وھاب کریمزھی – گونڈین دروشمے چہ درانڈھی ءِ سفرءَ
دی ماہءِ ۱۳۵۷ دیکتاتورین شاہ گون وتی خاندانءَ چہ ایرانءَ تتک ءُ شُت۔
۱۲ بھمنءِ ۱۳۵۷ هجری شمسی(۱۱فوریہ ۱۹۷۹ میلادی) ھَرَک جُڈالین ملا خمینی وتی شومین پاد مان ایرانءَ ایر کُتءُ ۲۲بھمنءِ ھمے سالءَ انقلاب سوبین بوت۔
گون ملا خمینیءِ آیگءَ شیعہ گری ءُ تروریسم مان ایران ءُ دگنیاءِ اے دگه مُلکان ردُوم کُت۔ایرانءِ شاھی نظام ءُ ھنوگین ملاخمینیءِ اسلامی نظام ءِ واکدارانی کوشست ھمے بوتگ ءُ انگت ھست انت کہ بلوچ راجءَ چہ گزرانی ، دودءُ رُبیدگی ءُ اجتماعی ءُ راجی شعورءُ زانتءَ زبهر بکن انت۔ ھنوگین ملا خمینیءِ اسلامی نظامءِ دورءَ ، روچے نیست کہ مان بلوچستانءِ ھر کونڈےءَچُنت نپر کُشگ یان کہ پاھو دیگ مبیت ءُ ھر روچءُ ھرھپتگ بے گُناھین ورنایان پاھو دیگ بنت ءُ بے گناہ بلوچ راجءِ نوکین نسلءُ اوبادگانءَ مان تُرسناک ءُ بیمناکین بندیگ جاھان بندیگ ءُ لٹ ءُ کُٹ بنت۔
من پہ وتی زندءِ بچینگءِ ھاترءَ ۱۳۵۹آھر سرءَ ، دیم پہ کراچیءَ شُتان ۔آوھدءَ منی ناکو کویتءَ کارءَ ات۔ چہ کراچی کولو د یمدات کہ پہ من ویزاے بگر ءُ دیم دے۔ ھمے درگتا پاسپورت ءُ شناختی کارتءِ چِنءُ لانچءَ اتان ۔ سئے ماہءَ رند ویزا آتک۔ کویت ءِ روگءَ رند ،کار بُنگیج کُت۔ بازین مُلکی مردم مان کویتءَ کارات ۔ سالے و کپے گوست مان یک بلوچی دیوانےءَ گون سازمان مجاھدینءِ مالی سروک واجہ“گل مھمد“ دچار کپتان .
چونائیءَ گون بھمن ءِ انقلابءَ،بلوچستانءِ نوکین نسل ءُ اوبادگءِ تھا بلوچ دوستیءِ راجی مارشت ءُ جزبگ گیشتر گیشتربوان ات۔
۲۶ دی ماہءِ ۱۳۵۷ دیکتاتورین شاہ گون وتی خاندانءَ چہ ایرانءَ تتک ءُ شُت۔
۱۲ بھمنءِ ۱۳۵۷ هجری شمسی(۱۱فوریہ ۱۹۷۹ میلادی) ھَرَک جُڈالین ملا خمینی وتی شومین پاد مان ایرانءَ ایر کُتءُ ۲۲بھمنءِ ھمے سالءَ انقلاب سوبین بوت۔
گون ملا خمینیءِ آیگءَ شیعہ گری ءُ تروریسم مان ایران ءُ دگنیاءِ اے دگه مُلکان ردُوم کُت۔ایرانءِ شاھی نظام ءُ ھنوگین ملاخمینیءِ اسلامی نظام ءِ واکدارانی کوشست ھمے بوتگ ءُ انگت ھست انت کہ بلوچ راجءَ چہ گزرانی ، دودءُ رُبیدگی ءُ اجتماعی ءُ راجی شعورءُ زانتءَ زبهر بکن انت۔ ھنوگین ملا خمینیءِ اسلامی نظامءِ دورءَ ، روچے نیست کہ مان بلوچستانءِ ھر کونڈےءَچُنت نپر کُشگ یان کہ پاھو دیگ مبیت ءُ ھر روچءُ ھرھپتگ بے گُناھین ورنایان پاھو دیگ بنت ءُ بے گناہ بلوچ راجءِ نوکین نسلءُ اوبادگانءَ مان تُرسناک ءُ بیمناکین بندیگ جاھان بندیگ ءُ لٹ ءُ کُٹ بنت۔
من پہ وتی زندءِ بچینگءِ ھاترءَ ۱۳۵۹آھر سرءَ ، دیم پہ کراچیءَ شُتان ۔آوھدءَ منی ناکو کویتءَ کارءَ ات۔ چہ کراچی کولو د یمدات کہ پہ من ویزاے بگر ءُ دیم دے۔ ھمے درگتا پاسپورت ءُ شناختی کارتءِ چِنءُ لانچءَ اتان ۔ سئے ماہءَ رند ویزا آتک۔ کویت ءِ روگءَ رند ،کار بُنگیج کُت۔ بازین مُلکی مردم مان کویتءَ کارات ۔ سالے و کپے گوست مان یک بلوچی دیوانےءَ گون سازمان مجاھدینءِ مالی سروک واجہ“گل مھمد“ دچار کپتان .
