سنوتاپ : شہ اسماعیل امیری

 سنوتاپءِ دلبندءَ نبشته ببیت: بلوچستانءِ پهریگ و نمیران

په دوئیں جهانی جنگانی کشگ بیتگینانی یادءِ دارگ و احترامءَ، هرسال یازده نومبرءَ، بریتانیاءِ مردم دو مِنِٹ بے توار بَیَنت و اوشت انت. حکومتءِ سروک، سیاسی سروک و بادشاهی کهول هم همے یادءِ احترامءَ هور بَیَنت. دو مِنِٹءِ خاموش اوشتگ، یازده نومبر سُهبءِ ساعت یازدهءَ بیت انت.

  ” سنوتاپ” Cenotaph

 یادگار چیدگے انت په جهانی جنگءِ کُشگ بیتگیناں که دگه هند و دمگاں گور کنگ بیتگ انت.

اے یاتمانی چیدگ، لندنءِ “وائیٹ هال”ءَ ۱۹۱۹-۱۹۲۰ءَ لِک کنگ بیتگ. بریتانیاءِ هما وهدءِ مزن وزیر ” لوید جورج”ءِ واهگ و لوٹءِ پدا، ” سر ادوِن لوتنز”ءَ ڈِزاین و جوڑ کتگ. همے یاتمان، اولسرا چه دارءَ جوڑ کنگ بیت و جوڑ کنوکانی گمان همیش ات که اے یک هدارُکی یادگاری میڑی یے بیت انت؛ بلے وهدے که مردمانی آیگ و مُچی و بے حسابءَ پُلّانی ایر کنگ اش دیست گڑا فیصله بیت که اے یک دائمی یادگارے ببیت. اے دابا، ” سنوتاپ” چه سنگءَ تراشگ و اوشتارینگ بیت و آئیءِ سرا ایوکا اے لبز کوچگ بیت انت:

 The Glorious Dead

“سنوتاپ”، چه  یونانی دو گال ” هالیک ، گور”ءَ زیرگ بیتگ بزاں هالیکیں گور.

مروچی ( یازده نومبر ۲۰۲۱) ساعت یازدهءَ، من ٹی وی چار ات و دیست که بریتانیاءِ مزنیں شهراں چو که: لندن، گلاسگو، بلفاست ….ءَ مردم و سیاستدان هوریگءَ هماهانی یادءَ په احترام اوشتاتگ انت که زند اش په یک مقصدےءَ ندر بیتگ. همے سیاسی سروک و مردمانی تها، دگه دگه فکر و رهبندءِ منّوک هوار اتنت. گوں اسکاتلندءِ سر وزیرءَ- که ” اسکاتلندءِ آزاتی و جدائیءِ جهدءَ کنگءَ انت – دگه سیاسی سروک هم اوشتاتگ اتنت.

دو روچءَ رند – سیزده نومبر- ،  بلوچ شهیدانی یاد و احترامءِ دارگءِ روچ انت. باریں مئے مانمیاتکیں سیاسی سروک، گل و هوربند، په بلوچ و بلوچستانءِ شهیدانی یادءِ دارگ و احترامءَ، دو مِنِٹءَ یکجاه و هوریگءَ ، بے توار اوشت انت! دریگتے هنچوش ببیت انت و آهانی مازگءَ، بلوچستانءِ نمیرانیں زهگانی ” سنوتاپ”ءِ دلبندءَ نبشته ببیت: بلوچستانءِ پهریگ و نمیران.