بلوچستان ءِ زالبولانی بیگواھی: سنگین بلوچ

پیر 2 دسمبر, 2019

ھمگام بلوچ

آواران ءُ ڈیرہ بُگٹی ءِ زالبولانی بیگواہ کنگ ءَ چے پدّر بیت کہ دُژمن ءَ پروش وارتگ چہ بلوچ ءِ نیمگا مروچی پمیشکا زالبولاں چِست کنگ ءُ بیگواہ کنگ ءَ اِنت ھمے بیگواھی ءِ ھبر ءُ ھال پہ مئے دلارانی واستہ یک شرم ءِ گپّے بلوچستان ءَ پاکستان ءِ پوج کئیت ءُ لشکرکشی کنت لوگانی سرا اُرش کنت ءُ چاپہ جنت بلوچ زالبولاں آوار جنت ءُ بیگواہ کنت ھمے آوار جنگ ءُ بیگواہ کنگ ءَ مئے وتی بلوچ برات پولیس ءُ لیویز ءِ رنگ ءَ کاینت مئے زالبولانی ازت آں پادمال کن اَنت دژمن ءَ ھینچو بستار نیست کہ اے وڑیں کار بہ کنت بلوچ کِستیں پہ چارکلدار ءَ وتی گیرت ءَ بھا کنت ءُ وتی مات ءُ گھارانی سودا ءَ جنت گُڑا آ وتی ھمساھگے وتی میتگ ءِ چُک ءُ زالبولانی ازت ءَ چوں کنت یک مردمے کہ وتی گیرت ءِ سودا ءِ کنگ ءَ ھچ چَکّ ءُ پَد نہ بیت گُڑا اَنچو سرپد بہ بو کہ ھمے مردم ءَ بے ھیائی ءُ بےگیرتی منتگ چہ ھمے بلوچاں مردم ءَ دُور بوھگ لوٹیت بَلے انچیں اے وڑیں بھا بوتگیں مردم اَست کہ ما ھاواں نہ زاناں کہ مئے آستینک ءِ مار اَنت مارا ڈنگ جن اَنت انوگیں وھد ءُ زمانگ ءَ مردم ھمساھگ ءَ چے وتی لوگ ءِ مردمانی سرا ھم یکین مہ بیت مروچی آواران ءَ زالبول آوار جنگ بیتگ اَنت باندا کِستیں دُژمن تربت ءَ ھم ھمے وڑیں کار ءُ کِردار کنت پدا پونشیگیں روچ ءَ سرجمیں بلوچستان ءِ مات ءُ گُھارانی گیرت ءُ ازت آں لگت مال کنت ءُ چو بنگال ءِ مردمانی وڑا دُگنیا ءِ توک ءَ بلوچ راج ءَ رسوا کنت اگاں کجام بلوچ پیسرا بھا بوتگ من ھمائی ءَ چے دستبندی کن آں کہ آ اِے وڑیں کردار ءُ کار دُژمن ءِ ھواری ءَ بائد اِنت مہ کنت بلوچی ءَ گُش اَنت کہ آس وھدے کہ کپیت گُڑا تر ءُ ھُشک ھم نہ زانت ھمے رنگ ءَ اگاں دُژمن ءَ ھادت کت گُڑا ھما بھا بوتگیں مردم ءِ سیاد لوگ ءِ مردم چُک ھم ھمے رنگ ءَ بھا بنت ءُ ھمے آس ءَ سُچ اَنت ھنچو کہ مروچی آواران ءِ لَھتیں برات ءُ گھار پہ وتی زالبولانی واستہ چو آس ءَ روک اَنت اگاں کُجام بلوچ وتی راج ءِ ھاترا زھم جت کُت نہ کنت چو دودا ءُ بالاچ گورگیج ءِ وڑا گُڑا باید اِنت کہ آ دُژمن ءِ ھمراہ مہ بیت شفیق مینگل ءُ راشد پٹھان ءِ وڑا وتی مات ءُ گھارانی وتی راج ءِ گیرت ءِ سودا ءَ مہ جنت ھما پیسر ءِ مُکبراں کہ وتی دیم سیاہ کُتگ ءُ آیاں رد وارتگ گُڑا ایندگہ باید ھمیش اِنت کہ رَد مہ ور اَنت ءُ بھا مہ بنت اگاں اَنُّو ماں بچاراں پہ بلوچ ءِ واستہ چے بَچ اِتگ نہ بلوچ ءِ گیرت مُھکم اِنت دُژمن ءِ دستاں چے نہ کہ بلوچ نودربر ءُ زانتکار مُھکم اَنت وھدیکہ پنجاب ءُ پشاور ءَ چے پاکستانی پوج کئیت ءُ آواران ءُ ڈیرہ بُگٹی ءَ بادشاھی کنت ءُ پدا مئے گیرت ءَ پاد مال کنت گُڑا اِے کُتگیں کار دُژمن ءِ نہ اَنت آئی ءَ اینچو بِستّار نیست آئی ءَ اینچو ھاٹیگ مان ھم نیست گُڑا چہ کئے بیتگ ءُ بوھگ ءَ اِنت مئے وتی براتانی مھربانیانی وجہ ءَ چے بوھگ ءَ اِنت ۔
