر بندات کتگ۔ملا فاضلءِ شعرءِ وانگءَ پد باز مردم گمان کنت کہ بلوچ عرب انتءُُ چہ عربستانءَ اتکگ انت۔ اے بلوچ بزاں ہما دہیں ٹک کہ چہ کوہء البرزءَ درکپتگ ءُُ عربستانءَ شتگ انت، وہدے عربستانءِ جاورحال پہ بلوچءَ نہ وش بیتگ انت، ہمے ٹکاں پدا دیم پہ وتی ماتیں گلزمین بلوچستانءَ واتر بیتگ انت۔
دہ میریں بلوچءِ ٹک اَت
لڈ ءُُ بوج دُبر بندات کت
آہِرّاں مدام یک دست ات
دیم پہ پیشیگیں آبنداں
شنگ بیت انت بلوچ ہر کنڈاں
کیچ ءُُ ڈاڈر ءُُ ہلمندءَ
تاں مائی کُلانچی ءُُ سندھءَ
شوران سبی ءُُ بولانءَ
دْراجیں منزلاں گولانءَ
ہند ءُُ جاگہاں پولانءَ
رپت انت ماں بلوچستانءَ
وش ءُُ وشدل ءُُ شادانءَ
دستور اِش بلوچی زُرتگ
پوشاک ءُُ زبان ءُُ رہبند
آ روچی بلوچ آزات ات
ملکءِ واجہ ءُُ وت واک اَت
تنگویں بیلاں! چرے کُلیں پٹ ءُُ پولاں پد اے گپ المی انت کہ بلوچ بلوچ انت۔ بلوچ نمرود ، نوح، قحطان، فرعونءُُ حمزہءِ اوبادگ نہ انت۔ پٹ ءُُ پولکاراں گوں بلوچءَ سک زیادہی کتگ۔ بلوچ وتی اصلی دْروشمءَ پیش نہ کتگ۔ چیزے پٹ ءُُ پولکارءَ پہ زانت ءُُ وتی سیاسی لوٹءُُ گزرانی ہاترا کتگ، دگہ بازینےءَ پہ نہ زانتکاری کتگ۔ بائد انت کہ ما وتا وت بزانیں، ما وتا پجہ بیاریں، اگاں دگرے مارا نہ زانت، باکے نہ انت، عیبے ہم نہ انت، بلے ما وتا پہ زور فرعون ، نمرود، نوح، قحطانءُُ حمزہءِ پدریچ مہ گْوشیں، مئے راجدپتر پولنگ نہ انت، مئے پیریناں، کماشاں ءُُ بُن پیرکاں مئے راجدپتر پہ وزمے زرینتگ۔ ادا بچار کہ دری پولکارے فردوسی بلوچءِ بابتءَ چے گْوشیت:
سپاہش زگردان کوچ و بلوچ
سقالیدہ جنگ و بر آوردہ خوچ
کسے درجہان پشتِ ایشاں نہ دید
درفشی بر آوردہ پیکر پُلنگ
ہمی از درفشن بیارید جنگ
**
بلوچی سبز ءُُ مَیزران بات
بلوچءِ دژمن بے سوب بات انت
(اے نبشتانکءِ نویسگءَ من چہ ڈاکٹرنصیردشتیءِ کتاب “The Baloch and Balochistan”ءَ کمک زرتگ۔ واجہءِ منتواراں)

تپاکی آجوئیءِ مانزمان اِنت
بلوچستان آجو بات