بالاچ قادر
گوستگیں روچءَ سیداکیڈمیءِ نیمگءَ چہ ماں آر سی ڈی کونسل ہالءَ سیدظہورشاہ ہاشمیءِ سالروچ دارگ بوگءَ اَت،داتگیں وھدءِ پدا من سربوتاں تہ ہال ھورک اَت……. من چہ لوگءَ درآہگءِ وھدءَ ھمے جیڑاتگ اَت کہ مروچی ہالءَ نندگءَ ھم جاگہ نہ بیت پرچہ کہ سیدءِ بوتن روچ اِنت بلئے اے وڑ نہ اَت………….!!
چہ درءَ آہتگیں مھمان اسٹیجءِ سرا نادینگ بیتاں ءُ دیوان بندات بیت،ہالءِ دپءَ پہ مردمانی وش اتکءَ اوشتاتگیں سید اکیڈمیِ کارگشاد قدوس قاسم ھوں یکیم بیت ءُ نشت……………..
من ہالءِ کُچےءَ نشتگءُ جیڑگءَ اِتاں پہ ھماھاں کہ اسٹیفنءِ مرگءَ وتی پروفائلءَ مٹ کن اَنت،آصمہ جہانگیرءِ بیرانیءَ پدردیگ بنت…… پہ ھماھاں کہ غالب،فیض،جالبءُ اقبالءِ شعراش پہ دل یات اَنت بلئے سیدءِ بوتن روچءِ مراگشءَ درا نہ بُوت اَنت!!
اسٹیجءَ چم کپت اَنت تہ اکیڈمیءِ سروک واجہ علی عیسیٰءِ جند ھمودا اَت بلئے چمے ہالءِ گیٹءَ کشتگءُ لھتے مردمءِ ودارءَ مھتل اِتاں………..ھماھانی ودارءَ کہ آھانی واستہ کرسی ھالیگ اِت اَنت…….ھماھانی ودارءَ کہ سیدءِ بوتن روچءِ مراگشءَ سر نہ بیتگ اِت اَنتءُ ھماھانی ودارءَ کہ زبان،زمینءُ پجارءِ گپءَ جن اَنت!!
علیٰ عیسیٰ ءِ وداریگیں چم انچو پہ دروازگاں سک اتاں گش ئے زاناں یکےءَ آیگءِ کرار کُتگ اَت.
واجہ منیر بادینی تران ءِ وھدءَ ھمے گلگءَ کنگءَ اَت “من چہ نوشکیءَ اتکگوں پہ سیدءِ ھاترءَ بلئے سیدءِ جندءِ ھمساھگیں مردم گاراَنت”
من پشل پشلءَ وتی پشتءَ کُرسیانی نیمگءَ چم شانک دات اَنت تہ بس چندے ھسابی مردم نشتگ اَت……………………..ءُ کرسیانی لُنٹ ھم گیلوسگی اِتاں!!
اسٹیجءِ سرا نشتگیں مھمانانی پُشتءَ لچتگیں سیدہاشمیءِ اکس پورا گپ جنگءُ اَنچو گشگءَ اَت کہ.
“وشیاں نوش کناں سکیاں پادار نہ بنت”
“بیلءُ دز برادرءُھمراہ گوں کسءَ یار نہ بنت”
ھمے وڑ بلوچیءِ مزن نام،زبان پہاز ءُ کواسیں بامرد سیدظہورشاہ ہاشمیءِ بوتن روچءِ مراگش گوں ھورکیں ہالءُ بے مردُمیں کُرسیاں آسر بوت!!
درآہاگءِ وھدءَ پدا منی چم پہ سیدءِ اَکسءَ کپت اَنت کہ گوں من گپ جنگءَ اَت ءُ اچ من لھتیں جُستانی پسوے لوٹ اِت!
“ھدا مہ کنت مئے شہرءِ دُرستیں مردم دریاءَ بُرتگ اَنت،اگاں پہ دگہ ھلکےءَ لڈاتگ اِش…………یا کہ نوک جوڑ بیتگیں شہرءِ جیڑہاں گوں سرءُچیریءِ سببءَ اتک اِش نہ کُت……………. اشکنگءَ دوشیگیں شپءَ چہ مردماں وتی پروفائل مٹ کتگ اَنت وتی پیسبک والءِ سرءَ منی شعر نبشتگ اش کتگ انت گُڑا ھمے مردم کجا آں………………………”
جستانی بندات بیتگیں لڑانگت ھلاس نہ بوتگ اَت کہ من پسو دئیگءَ ساری رھادگ بوتاں!
پدا سرجمیں راہءَ ھمے جیڑانءَ گسءَ اتکاں کہ اے شہرءَ وَ شپانی پاسءَ وٹس اپ گروپانی تہا لبزانک،ادب،بلوچی لبزانکءِ دیمروئیءُ دگہ ھمے وڑیں سرھالانی سرءَ گپ جنگ بیت بلئے ھمائیءَjھمائیءَ کہ بلوچی زبان،لبزانکءُنبشتہ رھبندءِ ھاترءَ زندے ببا دات،آئیءِ یاتگیری مراگشءِ نشتگیں بس چار مردم اِتاں….!
