شُد نادراہی ، بے لوگی ءُ جبر اے کل غلامی ءِ نشانی اَنت — شہید چیئرمین غلام محمد بلوچ

پسنی ءِ جلسہ ءِ گشتانک 

من بلوچ راج ءِ کلیں شھید ڈاڈائے بلوچ نواب اکبر خان شھید ، بالاچ شھید ءَ مامو شھید ، دلجان ءُ ڈاکٹر خالد شھید…. بلوچ قومی آزادی ءِ جھد ءِ تہ ءَ کلیں شہیدیں پسگاں سلام پیش کناں….
ءُ شمئے واجھانی گلانی منت ءَ گریں….اے شھر…..اے ڈگار….. اے دیار کہ پسنی گشگ بیت ادءِ کماش ادءِ ورنا ، ادءِ کواس،مزدور،ادءِ ماہیگیر، ادءِ سیاسی کارکن، دکاندار ءُ ٹرانسپورٹر….شمئے کلانی منت ءَ گریں کہ مرچی اے سیاہیں روچ کہ بلوچ راج ھمے روچ ءَ غلام کنگ بوتگ … انچش کہ سنگتاں گشت کہ 27مارچ 1948ء ءَ بلوچستان یک آزادیں ملکے دنیا نقشہ ءَ بوتگ ءُ منگ بوتگ…. ھمے روچ بزاں 62سال پیش پاکستان ءَ پہ زور وتی فوجی طاقت ءِ زورءَ بلوچستانءِ آزادی…. بلوچ قوم ءِ وتواجھی چہ ما پل اِتگ ءُ مارا غلامی ءِ زند ءِ تہ ءَ دور داتگ۔ شما میر ھمل ءِ پدریچ ئے …اے نیل بومیں زرءِ واھندئے …اے زر…. اے دیار….اے ڈگار….اے وتن اے مِلک ءُ میراس … ایشی ءِ مڈی ءُ واجہ توئے …. بلے اے پر گنجیں سر ڈگار اللہ تعالیٰ ءَ مارا نعمت ءِ سورت ءَ داتگ اے پر گنجیں زمین ….اے زر ءِ گیس ءُ تیل ، سھر ءُ آسن چہ دولت ءَ پریں ڈگار ءِ کماش، پسگ، بچ، مات ءُ گھار، مزدور ماہیگیر کل شدیگ اَنت ، نادراہ اَنت بے لوگ اَنت …زلم ءُ جبر ءِ آماچ اَنت …اے کل غلامی ءِ داد اَنت…وھدے کہ قومے غلام بیت ھر چیز چہ آئی ءِ دست ءَ رؤت 

Apr 9, 2018, 5:24 pm

پسنی ءِ جلسہ ءِ گشتانک 
من بلوچ راج ءِ کلیں شھید ڈاڈائے بلوچ نواب اکبر خان شھید ، بالاچ شھید ءَ مامو شھید ، دلجان ءُ ڈاکٹر خالد شھید…. بلوچ قومی آزادی ءِ جھد ءِ تہ ءَ کلیں شہیدیں پسگاں سلام پیش کناں….
ءُ شمئے واجھانی گلانی منت ءَ گریں….اے شھر…..اے ڈگار….. اے دیار کہ پسنی گشگ بیت ادءِ کماش ادءِ ورنا ، ادءِ کواس،مزدور،ادءِ ماہیگیر، ادءِ سیاسی کارکن، دکاندار ءُ ٹرانسپورٹر….شمئے کلانی منت ءَ گریں کہ مرچی اے سیاہیں روچ کہ بلوچ راج ھمے روچ ءَ غلام کنگ بوتگ … انچش کہ سنگتاں گشت کہ 27مارچ 1948ء ءَ بلوچستان یک آزادیں ملکے دنیا نقشہ ءَ بوتگ ءُ منگ بوتگ…. ھمے روچ بزاں 62سال پیش پاکستان ءَ پہ زور وتی فوجی طاقت ءِ زورءَ بلوچستانءِ آزادی…. بلوچ قوم ءِ وتواجھی چہ ما پل اِتگ ءُ مارا غلامی ءِ زند ءِ تہ ءَ دور داتگ۔ شما میر ھمل ءِ پدریچ ئے …اے نیل بومیں زرءِ واھندئے …اے زر…. اے دیار….اے ڈگار….اے وتن اے مِلک ءُ میراس … ایشی ءِ مڈی ءُ واجہ توئے …. بلے اے پر گنجیں سر ڈگار اللہ تعالیٰ ءَ مارا نعمت ءِ سورت ءَ داتگ اے پر گنجیں زمین ….اے زر ءِ گیس ءُ تیل ، سھر ءُ آسن چہ دولت ءَ پریں ڈگار ءِ کماش، پسگ، بچ، مات ءُ گھار، مزدور ماہیگیر کل شدیگ اَنت ، نادراہ اَنت بے لوگ اَنت …زلم ءُ جبر ءِ آماچ اَنت …اے کل غلامی ءِ داد اَنت…وھدے کہ قومے غلام بیت ھر چیز چہ آئی ءِ دست ءَ رؤت …آئی ءِ عزت رؤت ، آئی ءِ شادہی رواَنت…آئی ءِ دپ ءِ دپار ءُ چکانی، پوشاک چرائی ءَ پچ گرگ بنت ۔ آئی ءِ لج ءُ ننگ ءِ ھم پرواہ کنگ نہ بیت۔
غیرت مندیں بلوچاں!
