اَہدی زمانگءَ ہما وہدءَ کہ گْوادر سلطنت عمان مسقطءِ بہرے بیتگ، گُڑا گْوادرءَ بلاہیں نہادیگے بیتگ کہ کساس 200ہشترءِ بار روزانہ ہمے نہادیگءَ بہا ءُُ بُرد بیتگ۔ چہ مکرانءِ کُلیں ہند ءُُ دمگاں مہلوکءَ وتی دستکاری چو کہ تگرد، پات، سُند، ساد، دار، اشکر، بینگ، روگن ءُُ دگہ بازیں ساز ءُُ سامان ہمے نہادیگءَ آؤرتگ ءُُ بہا کتگ۔ مہلوکءِ روزگارءِ ہم بلاہیں وسیلہے ہمے بیتگ۔ ہمک سہب کساس 8بجءَ نہادیگ بندات بیتگ۔ گیشتر سوداگر گؤر بیتگ انت۔ ہر یک سوداگرےءَ وتی بولی داتگ، ہرکسی بولی کہ گیشتر بیتگ گِراکاں وتی مال ہمائیءِ کرّا بہا کتگ انت۔ کساس 12بجءَ نہادیگ بند بیتگ، پدا دومی سہبءَ 8بجءَ نہادیگ پدا بندات بیتگ۔ ہر چیزءِ قیمت بستگ، اَنچو کہ مروچی پاکستانءِ پارلیمنٹ انت۔

