انساندوستیں بلوچانی کمک کاری ءُ بلوچ دژمنیں سپاہ ءِ تکانسری
بلوچستان ءِ هما مردم که کم دزرس ءُ بے وس اَنت هنوگیں گژن ءُ واری ءِ “سونامی” ءَ سکّ بدھال ءُ بے واڑ کتگ انت۰ گژن ءُ واری ءِ سونامی یک اناگتیں گپے نھنت، اے بھرے چہ رستریں ایرانی واکدارانی بلوچ دژمنیں سیاسی پندل اِنت کہ بلوچاں وار، ایردست ءُ چمدار بداریت۰
ایرانی زورگریں واکداراں بلوچستان ءَ وتی لدیگی لشکر ( سپاه ) ءِ دستا داتگ بزان مئی آوارجتگیں ملک ءِ هاکم هنوں “حسین معروفی” نامیں رسترایت! آ ھونوار ءُ تگارلاپیں ڈنّی سپاہ ءِ مستر انت ءُ چه کرمان ءِ شهرِ بابک ، بلوچستان ءَ آرگ بوتہ تاں بلوچ دژمنیں ایرانی واکداراں زوتّر پہ وتی شومیں مکسداں بہ رسینیت۰ بلوچانی کشت کوش ءُ ڈیہ راجی مال ءُ مَڈی یانی پل ءُ پانچ رستریں حسینمانروپی ( معروفی ) ءِ ھُکم اَنت
لدیگی سپاہ گوں ناشریں مانروپی ( معروفی ) ءِ سروکی ءَ بلوچستان ءِ کارباری جاوراں باز ھراب کتہ ءُ بلوچانی زند جاوران اِش سک نگیگ کرتگ اَنت۰ ملک ءِ ھزاراں ورنا کار نیست ءُ گیش چہ یک لکّ بلوچ کودک چہ وانگ ءُ نبیسگ ءِ یاتگیری ءَ زبھر انت۰ وانگجاھاں گوں جاھلیں زابلی مدیر ءُ کینگی استاد بے استاندارد ءُ پہ بلوچ نودربراں شزاجاہ انت۰
سدانی سد بے وسیں مردم ماں پُر گنجیں بلوچستان شُد کَشگ انت ءُ اے لاچاریں مردم کہ سکّ دس تنگ انت گوں نیکوکاریں مردمانی کمک ءُ مَدتاںءَ وتی زند گوازینگاینت۰ ڈیہ ءِ باز جاگھاں انساندوستیں بلوچ کمککار ھمے مھتاجیں مردم ءُ گریبیں نودربران ھیالداری ءُ گَوَرکنگاینت۰ بلئے ناشریں ھاکم بزاں معروفی گوں ڈنّی یانی لشکر ( سپاه ) چہ بلوچانی ھشرکاری ءُ ڈیہ ءِ گریباں گَوَر کنگ ءَ ناراز ءُ تکانسراَنت۰
آ لوٹنت بلوچانی انساندوستی ءُ کمککاری ءَ کنترول بکننت! ھال رستگ کہ پارس ءِ لدیگی لشکر ءُ چاروگاں کمککاریں مردم جست پرس ءُ دِلسیاہ کنگاینت۰ پارس لشکرءُ ڈنّی یانی مکسد ایش انت کہ کمککاریں بلوچ ملک ءِ گریبانی کمک کنگ ءِ جاگہ ءَ کچکول ءَ بزورنت ءُ پہ ھکومتی پنڈوکی ادارہ یاں بہ پِنڈاَنت۰
محمــد کریــم بلــوچ
جون ۲۰۱۸
http://baluchistan47.blogspot.com/2018/06/blog-post_11.html
