گلامی ءِ مارشت سرگوست ندکار: چراگ رژن
من یک رَند یے چہ وتی گس ءَ دراتکاں دیم پہ کیچ ءَ رھادگ بوت اَنت گڈاں راھ ءِ نیام ءَ ایف سی ءِ چیک پوسٹ یے جتگ، ھمے چیک پوسٹ ءِ نزیک ءَ کہ ما سر بوتیں مئے گاڑی ءِ سواریں مردم گشگ ءَ لگ ات انت کہ سپاھی گاڑیاں دارگ ءَ انت، جست ءُ پرس ءَ انت ما کہ ایف سی ءِ چیک پوسٹ ءِ کر ءَ اتک ءُ سر بوتیں، یک سپاھی ءِ دیم ءَ دراتک ءُ دست ئے سرینت پہ اوشتگ ءَ اشارھے کت گاڈی اوشتات مارا کُلیں گاڈی ءِ سواریں مردماناں ایرئے کت، جست کنگ ءَ لگ ات، شما کجا بوتگ ات ءُ کجا رؤگ ءَ ات، درستاناں پہ یک، یک ءَ پجار کاڈ ءِ لوٹ ات انت، درستانی پجار کاڈاں چاراں بوت ءُ وھدے منی کر ءَ اتک من ءَ پجار کاڈ گوں نیست ات پرچا کہ لوکل ءِ ھساب ءَ منی امر ءَ ھژدہ سال پورا نہ ات منی کر ءَ اتک ءُ من ءَ گشگ ءَ لگ ات”اپنا شناختی کارڑ نکالو” من پسّو دات کہ منا پجار کاڈ نیست منی امر کسان انت انوں پجار کاڈ جوڑ نہ بیت من وانگ ءَ آں، بھیار دیاں زھر گپت منی سر ءَ باز کوکار ءُ جاک ئے کت ءُ پد ءَ من ءَ گشگ ءَ لگ ات کہ وتی پجار کاڈ ءَ الم جوڑ کن، اگاں جوڑ نہ کت واپس پد ءَ چداں نہ گوز ءِ ھمے گپے جت مارا یل ئے دات ءُ ما رھادگ بوت انت راھ ءَ من سرجمیں گوں وت دل ءَ جیڑاں بوت انت اے مرد پرچا من ءَ چو جست کنگ ءَ ات ءُ بھیار دیگ ءَ ات، جاھ منی وتی زمین منی وتی اد ءِ واجہ من وتاں، آھر اے چونین یے کہ من ءَ راھ ءِ دیم ءَ گاڑی ءَ ایر کنت ءُ جست کنت ءُ تو کئے ؟ تو کجا نشتگے؟ تئی پجار کاڑ کج انت؟ تو کجا روے؟ من ھمے گپ ءَ اجب ھیران ات انت کہ منی جند ءِ زمین ءِ سر ءَ دگہ درآمد یے کیت من ءَ اے پیمیں جست کنت ھبر و بھیار دنت.
ھما روچ ءَ من پھم انت کہ اے زمین ءِ واجہ من وتاں بلے واجھی دگرے کنگ ءَ انت، اد ءَ من چہ لوگ ءَ درکایاں من ءَ جست کنگ بیت ءُ تو پہ چی ءَ وتی لوگ ءَ دراتکگ ئے؟
جمعہ 31 مئی, 2019
من یک رَند یے چہ وتی گس ءَ دراتکاں دیم پہ کیچ ءَ رھادگ بوت اَنت گڈاں راھ ءِ نیام ءَ ایف سی ءِ چیک پوسٹ یے جتگ، ھمے چیک پوسٹ ءِ نزیک ءَ کہ ما سر بوتیں مئے گاڑی ءِ سواریں مردم گشگ ءَ لگ ات انت کہ سپاھی گاڑیاں دارگ ءَ انت، جست ءُ پرس ءَ انت ما کہ ایف سی ءِ چیک پوسٹ ءِ کر ءَ اتک ءُ سر بوتیں، یک سپاھی ءِ دیم ءَ دراتک ءُ دست ئے سرینت پہ اوشتگ ءَ اشارھے کت گاڈی اوشتات مارا کُلیں گاڈی ءِ سواریں مردماناں ایرئے کت، جست کنگ ءَ لگ ات، شما کجا بوتگ ات ءُ کجا رؤگ ءَ ات، درستاناں پہ یک، یک ءَ پجار کاڈ ءِ لوٹ ات انت، درستانی پجار کاڈاں چاراں بوت ءُ وھدے منی کر ءَ اتک من ءَ پجار کاڈ گوں نیست ات پرچا کہ لوکل ءِ ھساب ءَ منی امر ءَ ھژدہ سال پورا نہ ات منی کر ءَ اتک ءُ من ءَ گشگ ءَ لگ ات”اپنا شناختی کارڑ نکالو” من پسّو دات کہ منا پجار کاڈ نیست منی امر کسان انت انوں پجار کاڈ جوڑ نہ بیت من وانگ ءَ آں، بھیار دیاں زھر گپت منی سر ءَ باز کوکار ءُ جاک ئے کت ءُ پد ءَ من ءَ گشگ ءَ لگ ات کہ وتی پجار کاڈ ءَ الم جوڑ کن، اگاں جوڑ نہ کت واپس پد ءَ چداں نہ گوز ءِ ھمے گپے جت مارا یل ئے دات ءُ ما رھادگ بوت انت راھ ءَ من سرجمیں گوں وت دل ءَ جیڑاں بوت انت اے مرد پرچا من ءَ چو جست کنگ ءَ ات ءُ بھیار دیگ ءَ ات، جاھ منی وتی زمین منی وتی اد ءِ واجہ من وتاں، آھر اے چونین یے کہ من ءَ راھ ءِ دیم ءَ گاڑی ءَ ایر کنت ءُ جست کنت ءُ تو کئے ؟ تو کجا نشتگے؟ تئی پجار کاڑ کج انت؟ تو کجا روے؟ من ھمے گپ ءَ اجب ھیران ات انت کہ منی جند ءِ زمین ءِ سر ءَ دگہ درآمد یے کیت من ءَ اے پیمیں جست کنت ھبر و بھیار دنت.
ھما روچ ءَ من پھم انت کہ اے زمین ءِ واجہ من وتاں بلے واجھی دگرے کنگ ءَ انت، اد ءَ من چہ لوگ ءَ درکایاں من ءَ جست کنگ بیت ءُ تو پہ چی ءَ وتی لوگ ءَ دراتکگ ئے؟
گھنٹے ءَ رند ءَ ما کیچ ءِ شھر ءَ رس ات انت من و ھیراناں نہ زاناں چون بہ کناں اگاں پجار کاڈ ءَ جوڑ مہ کناں واتری ایف سی بدار ایت منی جند ءَ بزگ کنت گڑا من تچک ءَ شتاں نادرا ءَ من ءَ وتی لوکل چوناھا گوں ات پہ دگے کارے ءَ من کہ نادرا ءَ سر بوت آں داں اود ءَ مردمانی کتار لگ اتگ ات کیچ ءِ پد ءَ گرمی ءِ ھال ءَ کل سرپد انت چتو گرم انت ساھتے ڈن ءَ اوشتگ نہ بیت اے تبد ءُ سوچوکیں لیوار مردم ءِ دل ءَ در کنت من ھمے لین ءَ نشتگ ات انت، دو ءُ سئے گھنٹہ ءَ رند منی نمبر اتک من ءَ پرچی یے دات یے، من تہا ءَ شتاں اد ءَ پد ءَ ودار کنگی انت، دان نمبر بئیت، من نہ زاناں چل ءُ ھشت یا چل ءُ نو ات، داں دیراں منی نمبر اتک من ءَ توار یے کت، منی لوکل سرٹیفکیٹ یے لوٹ ات من وتی لوکل دات منی پنچیں لنککانی فنگر پرنٹ یے گیپت انت ءُ سیدھا دگہ کرسی ءِ سر ءَ مرد یے نشتگ ات اسپیت ریشیں کماشے ات من ءَ ھمائی ءِ کر ءَ راھے دات آئی منی دست نبشت لوٹ ات من وتی نام رومن لبزاں گوں نبشتہ کت ھمے مرد من ءَ چو ھیران ھیران ءَ چارگ ءَ لگ ات ءُ جست ءِ کت تو چنت ونتگ من وتی تعلیم زاھر نہ کت من پسہ دیان ءَ گشت ھشت ونتگ آئی منی گپ باور نہ کت گشت یے تو ھشت نہ ونتگ تچک ءَ بگش نہ گش ئے تئی پجار کاڈ ءَ جوڑ نہ کناں، من لاچار بوت اَنت کہ مہ گشاں منی پجار کاڈ ءَ جوڑ نہ کنت من پد ءَ پسہ دات گشت کہ نو ءَ وانگ ءَ آں مرد کمو اجکا بوت، گوں وت ءَ جیڑگ لگ ات کمو دیراں رند ءَ گشت یے تو وتی پجار کاڈا نوں چی ءَ جوڑ کنگ ءَ ئے اے سال سبر بہ کن دیم ءِ سال ءَ دہ ءِ چکاس ءَ بد ئے ڈاکومنٹسانی ھساب ءَ وتی پجار کاڑ ءَ جوڑ کن، اے وڑ ءَ پد ءَ تئی واستہ بازیں مسلہ یے بیت من وتی لاچاری آئی ءِ را گشت نہ کت من گشت من دبئی ءَ رؤگ ءَ آں پمیشکا وتی پجار کاڑ ءَ جوڑ کنگ ءَ آں پد ءَ آئی دگہ جست نہ کت ءُ منی گوانکو نمبر یے لوٹ ات، گشت ئے تئی پجار کاڈ تیار بیت تئی نمبر ءَ کلوھے چہ نادرا ءِ نیمگ ءَ کیت،من ءَ ٹوکن یے دات، ھمے گشتے ماھے ءَ رند بیا وتی پجار کاڈ ءِ رند ءَ بلے ھمے ٹوکن لازم گوں بہ بیت اے سپر جت ءُ من واتر پہ گس شتاں واتری ءَ مارا ایف سی نہ داشت.
