بلوچ دمات گُھارانی اِزّت ءُ ننگ ءِ سرا دُژمن ءِ دست دراجی، ندکار: میر شھسوار بلوچ
پیر 2 جولائی, 2018
‘ بلوچ دمات گُھارانی اِزّت ءُ ننگ ءِ سرا دُژمن ءِ دست دراجی، ندکار: میر شھسوار بلوچ
ھمگام:بلوچی نبشتانک
بیت کِہ مَردُم ءُ دَلوَت ءُ رَستَر بَرابَر ءُ دَروَر بِہ بَنت؟
مَردُم ءَ اَپسوٗز ءُ اَرمانِ بیت کہ مَروچی بَلوٗچ ھَما بی ننگی ءِ سیِمسَر ءَ آرَگ ءُ رسینَگ بوُتَگ اَنت کہ بلوٗچستان ءَ پَھرَہ ءِ دابیں کسانیں شَھرے ءِ توٗک ءَ گیش چَہ ۴۱ بَلوٗچیں دُتَّگ ءُ مات ءُ گُھارانی نَنگ ءُ ازّت ءِ سر ءَ دُژمِن گوں گَجَری گُد ءُ موٗٹَل ءُ تُپَنگاں دست دْراجی کَنَ اَنت ءُ ھِچ کَس زُگ پَہ زُبانِ نَہ کَنت!
کُجا اَنت شامپِنڈیں جَھگیر “نمایندہ” ءُ دراج ریش ءُ مَزں زِڈّیں نیکمَرد “مُلّا” ءُ گَجَرانی داشتَہ؟
پَرچا کَرّ ءُ کوٗر ءُ گُنگ ءُ سیَاه چُپت اَنت؟
پَرچا وَتی نَنگ ءُ گَیرَت ءُ مات ءُ گُھارانی دیمپان ءُ پَھریزوٗکِ نَہ بَنت؟
پَہ شام پِنڈی ءَ سرَپِ بَند اَنت ءُ چَہ بے راھیں رَھبر ءُ چہ ویرانیں ایران ءُ چَہ یَکّوٗئی ءُ براتی ءُ بَرابَری ءَ گَپ کَن اَنت!
مَجوُس ءُ بے ناموُسیں “صَفَویانى” راجمَنّار ءَ پَہ “نظامِ مُقَدَّس” ءِ نام ءَ تَوارِ کَن اَنت!
“مُقَدَّسیں نِظام” ھَمش اِنت کِہ مَردُم ءِ جان ءُ مال ءُ گَیرَت ءِ سَر ءَ دَست دراجی بیت ءُ دَست دراج کَنوٗکاں کَس جُست کُرتِ نَہ کَنت کِہ مَردُمانی ھیا ءُ گیرَت ءِ سَر ءَ دَست دراج کَنوٗک سیرین ءُ ھَمے “مُقَدَّسیں نِظام” داشتَہ ءُ نَوکَر ءُ ھاسیں مَردُم اَنت؟!
جَنگَل کِہ جَنگَل اَنت ماں ھَما جَنگَلاں رَستَر ءُ جانوَراں پَہ وَت رَھبَند ءُ کانوُد ھَست ءُ ھِچ دَلوَت ءُ رَستَرے دومی ءُ دَریں دَلواتانی ھاڈی ءُ ھمراھانی سَر ءَ اُرُش نَہ کَنت ءُ بیِڈ نَہ بارت ءُ اگاں یَک گُستاھیں رَستَرے رَدے یے بِہ کَنت گُڈا اَلَّم ءَ آ رَد وارتَگیں دَلوَت تَلتَل جَنَگ ءُ تمّہ کَنَگِ بیت تاں دوٗبارَگ دِگے دَلوَت ءُ رَستَرے چُشیں رَدی مَہ کَنت!
“مُقَدَّسیں نِظام” ھَمش اِنت کِہ آئی داشتہ ءُ نَوکَر ءُ نَوکَرانی ھَرَمزادَگیں چُکّ گَیرَتمَند ءُ ھَیاداریں بَلوچانی پاکدامُن ءُ بے وَسیں جَنیں چُکّاں پَہ تیر ءُ تُپَنگ ءِ زوٗر ءَ گِر اَنت ءُ بَر اَنت ءُ آیانی اِزَّت ءِ سر ءَ دست دراجى كَن اَنت؟
لانَت پَہ چُشیں “نِظام ءُ نِظامدار” ءُ آئی مَنّوٗگِراں بِہ بات کِہ اوٗد ءَ مَردُمانی جان ءُ مال ءُ نَنگ ءُ ناموُساں جُست ءُ پَد مَہ بیت،،
اِے چوٗنیں “مُقَدَسیں نِظامے” کِہ اود ءَ بَدکار ءُ بے گَیرَتانی مُزَّمَّت کنوٗکانِ گِر اَنت ءُ بَندی جاھاں “زنداناں” بَندیگِ کَن اَنت؟
پَد ءَ ھَما اولی جُست دیم ءَ کَیت کَہ کُجَنت شام پِنڈ ءُ سَڈِتَگیں “نظام” ءِ بے شَرمیں جَھگیر ءُ ٹَگار لاپ ءُ جَبَّڈ ریشیں نیکمَرد ءُ بَھا بوُتَگیں “شیخ الإسلام” ؟!