بلوچ ءَ ھر وھد ءَ پہ وتی لج ءَ، وتی ننگ ءَ ،پہ وتی ھک ءَ ،پہ مزّ ءَ …وتی سر داتگ…ھنچش کہ ھمل ءَ گوں پرنگاں جنگ دات …وتی ڈگار ءِ سرءَ پرنگانی نشان نہ اِشت…ھمے رنگ ءَ انگریز ءَ بلوچ ءَ گوں جنگ کت مرچی انگریز بلوچ ءِ زمین ءِ سرءَ نہ اِنت… ھمے رنگ ءَ بلوچ عرب ءُ آئی ءِ قبضہ گیر یءِ دیم ءَ اوشتات ھمے رنگ ءَ ترک قبضہ گیری ءِ دیم ءَ اوشتات ، فارس ءِ قبضہ گیری ءِ دیم ءَ اوشتاتگ آھاں مقابلہ کتگ۔ یک دریایے، یک زمینے، یک زرے ،یک پرگنجیں سر ڈگار ءِ واھند مارا کتگ۔ حیف اِنت کہ مئے دست ءَ ھمے ڈگار ، ھمے ماتیں وتن پلگ بوتگ یک بھرے ایران ءَ یکے اوگانستان ءَ یکے انگریز ءِ بنگی پنجابی ءَ چہ ما برتگ ۔
منی واجھاں ! من اے کچ ءُ کساس ءَ نیاں کہ شمارا سرپدی بہ دیاں اے شھر ءِ مردم دانائیں مردم اَنت ادءَ شائر ادیب زانتکار است ۔ سیاسی مردم ءُ وانندہ است کماش کہ وتی کْوھنیں سیبیاں سرپد اَنت، وتی کوھنیں زندءَ سرپد اَنت بلوچ ءِ دود ربیدگ لجءَ زاننت ۔تھنا ھمے گشیں کہ اے مئے زمینءَ ….اے واجھی ءَ چہ زبھریں ….اے بلاھیں بلوچ راج کہ اے زمین ءِ سرءَ نشتگ آ چہ وتی زِردءِ ھک ءَ زبھر اِنت…. آ بے عملی اِنت…. آ بے حسی اِنت، عمل، جدءُ جھد…. انسان وتی برورد چہ وتی جھد ءُ محنت ءَ رسیت۔پہ نندگ ءُ چارگ ءَ اللہ تعالیٰ کس ءَ نہ دنت۔ اللہ تعالیٰ گشیت کہ حرکت بہ کن من ترا برکت دیاںھمے غلامی ءِ خلاف ءَ بلوچ قومی جدءُ جھد کہ62 سال اِنت کہ جاری اِنت۔ 8ءُ 9 سال اِنت کہ آ نوکیں رنگے ءَ ، نوکیں دْروشمے ءَ یک زرمبشتے کہ آئیءَ نہ بلوچستان بلکیں جھان سرءَ زرتگ ءُ بلوچ اش چو زندگیں راجے وڑءَ دنیا ءِ دیم ءَ آؤرتگ کہ بلوچ پہ وتی آزادی ءِ دزگرگ ءِ ھاترءَ جدءُ جھد کنگ ءَ اِنت چہ بلوچ ڈگار ءَ پنجابی لشکر ءِ کشگ پنجابی ءِ قبضہ ءِ ھلاس کنگ ءُ بلوچستان ءِ آزاد کنگ ءِ ھاترءَ اے جدءُ جھد بنگیج بوتگ ۔اے مھلوک کہ وتی سرانی دیمونی ءُ قربانی ءَ دیگ ءَ اِنت۔ نواب اکبر خان ،بالاچ مری گوں وتی سنگتاں آھاں پرچا وتی ساہ دوست نہ داشت؟ ما پرچا ترس ءِ آماچیں؟ ھنچش کہ ساحرؔ گشیت،
کئی بیم ءَ ترا اے زندگانی ءَ کتگ در گور