1۔ یہ پارلیمنٹ نہیں ایک منڈی ہے۔
2۔ مجھے اس پارلیمنٹ میں شرم آتا ہے۔
3۔ آج جمہوریت ہار گیا، بالادست قوتیں جیت گئیں۔وغیر وغیرہ۔۔۔ (حاصل خان بزنجو)
واجہ میر حاصل ! تو مروچی زانت کہ اے پارلیمنٹ منڈی یے؟؟ پیشءَ تو نہ دیستگ؟؟ تئی عمر چو کسان ہم نہ انت، تو اے شمشتگ کہ 2009ءَ تو چون سینیٹربیت ئے؟؟ ترا کےَءَ ووٹ دات؟؟ تئی لینگاٹ پارٹیءَ یک سیٹے ہم اسمبلیءَ نیست ات۔سینیٹر بیئگءِ واستا صوبائی ءُُ قومی اسمبلیءِ 8ممبرءِ ووٹ درکار اِنت۔ ترا کےَءَ ووٹ دات؟؟ ہو بلوچ گْوشیت: ’’چم وتی عیبءَ کور اِنت‘‘
ہمے قوتاں کہ ترا 2009ءَ سینیٹر کت، مروچی پداہمے قوتاں صادق سنجرانی سینیٹءِ چیرمین کتگ۔ بلوچ گْوشیت: ’’تینءَ تاپگءَ را شگان نہ جتگ‘‘ آ مرد ءِ قیمت گیشتر انت کہ تنیگا کارمرز نہ بیتگ، آ مرد چیرمین بیتگ۔ واجہ ترا ہم زانگ لوٹیت کہ زورگیر وتی دلار ءُُ کاسگ چٹاں دائما بدلی سدلی کنت، پدا منی واجہ پنڈوک حکم دات نہ کنت، پرچا کہ پنڈوکءَ دپ ءُُ آپ نیست۔ پنڈوکءَ ہرچی کہ رسیت آ بائد انت رازیگ بہ بیت۔ تو ہم پنڈوک، صادق سنجرانی ہم پنڈوک، ناں تو آپء زمزمءَ ششتگ ئے، ناں کہ صادق سنجرانی، بلے بلوچاں اے ہم گْوشتگ : ’’ پنڈوکءَ پہ پنڈوکءَ زہر کیت‘‘
تو وتی وفاداری شر پیش داشتگ، زورگیرءِ لوٹءِ پدءَ تو بلوچءِ نسل کُشی کتگ، بلوچءِ گنجیں زر ءُُ زِربار ، بلوچءِ زیرزمینی مڈی گوں زورگیرءَ لیلام کتگ انت۔ بلوچ گلزمینءِ غلامیءِ دْراج کش کنگءَ تو گوں زورگیرءَ ہمسنگر بیتگ ئے۔ نی منی واجہ صادق سنجرانی چہ تو جْوانتر اِے کارءَ کت کنت۔ تو وتی ہما پیشی نوکریءَ سمبال۔
میرحاصل صاحب! من دو ماہ ساری وتی نبشتانکےءِ اَندرا ترا ڈاہ داتگ ات ءُُ گْوشتگ ات کہ دو چیز بس یکرندے کارمرز بیت، یکے کنڈم (Condom)دومی ٹِشوپیپر (Tissue Paper)گندئے کہ منی گپ راست بیت، بلے تو گوش نہ داشت۔ ہو گریبءِ گپءَ کےَ گوشداریت؟؟ منی واجہ تو چو ہما کنڈمءُُ ٹشو پیپرءِ دابءَ کارمرز بیتگ ئے، تئی آ اولی اَرزشت ہلاس بیتگ، بلے ترا ہمے نوکری بس اِنت، ہرچی قسمتے۔ زورگیرءَ پہ وت نوکیں دلارے شوہازتگ، ترا چیا زہر کیت؟؟ ہو بلے بلوچ گْوشیت: ’’وروکءَ پہ وروکءَ زہر کیت‘‘
میر حاصل صاحب! تو گُشئے کہ منا اے پارلیمنٹءِ نندگ شرم کنت؟؟ وہدے کہ ترا شرم کنت، گُڑا چہ پارلیمنٹءَ درکپ، ترا کسءَ پہ زور نہ داشتگ، بلے منی واجہ راستیں گپ ایش انت کہ تئی شرم کجا اِنت؟؟ اللہ ءِ لک لک شکر انت کہ تو شرمءِ نام نہ شمشتگ۔ لبزء شرم تئی ڈکشنریءَ انگت است انت، بلے تئی شرمءِ جند مُرتگ، مرد گ پدا زندگ نہ بیت۔ آ وہدی تئی شرم کجا اَت کہ ہیرامنڈیءِ پلیتیں سپاہیگاں مئے غیرت مندیں، عزت داریں بلوچ زالبول، ماتءُُ گْوہارانی چادر ءُُ دیواری پادمال کت انت؟؟ آ وہدی تئی شرم واب ات کہ بلوچ زالبول ہیرامنڈیءِ بے پِتیں سپاہیگاں ماں بندیگ جاہاں برت ءُُ بندیگ کت انت؟؟ ترا آ وہدی شرم نہ بیت کہ بلوچ ورناہانی، سالونکیں بچانی زدگ ءُُ زانگولیں لاش رسترانی وراک اتنت۔ آ وہدی تئی شرم کجا ات کہ یزیدی لشکرءِ کارندہاں بلوچ کماش، عزت داریں مہلوکءِ بے عزتی کت؟؟ ترا آ وہدی شرم نہ بیت کہ تئی ڈیتھ اسکواڑءِ کاسگ چٹاں یک بزگریں گریبیں بے توانیں شْوانگے گل محمدءِ بروتانی بے عزتی کت، مگرازے زرت یک نیمگےءِ بروت چت انت ءُُ پداہمے کارست ویڈیو کت ءُُ ہر جاہ شنگ کت ءُُ وتی بہادری پیش داشت؟؟
آ وہدی تئی شرم واب ات کہ زورگیرءِ یزیدی لشکرءَ راجی لشکرءِ کماندار ’’مرد ء آہن‘‘ ڈاکٹراللہ نزر ءُُ کماندار اُستاد اسلمءِ کہولءِ زالبول بندیگ کت انت، تئی شرم کجا ات کہ زورگیرءَ ماں آوارانءَ کساس 10مات ءُُ گْوہار وتی کیمپءَ برت ءُُ تاں دو ہپتگءَ بندیگ کت انت، آ وہدی تئی شرم کجا اَت؟؟ واجہ حاصل خان نی شرمءِ نام ءَ مگر، تئی شرمءَ سک دیراِنت کہ پنڈی ءُُ لاہورءَ پنڈگ ءُُ ورگءَ شتگ، تئی شرم ورگ ءُُ چرگءَ دلگوش انت، نی تئی شرمءَ جہہ جتگ کہ صادق سنجرانی سینیٹءِ چیرمین بیتگ؟؟
مروچی بلوچءِ سرا زلم ءِ آس روک انت۔ تو یک روچے بلوچءِ حقءَ بیانے داتگ؟؟ تئی شرم مرتگ۔البتہ یک کارے تو کتگ، تو مدام گشتگ: ’’بلوچستان میں آپریشن تیز کیا جائے‘‘ تئی، ڈاکٹر مالک ءُُ جامک بلیدئیءِ ہمے بیان ما دیستگ ’’ بلوچستان میں آپریشن تیز کیا جائے‘‘
منی دیدگیں لینگاٹ! بلوچ گْوشیت ’’کُڈّءِ جَللاں ہیرتیں است‘‘ ہر وشیءَ سکی یے است۔ یات بہ دار ہر شپءَ یکروچے است، ہر روچءَ یک شپے است۔ راجی لشکرءِ کماندار ’’مردء آہن‘‘ ڈاکٹراللہ نزر گْوشیت: ’’نیشنل پارٹی کا جرم ناقابلِ معافی ہے‘‘ تو بلاہیں جرمے کتگ۔ بلوچ گْوشیت: ’’کورءِ دپ بندگ بیت، بلے قومءِ دپ بندگ نہ بیت‘‘
دیدگیں حاصل خان! اگاں اے پارلیمنٹ ءَ بلوچءَ را فائدہ بہ داتیں گُڑا تئی آریپیں کماش، میرغوث بخش بزنجو، سردار عطااللہ مینگل، سردار خیربخش مری، شہید نواب اکبر خان بگٹی، میر گل خان نصیرءُُ جنرل شیرو مروءَ داتگ ات، اشاں ہم پارلیمنٹ شر چکاستگ، بلے بے سوب بیتگ انت، گُڑا پارلیمنٹ اش لگت جتگ۔ اے تئی پارلیمنٹ، ووٹ، الیکشن ءُُ سلیکشن بلوچ راجءِ گلام دارگ ءِ مستریں سبب انت۔ ہمے واستا عزت دار ءُُ غیرت مندیں بلوچ تئی اے پارلیمنٹءَ تُک جننت۔ پاکستانءَ جمہوریت مزاقے، جمہوریت نیست، ہرچی کہ ہمے زورگیرءِ لِٹکیں فوج لوٹیت ہما بیت۔ ترا تئی پارلیمنٹ مراد بات، بلوچءَ وتی رہبند گچین کتگ ’’وطن یا کفن‘‘
واجہ حاصل خان انچو کہ من گوں وتی سرحالءَ اے درور دات کہ پاکستانءِ پارلیمنٹءُُ گْوادرءِ نہادیگءَ ہچ پرک نیست۔ گُڈسرا من گوں وتی اے شعرءَ وتی نبشتانکءَ آسر کناں:

