مغربی بلوچستان چمشانک: ولید گربُنی – سیاھگ، اکبر بارگزئی ءِ رھبندا

اے گپا یاد گر ات کہ مغربی بلوچستان ئے نام سیستان و بلوچستان نہ انت. راستیا مغربی بلوچستان بلوچ زمین ئے هما ٹوککر انت کہ ایرانا گونائی شیعہ آبادیں زابُل شهر لچینتگ و نام چہ بلوچستانا مٹینتگ و ‘سیستان و بلوچستان’ بستگ. اے نام غیر فطری نامے و بلوچ راجا ایشی هچبر نہ منّتگ.

پہ بلوچ ئے نزور کنگا ایران ئے حاکماں دگہ گپڑے کارهم کتگ. پہ دروَر لهتے بلوچ هند چہ بلوچستانا سستگ و گوں وتی جنوبی خراسان پرگنگا (صوبها) هوار کتگ انت. گپڑے بلوچ هند گوں کرمان پرگنگا هوار کنگ بیتگ انت و تیابگوَری هند جاسک و میناب گوں هرمزگان پرگنگا لچینگ بیتگ انت.

بلوچ میتگ، شهر و دمگاں گوں جنوبی خراسان، کرمان و هرمزگان پرگنگاں هوار کنگ ئے درگتا ایرانی واکانی نیمون همے بیتگ کہ اے دمگاں آسراتیانی رسینگ آسیدگ تر بیت و مردم آبادتر بنت؛ چہ بلوچستانا ایشاں آسراتی رسینگ گران انت.

البت، مرچی ایران ئے وار و پدمنتگتریں هند بلوچ ئے هما هند انت کہ چہ بلوچستان سندَگ و گوں سئیں پرگنگا هوار کنگ بیتگ انت.

بلوچ کہ پہ راستی وتا ایرانی قومانی سیادے زانت و زبان ئی چہ همُک دگہ زبانا گیشتر گوں فارسیا نزیکتر انت (اگر فارس هم ستکیں دل و پچیں مغزاں بہ چار انت، زبان و تاریخ ئے حسابا آیاں ایبد بلوچا دگہ هنچوشیں نزیکیں قومے نیست)، چہ بیها فارسانی فرقگزاری و ڈالچاری ئے آماچ انت. فارس قوما مدام تُکشِتگ کہ بلوچا پدمنتگ، وار و بیزار بہ کنت. همے سببا بلوچ ئے هجرت کنگ ئے دیم مدام گوں مشرقا بیتگ. مغربی بلوچستان ئے هزاراں بلوچ چہ پاکستان ئے اڈ بیگا ساری کراچی و سند ئے سرسبزیں ڈگارانی سرا شتگ و آباد بیتگ انت. اے بلوچانی مرچیگیں نسل سندی گپ کنت یا کراچی والا ئے ناما زانگ بنت کہ وتی گستائیں بلوچی گالوارے ئے واهند جوڑ بیتگ انت.

اگر چماں شانگ بہ دی ئے، درا بیت کہ مغربی بلوچستان ئے دانشوَر دابے نہ دابے جهدا بیتگ انت کہ ایرانی دانشوَرانی دلگوشا وتی نیمگا بہ ترّین انت و آیاں ترانگ بہ دی انت کہ مغربی بلوچستان ئے بلوچا چہ ایرانا بیراز کنگ ئے سرکاری کارکرد ئے مزنتریں سبب مذهب انت. گمان همے درشان کنگ بیت کہ ایران ئے شیعہ واکدارانی دلا بلوچانی خلافا ایریں کینگ ئے مزنتریں سبب بلوچانی سنّی بیگ انت.

اگر بلوچانی شیعہ بیگ ئے سببا ایران ئے سرکار آیانی غموار جوڑ بیتگ اتنت، گوڑا هرمزگانی، کرمانی و خراسانی بلوچانی گیشتریں بهر کہ شیعہ انت، چہ بلوچستانی بلوچاں وارتر نہ بیتگ انت.

بلوچ و غیر بلوچ ایرانی دانشوَرانی ذمواری انت کہ راه کپتگیں راجپهاز بلوچ سیاستا دربرگ ئے جهدا بہ کن انت. اگر الکاپیا دربرت اش کت، سرپد بی انت کہ آبادیں بلوچستان ئے سیت چہ همُک دگہ قوما پیسر ایرانا رس انت. پمیشا بلوچ پجّارا ساٹگ و پهازگ ئے مقصدا گوں بلوچا همدست بیگ باید ایرانی دانشوَر و واکدارانی ذمہ واریاں هوار بہ بیت.

www

.facebook.com/groups/balochinews/permalink/3110792988947030/