بلوچی یکیں نبشتہ رھبندے لوٹ ایت: ابدلستار بُگٹی

اگاں ما لوٹ ایں کہ بلوچ راج ءِ ماتی زبان ھم گیدی ءِ دگریں زبانانی ڈول ءَ پہ دیمروئی ءِ مِنزل ءَ جُنزان بہ بیت ءُ ھمُک گالوار ءِ بلوچ ھمگرنچ ءُ یکتوار بہ بنت گُڑا مارا زیت پہ یکیں نبشتہ ءِ رھبند ءِ سر ءَ تپاک کنگ لوٹ ایت بلے بژن انت کہ وتواھیں راج ءَ ساری ءَ سَک باز سال ءُ وھد زوال کت انت ءُ انگت ءَ ھم کنگ ءَ انت گُڑا اے آکبت ءَ ما گِند ایں بلوچ سندھی، سرائیکی، ھندی ءَ باز پھر ءُ ناز ءَ وان ایت بلے ماتی زبان ءِ وانگ ءُ نبیسّگ ءَ بے ھال انت

بلے پہ ماتی زبان ءِ یکیں نبشتہ رھبند ءِ ٹھینگ ءَ بلوچستان ءِ ھر گالوار ءِ، بزاں سلیمانی، رکشانی ءُ مکرانی ءِ پنچ پنچ زبان زانتکار یکجاہ بہ بنت ءُ ھواری ءَ یکیں نبشتہ ءِ رھبندے سر ءَ وتی کاراں بُنگیج بہ کن انت انچوشکہ یک ٹیم ورک ءِ درُشم ءَ، ماں باوست ءُ راستی ءِ سر ءَ ماتی زبان ءِ یکیں سْیاھگے اڈ کن انت ءُ پد ءَ راج ءِ دیم ءَ وتی سوڑگ ءَ بیار انت کہ نی اے منّگ بیتگ ءُ مارا ماتی زبان اے ڈول ءَ نبیسّگی انت بلے بژن انت ھر کسے وت آیوکائی وتی لوگ ءِ بانے ءِ لاپ ءَ نند ایت ءُ یک رھبندے وتی گالوار ءِ ھساب ءَ جوڑ کنت ءُ راج ءَ رَد دنت کہ اے نی ماڈرن بلوچی انت۔ اگاں انگریزی ءُ ھندی ھما کْوھنیں رِد ءُ رھبند نبیسّگ بنت گُڑا اے زیر دستیں بلوچ راج ءِ بلوچی ءِ ماڈرن گرائمر چہ کُجا آتکگ۔

کمیں روچاں پیش ماتی زبان ءِ یک زانتکارے، انچوشکہ نام بانُک کارینا جھانی انت ئِے، آئی ءَ ھم یک نبشتہ رھبندے راج ءِ دیم ءَ آؤرتگ انت بژن انت کہ ھمے نبشتہ رھبند ٹھینگ ءِ گَل ءَ ناں کہ سلیمانی گالوار ءِ مردم ھست ات انت ءُ نیکہ مکران ءُ رکشان ءِ مردمے بلکیں ھپت دریا دِیر یک کارینا جھانی نامیں بانُکے ءَ ماں کبلیں بان ءِ لاپ ءَ وت نبشتہ رھبندے ٹھینتگ ءُ راج ءِ دیم ءَ آؤرتگ کہ نی ما ایشی ءَ بہ منّ ایں بزاں اے کار ءَ ھچ ٹیم ورک نیست اَت۔ من آئی ءِ نبشتہ رھبند پیلوئی ءَ ونتگ ءُ آئی ءِ سر ءَ من وتی ھیال ءُ لیکھانی رِد ءَ درنگازی ھم کت۔

البت اے ٹَوکے پد ءَ گْوش آں کہ مرچیگیں مڈرن وھد ءَ بانُک کارینا جھانی ءَ رَدیں ماڈرن بلوچی نبشتہ رھبندے آؤرتگ بلے دریگتیں باُنک ءَ ھستیں ماڈرن آسراتیانی کارمردی ءِ سوب ءَ بلوچستان ءِ کُنڈ کُنڈ ءِ زبان زانتکاراں ھمے کار ءَ بیارتین انت بزاں آیاں گوں وڈیو چیٹے کتین ءُ سوجے گپتیں بلے بژن انت کہ ھر کسے وتواھی ءَ ایوک ءَ گسریں دگاں جُنزان انت۔ نی ھال پیداک انت کہ واجہ اللہ بکش بُزدار ھم یک کبلیں بانے ءِ لاپ ءَ ایوک ءَ ماتی زبان ءِ نبشتہ رھبندے آڈ کنگ انت بلے واجہ ءَ را دزبندی انت کہ شُما ایوک ءَ اے رھبند ءَ پہ وت ءَ جوڑ مہ کن اِت بلکیں بلوچی ءِ دگریں گالوار ءِ مردماں ھم وتی گَل ءَ پہ ھمے کار ءَ ھوار کنائین اِت ءُ یک ٹیم ورکے ءِ درُشماں کار ءَ آسر کن اِت نیکہ تو ھم نبشتہ رھبند ءَ ایوک ءَ وتی وڑ ءَ بیار ئے۔

