روکپتی بلوچستان ءَ ایران ءَ دو میدان ءَ سوبمندی رستگ اولی میدان ایش انت که

روکپتی بلوچستان ءَ ایران ءَ دو میدان ءَ سوبمندی رستگ اولی میدان ایش انت که اودا بلوچانی تھا راجدوستی/ nationalism ھلاس کتگ ءُ راجی جیڑہ ءَ را گوں دین ءَ ھمگرنچ کتگ ـ بلوچان گشگ بیتگ که شما ھک ءُ اکبال

ھمے ھاترا ءَ دیگ نه بیت که شما سُنّی انت تھران ءَ شیعه آنی سرکار انت پمیشه شمارا ایران ءِ سرکار ھچ دابیں بنکی آسراتی نه دنت این نادراھی ھم مئے بلوچیں ملا آں وت بلوچستان ءِ تھا انجیکت کتگ نی بازیں بلوچان وتی راجی جیڑہ بزانکه غلامی شموشتگ دینی ءُ مذھبی راہ گپتگ داشتگ که ما واکی سنی آں مارا ھمے ھاترا ھچ سیت ءُ نپ نه رسگ ءَ انت چو ایران ءِ ایندگے راجانی وڑا که آیان رسگ ءَ انت ـ

دومی مھمیں ھبر ایش انت ھما که رودرتکی بلوچستان ءَ بزانکه پاکستان ءِ اشغالی کتگیں بلوچستان ءَ بیست سال انت آجوھی ءِ جنگ بندات انت ایران ءَ په وت لھتین نام نھادیں بلوچ رھشون جوڑ کتگ ءُ آیانی ھاترا سازمان ٹھینتگ این بلوچین رھشون ءُ ایشانی سازمانان گرد انت ھر جاہ ءَ ھمے واھو/ نعرہ ءَ جن انت که مارا ایران فیدرلزم بدنت ءُ ما چون ایندگے ایران ءِ آبادین راجانی داب ءَ برابری لوٹاں این ھما مردم ءُ سازمان/ Party/ Organization انت که ایشان کامل ایران ءِ القدس ءُ سپاہ پاسداران ءِ انقلاب کمک کنگ ءَ انت ایشانی مول ءُ مراد یا تارگت ھمیش انت که رودرتکی بلوچستان ءِ آجوھی ءِ روکین آس ءِ برانز ھچ داب ءَ روکپتی بلوچستان ءَ اثرمند مکنت ءُ ایران دزگیر کتگیں بلوچستان ءَ ھچ وڑیں راجی جنز چیست مه بیت چیا که رودرتکی بزانکه پاکستانی دزگیر کتگیں بلوچستان ءَ آجوھی جنز اگان سوبمند بوت گرا الم ایرانی دزگیر کتگیں بلوچستان ءِ سرا وتی اثران دور دنت ـ

ھمے درگت ءَ ایران ءِ القدس ءَ سک دیر انت پاکستانی دزگیر کتگیں بلوچستان ءِ آجوھی ءِ آس ءَ توسگ ءِ جھد ءَ انت یک حدے ءَ دان ایران سوبمند بیتگ چیا که ایران ءَ لھتیں نام نھادین رودرتکی بلوچستان ءِ رھشون ءُ آیانی چیریں سازمانانی مرم بھا زرتگ انت ـ این الزام نیاں این راستی انت ایشانی زنڈین دلیل است ءُ زمینی راستی ھم بلوچ راج ءِ دیم ءَ پدر انت ـ

گڑی ھبر ایش انت که ایرانی سرکار ءَ رودرتکی بلوچستان ءِ رھشون ءُ سازماناں کارمرد کنگ ءَ انت روکپتی بلوچستان ءِ تھا آجوھی لوٹوکیں بلوچانی ھلاپ ءَ ایشان بازین ھنر کتگ ءُ ھمے الزام ءَ جنگ ءَ انت که روکپتی بلوچستان ءِ بلوچ دینی جنگ ءَ انت یا اسلام ءِ نام ءِ سرا جنگ کنگ ءَ انت ایشاناں ما پیسر ءَ گوشتگ که بلوچ ءَ را گوں ھچ دابین مذھبی جنگ ءُ مڑاں سیادی نیست روکپتی بلوچستان ءِ تھا ھر دابیں دینی سازمان ببان آ بلوچ راج ءِ آجوھی ءِ جنز ءِ دوزاہ نیاں ـ بلوچ تھنا راجی آجوھی لوٹ ایت بارھا الزام مه جن ات که روکپتی بلوچستان ءِ بلوچ دینی جنگ کنگ ءَ انت ـ امیر دوست محمد بارانزھی ءُ دادشاہ ءِ جنگ په دین ءُ مذھب ءِ نام نه بیتگ آیان راجی جنگ کتگ غلامی ءِ ھلاس کنگ ءِ ھاترا گوں ایران ءَ جنگ کتگ ـ

نبشته .. امینه سربازی

f  https://www.facebook.com/photo?fbid=962412527561683&set=a.399026127233662