کندیل بَلان اِنت – سکی ساوڑ

نبشتانک: کندیل بَلان اِنت

نبشتہ کار: سکی ساوڑ

دی بلوچستان پوسٹ

شپ سک تھار اَت، کچکانی کْوکگ ءُ ھولگ اَت، چِرتانی چِری چِری اَت، گرماگیں شپانی سارتیں جھل گْوات لھم لھم ءَ کَشگ ءَ اَت، نزیک ءُ گْوراں کسانیں روژنے ھم گِندگ بوگ ءَ نہ اَت، سک دُور مزن دَگ ءَ یک ءُ دو گاڑی ءِ کندیل گِندگ بوگ ءَ اَت کہ روٹک ءِ نیمگ ءَ روگ ءَ اِت اَنت، ھمساھگ لال بی بی ءِ زھگ گُژن ءَ گریوگ ءَ اِت اَنت ءُ آ وتی زھگانی سھڑینگ ءِ جھد ءَ اَت دانکہ زھگ بہ سھڑ اَنت بلے اے زالمیں گُژن ءِ آس پہ تسلاہ دیگ ءَ ھلاس بوگ ءِ وڑ ءَ نہ اَت، ھمے وھد ءَ کماش اُسمان تھاری ءَ لَٹ ءُ بند کنان ءُ لال بی بی ءِ گِدان ءَ آھت ءُ توار ئِے کرت ” او ماس لال بی بی تو آگاہ ئے”.
لال بی بی ءِ زھگاناں گُژن ءَ انگیراں کرتگ اَت، آئی ءَ اے وھد ءَ واب کجا امباز اِت کرت کنت!، ھمے دمان ءَ آئی ءِ یک زھگے گریوگ ءَ لگ اِت اماں نان انگت نیست؟ اُسمان ءَ زانت کہ لال بی بی آگاہ اِنت، لال بی بی ءَ پسّو دات، ھَو ابا من آگاہ آں ھیر اِنت تو اے وھد ءَ آھتگ ئے، زاناں دُرناز وش وش نہ اِنت( دُوناز اُسمان ءِ لوگی اِنت،لال بی بی چوناھا سرپد اَت کہ دُرناز ماہ ءُ نوک اِنت پمیشکا آئی ءِ شک ھمود ءَ شُت)”؟

اُسمان ءَ گْوشت” من ھمے ھاتر ءَ آھتگ آں کہ درناز وش وش نہ اِنت، تو چوش کن بیا کہ آ بیوار اِنت، منی ماس لال بی بی زاناں تئی زھگاناں نان نہ بوتگ کہ گریوگ ءَ اَنت؟ تو بھتاور داں اد ءَ بیاتکیں، یک ھمساھگے وتی دومی ھمساھگ ءِ انچُکیں دردے وارت مہ کنت دگہ چِہ کارے ءَ کیت، اما یکے دومی ءِ ھمساھگ ایں ، اے وڑے نہ اِنت زھگ پہ دپارے نان ءَ بہ پِلیسک اَنت ءُ تو داں اد ءَ میا ئے! بیا منی گِس ءَ نان ءَ بر وتی زھگاناں بہ دے بلے زوت کن درناز بیوار اِنت”.

لال بی بی زوت زوت وتی جاہ ءَ پاد آھت ءُ وتی زھگاناں گْوشت ئِے” انوں من پہ شما نان کار آں بور اِت ءُ بہ وپس اِت، اللہ ھیر بہ کنت باریں درناز ءِ تبیت چون اِنت، مدام زھگ ءِ سر ءَ سک بیوار بیت، اد ءَ دگہ آسراتی یے وَ نیست کہ مردم نادراھے داں نادراھجاھے ءَ سر بہ کرت بہ کنت داں ساہ ئِے بہ رک اِیت”.
لال بی بی ءَ وتی زالبولی ڈَکّ ءُ درمان زُرت اَنت ءُ اُسمان ءِ ھمراھی ءَ اسمان ءِ گِس ءَ آھت ءُ سر ئِے چیر دات داں پیسر ءَ لھتیں زالبول درناز ءِ سرون ءَ نشتگ ءُ تسلاہ ئِے دیگ ءَ اَنت ،بلے گِدان ءَ کندیل گْواہ کنگ ءَ نہ اَت، لال بی ءَ جُست کرت” زاناں کندیل نیست کہ روک نہ کن اِت اے وڑ ءَ سک تھار اِنت ھچ میم نہ بیت”؟

اُسمان دزموش کناں بوت ءُ کندیل ئِے روک کرت ءُ گْوشت ئِے ” من پیسر ءَ اے ھاتر ءَ کندیل روک نہ کرتگ کہ تیل ئِے کم اَنت ءُ پد ءَ امارا دروہ اِیت، من پہ ھمے ساھت ءِ ھاتر ءَ پیسر ءَ کندیل روک نہ کرتگ”.