ھمے مئے گُلامی ءِ مُزہ اَنت کہ مئے برات گوں دُژمن ءِ ھواری ءَ مارا دئیگ ءَ اِنت ءُ دُگینا ءِ دیم ءَ مارا رسوا ءُ نیست کنگ ءِ جُھد ءَ کنگ ءَ اِنت بے ھیائی ءُ چم جَھلّی ءَ ھم یک سیمسرے ھَست اِنت بلے مئے لھتیں برات ھست اَنت کہ آواں بے ھیائی ءِ سیمسر ھم گوازینتگ یک مردمے کہ وتی راج ءَ وتی مات ءُ گُھاراں رسوا کنگ لوٹیت گُڑا ھما مردم پدا چون زندگ ءُ ھست اِنت لانت انت ھما برات ءَ کہ پہ چارکلدار ءَ سرجمّیں راج ءِ سودا ءَ جنت آ وت ھما روچاں کہ دُژمن ءِ پاداں کپتگ ھما روچاں چے بھا بوتگ آئی ءَ وتی ھمراھی ءَ وتی سرجمّیں لوگ ءُ میتگ ھم بھا کُتگ مروچی آواران ءِ زالبول آوار جنگ بوتگ اَنت مئے سروزیر ءُ چمچہ اسمبلی ءُ پارلیمنٹ ءَ نشتگ اَنت مجلس ءُ دیوان کنئگ ءَ اَنت لانت اِے وڑیں زندگی ءُ سیٹ ءَ ءُ سر وزیری ءَ بہ بات ۔
چار سال کُبل بوھگ ءَ چے رند اگاں بلوچ راج ھمے سروزیر ءُ چمچہ اں ووٹ دئیگ ءِ جُھدا بہ کنت گُڑا بہ زان کے دلار ءُ مُکبرانی ھمراھی ءَ راج ھم بھا بوتگ راج ءِ بھا بوھگ ءَ چے پشکپتگ دُژمن ءَ وتی روتگ جتگ اَنت بلوچستان ءِ سرا روچے پَندلّے سازیت ھمے مئے راج ءِ گُنگ بوھگ ءُ دلارانی بھا بوھگ ءَ پنجاب ءِ جاہ منند کاینت مارا لوگ ءَ چے چِست کن اَنت ءُ بَر اَنت واجہ کار اسمبلی ءَ نند اَنت ءُ پہ وتا زَرّ ءِ راہ درگیجگ ءِ جُھدا کن اَنت ھمے اکتر مینگل کہ وتا بلوچ گیرت مَندے کنت ھمائی ءَ دہ ارب زُرت چہ سرکار ءُ ھکومت ءَ مروچی نشتگ مزن مزنیں گپ کنت کہ پِلاں بلوچ من چہ بندیگ جاہ آں آجو کُتگ پلاں بلوچ من نوکری داتگ شرم ءِ گپّے پہ مئے راج ءُ پہ سروزیرانی واستہ ووٹ ءِ روچ بوتگ ھمے زالبولاں وتی سریگ سرا کُتگ ءُ شُتگ اَنت ظھور بلیدی ءُ ڈاکٹرمالک ءُ قدوس بزنجو ءُ جام کمال ءَ ووٹ داتگ ءُ سوبمند کُتگ مروچی ھما زالبول دُژمن ءِ بندیگ جاھاں بند اَنت باریں چونیں چونیں زُلم ءُ زیادتی سَگّگ ءُ برداشت کنئگ اَنت ھمے ووٹ پنڈوکانی گوْشاں مُورے ھم نہ وارت۔
وتارا گُنگ ءُ کَرّ اِش کُتگ ھمے میتگانی متبر کہ چمچہ گری کن اَنت ھمے اوں گُنگ اَنت مروچی سروزیراں دو گپ کُت نہ کن اَنت کہ واجہ آں شُما چوناھا بیگوائیں بلوچانی آجو کنگ ءِ وادا ءَ کن اِت ووٹ ءِ روچ ءَ مروچی ھما بیگواہ اَنت ابید مئے میتگانی جنین چک ءُ زالبول آوار جنئگ بوھگ ءَ اَنت اگاں شُما ایشانی واست ءَ گپ نہ کنے ما شمارا دومی رندا ووٹ نہ دئے اِیں اینچو گپ ھمے میتگانی کماش ءُ دیمپان ھم جت نہ کن اَنت پنچ سال کُبل بیت ھمے میتگانی کماش کاینت چُک ءُ زالبولاں رد دئینت کہ اے رنداں پِلاں مردم ووٹ ءَ سوبمند بہ بیت من گُشانے پہ شما کار کنت ءُ شمئے جیڑھاں گیشین اِیت مروچی ھمے واجہ کارا جست بہ گِر اِت کہ تئی میتگ ءَ آس روک اِنت تو گوں وتی بھا بوتگیں وزیر ءَ چیا گُنگے ءُ نشتگے ؟
مئے راج ءِ ورناہ آں سرکار رَد دنت ءُ چپراسی ءِ نوکری اِش دنت ءُ وتی چمچہ اِش جوڈ کنت پہ ایندگہ راج ءِ گار ءُ بیگواہ کنگ ءُ زرگرگ ءِ ھاترا ھمے چپراسی اوں وتی گوستگیں زندگی ءِ باروا کمو نہ جیڑ اِیت کہ منی ھال چے بوتگ من بایدیں چو وت وری ءُ لالچ پرست جوڈ مہ باں ھر کس شپ ءَ وپس ایت ءُ سُھب ءَ پاد کئیت ھمے چمچہ آنی پدا چمچہ گری ءِ ھاترا وتی چماں دار اِیت گُڑا اِے وڑیں راج کجا آجو بیت ءُ وتی سرزمین ءِ واھند بیت۔