بلوچی زبان ءِ مھتر سید ھاشمی بلوچ
نبشتہ کار: سکی ساوڑ بلوچ
مروچی من وش بھتے آں کہ منی سنگتی نمیرانیں سید زھور شاہ ھاشمی ءَ گوں بندوک اِنت ءُ من گوں آئی ءَ ھم دیوان آں ءُ من چہ واجہ ءَ باز دربرتگ ءُ دربرگ ءَ آں، واجہ ءِ داتگیں داد ، سر ءُ سوج منی منزل اِنت.
واجہ سید زھور شاہ ھاشمی 21 کرّا 1926 ءَ ماں گْوادر ءَ واجہ مھمد شاہ ءِ گِس ءَ ودی بیت،واجہ ءَ وتی ودی بوگ ءَ بہ گر داں نمیرانی ءَ، شپ ءُ روچ پہ زبان ءِ رکینگ ءَ جھد کنت، آئی ءَ را ھمے زبان دوستی ءَ یک راجدوستے جوڑ کنت کہ آئی ءَ وتی زند پہ ھمے راج ءِ واستا ندر کرتگ، واجہ ءِ جھد ءُ جپاکشی ءِ برورد اِنت کہ مروچی بلوچی زبان زندگ اِنت، من گْوش آں اگاں نمیرانیں سید زھور شاہ ھاشمی یک بلوچ شیرزالیں ماسے ءِ شِکم ءَ ودی مہ بوتیں گڑا بوت کرتگ اَت کہ مئے زبان ایدگہ نزوریں زبانانی وڑ ءَ بیگواہ بوتگ اَت، سید ءَ گژن ءُ تن اوپار کرتگ ءُ میتگ پہ میتگ گول اِتگ ءُ زبان ءِ رکینگ ءِ ھاتر ءَ گال یکجاہ کرتگ ءُ مروچی ھما گال مارا سیدگنج ءِ دروشم ءَ دزکپ اَنت.
نمیرانیں سید ھاشمی یک زبانزانتے بوتگ ءُ آئی ءِ رجدپتر ونتگ ءُ نبشتہ کرتگ، آ یک مردمے بوتگ بلے راج ءِ مھتر بوتگ،آئی ءَ زبان ءِ ھرچ پِڑ ءَ کار کرتگ، آزمانک، گِدار، شرگداری، نمدی، راجدپتری، لچہ کاری دگہ دگہ وتی نَد تاچینتگ ءُ ھما جھد ءُ جپاکشیانی برورد اِنت کہ مروچی مارا پہ آسانی ءَ نکان دزکپگ ءَ اَنت.
بلوچی ءِ اولی گِدار نازک اِنت کہ مروچی مئے دیم ءَ اِنت، واجہ ءِ کِشتگیں چنال اِنت کہ مروچی دگہ سک باز کواس ءُ زانتکار ھمائی ءِ شون داتگیں راہ ءَ رھادگ اَنت ءُ زبان ءِ رکینگ ءِ جھد ءَ اَنت.
نیمرانیں سید زھور شاہ ھاشمی ءَ وتی اے اُمر ءَ راج ءَ را بے دروریں داد بکشاتگ، واجہ ءَ را ٹی بی ءِ نادراھی ءَ باز بیوار کرتگ بلے واجہ ءِ مزن پگری ٹی بی ءِ نادراھی ءِ دیم ءَ چو البرز ءِ کوہ ءَ مِک بوتگ.
واجہ ءَ بلوچ راج ءَ را 29 کتاب ٹیکی داتگ کہ اے کتابانی تہ ءَ 18 کتاب چاپ ءُ شنگ بوتگ ءُ دگہ 11 کتاب پہ چاپ ءُ شنگ کنگ ءَ ایر اِنت.
چاپ بوتگیں کتاب چو اے وڑ ءَ اَنت
1-سستگیں دستونک
2 -بلوچی بنگیجی
3- بلوچی سیاھگ ءِ راست نبیسگ
4- جُز,, عمّ بلوچی
5-میرگند
6-بلوچی اردو بول چال
7-انگر ءُ ترونگل
8- بْرتکگیں بیر
9-تْراپکنیں تْرمپ
10-نازک
11-سیدگنج
12-سچکانیں سسّا
13-شکّلیں شھجو
14-گسد گْوار
15-سید نمدی
16-بلوچی زبان و ادب کی تاریخ (ایک جائزہ )
17: شھلچہ کار (ملا پازل ءِ زند ءُ ازم ءِ بارہ ءَ نبشتگیں کتاب )
18: چکاسنگ۔ (شرگداری)
ھما کتاب کہ نبشتگ ءُ ایر اَنت بلے پہ چاپگ ءُ سرجم کنگ ءَ مھتل اَنت، ایش اَنت
19-بلوچی دربر
20 -پاپولر پوئٹری آف بلوچ
21-گورکی ءِ مات ءِ بلوچی
22-زوت گر ءُ دیر ھِلّ
23- گمے تالان کناں
24- اوِستا ءِ بلوچی
25- ھنکین
26: سستگیں دستونک (اردو)
27: شھگوشتن شاھار
28:بلوچی دلپسندیں لچھکاری
29: گاریں کلدار
واجہ ءَ وتی سرجمیں اُمر ءَ بزاں پنجاہ ءُ دو سال ءَ بلوچ راج ءَ بیست ءُ نُھ کتاب داد بکشا اِیت، من گْوش آں اے بلوچ راج ءِ وش بھتی یے نہ اِنت گڑا دگہ چے یے؟
بلے بژن کہ ما سید ءِ کدر نہ زانتگ ءُ آئی ءِ دادتگیں دادانی ارزشت ءَ نہ زان ایں ءُ انگت ما نند ایں کہ واجہ ءَ ھچ نہ کرتگ.
اگاں واجہ ءَ ھچ نہ کرتگ گڑا تو بہ کن اگاں واجہ ءِ کار پَشکپتگ اَنت گڑا آ منی ءُ تئی پرز ءُ زمہ واری اِنت کہ ما ھما پَشکپتگیں کاراں دیم ءَ بہ بر ایں نا کہ چہ راہ ءَ گِسر بہ بہ ایں.
من ھرچی نبشتہ بہ کن آں کم اِنت ءُ واجہ ستا ءِ مھتاج نہ اِنت پرچاکہ واجہ ءِ داد وت آئی ءِ نمیرانی ءِ چیدگ اَنت، واجہ تئی دادتگیں داد مئے زندگ بوگ ءِ نشانی اَنت.
f acebook.com/photo.php?fbid=679062672925347&set=a.157418478423105&type=3&theater