پَرچا چُش بے ننگ بوُتَگ اَنت؟
پَرچا چُش بے دین ءُ بے مات ءُ گُھار بوُتَگ اَنت؟
اِے چِلّ ءُ پَنجاھیں ھالات ھَمش اَنت کِہ زانَگ ءُ گِندَگ ءُ سابِت بوُتَگ اَنت!
بلَےَ اَلَّم ءَ ھَزارانی ھِساب ءَ گیشتِر بے نَنگی بوُتَگ ءُ بوُئَگ ءَ اِنت ءُ مَردُم چَہ ھَمے “مُقَدَّسیںِ نِظام” ءِ بیم ءُ ترُسّ ءَ ھِچّ گوَشت ءُ نام گِپتِ نَہ بَنت!
مِلیوُن لانت پَہ چُشیں “نِظام” ءُ آئی مَنّوک ءُ دوٗستواھاں.
مَردُم ءَ اَرمان ءُ اَپسوٗزِ بیت کِہ چُشیں بَلاھیں جُرم ءُ ھَراب کاری ءُ بَدنامی بیت ءُ اَنگَت مےَ راج ءِ نام دوست ءُ مِنڈی چَمّیں جَھگیر ءُ لَھتے مَزَں مُزگ ءُ زَنڈ لاپیں نیکمَرد تَو گوَش ۓ زان آں کَرّ ءُ کوٗر ءُ گُنگ ءُ سیَاہ چُپت اَنت ءُ اَنگَت گوں بَلوٗچ راج ءُ بلوٗچِستان ءِ دُژمِناں بے شَرم ءَ بے شَرم ھَمراہ ءُ ھَمزان ءُ ھَمکاسَگ اَنت ءُ ھَمے پُرّ چَہ پَسات ءُ شِدَّت ءُ پِتنَھیں راجمَنّار ءَ ” مُقَدَّس ” گوَش اَنت!!
بیزار چَہ نَنگ ءُ گَیرَت ءِ پَھریزَگ ءُ دُژمِنانی دیم ءَ اوٗشتَگ ءُ آیانی دیم ءِ دارَگ ءَ ،
اَنگَّت مے راج ءُ ڈیھ ءِ دُژمِن ءُ بَدواھاں دِلبَڈّی دی اَنت ءُ گوَش اَنت کِہ شُما ھِچّ وَڈ ءَ پریشان مَہ بِت ءُ تاں ما ھَست ءُ سَلامَت اِیں ما اِے سَر کَش ءُ زُباں دراج ءُ “شَروُر ءُ ھَراب کار ءُ “مُقَدَّسیں نِظام” ءِ نَہ مَنّوکیں بَلوچاں کُنترول ءُ مَھارِ کَن اِین ءُ کار اِین ءُ شُمارا چانچ دین ءُ شُما آیاں پَہ وَتی وَڈ ءُ داب ءَ نیست ءُ نابوُد بِہ کَن اِت ءُ دِلجَم بِہ بِت کِہ ھِچ کَس شُمےَ نام ءَ پَہ زِبری گِپتِ نَہ کَنت!
اِے مےَ لَھتے نیکمَرد ء مےَ جَھگیر ءُ بے تائِپَہ ءُ بے ٹَکّ ءُ ٹَکَرَھیں سَر تائِپَہ ءُ بے شون ءُ بے سَریں شَوریٰ ءُ ڈَلُّک ءُ کاسَگ چَٹّیں بَسیجیانی کار ءُ کِردار اَنت!
بَلوچ راج ءُ بَلوٗچِستان ءَ مِلیونانی سال ءَ گیشِ بیت بَلےَ اَولا راج دَپتَر ءِ توٗک ءَ پَہ گَیرَتمند ءُ مَیار جَلّ ءُ ناندِہ ءُ دِلیر ءُ سَرمَچار ءُ بیر گیر ءِ نام ءَ یات کَنگ بوُتَگ ءُ گِندَگِ بیت!