البت من گْوشگ لوٹ آں کہ باید انت راج سید رھبند ءَ بہ منّ ایت انچوشکہ راج ھستی ھُدامُرزی سید زھور ھاشمی ءَ ھمے رھبند بے کساس پٹپول ءُ وتی نمیرانیں جُھداں رند اڈ کتگ۔ چوناھیگا سید وَ بنی آدمے اَت پمیشکا آئی ءِ رھبند ءَ کمیں نزوری ھست اَت انت گُڑا ھما نزور ھستیں وھد ءِ لھتیں زبان زانتکاراں وتی ھیال ءُ لیکھانی ھساب ءَ راست کتگ اَنت بلے سَک بژن انت کہ سلیمانی گالوار ءِ وتواھیں بلوچاں ناں کہ سید رھبند منّ ات ءُ نیکہ وت پد ءَ راستیں رھبندے راج ءِ دیم ءَ آؤرتگ اش بلکیں یک وتگڑے ءَ گوں اوشت ءِ آماچ بیتگ انت پمیشکا سلیمانی شھر ءُ دامگاں بلوچ چہ ماتی زبان ءِ وانگ ءُ نبشتہ کنگ ءِ داد ءَ زَبھر انت چمیشکا مرچیگیں دامگ ءِ دور ءَ سلیمانی گالوار ءِ نبشتہ کار مارا گِندگ نہ بنت اگاں ما پیسبُک ءُ وٹس ایپ ءِ چاگردی رسانکدر بہ گند ایں گڑا مکُران ءُ روایرشُتی بلوچ بلوچی نبشتہ کن انت بلے سلیمانی گالوار ءِ مردم ھندی ءُ سرائیکی ءِ وازمندگ اَنت

سلیمانی ءِ وتواھیں زبان زانتکاراں ھمے زنگ جتگ کہ سید رھبند سلیمانی گالوار ءَ پیلو نہ کنگ ءَ انت البت ما بہ گند ایں سید ءَ ھمے گْوشتگ گُپتاری ءُ نبشتہ کاری دو جتائیں شے اَنت
کہ ھر بلوچے وتی دَمگ ءُ شھراں وتی گالوار ءَ ٹَوک ءُ توار بہ کنت بلے ماتی زبان ءِ یکیں نبشتہ ءِ سْیاھگے بہ بیت۔ سید ءَ بُن توار ءُ بدل توار ءِ رِد ءَ بلوچی آب گیشینتگ انت کہ بلوچی زگر بہ بیت۔

من وت سلیمانی گالوار ءِ بُگٹی یے آں پمیشکا من ءَ سما انت کہ بازیں جاھاں سید ءَ وتی جِند دَمگ ءِ گپ رَد منّ ات ءُ سلیمانی گالوار ءِ گال زُرت انت انچوشکہ مکران ءِ بازیں دَمگاں پہ وتی جِند”من” ءَ گْوش انت
* من نگن وریں
* من تئی کار نہ کنی
* من وپسی ءُ من ترا جنی

پد ءَ مکران ءِ لھتیں دَمگاں گْوشگ بیت
* من کار کن اوں
* من روگ ءَ اوں

سید ءَ ماں وتی رھبند ءَ گْوشتگ کہ اے گالوار انت پمیشکا چُشیں ماں نبشتہ کاری ءَ نبیسّگ رَد انت
بلکیں اے ڈول ءَ راست انت کہ سد در سد سلیمانی گالوار ءِ بیتگ انت انچوشکہ
* من نگن ور آں✅
* من تئی کار نہ کن آں✅
* من روگ ءَ آں ✅

دومی دروغ، لوغ اے وڑیں گال مکرانی گالوار لاپ ءَ ھم سَک باز انت کہ سید ءَ گْوشتگ کہ اے بدل توار انت نیکہ بُن توار اَنت باید انت گوں “گ” نبیسّگ بہ بنت انچوشکہ لوگ ءُ دروگ۔

گُڈسر ءَ من راج ءَ دزبندی کن آں کہ شُما ماتی زبان ءِ وانگ ءِ ھیل بہ کن اِت ءُ ماتی زبان ءِ نبیسّگ ءَ بہ زان ات انچوشکہ مرچی ماتی زبان دوستاں بلوچی پیسبُک تاکدیم ءُ بلوچی وٹس ایپی وانگجاہ اڈ کتگ اَنت کہ اود ءَ ماتی زبان وانینگ بوگ ءَ انت اود ءَ باسکی بہ دار ات ھما راست انت ھما نبشتہ رھبند ءَ بہ منّ ات ءُ کارمرد بہ کن ات ئِے۔ھست بات ات ءُ پہ ماتی زبان ءِ دیمروئی ءَ مُدام جُنزان بہ بات ئے۔

دلگوش: دیمروئی ءِ بزانت اے وَ نہ انت کہ ما تھنا ماتی زبان ءَ وت دربر ایں، وت ماتی زبان ءَ بہ وان این ءُ نبیس ایں بلکیں وت دربرگ ءَ رند وتی سْیاد ءُ وارساں ماتی زبان ءَ بہ وانین ایں۔ ماتی زبان ءِ نبشتہ کار ءُ نودربراں ودی بہ کن ایں ءُ راج ءِ تہ ءَ ماتی زبان ءِ بستار ءُ ارزِشتے ودی بہ کن ایں۔