ماھے رند ءَ پد ءَ ارادہ کت رواں وتی پجار کاڈ ءَ کشاں کہ ماھے سرجم بوتگ نوں الم تیار بیت من گاڑی ءَ سوار بوت انت دیم پہ کیچ ءَ من چاراناں یک چیک پوسٹے ءِ جاھ ءَ دگہ چار چیک پوسٹ لگ اتگ من ءَ ھمے سما بووگ ات کہ بلوچ ءِ سرڈگار زور آوراں وتی ھرجاں جتگ ھمک گام ءِ سر ءَ چیک پوسٹ یے جتگ ھرچی کہ دلے بہ لوٹ ایت کنت اے رند ءَ پد ءَ مارا داشت یے، پد ءَ مارا پجار کاڈ ءِ لوٹ ات انت، جست ءُ پرس ءَ شرو بوت، کج ئیگ یے؟؟ تئی پت ءِ نام کے انت ؟؟ تو چنت ونتگ؟؟ کیچ ءَ چی ءِ واستہ رؤگ ءَ ئے؟ من پہ ترس ءُ لرز پسہ دیان ءَ گشت من وتی پجار کاڈ جوڑ کنگ ءَ داتگ نادرا ءَ رؤگ ءَ اوں کشگ ءِ گشی وتی ٹوکن ءَ پیشدار من ٹوکن پیش داشت ءُ مارا یل ئے دات، ما شت انت کیچ ءَ من انگو آنگو ھچ جاھ نہ شتاں تچک ءَ نادرا ءَ وتی پجار کاڈ ءِ ٹوکن دات ءُ پجار کاڈ کش ات واپس اتکاں گاڑیانی اوشتگ جاھ ءَ گاڑی یے ءَ سوار بوت آں واتر پہ گس ءَ.
دگہ یک رند یے انچو من سپر ءَ در اتکگ ات انت گاڑی ءَ سوار اتاں ءُ راھ ءَ روگ ءَ اتاں چاراں دیم ءَ آرمی ءِ چیک پوسٹ یے، ما نزیک ءَ کہ اتکیں دُستکے کت مارا داشت اش، جست پرس ءَ کنگ ءَ بوت منی پجار کاڈ ءِ لوٹ ات من وتی پجار کاڈ دات منی نام ءِ دیم ءَ بلوچ نبشتہ ات ایشی ءَ منی نام ءِ دیم ءَ بلوچ دیست گوات گپتگ چو جنین ءِ پیم ءَ، من ءَ لھتیں بد ءُ رد یے کت ،من وَ چٹ ھیران بوت انت کہ اے مرد ءَ گوں بلوچ ءِ نام ءِ سر ءَ چی ءَ زھر کیت؟ منی دل اندر ءَ چے بنگیپت کہ منی سرڈگار ءِ سر ءَ نشتگ ءُ من ءَ چم پیشداریت ءُ بد ءُ رد کنت،بلے چے کن ءِ زوراک انت ھرچی کت کنت، ساھتے ءَ رند مارا یل ئے دات ما شتیں.
