ماں ایرانءَ نوکیں تحصیلی سالءِ بنگیج
بلوچستانءِ راجی زرمبش: ھمے گؤستگیں دو سۓ سدیاں زبانانی بیگواھیءِ رواج سکّ تیز بیتگ؛زبانانی پٹ و پول کنوک گش انت کہ ھر ماھے دو زبان گار و بیگواہ بیت انت ۔
پمیشا ضروری انت کہ ھر راجےءِ زبان ماں اسکولاں وانینگ ببیت ۔ بلے ما گندیں کہ بلوچانی راجی زبان ماں آھانی وتی ملک بزاں بلوچستانءَ ماں اسکولاں وانینگ نبیت کہ اے یکے چہ انسانی بنیادی حقان انت کہ چہ ایران و پاکستانءِ نیمگا لگتمال بیگءَ انت ۔
ماں ایرانءَ نوکیں تحصیلی سالءِ بنگیج
راجانی پجار و دود و ربیدگ ءِ مستریں عنصر زبان زانگ بیت انت ۔ یک راجےءِ زبانءِ ڈالچار کنگ و یا چہ آییءِ دیمرویءَ دیمگیری کنگ ، پہ آییءِ بیگواھی ءَ چن و لانچ کنگ ءَ برابرانت۔زبانءِ مرگ گوں آ راجءِ میراثانی بزاں موسیقی و لبزانکءِ
میزریں کشارءِ آدرہ بیگ و آسرا دود و ربیدگءِ بیگواھی انت۔ راجےءِ کہ زبان و دود و ربیدگ ولگوج کنگ بیت انت بزاں آ راجءِ گڑا وجود و ھستی ھم ڈڈتریں و حاکمیں راجءِ دود و ربیدگءِ
اوساہءَ ایر روت و گار بیت۔
مروچیگیں دنیاءَ گوں علم و تکنولوژیءِ دیمرویءَ یک نیمگے پہ مۓ وڑیں نزوریں راجاں ،راہ و در ودی کتگ انت تا کہ پہ وتی دود و ربیدگ و زبانءِ زندگ دارگ و دیمرویءَ شرتر و گیشتر کار کت بکنیں بلے آ دگہ نیمگا گوں بالادستیں راجءِ ظالمیں حکومت و پالیسیانی سببءَ ، دری دود و ربیدگ و زبانانی ھار و ھیروپ مۓ ھزارانی سالءِ راجی میراثاں روپان و ایربران انت۔
ھمے گؤستگیں دو سۓ سدیاں زبانانی بیگواھیءِ رواج سکّ تیز بیتگ؛زبانانی پٹ و پول کنوک گش انت کہ ھر ماھے دو زبان گار و بیگواہ بیت انت ۔
پمیشا ضروری انت کہ ھر راجےءِ زبان ماں اسکولاں وانینگ ببیت ۔ بلے ما گندیں کہ بلوچانی راجی زبان ماں آھانی وتی ملک بزاں بلوچستانءَ ماں اسکولاں وانینگ نبیت کہ اے یکے چہ انسانی بنیادی حقان انت کہ چہ ایران و پاکستانءِ نیمگا لگتمال بیگءَ انت ۔
ماں ایرانءَ ، اول مھر برابر گوں 22 سپتمبر ءَ وانگءِ سال بنگیج بیت و اسکول و وانگجاہ پچ بیت انت ۔ ماں ایرانءَ بید چہ فارسی زبانءَ اودءِ نندوکیں دگہ ھچ قوم و راجےءِ زبان واننیگ نبیت انت ۔ ماں ایرانءَ بلوچی زبانءِ واننینگءِ لوٹ ھم جرمے زانگ بیت ۔
ایرانءِ بلوچ دشمنیں حکومت نہ تیوکا بلوچی زبانءَ ماں اسکولاں نوانینیت بلکیں اگاں یک دلسوچیں بلوچے بلوٹیت کہ پہ وتی ماتی زبانءَ خدمتے بکنت و کتاب و ماھتاکے شنگ بکنت ، اجازت دیگ نبیت ۔
ھمے دابا ماں بلوچستانءَ بازیں جاھاں کسانیں چک ، کاپرانی چیرا نشتگ و واننت ، بزاں آھانی مدرسہ ھمے کاپر انت ۔ھور گوں اے درستیں مالی نزوری و اے دگہ جنجالاں کہ بلوچ زھگ گوں آھاں دیم پہ دیم انت ، پدا ھم بلوچ زھگ و آھانی مھربانیں مات و پت کوشش کننت و تا جاھے کہ آھانی دست برسیت آھاں واننین انت ۔ وھدیکہ بلوچ زھگ گوں اے درستیں مشکلاتاں ، وانیت و باریگ پہ زانتجاہ و یونیورسٹیءَ کئیت گڑا اودا ھم گوں بازیں پندل و جنجالاں چہ ایرانءِ حکومتءِ نیمگا دیم پہ دیم بیت انت ۔ پمیشکا ما گندیں کہ ماں بلوچستانءِ دانشگاہ بزاں یونیورسٹیاں ، ڈنی وانوکانی حساب چہ بلوچاں دہ سری گیش انت ۔
اے چو روچءَ روژنا انت کہ ماں ایرانءِ اے سیستمءِ تھا ، ایرانءِ نشتگیں ایردستیں راجانی وت واجھی و وت مستری برجاہ نبیت و تا وھدیکہ اے رژیم و اے سیستم ھست ظلم و زوراکی ھمے پیما برجاہ مانیت و مئے زبان و فرھنگ ھنچو لگتمال ۔ پہ وتی راجی پجارءِ برجاہ دارگ و وتی وت مستریءِ گرگءَ ضروری انت کہ ما درست گوں ھوری و تپاکیءَ وتی راجی و ملی جھدءَ دیما ببریں ۔
بلوچستانءِ راجی زرمبش
24 Sep 2019
