گُراگ ءُ مار: بوھیر کُلانچی

گراگے ءَ انچیں درچکے ءِ سر ءَ کدو کتگ ات کہ آئی ءِ چیر ءَ مارے ءِ ھُونڈ ات. وھدیکہ گراگ ءِ ھیکاں چورک در آؤرتگ ات ءُ آ پہ وتی چُکّاں وراک ءِ شوھاز ءَ شتگ ات مار ءَ آئی ءِ چُک وارتگ ات انت. گراگ کہ گوں ورگاں اتکگ ات ءُ وتی چُکّ ئِے کدو ءَ نہ دیتگ ات انت گڑا چہ مار ءَ جست ئِے کتگ ات کہ باریں منی چُک کجا شتگ انت گڑا مار ءَ بے نیازی گوشتگ ات کہ من نہ زان آں. دو سئے رند ءَ گراگ ءِ چُک ھمے رنگ ءَ گار بیتگ انت. گراگ ءَ زانتگ ات کہ آئی ءِ چکّاں مار ورگ ءَ انت.

یکروچے گراگ ءَ گوں مار ءَ گوشت کہ منی ھمساھگ تو ئے ءُ منی چکّاں ھم تو ورگ ءَ ئے. مار زھر گپت ءُ گوشت ئِے کہ تئی چک من وارتگ انت ترا ھرچ زھمے جنگی انت بہ جن تو اگاں گیشیں گپ بہ کن ئے من ترا ھم ور آں.

بزگیں گراگ ءَ زانتگ ات کہ اے زوراوریں مار ھرچ وڑ ءَ چہ آئی ءَ تیار تر انت ءُ آ اے زوراک ءِ دیم ءَ بیوس انت پمیشا بے ترک ءُ توار ءَ بال ئِے کُت.

ترّان ترّان آئی ءِ سر تلاوگے ءَ کپت. آئی ءَ دیت داں بادشاہ ءِ ذال تلاوگ ءَ جان شودگ انت ءُ آئی ھار تلاوگ ءِ لمب ءَ گدانی سر ءَ ایر انت. گراگ ءَ ھینژ کُت ءُ ھار چانکاں چت ءُ در شُت.

سپاھیاں دیت داں گراگ ءَ بانک ءِ ھار چامپ اتگ ءُ بال انت آ گراگ ءِ رند ءَ کپت انت. گراگ پہ بال ءُ سپاھی پہ میدان داں گراگ درچک ءِ گور ءَ سر بیت ءُ آئی ءَ ھار مار ءِ ھونڈ ءَ دور دات ءُ وت گشادی ءَ شُت ءُ جاھے ٹپّ ات. سپاھیاں دیت کہ گراگ ءَ ھار ھونڈ ءَ چگل دات آھاں ھونڈ لٹّ جنان کُت ءُ گوں لٹاّنی توار ءَ مار ءَ چہ ھونڈ ءَ سر کشّ ات. سپاھیاں دیت داں بانک ءِ ھار مار ءِ گور ءَ انت آھاں مار کشت ءُ بادشاہ ءِ ذال ءِ ھار اش بُرت ءُ سر کُت.

اے رنگ ءَ مار مُرت ءُ گراگ چہ زوراور ءِ کھراں آجو بیت.

f  https://www.facebook.com/photo?fbid=812246269537179&set=gm.1771350013032395