بَلےَ چَہ روٗچے کِہ زوٗر گِپتیں بلوٗچِستان ءِ سَر ءَ اِے “مُقَدّسیں نِظام” آتکَگ ءُ پَہ زوٗر ھاکُم اِنت،،
روٗچ پَہ روٗچ پِتنَہ ءُ پَسات ءُ برات کُشی بے نَنگی جواں کَنان اِنت ءُ سَرین ءُ سَرپدین ءُ راج دوست ءُ ڈیھ دوٗستاں کُشان ءُ دَرانڈیھ کنان ءُ ماں بَندی جاھاں بَند کَنان اِنت ءُ نام دوست ءُ کاسَگ چَٹّ ءُ لاپ ءِ گُلاماں پَہ بَھا زوُران اِنت ءُ پَہ ھَمشانی نیموٗن ءَ پِتنَہ ءُ پَسات جواں کَنان ءُ بَلوٗچانی تپاکی ءَ چَہ بَین بَران اِنت ءُ اَنگت راج دوست ءُ ڈیھ دوٗست ءُ گَمواریں بَلوچاں شَروُر ءُ ھَراب کارِ گوَش اِیت!
پَیسَلَہ ءَ زانتکار ءُ سرپَدیں مَردُم ءُ بَلوٗچ راج بِہ کَن اَنت ءُ بِہ زان اَنت ءُ بِہ گِند اَنت ءُ بِہ گوَش اَنت کِہ “شَروُر ءُ ھَرابکارءُ پِتنَھکار” ھَمے شوُم ءُ ناشَریں زوٗر گیر ءُ بیگانَگ اَنت اَگاں بیگانَگانی نَہ مَنّوٗک ءُ ھاک ءُ ھَکّ ءِ واھُند؟!
ھَرچ بَلوٗچے کِہ گُلامی نَہ مَنّ اِیت ءُ بیگانَگانی ھِلاپ ءَ چِستِ بیت ءُ بَلوچ راج ءُ بَلوٗچِستان ءِ وَشھالی ءُ وَتواجھی ءِ گَپ ءَ جَنت،، آ پَہ بیگانَگ ءُ آیانی داشتَہ ءُ کاسَگ چَٹّانی چَمّاں شَروُر ءُ ھَراب کار اَنت ءُ دَوا اِش مَرگ اِنت!،
آ کِہ بیگانَگ اَنت ءُ پَہ زوٗر ماں بَلوچانی سَر ءَ ڈوُل اَنت ءُ بَلوچانی دود ءُ گُد ءُ زُبان اِش گاجیل ءُ زَوال کُرتَگ اَنت ءُ بَلوچِستان زِر ءُ دَشت ءُ کوٗہ ءُ آزمان ءِ ھَستی اِش گون اَنت ءُ سَرجَمیں گَنج ءُ ھَستیاں دُزّان ءُ وَران ءُ بَران اَنت ءُ ھَستیانی واھُنداں کُشان ءُ دَر پَہ دَر کَنان اَنت آ “مُقَدَّس ءُ عادِل” ءُ شَرّیں مَردُم اَنت!
اَگاں یکَّے پَہ ھّکّ ءِ لوٗٹَگ ءَ چِست بیت ءُ چار گَپِ کَنت بیگانَگ ءُ زوٗر گیر گوں ھَکّ ءُ هاك ءِ واجَہ ءُ لوٗٹوٗک ءَ گَپ ھَم نَہ کَن اَنت ءُ پَہ تیر ءُ تُپنگ ے ءِ جَوابِ دی اَنت!
ھّکّ ءُ ھاک ءِ واھند کِہ چَہ دَراں نادَرِ بیت ءُ ابید ءُ مَرگ ءُ دَرانڈیھی ءُ ماں بَندی جاہ ءِ سَڈَگ ءُ پوُنسَّگ ءَ دِگے ھِچ راہِ نَہ گِند اِیت ءُ چَہ ناچاری ءَ پَہ وَتی ھَکّ ءُ زوٗر گِپت ءُ لَگَتمالیں ھاک ءِ گِرَگ ءُ لوٗٹَگ ءَ جُنز اِیت!
گُڈا لَھتے بَھا بوُتَگین ءُ مَزَں مُزگ ءُ جَبَّڈ ریش ءُ ٹَگار لاپیں نیکمَرد ءُ شَیتان ءِ داشتَگیں “مُلّا” گوں لاپ ءِ گُلامیں جَھگیر ءُ ڈَلُّکاں پَہ میانجیگِری ءَ توٗک ءَ دَور کَن اَنت ءُ بَلوچاں گوں وَتی مَکر ءُ پَندَلاں پَہ الله ءُ اِسلام ءِ نام ءَ رَد ءُ دوٗکَھ دی اَنت کِہ ھِچ مَہ گوَش اِت ءُ ھِچ مَہ کَن اِت ءُ کار شَرّ اَنت ءُ ما گوں بیگانَگاں گپ جَتَگ ءُ شُمےَ ھَکّ شُمارا رَس اَنت!!
