بَیرَک اِت بُرزتر بات بلوچستان
ایرانی واکداران ءُ آهانی لدیگی لشکر په بلوچستانءِ مدامی زوربرد کنگ ءُ بلوچانی هلاپ ءَ وڑوڑیں پندل ساز اِتگ۰ اے انسان دشمنیں زالمانی یک پندلے دروگ بندگ اِنت۰
په دَروَر جگین، پیشّن، شئے کلگ، زیردان ءُ هیرآبادءِ آپ بندانی آپ ءِ یله کنگ ءُ هار ءِ آماچیں بلوچانی تاوان بار کنگ گجر ءِ بلوچ دشمنیں سپاه ءُ زابلی ٹولی یانی کار اَتنت۰
آهاں مردمانی کمکانءِ دیم داشت ءُ گیشتریک اِش آوار جتنت ( دُزاتنت)۰ هما سَهت ءُ دماناں که هار ءُ سیلابانی آماچیں مردم په نان ءُ ورگی آپ ءُ درمان مهتاج اتنت گجر ءِ لشکر چه یک نیمگے مزنیں دروگ بست که مردماں کمک کنگ انت ءُ چه دگه نیمگے کمک کارانی دیمپان بوتنت ءُ جم بوتگین زرّ ءُ دگه کمک اِش اوشتارینت ءُ آوار جتنت۰
دومی دَروَر ایش انت که درآمدانی پلینڈیں اداره، لدیگی لشکر ءُ آهانی زابلی ٹولی همک سال بلوچ راج ءُ بلوچستان ءِ باروا چنت سد دروگ بند اَنت تاں وتا بلوچانی دوزواه پیش بدارنت۰ آ جارجننت که بلوچستان ءَ گوں وتی دروگیں پروژه یان آباد کنگاینت! هال آنکه اے رستراں هما جانی ءُ مالی تاوان بلوچ راج ءَ داتگ ءُ دیگاینت که ماں راجدپترا بے دَرورَ اَنت۰
گپ ایش انت که دروگ بندگ هامنه ای ٹولی ءِ یکَے چه بُن هِشتان انت۰ آهاں ” تقیه “( دروگ بندگ) ءِ سرا باور ءُ ایمان هست ءُ اے ردیں کار ءَ په وت جائز زاننت.!
ما هرچے گجرانی دروگاں پاشک کنیں آ گیشتر دروگ بند انت۰ په ما گهتر همیش انت که بلوچستان ءِ راجی جنز ءِ گامگیج ترند بکنین ءُ په گهترین بانداتے ھوری ءَ دیما برویں۰
-هارءُ هیروپانی آماچیں بلوچاں هر وڑیں کمک بکنیں۰ په آهانی لوگانی بندگءَ هشر ءُ مدت بکنیں۰ دلجمیں کمک کاراں همراهی بکنیں۰ وتی کمکاں هچ بر درآمدانی دستا مه دئین ءُ آهانی سوگند ءُ هبراں باورمه کنیں۰
ـ هما بلوچ که چه بدنسیبی یا چه نازانتیءَ گوں سپاه ءُ بسیج هور تَرِّتگنت هر چے زوتر چه اے بلوچ دشمنانی رِداں دَر به بنت۰
ـ دروگ بندیں “شبکه هامون” ءَ بایکوت بکنیں۰
ـ په شهدیں بلوچی زبان ءِ وانگ ءُ وانینگ ءَ جهد ءُ کوشست بکنیں۰
ـ درملک ءِ بلوچاں تپاک بیگی انت ءُ وتی راجی جهداں پرزورتر کنگی انت۰
ـ نالائکیں مجلس ءِ گچینکاریاں بایکوت بکنیں۰
ـ په بلوچ بندیگان ءُ مولانا کوهیءِ آزاتی ءَ گیشتر جهد بکنیں۰
ـ بلوچ کمک کاراں ماں ملک ءَ هوربندی شکلے گیشترکار کنگی انت۰
ـ جهدکاریں بلوچ ازمکار، ندکار، وانندهءُ راجی کماشاں کمک ءّ مدت بکنیں۰
ـ بلوچستان ءِ هزاراں چوره ءُ یتیمان کمک بکنیں۰
ـ وتی نادراهین برات ءُ گهاران گَوْر ءُ هیالداری بکنیں۰
ـ په بلوچ ورنایانی راجی بیداری ءِ گیش کنگ ءَ جهد ءُ کوشست بکنیں.
ـ دروگ بندیں گجرانی بلوچ دشمنی کارکرد ءُ آهانی پندلاں پروش بدئیں.
ـ هما کینگی زابلی ٹولیانی مردم که بلوچ راج ءِ دژمن اَنت، بلوچ ورنایاں شزا دینت ءُ کشنت ءُ بلوچانی مال ءُ مڈی پّلَگ ءُ ورگ انت یک په یک پجّاه آرینگی انت۰
ـ گوں تپاکی ءُ همکوپگی ایرانی لدیگی سپاه ءُ واکدارانی بلوچ دشمنیں ” طرح توسعه سواحل مکران” ءَ پروش به دئیں۰
ـ هچ بر ءَ اجازت مه دئیں تاں بلوچستان ءِ زرءِ آپ ءَ هراسان، کرمان یا پارس ءِ دگه دمگان به بَرَنت۰
ـ بلوچستان ءِ بهر بهر کنگ ءِ پندل ءَ پروش بدئیں۰
ـ په بلوچستان ءِ سستگیں بهرانی نزّآرگ ءَ جهد ءُ کوشست بکنیں۰ مکران زمین، سیستان، رودبارزمین، گیاوان زمین ءُ سرهد زمین بلوچ ءِ ڈیه ءُ هنکین انت۰
ـ په رستریں هامنه ای ءِ موری بادشاهی ءِ هلاس کنگ ءَ گوں کورد، عرب، ترکمن، تورک، لُر، کاسپین، بهایی یان ءُ درویشان تپاک بئیں۰
ـ هامنه ای موری بادشاهی دراج کش وَ نبیت۰ ما را په وتی ڈیه ءِ گیاوان زمین، رودبار زمین، سیستان، مکران زمین، سرھد زمین دست گِرَگ ءَ تیار بیگی انت۰
ـ بلوچستان ءِ بیرک ءَ مُلک ءِ ھر نیمگ ءَ برزکنگی انت۰
آزات ءُ آباد بات گنجیں بلوچستان
محمد کریم بلوچ
فوریہ ۲۰۲۰