کندیل ءِ روک کنگ ءَ داں نیم ساھتے ءَ پد ءَ یک دگہ کندیلے ودی بوت داں سرجمیں گِدان ئِے روژنا کرت، وھدے اولی گریوگ ءِ توار اُسمان ءُ درناز ءِ گوشاں کپت داں آ چَہ گَل ءَ بال بوت اَنت ءُ درناز ءَ گْوشت پہ تئی گریوگانی توار ءَ نہ کرز آں ءُ اے بُنگپتگیں دل کمو سارت بوت، پد ءَ جُست ئِے کرت” زھگ چی یے”؟
لال بی بی ءَ پسّو دات ” مراد بات درناز شمارا بچکے بوتگ”. ھمے گپ ءَ دنیا ءُ جھان ءِ وشیاں گِدان وتی امبازاں زُرت، اُسمان آھت ءُ وتی کندیلیں بچ ئِے چار اِت ءُ وتی دستاناں ماں بروتاں بُرت ءُ گْوشت ئِے” ماشاءاللہ”.
لال بی بی ءَ وتی زھگانی واستا نان زُرت ءُ گِس ءَ رھادگ بوت.

وھد گْوزان بوت ءُ کندیل کمو مزن بوت، وانگجاہ ءَ شُت ءُ وانگ ئِے بنا کرت، بازیں بزگی ءُ جپا کشی یے ءَ پد وتی وانگ ئِے سرجم کرت ، وانگ ءِ وھد ءَ ھم سکیں زانتکار ءُ روژنا پگریں نودربرے اَت، وتی راج ءِ بزگی ءُ پدمنتگی ءِ بارو ءَ جیڑگ ءَ اَت، مدام بزگی ءِ ھلاس کنگ ءَ وتی زانت ءِ کندیل ئِے شاھگان کرتگ اَت، وتی روژنائی ءَ را روچ پہ روچ تالان کنان اَت، شھدربرجاہ ءُ مزن شھدربرجاہ ءَ بوتیں یا میتگ ءُ شھرے ءَ بوتیں کندیل ءَ وتی روژنائی داد بکشات، مدام نودربر ءُ ورنا چو بالوانی وڑ ءَ کندیل ءِ تواب کنگ ءَ اِت اَنت ھر کس ءَ ھمے لوٹ اِت من چَہ روژنا زِبھر مہ باں ، ورنا مدام کندیل ءِ چاریں آتراپاں ساڑی اِت اَنت ، آئی ءِ ھمے کَش ءِ ورنا آئی ءِ داتگیں روژن ءَ میتگ پہ میتگ ، شھر پہ شھر تالان کنان اِت اَنت.

اللہ ءِ داتگیں ھمے ھستی ءُ روژنائیں کندیل پہ راج ءُ لبزانک ءَ بے دروریں داد بکشات، ھمے داد ءَ پہ راج ءَ دگہ بے دروریں داد بکشات ، دگہ ھزاراں کندیل چاگرد ءِ تہ ءَ روک کرت داں روچ ء مروچی ھمائی ءِ روک کرتگیں کندیل روژنائی تالان کنان اَنت،بلے ھمے کندیل ءَ اھَد ءِ زوراکانی ھمک بد ءُ سِلکاریاناں چَہ تھاری ءَ کَشان ءُ راج ءِ دیم ءَ پَدر کنگ ءَ اَت پمیشکا آواناں اوپار نہ شُت ءُ آواں روچ ء رھمانی ءَ 1 جون 2011 ءَ ماں گُلیں شال ءَ چار راہ ءِ سر ءَ آئی ءَ را تیرانی آماچ کرت، بلے زوراک اے سرپد نہ اِت اَنت اے کندیل یک گِدان ءُ شھرے ءِ تہ ءَ بندیگ نہ اِنت کہ پہ چار آس داتگیں تیر ءَ ھلاس بیت بلکیں مروچی میتگ پہ میتگ، گِدان پہ گِدان ءُ شھر پہ شھر تالان اِنت، اے کندیل ءِ ایرموش کنگ یک دروگے ءُ چَہ جیڑگ ءَ آ دیم اِنت.

مروچی کندیل ءِ روژن بَلان اِنت،مروچی کندیل ءِ روژن ءَ ھمک ورنا ءِ دل روژنا کرتگ، مروچی ھمے کندیل ءَ تھاری ءَ را داں ھَدے ءَ گُٹگیر کرتگ ءُ مروچی تھاری چَہ کندیل ءَ تچان ءُ بیگواہ بوان اِنت.
داں جھان ھست کندیل بَلان اِنت ءُ بَلان بات.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت