شمالی عربستان ( اَلاَحـواز العربی ) ءِ مهلوک وت مستری ( استقلال ) لوٹنت
اَلاَحـوازالعربی که پیش ءَ عربستــان هم گوشگ بوتگ عربی ملک ایت ءُ نود سال انت پارسیاں آوارجتگ۰ اے کوهنیں ملک ءِ گُـڈی بادشـاه « شیخ خَـزعَـل » اَت که رضا میرپنچ ءَ گوں انگریزانی هم شوری سال ۱۹۲۵ عیسایی تهـران ءَ لوٹائینت۰ شیخ په پندلےءَ تهـران ءَ لوٹائینگ بوت۰ رضا میرپنچ ءُ انگریزان هـوری ءَ کامیاب بوتنت تاں آ مزن مرد ءَ ماں « مذاکـره » ءِ دام ءَ ماں تریننت۰ هنچوش که «شیخ خَـزعَـل» تهران ءَ سربوت اوداں ماں یک لوگے په زور دارگ بوت ءُ چه دگه نیمگے پارس ءِ رستریں لشـکر الاحـواز ءِ سرا ارُش بُرت۰ بازیں مردم اش کشتنت ءُ بیشمار دسگرکتنت ءُ آ ملک اِش آوار جت۰عربانی مزن نامیں «شیخ خزعل» ماں تهران ءَ شهیــد گنگ بوت
آوارجتگیں الاحواز بزاں شمالی عربستان ءِ مردم یکسد ءُ بیست لکّ (دوازده میلیون ) نپر انت۰ اے ایردستیں راج چه وتی راجی هکّاں زبهراَنت۰ گوں الاحواز ءِ گیس ءُ ٹیل ءِ پل ءُ پانچءَ پارسیاں وتی شهر ءُ میتگاں آباد کتگ ءُ په وتی پدریچاں آسراتیں زند اِش اڈ کتگ۰ بلئے عرب گوں بدیں زند جاوراں دیم په دیم انت۰
الاحــواز ءِ ٹیل ءُ گیس ءِ زر شپ ءُ روچ ماں تهران، اسپهان، یزد، کرمان، کاشان، مَشَد ءُ پارس ءِ آدگه شر ءُ میتگاں هرچ بیگ انت۰ بید چه الاحواز ءِ نپت ءُ گیس پارس ءِ مالی جاور گوں نیست ءَ برابر اِنت۰ نپت ءُ گیس وتی جاگه ءَ عربانی کئوران کارون، مارون، سیمره، کرخه، دِز، زهره ءُ اروندرودءِ آپ اشاں کم ءُ گیش هُشک کنائینتگ۰ کئورِ « کارون » ءِ آبریچ ماں زاگرُس ءِ کوهاں بندگ بوته ءُ دیم په اسپهان ءَ چَهر دیگ بوتگ ءُ دِزءُ کرخه ءُ آدگه کئورانی سرا گیش چه بیست ءُ هپـــت آپ بند اِش بستگ۰
گوں کئورانی هشینگ ءَ الاحواز ءِ کِشت ءُ کِشاراِش تباه کتگ ۰ ساپیں ورگی آپ نیست ءُ چه بازیں گوات ءُ لوڈاں هوا هنچو پر دنز ءُ پُلگ اِنت که مردماں په آسانی ءَ نپس کَش اِت هم نه کن انت۰همے سوب ءَ هیسک ءُ پُپّانی بیماری اوداں سک باز بوتگ۰
هنوں الاحــواز ءِ شزادیستگیں عرب پادآتکگ انت۰ آهانی لوٹ آجویی ءُ وت مستری اَنت۰ تهران ءُ یزدءُ اسپهان ءُ پارسءِ آدگه جاگهانی مردم سَیل چارگ انت یا که وتی تیر ءُ توپءُ پئوجی ءُ پاسدار ءُ بسیجی په پادآتکگیں عربانی کشت کوش ءَ دیم په عربستان ءِ عبادانءُ اهوازءِ شهر ءُ محمره ءُ آدگه شهراں راه دیگاینت۰
ایرانی لشـکر، بسیجی ءُ سپاهیگاں هر نیمـگ ءَ بیگناهیـں مردماں کشگ ءُ رستـری کنگاینت ءُ سئے آپریل، سئے شمبه ءِ اولی پاس ءَ بیست ءُ چارعرب ورنا اِش زندکا سوتکنت تاں پادآتکگیں عربانی جنز ءَ سریں پروش بکننت۰ ده عرب ورنا پیلوشتنت ءُ شهید بوتنتءُ چارده نپر ٹپی بوتنت۰ هما پارس که وت ءَ انکلابی ءُ دیمـروی پسند زاننت هم وتی چم بستـگ ءُ کَـرمَه گوشی کنگاینـت۰ بلئے دلجم اوں که ایران ءُ پارسیانی زورانسری ءُ برزدستیءِ تهاریں دؤر ءِ آهــری روچاں دور نهَنـــت هچ شکّے نیست که الاحوآزءِ عرب ءُ آدگه ایردستیــں گــڈســــراسوبیــن بنت ۰
هما روچ آیگ اَنت که پارسیاں دیم په یزدءِ پٹ ءُ پارس ءَ گَـلّینَگ بنت ءُ عرب، کورد، بلوچ، آزری تورک ءُ تورکمن آزات به بنت ءُ په وتی پَدا داشتگیـں ملکانی گِهبـــودی ءَ وَت پیسلــه ءُ کوشسـت بکننت۰
عربستان ءِ شهیداں سهریں سلام
آزات ءُ آباد بات عربستان (الاَحـوازالعربی)
محمد کریم بلوچ
آپریل ۲۰۱۸
http://baluchistan47.blogspot.co.uk/2018/04/blog-post_3.html