رَند ءَ کِہ چارۓ تاں بَھا بوُتَگیں نیکمَرد ءُ جَھگیر ءُ ڈَلُّک ءُ شام پِنڈ روٗچ پَہ روٗچ سیرتِر بوُان ءُ پَراڈو ءُ لانڈکروٗزاں سوار اَنت !
ھَو پَرچا مَہ بَنت؟
بیگانَگ اِش دوٗست دار اَنت ءُ تَنگ ءُ زَنگ اِش نَہ کَن اَنت!
پَرچا کِہ پَہ بیگانَگاں کار ءَ اَنت ءُ وَتی بَلوچ راج ءِ دَپ ءَ لَگام اَنت ءُ بَلوٗچاں رَد دی اَنت ءُ کَلاگ اِش بَند اَنت!
دُژمِن دُژمِن اَنت ءُ بَلوچ راج ءِ نیست ءُ نابوُد ءُ بَد نام ءُ بے ننگ کَنَگ ءِ رَند ءَ اَنت ءُ ما اِے چیزّ ءَ پَہ جوانی سَرپَد اِیں،
بَلےَ بَژن ءُ اَپسوٗز ءِ گَپ اِش اِنت کِہ مےَ جَھگیر ءُ ڈَلُّک ءُ شام پِنڈ ءُ لَھتے بَھا بوُتَگیں نیکمَرد ھَم گوں بلوچ راج ءُ بلوچِستان ءِ بَدواھاں ھاڈ اَنت ءُ پَہ دُژمِنانی اُمر ءِ دراج کَنَگ ءُ بالاد دَستی ءُ بَلوٗچانی گُلامی ءُ لَگَتمالی ءُ نیست ءُ نابوُدی ءَ کار ءَ اَنت!
بَلوٗچ راج کِہ چہ مازِندَران ءُ البُرز ءُ تُربَتِ جام ءَ ءُ تاں دِھلی ءَ ھاکُم بوُتَگ ءُ پَہ وتی گَیرَت ءِ ھاتِر ءَ مُرتَگ،
چَہ ھَمے نام دوٗست ءُ لاپ چارین ءُ ڈَلُّکانی سَوَب ءَ مَروچی بَلوٗچ بے ننگءُ بے دوٗد ءُ رُبیدَگانی گُلام اَنت ءُ وَتی مات ءُ گُھاراں ھَم پَھریز اِت نَہ کَن اَنت ءُ اَگاں چار مَڈادار ءُ سَرمَچاریں بَلوچ چِستِ بیت ءُ گَپے جَنت!
ھَمے شوُمروٗچیں نیکمَرد ءُ شَیتاں کِردیں “مُلّا” ءُ نام ءِ گُلامیں جَھگیر اِش دَپاں لَگامِ بَنت ءُ نَیل اَنت اِش ءُ پَد ءَ ڈَلُّک ءُ شام پِنڈ اِش گِرائین اَنت ءُ جَنائین اَنت ءُ پَہ بے بَزَّگی ءُ نا اِنساپی پاھو دیئَگ ءُ بے گواہ کَنَائین اَنت!
الله ءُ مَلائِکَت ءُ جِن ءُ اِنسانانی لانَت ماں ھَما کَسانی سَر ءَ بِہ بات کِہ گوں بَلوٗچ ءُ بَلوٗچِستان ءِ بَدواھاں ھوٗر ءُ ھَمراہ ءُ ھمکاسَگ ءُ ھَمپِگر ءُ ھَمدیوان اَنت،
ھَزار شاباش ءُ الله ءِ رَھمَت پَہ ھَما کَسانی سَر ءَ بِہ بات کِہ گوں بلوچانی دَرداں شَریدار اَنت ءُ پَہ بَلوچ ءُ بَلوٗچِستان ءِ وَشھالی ءُ وَتواکی ءِ ھاتِر ءَ جُھد ءَ اَنت ءُ جُھد اِش کُرتَگ ءُ جُھد کَن اَنت ءُ پَہ ھَما کَساں کِہ پَہ راج ءُ ڈیھ ءِ وَشھالی ءَ وَتی ھَیشی سَر اِش نَدر ءُ ھَیرات کُرتَگ ءُ باھینتَگ اَنت.
گوں بَلوٗچ راج ءِ گَیرَتمَند ءُ دِلیر ءُ راج دوٗست ءُ ڈیھ دوٗستیں بَچّ ءُ دُتَّگاں دَست بَندی اِنت کِہ دوٗبارَگ اِے مِنڈی چَمّیں جَھگیر ءُ دُژمِنانی ھَمکاسَگیں نیکمَرد ءُ اَرزاں کیمَتیں ڈَلُّکانی ھَبَراں مَہ زوُر اَنت ءُ ھِچّ اِش گوٗش مَہ دار اَنت،،
پَرچا کِہ اِے شوُمروٗچ دُژمِنانی داشتَہ اَنت ءُ پَہ دُژمِنانی پائِدَگ ءَ کار ءَ اَنت ءُ چَہ دُژمِناں دُژمِنتِر اَنت!
اگاں اِے شوُمروٗچ بَھا مَہ بوُتین اَنت بَلوٗچ ءُ بَلوٗچِستان ءِ ھال چُشِ نَہ بوُت اَنت!
مَروٗچی اگاں بَلوٗچی زُباں گاجیل اِنت سَوَب ھَمے موٗٹ اَنت!
اگاں بَلوچ وار ءُ بَزَّگ ءُ چمدار اِنت ءُ پَہ گیلِنے ٹیل ءُ پَہ کارتونے اَمب ءُ کیسَگے بِرِنج ءَ کُشَگ ءُ تیرانی آماچِ بیت سَوَب ھَمے چیر کَروٗد اَنت!
اگاں بَلوٗچی دوٗد ءُ رُبیدَگ چیرتَرّ اِتَگ اَنت ءُ بلوٗچ ءِ بَسّ نام پَشت کَپتَگ ءُ چَہ بَلوٗچی دوٗداں ھِچّ گِندَگِ نَہ بیت، اِے چیزّ ءِ سَوَب ھَم ھَمے ھُدا ءِ جَتَگین اَنت!
اگاں بَلوٗچِستان ءِ دِلبَند کَپّ کَنَگ ءُ سی سَری کَلّ ءُ چالَہ بُرّگ بوُتَگ ، سَوَب ھَمے بے شَرم اَنت!
اَگاں مَروچی ماں پَھرَہ ءَ ماں یَک ماھے ءِ توٗک ءَ گیش چَہ ۴۰ ھَیادار ءُ پاک دامُنیں مات ءُ گُھارانی اِزَّت ءِ سَر ءَ دَست دراجى ءُ بے اِزَّتى کَنَگ بوتَگ،، اِے ھَم چَہ ھَمے پاسِد ءُ بیگانَگ ءُ آیانی ڈَلُّک ءُ مَنّوکانی سَوَب ءُ بَرکَت ءَ اِنت!
بوُت کَنت کِہ پاک دامُنیں مات ءُ گُھارانی اِزَّت ءِ سَر ءَ دَست دراج کَنوُک بَلوچ اَنت ءُ بَلوچی گَپ کَن اَنت ءُ بلوچی پوشاک پوش اَنت!
بَلےَ اِشانی تَربیَت دیئوٗک ءُ ھَمے بے ننگی ءِ آروک ھَم ھَما بیگانَگ ءُ آیانی شام پِنڈیں جَھگیر ءُ نیکمَرد ءُ سَرجمیں ڈَلُّک ءُ مَنّوک اَنت!
بَلوٗچ ءَ بیگانَگ ءُ دُژمِنانی مات ءُ گُھار اِزَّت داتَگ اَنت ءُ پَہ بَدیں چَمّ اِش نَہ چارِتَگ اَنت!
بَلوٗچ بے ننگ مَزَن نہ بوُتَگ ، بَلوچ پَہ گَیرَت ءِ سَر ءَ مُرتگ!
بِہ چار اِت ءُ بِہ زان اِت ھُژّار بِہ بِت ءُ پَہ بیگانَگ ءُ بیگانَگانی ڈَلُّک ءُ داشتَھ ءُ بَھا بوُتَگیں جَھگیر ءُ نیکمَردانی ھَبَراں رَد مَہ وَر اِت!
آ پَد ءَ جُھد کَن اَنت ءُ ھَمے گَپ ءَ جَن اَنت کِہ ما آگاہ اِین ءُ ھَراب کار اِیں گِپتَگ اَنت ءُ تَمّہ کَنَگ بَنت ءُ “نِظام مُقَدَّس” شُمارا پَھریز اِیت ءُ شُمےَ گَموار اِنت!
رَد مَہ وَر اِت ءُ ھُژّار بِہ بِت ءُ بِہ زان اِنت کِہ اِے واری ءُ گاری ءُ لَگَتمالی ءُ بے ننگی سَرجَم ءَ ھَمے بیگانَگ ءُ بیگانَگانی دوٗستواہ ءُ مَنّوکانی “مُقَدَّسیں نِظام” داد ءُ تُھپَہ ءُ سَوگات اَنت!
کُچَک اِش وَت داشتَگ ءُ وَت اِش روٗدینتَگ ءُ ھَمے داب ءَ تَربیَت داتَگ اَنت تاں بَلوٗچ ءَ بے ننگ بِہ کَن اَنت!