شیخ یاسین فلسطین ءِ معذوریں لیڈرے بیتگ آ گشیت کہ
اَے فلسطینیاں! شما چہ اے مرگ ءَ کہ ترس اِت عزرائیل ءُ یہودی ءِ زلم ءُ آئی ءِ کشت کوش ءَ ترس ات بلے من ءَ گوں ھمے مرگءَ دوستی ءُ یاری اِنت منی سنگتی گوں ھمے مرگءَ اِنت ھمے مرگ ءَ گوں مئے آکبت وابستہ اِنت ،ھمے پیم ءَ مئے سروکاں ، مئے راہ دربراں گوں وتی قربانیاں وتی سرانی دیگ ءَ مارا شمارا ڈس ءُ نشان داتگ اے راہ پیش داشتگ کہ قربانی ءَ ابید ھچ نہ رسیت ، قربانی بہ دئے جھد ءِ میدان ءَ دربیا ءُ وتی واجھی ءَ ،وتی واھندی ءَ ،وتی وشی ءَ ،وتی آزادی ءَ دزبہ گر ءُ درءِ غلامی چہ وتءَ در بہ کن۔درآمد ءِ زلم ءَ برداشت مہ کن، مہ سگّ آئی ءَ ، آئی ءِ خلاف ءَ در بیا، آئیءِ مقابلہ ءَ دربیا ۔بلوچ سرمچاراں ھمے ھمت ، ھمے جرات بلوچ راج ءَ بلوچ بچ ءَ ، بلوچ مات ءُ گھارانی تہ ءَ بلوچ کماشانی تہ ءَ پیدا کتگ کہ مرچی شما ھمے اشکن اِت کہ پاکستانی ٹارچر سیلانی تہ ءَ چک ھست، ورناھم ھست اَنت گھار است اَنت ، مات ھم است اَنت کئے ءَ کئے رکین ئے ، تو چوں وت ءَ رکین ئے ؟ھمے پسنی شھر ءِ تہ ءَ بازیں بچّاں ھمے کیس ءُ مقدمھاں ، جیل ءُ کید کاٹ اتگنت، ھمے تکلیفی سگّ اِتگنت، ھمے وتن ءِ ھاترءَ پہ وتی ننگ ءِ ھاترءَ پہ وتی قومی آزادی ءِ ھاترءَ، زانتکار ءُ کواس ، شاعر ءُ ادیب، قوم ءِ چم بنت،وھدے کہ چم کور بیت گڑا رھشونی ءِ واب ءَ گڈ دروگیں ھبرے بیت…ادءَ مبارک قاضی کہ پہ یک شعر ے ءَ راج ءِ نازینگ ءَ ، راج ءِ ساڑا، زلم ءُ جبر ءِ خلاف ءَ وتی قلم ءَ کاربند ایت تہ آئیءَ گرگ دزگیر کننت۔ بلے گوں دلیری ءَ کید ءُ بندانی روچاں گْوازین ایت آ تئی شھرءِ بچّ اِنت ۔ھرچے تو سرپد بئے بلے آئی ءِ لائقی ، آئی ءِ دانائی آئیءِ محبت ،آئیءِ دوستی ، آئی ءِ عشق گوں وتی وتن ءَ ، گوں وتی راج ءَ پدر اِنت زاھر اِنت کہ آئی ءَ ھرکس مرچی من ایت ھمے رنگ ءَ ھر شائر ،ھر ادیب، ھر زانتکار ،ھر کواس ءِ سرءَ فرض اِنت قوم ءِ غلامی خلاف ءَ اے جنگ ءَ، اے جھدے کہ بوگءَ اِنت آزادی ءِ واست ءَ اے جھد ءِ تہ ءَ بیائے شریدار ببئے۔
پادا ئے !!! پادائے!!!
