مَرگ نازینک – مجید عاجز

“” تو کجائے او رہشون گِندگ نہ بئے
ہیسکگاں مینتگنت ھون گِندگ نہ بئے
بے کپن کپتگنت جون گِندگ نہ بئے
پہ کجام اُزر ءُ نیمون گِندگ نہ بئے

شیرگیں مچکدگ بینگاں مِتکگنت
چمّے ءِ ارسیں ہوشام سر رِتکگنت
گْرنچیں کَولانی بندیک پَر رِتکگنت
کوریں کشکانی پنداں سپر رِتکگنت

زھگیں استال پاساں اُبینگ نہ بنت
زگریں زھرانی زھراپ بینگ نہ بنت
انچیں ٹپّ اَنت دل ءَ کہ کُدینگ نہ بنت
انچیں سوک اَنت کہ انسرینگ نہ بنت

من کجا سربتگ ، آ کجا گار اِتنت
کسّ ءَ جند ءِ ھوں ریزگ نہ نزّار اِتنت
ارسیں کندیل چمّے کت ءُ چار اِتنت
چو کپوتے ءَ کُوکُویں ہیسکار اِتنت

شپکدگ شپ جتیں ھارے ءَ مَلّ اِتہ
روچ ڈیوائیں بازارے ءَ جَلّ اِتہ
تْراولیں کشک منتہ سفر ھَلّ اِتہ
زندگی ءَ منا مَرگ ناولّ اِتہ

کُوکُویں دیدگاں موتک شیزار اِتہ
آھے ءَ گْریتگ ءُ ٹپّے ءَ نار اِتہ
نوبت ءَ ھَڈّ ءُ کامپول اُفّار اِتہ
آجوی جیڑ اِتہ ، آجوی مار اِتہ

تِنگے ہشکاوگ ءُ زِر من ءُ زندگی
انچیں پنداں مساپِر من ءُ زندگی
تُنّ کرپاسیں کوکِر من ءُ زندگی
مَرگ نازینکیں شائر من ءُ زندگی “”

19. 12. 18