پَہ الله ءَ بِہ چار اِت ءُ رَد مَہ وَر اِت کِہ مَروٗچی ھَما کَس کِہ شُما آیاں وتی دینی ءُ دُنیائی پیشونک ءُ مَستِریں دوٗستواہِ زان اِت آ ھَم بَھا بوُتَگ اَنت!
گوں شُما دِگے چیزّ گوَش اَنت ءُ شُمارا دِگے چیزّ پیش دار اَنت ءُ ھَکیکَت ءَ گوں شُمےَ دُژمِن ءُ بیگانَگاں ھوٗر ءُ ھَمراہ ءُ ھُمکاسَگ ءُ ھَمپِگر اَنت ءُ پَہ ھَمایاں کار ءَ اَنت!
پَرچا کِہ اَگاں بیگانَگ مَہ بَنت اِے لَھتے بَھا بوُتَگیں نیکمَرد ءُ جَھگیر ءُ ڈَلُّک نَہ بَنت ءُ اَگاں بَھا بوُتَگیں ڈَلُّک ءُ جَھگیر ءُ نیکمَرد مَہ بَنت گُڈا بیگانَگ ھَم رَو نَہ کَن اَنت ءُ چَہ شُمےَ ھاک ءَ وَلّ گوَجِ بَنت!
اِے یَکّے دوٗمی ءِ لاپ سیر کَن ءُ داروک ءُ ھَمدَرد ءُ ھَمراہ اَنت!
مَروٗچی زَمانَگ زانت ءُ سائنس ءُ ٹِکنالوجی ءِ زَمانَگ اِنت سادَہ ءُ زوُت باوَر مَہ بِت کِہ روچ پَہ روچ بَد نامی ءُ تاوان ءُ بے ننگی گیشِ بَنت!
اِے بے ننگیں مَردُم اگاں کُشَگ ءُ تَلتَل ءُ چُنڈ چُنڈ ءُ کُچَکاں دیئَگ ءُ وارینَگ بِہ بَنت پَد ءَ ھَم دَردے دَرمان ءُ کارے شَرّ نَہ بیت!
پَرچا کِہ اِے بے ننگی ءُ تاوان ءُ ھَرابیانی سَوَب بیگانَگ ءُ آیانی مُناپِکیں نیکمَرد ءُ چَمّ کَٹّیں جَھگیر ءُ بَھا بوُتَگیں ڈَلُّک اَنت کِہ آ زالِم ءُ زوٗراکانی مَنّوک اَنت ءُ شُما زالِم ءُ زوٗر گیرانی مَنّوکانی مَنّوک اِت!
بیگانَگ ءُ زوٗر گیرانی پَہ بَھا زُرتَگیں نیکمَرد ءُ جَھگیر ءُ ڈَلُّک زاھِر ءَ گوں شُما اَنت ءُ شُمےَ ھَکّانی لوٹوٗک ءُ گِروٗک بَلےَ پَردَگ ءِ پُشت ءَ زوٗر گیر ءُ بیگانَگانی نَوکَر ءُ شُمےَ رَد دیئوٗک ءُ کَلاگ بَندوٗک ءُ وَتی نامانی مَزَن کَنوٗک ءُ وَتی جُھلیں کیسَگ ءُ ھُمب گوٗنَگیں سِگِندانانی پَرّ کَنوٗک اَنت ءُ شُما شونَگ ءَ گار ءُ بیگانَگ ءُ بَھا بوُتَگیں نیکمَرد ءُ جَھگیر ءُ ڈَلُّکانی پَندَل ءُ مُندر ءُ مَکرانی آماچ اِت!
بَژنی گَپے کِہ بَلوٗچاں بَلوٗچیَت اَنگار کُرتَگ ءُ بیگانَگانی رَند گیری ءَ کَنَگ ءَ اَنت!
بَژنی گَپے کِہ بَلوٗچ دِگے دَرینانی نَنگانی پاسپان بوُتَگ بَلےَ مَروٗچی بلوٗچانی مات ءُ گُھار چَہ بیگانَگانی تَربیَت داتَگیں بَلوٗچ براتانِ ترُسّ اَنت!
بَژن اِنت کِہ بَلوٗچ ءِ مات ءُ گُھار ماں وَتی شَھر ءُ میتَگ ءُ بازار ءَ دَرُآتک ءُ گَشت مَہ کَنت ءُ چَہ وَتی سائِگ ءَ بِہ ترُسّ اِیت!
چاکَر ءُ گوَھرام پَہ بانُک/ گوٗھَر ءِ ھِرّ ءُ ڈاچیانی سَر ءَ سی سال جَنگ کُرت ءُ مَروٗچی بَلوٗچاں بیگانگانی رَسم ءُ راہ زُرتَگ اَنت ءُ وَت وَتی مات ءُ گُھاراں پَہ بَد چَمّی چار اَنت!