پادائے راج ءِ چم جوڑ بہ بئیت اے راجءِ میتگ ءُ ھلک ءُ بازارءِ رھشونی ءَ کن اِت وتی مات ءُ گھار ،کماش ءُ ورناھاں شریں سکین دئیت تاکہ ما وتی آزادی ءِ منزل ءَ سربہ بئیں جنگ وتی آسری سیمسراں سر بوتگ بلوچ دیم پہ آزادی ءِ منزل ءَ سر بوگءَ اِنت ما پر امیتیں پاکستان ءِ زلم ، جبر ءُ چہ آئی ءِ طاقت ءَ دلپروش نہ بئیں بیم ءُ ترس ءِ شکار نہ بئیں اللہ ءِ زات ءِ سرءَ مارا یقین انت اے ماتیں وطن ءَ اے زمین ءَ کہ ما ترّیں،گردیں، وریں وتی ماتانی شیر اِنت کہ مارا میچینگءُ رودینگ ءَ اِنت آئی ءِ سرءَ مارا یقین اِنت شھیدانی ھونانی سرءَ مارا یقین اِنت ما وتی آزدی ءِ منزل ءَ سر بیگ ءَ ئیں۔ انچشکہ سنگتاں گشت کہ مرچی اقوام متحدہ یا جنیو اکنونشن عھدہ دار یا امریکہ ھم اے ھبر ءَ مجبور بوتگ کہ آ بلوچ ءِ توار ءَ گوش بہ داریت اے بلوچ ءِ زور ءَ بلوچ ءِ جھد ءَ بلوچ جنگ ءَ آھانی دلگوش اینگو ترینتگ ھمے واستہ اے وھد ءَ اے موقع ءَ فائدہ چست کنگی اِنت پنجابی ءِ ریپگ آئی ءِ اسمبلی ، آئی ءِ مراعات ، آئی ءِ لالچ، آئی ءِ ووٹ اے سازش ءِ شکارمہ بئیں آ کسے کہ پاکستان ءِ صوبائیت، پنجابی ءِ راج قبول کتگ ، پنجابی ءِ واجھی ءَ قبول کنگ ءِ بنیاد ءَ آ بلوچءَ یک رندے پد ءَ غلام دارگ لوٹ اَنت آھاں پجّہ بیاراِت ۔ ھمایانی رندگیری ءَ بہ کنیں کہ وتی سرءِ دست ءِ دلءَ ایر کتگ کتہ تئی آزادی ءِ ھاترءَ جدءُ جھد کنگ ءَ اَنت۔ مرچی زرداری بہ بیت یا ھر کس آ بلوچ ءَ ریپینت نہ کنت، آ بلوچ ءَ ھچ دات نہ کنت بلوچ ءِ درد ءِ ، بلوچ ءِ نادراھی ءِ علاج بلوچ ءِ آزادی اِنت۔ مرچی آزادی ءِ جھد ءَ دیم ءَ برگ ءَ اِنت مرچی براھندگ ھم مئے جنگ ءِ پڑ ءَ اوشتاتگ ، اللہ نزر اوشتاتگ، میر عبدالنبی بنگلزئی اوشتاتگ، بلوچ نیشنل فرنٹ ءِ سنگت اوشتاتگ اَنت با با خیربخش مری ءِ رھشونی آئی ءِ جھد دیم پہ وتی منزل ءَ رھادگ اِنت۔شما بے رھدربر نہ اِت ، بے رھشون نہ اِت ، اے ھبر غلط اِنت بلوچ ءَ قیادت نیست ، بلوچ ءَ رھدربر نیست یک نیمگے کمبر اِنت ،یک نیمگے نبی اِنت ، یک نمگے براھندگ اِنت، یک نیمگے اللہ نزر اِنت، حیربیار اِنت۔ اے گل ءِ جھد ءِ رھدربر اَنت اے آزادی ءِ جھد ءِ سروک اَنت بلوچ قوم ءِ رھنما اَنت کہ عملی میدان ءَ عملی جدءُ جھد ءَ گوں شمئے پانک ءَ جنئگ ءَ اَنت کوہ ءُ گرانی تہ ءَ کپتگ اَنت ھمے کید ءُ بندانی تہ ءَ کپتگ اَنت ھمے کہ وتی دیدگانی قربانی دیگ ءَ اَنت، ھمے شمئے رھشون اَنت چرے ٹگان چرے کوراں چرے دزاں کہ پنجابی ءِ دربار ءَ چو پنڈوک ءَ اوشتاتگ اَنت ءُ محتاج اَنت پہ پنجابی ءِ دان ءُ دژے ءَ ایشانی چہ وت ءَ پھریز اِت آ قوم پرستی نام ءِ سرءَ غلامی ءَ منگ ءَ اَنت پنجابی ءِ واجھی ءَ منگ ءَ اَنت ۔ھر بلوچے کہ بلوچ وتن ءِ آزادی ءِ دشمن بیت آ قوم فروش گشگ بیت ،آ قوم فروش قوم ءِ غداراں کس نہ بکشیت ۔