سید کئے انت؟- سالروچ

اگاں یکے جست بہ کنت سید ظہور شاہ ہاشمی کئے انت ، مئے پسو چے بیت؟ ـ نزاناں ایدگہ بلوچ چے پسّو بہ دیاں بلے من الّم مانگیشّاں ءُ تھنا ھمے گوشت کناں “ادارہ” انت ـ

اے مزن شانیں انسان ءِ باروا ھرچی گوش ئے بے تام بیت ـ یک نیمگے واجہ شاعری کنان انت ءُ پیداک انت ـ دومی نیمگ ءَ گندے آزمانک نبیسگ ءَ انت ـ پدا چارئے گِدار نبیسی بندات ئی کتگ ـ تنیگا ھمشانی حساب کتاب کنگ ءَ بئے گند ئے واجہ ءَ بلوچی لبزانی بلاھیں گنجے وتی کوپگاں زرتگ ءُ آیان انت ـ بِل ایشی ءَ بچار اد ءَ واجہ ءَ مُلا فاضل درگیتکگ ـ اود ءَ بہ چار آ ریڈیو کراچی بلوچی انت ، سید نشتگ بلوچی ءَ لوگ لوگ ءَ سر کنان انت ءُ گوشان انت زبان ءَ دار اِت کہ مئے پجّار انت ـ مردم ھیران بیت کہ یا ھدا اے انسان انت یا سُپر کمپیوٹر یا بگند ئے بلوچی گوگل ـ

دل ءَ بدار اِت، مئے سرمچار انگت دم نہ بُرتگ ـ نشتگ مارا سوج دیگ ءَ انت کہ بلوچی چون راست نبیسگ بیت ـ یک یک لبزے یے سرا باوست کنگ ءَ انت ـ یک یک اڑے یے سرا گپ کنگ ءَ انت ـ تو دَم بُرت؟ ـ سرمچار ءَ تنیگا دَم نہ بُرتگ ـ

اولی فلم ءِ اسکرین پلے نبیسگ ءَ اِنت ؛ “ھمل ءُ ماہ گنج” ـ زان ئے مرد ءَ گوادر ءِ آجوئی ءِ جھد ھم کتگ ـ بزاں سیاست ئی ھم گون انت ـ “بلوچی زبان ءُ ادب کی تاریخ” ھم واجہ ءِ ند ءَ چے در اتکگ ـ یک مردمے ھینچو کار کت کنت؟ ـ ھو اگاں مردم ؛ سید ظہور شاہ ہاشمی بہ بیت ـ

نوں شما بہ گوش اِت ، سید کئے انت؟ ـ

منی پسو یکے ـ

“ادارہ”