(گِھگِندیں شائِر ءَ باز جوان گوَشتَگ)
لعـنـت اِنـت دَجّــــــــال ءَ جَـدیـــدیـن ءَ
روُحِ شَـــــــــیـطان ءَ پُـــــرّ فَــــربـیـن ءَ
دوٗزَخـــــــی مَــــــــرد ءَ نـــــا اُمـیـتـن ءَ
لوٗٹ اِیت کِہ قــائِــم کَـنـت وَتـی دیـن ءَ
درُســـتیں کِــردارےءِ ھَنچو فـــرعـون ءَ
راج ےءِ رَد داتَـگ شـــــوُمـیـں مَلعـون ءَ
شَــھر اِشـی وَیـران کُرتَگ اَنت پیشــی
قَـبرِســـــتاں آبـــاد کُـرتَـگ اَنـت اِیشــی
کَےَ گوَش اِیت ظُلم بوُتَگ چُشیں پیش ءَ
نَــہ کُـتَـگ ھیِـتـلَـــر نــازی سَـــــرتـیـپ ءَ
موُسَـــلـیـنــی ءَ نَــہ کِــہ مـــــاں روُس ءَ
گـوَســتَـگ چَــہ حَـدّ ءَ قـــاتِـلـیـں کوسَـہ
جُسـت ءُ پَد ھِچّ نیست نَنگ ءُ ناموُس ءَ
کَس مَـہ جَنت مُپت ءَ ماں سَر ءَ جوش ءَ
کارچ اِشی تیز اِنت ھَرچ کَس ءِ کوٗش ءَ
پـائدَگ نیســت اِنت ھُشکیں افسوس ءَ
شُمــا مَـڈاداراں مَـن دی آں هشـــــدار
گَـوھَـریـں گـالاں پَــہ یَـقـیـن گوٗشــــدار
آوٗکــیـں وَھـدانــــی تَـــوئے مِـعـمــــــار
ظـالِــــــم ءُ زوٗراکـاں بِــہ دئـے اِخـــــتـار
چــو مَـہ بِـت مِـثــلِ اَخـــرَس ءُ گُـنـــگـاں
غَـفـلَــت ءِ واب ءَ پَـــچ کَــن اِت چَـمّـــــاں
دُژمِـن ءَ مَـیــل اِت سِـــــــلّ کَـنـت مُـلـک ءَ
بہ چوٗپِ اِت ےءِ ھَنچو ترونگَل ءُ جَتک ءَ
جَـنـگ ءِ مَیدان ءَ گیــش بَـلــوٗچ بـوُتَـگ
وَتیگ ءُ علی شــیر ءِ دُژمِن اِش کُشـتَـگ
کَـس نَـہ دَنـت گواھـی کِہ بَلوٗچ تَـتـکَـگ
کَـلِــمَــه ءِ حَــق اِش پَــہ زُبـــــاں وَنـتَـگ
مَرچـی ھَـم ھَسـت اَنـت آ بَـلــوٗچ میریں
آســـگـوار اِش بَــڈّ ءَ اَنـت نَـپَـس گــیریں
تَـرّ اَنـت مــاں کـوٗہ ءُ آپـسَــــــراں دوُریں
شـیردِلـیـں جـوان ءُ وَرنــا نوٗک ســـوُریں
تَـگــواہ اِش ڈیـھ ءُ جَـنَّـتــــی ھـوُر اَنـت
دوُر چَــہ تَـریــاک ءُ بَـنـگ ءُ بـاپـوُر اَنـت.
واجَھیں برات ءُ ھاتوُنیں گُھاراں اُمیت اِنت کِہ چَہ سِند سِندی ءُ ٹَکّ ٹَکّی ءَ پَھریز ءُ دوُری کَن اِت،
مَہ شَموٗش اِت کِہ بَدواہ زَبَردَست جُھد ءَ اَنت کِہ شُمارا سِند ءُ سیل ءُ ناتُپاک بِہ کَن اَنت!
پَرچا کِہ ھَرچ چُنت کِہ شُما زات زات ءُ زَئی زَئی ءُ ناتُپاک بِہ بِت آ گیشتر سوب بَر اَنت ءُ شُما کمزوٗرِ بِت ءُ آ شُمارا گیشتِر ءُ تاں دیرتِر ءَ وتی گُلام ءُ لَگَتمالِ کَن اَنت ءُ شُمےَ زِر ءُ زُمین ءِ گَنجاں ھوُل ءُ تاراجِ کَن اَنت!
اگاں آیانی دَست بِہ رَس اِیت ھَنچِ کَن اَنت برات ءُ برات ءُ پِت ءُ چُکّاں وَت ماں وَت ءَ سلام ءُ الیک مَہ بیت ءُ یَکّے پَہ دومی ءِ گُٹّ ءِ ھوٗناں تُنَّگ بِہ بیت!