غدارءِ مَرگ

ترا مبارک بات اے وفاداری
مال ءُُ مڈی ءُُ ٹیکی سرکاری
ہیرا منڈیءِ فوجءِ دلاری
مئے شہیدانی ہونءِ واپاری
ہیروئین فْروشاں گوں شریداری
جعفرءِ نام تو نوک کتگ پاری
صادقءِ بیل ءُُ باجوءِ یاری
رازق ءُُ بنگانانی ہمکاری
لینگاٹءِ دابیں مکر ءُُ ریپکاری
تاں جہان است ترا راج ڈوباری
تئی پُشپد ءُُ پدریچانی شرمساری
ترا مبارک بات راجءِ دلاری
ہوناں فداءِ تو کُرتگ غداری
شیریں حمیدءَ ماں پاہوءِ دارءَ
چک اِت ءِے پاہو پہ ننگءِ پاسداری
من گوں مینازءِ شیریں ایوبءَ
دیستگ تئی کولانی وفاداری
ترا مبارک بات اے جماداری
ہونءِ سوداگر ووٹءِ بَئے پاری
دولت ءُُ مال ءُُ گنجءِ مُنجاری
تئی شُتگ کرن ءُُ نوبت ءُُ باری
پاشک انت تئی کردار ءُُ حرابکاری
الم ترا دْروہیت منزلءَ ساری
اے وفاداری تئی سرءِ گاری
مرچی ما پِیشّءِ ماسگے بستگ
ماسگءَ شُومینءَ شرو داتگ
ماہ ہلاس انت ترا ہپتگاں داشتگ
چو کہ من گنداں بردستءِ ہڈّءَ
انچو وش گْوات ماہلیں گڈّءَ
انگتءَ وہد انت بیا سرءَ چڈّا
دَرکپ چہ مین ءُُ جوہڑ ءُُ چِڈّءَ
باراں مُہر بند ءُُ پیش بہ کپ لڈّءَ
ماں ہما تاہاپءُُ کپیں وڈّءَ
چو بْرتکگیں گوشتءَ دِیر بئے ہڈّءَ

تپاکی آجوئیءِ مانزمان انت
بلوچستان آجو بات

 Mar 21, 2018  میجرمجید

https://dailysangar.com/home/page/10119.html