لھتیں روچ ءَ رند من ءُ منی کماش لوگ ءِ دپ ءَ بیگاہ ءِ ساھت ءَ وھد ءُ پاس کساس چار بج ات ما وتی گس ءِ دیم ءَ ترگ ات انت داں چاراں لھتیں گاڑی دیم پہ مئے لوگانی نیمگ ءَ آیگ ءَ انت، گاڑیاں سپاھی مان انت، دو گاڑی مئے لوگانی نزیک ءَ اتک ءُ اوشتات، سپاھیانی جُپ کنوکائی بوت چار ایں نیمگاں لوگ اش انگیر کت، دو سپاھی منی کر ءَ اتک من ءَ سر ءَ داں پاداں چارگ ءَ بوت، منی کماش اتک منی نزیک ءَ ھمے سپاھی آں چہ یکے ءَ مارا ھردوکاناں گشت سوار بئیت گاڑی ءَ، ما گاڑی ءَ سوار بوتیں من سک پریشان اتاں کہ مئے لوگ تھنا ڈن ءِ یے سر ءَ انت مئے لوگانی نزیک ءَ دگہ ھمساھگ نیست مئے لوگ ءِ مردین من ءُ منی کماش، باریں مات چون بیت، مئے لوگاں چہ کمو گستہ بازارے ھست بلے آ کمو دور انت مئے لوگانی پشت ءَ لھتیں کوھ ھست انت مارا زرت یے ءُ شت لوگانی پشتی نیمگ ءَ اوشتات، جست ءُ پرس ءَ شرو بوت، دست یے مئے لوگانی پشتی نیمگ ءَ کوھانی دیم ءَ ٹال کت گشت یے اے کوھانی نیمگ ءَ سرمچار اتکگ انت، مارا جتگ اش شتگ انت شما نہ دیستگ انت ما گشت ما ھچ سرپد نہ انت، چی بوتگ؟ یکے ھمیشانی تہ ءَ زھر گیپت گشگ ءَ لگ ات شما دروگ بند ات لھتیں زاہ ءُ بد یے مارا دات، پد ءَ مارا زرت یے دگہ لھتیں مردمے گیپتگ ات، دگہ بازارے یے مارا ھمود ءَ برت ئے کلاناں یکجاھے کت جست ءَ شرو بوت بگش ات سرمچار چہ کجا اتکگ انت ءُ چہ کجا شتگ انت اگاں نا شمارا براں بیگواھ کناں ھچبر یل نہ کناں. گڑا مئے کلیں گیپتگیں مردمانی گپ یکیں ات “ما سرپد نئیں” مارا ھکّل یے کت وتی پشکاں کش ات وتی چماں بند ات من ءَ چادرے گوں ات منی کماش منی کش ءَ نشتگ ات من وتی چادر کماش ءَ را دات من وتی پشک کش ات وتی چم بست انت مارا گاڑی ءَ سوار یے کت ھمد ءَ بازیں زالبولے ءَ گریت کوکار بوت گاڑی اسٹارٹ بوت روگ ءَ لگ ات کساس گھنٹے انداز ءَ ما ایف سی کیمپ ءَ رس اتاں مارا ھکل یے کت ایر آ ایت مارا ایرے کت برت یے کوٹی یے ءَ ما نہ زانت اے کجام جاھ انت مارا کجا برتگ ئے، زمستانی موسم ات، سک سرد ات مارا گھور ھم کنگ ءَ ات پد ءَ پشک گورا نہ ات انت، مارا چادرے بلاھیں گوں ات، چادرے درت گشی وتی چماں بند ات پشکاں گور ءَ کن ات ما پشک گورا کت انت اے سپاھی مئے کر ءَ چے شت کمو ھاموشی بوت ما یکے دومی ءَ دست جت جست کت تو کئے ءِ ما یکے دومی ءَ را پجا آؤرت چیزے منٹ ءَ رند ءَ یک برزیں ءُ زنڈیں سپاھی یے اتک پہ ما ورگ ءِ لوٹائینت لھتیں آمگ پتکگیں نان ءُ لھتیں آلو ءِ نارشت مئے دیم ءِ دات مارا گشت یے چمانی پٹی آں پچ کن ات ورگ بوّر ات جند یے شت ما ورگ وارت ھلاس کت دگہ یک سپاھی یے اتک رزان ءِ چست کت انت پد ءَ ھمے زنڈیں سپاھی اتک مارا جست ءُ پرس ءَ شرو بوت بی ایل اے ءَ شما کمک کن ات ؟ بی ایل اے والا شمے کر ءَ ھست؟ بی ایل اے شمارا چے ٹریننگ دنت اے درستیں جست ءِ یکجاھ کت انت مئے درستانی جواب یکیں ات ما ھچ نہ زاناں مئے کر ءَ بی ایل اے والا نیست بازیں گپے ھمد ءَ کت ئے من ءَ یات نہ انت گپ ئے بس کت اے سپاھی دراتک ءُ شت اے شپ ءَ ما کمو وپتیں بلے مارا واب نیاتک شپ گوست سھب ءِ سر ءَ مئے چم بستگ ات انت بس ھمنچو سما بوت کہ روچ انت روچ دراتکگ مئے کوٹی دریگ ءَ روچ رژنائی ءِ شمب لگگ ءَ ات انت سھب ءِ سر ءَ پہ ما چاھ ءُ لھتیں نان آرت یے ھمے کیمپ ءِ تہ ءَ ھمیشاں یک کسانیں بچکے نوک بروت شنز ات مئے کر ءَ اتک بلے بلوچے ات بلے بلوچی گپ ئے نہ زانت اردو ءَ گپ ءَ شرو بوت گشگ ءَ لگ ات بیا ات ایف سی ءَ بھر بزور ات وتی راجی ھک ءَ ادا بہ کن ات پاکستان ءَ پہ کربانی بدئے ات پاکستان مئے ملک انت،، من ھمود ءَ دل ءِ تہ ءَ جیڑیت اے مرد گلامی ءَ انچو چم کور کتگ انت کہ پنجابی ءِ گلامی ءِ پہ پھر بند ایت پہ شان گش ایت بیا ات ایف سی ءَ بھر بزور ات وتی ھک ءَ ادا بہ کن ات اے زانت من پنجابی ءِ گلامی کنگ ءَ آں من و دیم ءَ ھچ گشت نہ کت دل ءَ گشت تو چونیں انسان ءِ ئے وتی ءَ گلامی ءَ پہ پھر بند ئے گلامی ءَ وتی پرز سرپدے بے کہ من وتی ھک ءَ ادا کنگ ءَ اوں ایشی ءَ وتی گپ ھلاس کت اَنت ءُ شت پد ءَ ھما زنڈیں سپاھی اتک مارا گپ پرمات ئے بلکیں ایشانی دپ ءَ گپے در کیت مارا گش انت گوں ھرچی کہ مارا جست یے کت مئے جواب ھمے یکین ات ما ھچ نہ زاناں اے روچ شت مگرب بوت ملا ءَ بانگ دات ھمے سپاھی شت کہ من رواں نماز واناں من دل ءَ گشت اے کاپر ءُ زالم ھم نماز وان انت باریں؟ ایشاں چنت بے گناھ کشتگ چنچو بے بیگواہ کت ؟
چیزے منٹ ءَ رند ھمے سپاھی پد ءَ اتک مئے کر ءَ گشگ ءَ لگ ات کران بوان ات اللہ ءِ سر ءَ ستک بدار ات بیا ات ایف سی ءَ بھر بزور ات شمارا کس ھچ کت نہ کنت من وتی دل تہ ءَ گشت تئی دپ ھون ءِ بوھ ءَ کنت تئی وڑیں بیا انت مارا کران ءِ وانگ ءُ نیکراھی ءِ درس ءَ بہ دینت تو وت زالم ءُ زوراکے ءِ ھمے سپاھی ءَ ساری ءَ شپ ءَ مارا گشتگ ات شمارا یل کناں بلے یل ئے نہ دات ایدگی شپ اتک ما امیت دامن ءَ نشتگ ات انت مرچی نا باند ءَ بلکیں مارا یل کنت اے سپاھی شت داں دیراں شپ ءِ کساس دو بج ات دگہ دو سپاھی اتک مارا لھتیں لگت یے جت، ٹوھینتے، مئے چمانی پٹی کمو چست کت انت ٹارچے گوں اتے ٹارچ مئے چمانی تہ ءَ جت یک یک ءَ درست انچو چاران یے کت انت، پٹی لیٹان یے کت انت من ھما دمان ءَ زانت کہ دلار یے مارا چارگ ءَ انت من چم نیم بند کت چار ات باریں دلار کے انت من وس کت بلے ھچ میم نہ کت وت ما وت سُک سُک اش کت ما ھچ سرپد نہ بوت آں چے گشت ایش کمو ھاموش بوت انت ھاموشی ءَ رند مئے تہ ءَ دو مردم اش کش ات گوں برت اش، اے شپ گوست پد ءَ انچو اے شپ پہ بے وابی گوست ماں اے تھاریں کوٹی ءِ تہ ءَ ایدگی روچ ءَ دگہ یک سپاھی اتک مارا گشت یے شمارا یل کناں، پادا ات بیا ات، مارا کَشِت اش چہ کوٹی ءَ، گاڑی ءَ سوارے کت، برت ئے دور جاھے ءَ ایر ئے کت .
h umgaam.net/گلامی-ءِ-مارشت-سرگوست-ندکار-چراگ-رژن/