وَ تاں دَست اِش بِہ رَس اِیت ھَنچُش کَن اَنت کِہ بَلوٗچ چَہ وَتی بَلوچیَت ءَ نَپرَت بِہ کَن اَنت!
اگاں بِہ توان اَنت ھَنچِ کَن اَنت کِہ بَلوٗچی دود ءُ گُد ءُ زُباں گار بِہ بَنت!
پَہ بَژن گِندَگِ بیت کِہ بَدواہ اِے پِڈ ءَ باز دیم ءَ شُتَگ ءُ سوبیں بوُتَگ اَنت!
اّگاں دَست اِش بِہ رَس اِیت روٗچ پَہ روٗچ شُمارا گیشتِر وار ءُ تَنگ دَست ءُ گُژنَگِ کَن اَنت تاں بِہ توان اَنت شمارا کَمزٗور ءُ ناچَگ بِـہ کَن اَنت ءُ چمداری ءَ ھیل بِہ کَن اِت!
لَگَتمال ءُ ناچَگ ءُ چَمدار ءُ گُژنَگیں راج ھِچبَر زانتکار بوُت نَہ بَنت!
تاں مَردُم زانتکار مَہ بیت ھِچ کار کُرتِ نَہ کَنت ءُ مُدام چَمدار ءُ لَگَتمالِ مان اِیت!
چَمدار ءُ نَہ زانتکار ءُ گُژنَگ ءُ لَگَتمالیں راج وَتی نَنگ ءُ ناموُس ءَ ھَم پَھریز اِت نَہ بَنت!
بیگانَگ ءُ زوٗرگیر ھَمے کار ءُ ھَمے چیزّ ءَ کَنَگ ءَ اَنت ءُ کُرتَگ اِش!
ھَمے چیزّ ءُ ھَمے کار سَوَب بوُتَگ اَنت کِہ بَلوٗچاں وَتی وَتواجَھی چَہ دَست داتَگ ءُ ماں وتی گَنجین ءُ پاکیں ھاک ءِ سَر ءَ بیگانَگانی چَمدار اَنت!
ھَمے کار ءُ چیزّ سَوَب بوٗتَگ اَنت کِہ مَروچی بَلوچ ءُ بَلوچیَت گار ءُ کمزوٗر بوُتَگ ءُ ھَنچیں بَلوٗچ اِش تَربیَت داتَگ کِہ بیزار چَہ بَلوچیَت ءَ مات ءُ گُھار ھَم نَہ زان اَنت!
چاکَر ءُ کمبَر ءُ کیھا ءُ دوٗدا ءُ بالاچ ءُ بیبَگر ءُ گوَھرام پَد ءَ زِندَگِ نَہ بَنت ءُ نام گِپتَگیں بامَرد ءُ سَرمَچارانی پُشت پَد شُما اِت ءُ مَرچیگیں دَور ءِ گرانیں بار شُمارا ماں وَتی کوپَگاں زوُرَگِ لوٗٹ اِیت!
اُمیت اِنت کِہ پیرینانی مانِشاں “قَبراں” چیدَگِ ءُ نیکیں نامان اِش پوٗلِنگِ نَہ کَن اِت!
بیگانَگانی دیم ءَ پَہ ھوٗش ءُ سار ءُ پَہ ھوٗر ءُ تُپاکی اوٗشتَگ لوٗٹ اِیت ءُ دَپچوٗٹیں جَوابِ لوٗٹ اَنت!
اَگاں دِگے ھِچ کُرت نَہ بِت کَم چَہ کَم پَہ بیگانَگاں بَھا مَہ بِت!
کَم چَہ کَم بیگانگانی بے نَنگیں رَسم ءُ راھیں ھیلاں مَہ زوُر اِت ءُ بے نَنگیں کار مہ کَن اِت!
گوں شُما دَست بَندی اِنت کِہ بیگانَگ پَسُندی ءَ اَنگار بِہ کَن اِت ءُ بَھا بوُتَگینانی ھَبَراں مَہ زوُر اِت،
بائِد اِنت کِہ بیگانَگ ءُ بیگانَگانی پَہ بَھا زُرتَگیں کاسَگ چَٹّ بِہ زان اَنت کِہ بَلوٗچ زانتکار اَنت ءُ آیانی پَندَل ءُ مَکراں سَرپَد بوُتَگ اَنت ءُ چو بے نَوائیں کَرگوٗشک ءُ سیسو ءَ آیانی رَچّ ءُ دام ءَ نَہ کَپ اَنت!
شَرّ بِہ زان اِت
‘ بلوچ دمات گُھارانی اِزّت ءُ ننگ ءِ سرا دُژمن ءِ دست دراجی، ندکار: میر شھسوار بلوچ