آ چونیں سرے بہ بیت آ ھر کس بہ بیت من گشگ لوٹاں ھما مردم کہ شما گند اِت کہ پنجاب ءَ وھدے کہ نواز شریف ءَ پنجابی پولیس سپاھیگ وتی بیلٹ ءَ وتی کلاہ ءَ دست ءَ دنت کہ من پنجابی ءَ نہ جناں ۔ بلوچ پولیس کہ آ سرکارءِ رد ءَ موجود اِنت وتی چم پچ کنگی اِنت۔ آ سرپد بہ بیت …. بلوچیءَ گش اَنت کہ کونڈانی جاگہ دل ءِ سرءَ اِنت ھرکسی لوگ ءُ ھر کسی زندگی گوں بلوچستان ءَ اِنت بلوچ راج ءَ اِنت گوں پنجابی ءَ نہ اِنت۔عالم دین گشنت کہ کشمیر ءُ اوگانستان ءِ جھاد ءَ تئی درد ءِ درمان گون نہ اِنت تئی سرءَ فرض اِنت کہ تو بلوچستان ءَ جھاد بہ کن۔ بلوچ قومی آزادی ءِ جھد ءَ ھمراہ بہ بو۔مئے عالم دین آئی ءِ تہ ءَ یک مارشتے یک زانتے پیدا بیتگ، آ محسوس کنگ ءَ اِنت آئی ءِ بقا ء سلامتی ، آئی ءِ وجود ، آئی ءِ مستقبل آئی ءِ چکانی آئی جند ءِ گوں بلوچ قومی رشتہ ، بلوچ قومی آزادی ءِ جدءُ جھد ءَ گوں ھمکاری ءِ رنگ ءَ بیت کنت ۔ اے واست ءَ مارا شمارا کلاں گوں دراھیں واجھاں اے گشیں کہ بلوچ قوم نازانت نہ اِنت، بلوچ قوم زانتکار ءُ سرپد اِنت صرف عمل ھمت لوٹیت ۔دربیا اِت چرے بیم ءَ ،چرے ترس ءَ ، یکے مئے مات ءُ گھارانی دست ءَ بہ گپت ببارت ھمے پنجابی ءُ آئی ءِ فوج آئی کوست گارڈ ، آئی ءِ رسترءُ ناھاریں لشکر ءَ ما بہ ترسیں کہ بل ءِے مئے مات ءُ گھاراں بارت ھنچش شما گندئے چہ اے ترقی ءَ شماراھمالی ھم نہ رس ایت، مزدوری نہ رس ایت اے وتن ءِ واجھی ءَ اے وتن ءِ آزادی ءِ ھر چیز ءِ واجہ شما بئیت ۔شمئے زندگی، اے بدحالی ، اے شد ءُ بزگی اے پیمءَ نہ بیت، وتی ڈگار ءَ وتی زمین ، وتی لوگ ءُ ھنکین ءِ تہ ءَ وشھال بئیت ءُ اے سیاہ ءُ بزیں روچ ءِ خلاف ءَ جنگ قومی آزادی ءِ جنگ اِنت ، قومی آزادی ءِ جنگ ءِ تہ ءَ شریدار بہ بئیت۔ بیااِت ھواری ءَ اے جھد ءَ دیم ءَ بریں۔ مرچی اقوام متحدہ یا جینیوا ءِ گدار گوں بلوچ گپ ءُ ترانءَ پہ وتی وشی ءَ بہ گندئے کنگ ءَ نہ اَنت۔ بلوچ زور ءَ مجبور بوتگ ! ءُ اے قیادت ما آھانی ذکر کتگ آ شمئے آزادی ءِ حاصل کنگ ءَ ابید دگہ ھچ اش قبول نہ اِنت ۔ پاکستان 62سال ءِ تاوان ءََ بلوچ ءَ بہ دنت بلوچ راج ءِ آزادی ءَ دنیا تسلیم بہ کنت ءُ پنجابی ءُ آئی ءِ لشکر چہ بلوچستان ءَ دربئیت فیصلہ ھمے بنیاد ءَ بیت ۔ھچ جمھوریت، ھچ پارلیمنٹ ، ھچ مراعاتءُ رائلٹی بلوچ ءِ درد ءِ دوا نہ اِنت ما شما اے عھد بہ کنیں اے سوگند ءَ ھر رند ءَ ما شما وارتگ مرچی ھمے عھد ءَ بکنیں سوگند ءَ بہ وریں بلوچ قول ءُ زبان بہ دئیں کہ قومی آزادی ءِ جنگ ءَ قومی آزادی ءِ ھاترءَ بلوچ سرمچاراں، قومی آزادی ءِ تحریک ءَ گوں ما ھم ھواریں،ھم گامیں، ھم کوپگیں ، ھم فکریں ۔
***

https://dailysangar.com/home/page/10457.html