چونائیءَ گون بھمن ءِ انقلابءَ،بلوچستانءِ نوکین نسل ءُ اوبادگءِ تھا بلوچ دوستیءِ راجی مارشت ءُ جزبگ گیشتر گیشتربوان ات۔
بازین بلوچے گون اے دگہ سراسری تنظیمان ھوربوت انت تاں وتی پدمال کُتگین راجی حق ءُ حقوقءَ چہ اے راہءَ پَد بجن انت یا بگرانت۔
وھد پہ تیزیءَ روان ات۔ چُنت ماہے گوست ، یک روچے واجہ گل مھمد آتک ءُ گون منءَگوشت کہ بیا مئے تنظیمءِ باسک جوڑببی ، من ھو کُت . باسک ءِ چَندہ(حق عضویت) ۱۰ دینار ات ۔ آ وھدءَ مان کویتءِ بازار بورس کارءَ اتان کارءُ بار شرات ءُ ۱۰دینارءِ دیگءَ منءَ نہ تورینت.
گل مھمد چہ سیٹین ایرانی عربان، کمبل ءُ کالین پچ گپت ءُ گون مئے ھوریءَ اے دگہ جاھان بھا کُت ءُ چُنت دانگ من چہ گُل مھمدءَ پہ بھا زرت. لھتے کہ بھا نبوت واجہ ءَ وتی کِرءَ ایر کُت انت۔
۱۳۵۹ءِ آھر ءُ ۱۳۶۰ اولی سرءَ بلوچ راجءِ نسلءُ اوبادگ مارات ءُ پوہ بوت کہ سراسری تنظیمانے ھوریءَ حق ءُ حقوق گرگ نبنت۔
گُڑا بازینے چہ بلوچستانءِ راجی جُھدکاران گون وت شؤر کُت ءُ پہ اے نتیجہ رست انت کہ گون بلوچی تنظیمءَ ھوار ببنت۔ لھتے چہ بلوچستانءِ نوکین نسل ءُ اوبادگ ءِ جُھدکاران چہ سازمان چریکہای فدائیان خلق ءُ سازمان مجاہدین خلق دراتکنت ءُ گون بلوچستانءِ راجی زرمبشءَ ھور بوت انت ءُ وتی نوکین سیاسی جہدءَ را بنگیج اش کت۔
ماہ ءُروچ پہ تیزیءَ روان ات۔ بلوچستانءِ راجی زرمبشءِ اولی وت واجھی ءِ بر نامہ۱۳۶۲ سالءَ مان کویتءَ چه مجاھد نامینبلوچے شنگ بوت۔ ( واجہ مجاھد سازمان مجاھدین ءِ مردم نہ ات آئی نام مجاھد ات) وت واجھی برنامہءِ وانگءَ رند گل مھمد،منءُچُنت دگہ کِرءُ گوری بلوچ وتی ھُب ءُ واھگءَ گون زرمبشءَ در شان کُت۔
بلوچستانءِ راجی زرمبش ءِ برنامہ خودمختاری گونڈین وھدےءَ رند مان بلوچستانءِ کُند کُنڈءَ شنگ ءُ تالان بوت ءُبلوچستانءِ ھر کُنڈےءَ زرمبش ءِ نامءُ توار ات۔
مدتے رند ، من و واجہ گل مھمد کویت ویل کُت ءُ کراچی ءَ آتکین ۔ مجاھدانءِ مردم سھیگ بوت انت کہ گل مھمد کراچیءَ آتکگ۔مجاھدانءِ سروک مان کراچی ءَ گل مھمدءِ دُمبءَ آتک انت ۔ مجاھدان ءِ ٹولی لوٹ ات کہ گون گل مھمد ءَ گندءُ نند ءُھساب ءُ کتاب بکنت۔
کُومباڑءَ(کُمباڑ مان لیاریءَ انت ءُ آ وھدءَ بلوچستانءِ بسانی اڈہ ات) وھد ءُ کرار ایرکنگ بوت ءُ ما چُنت سنگت گُل مھمدءِھمراہ بوت این۔ مئے دل ادان ڈڈات کہ گجر( مجاھد) چہ ما باچ برت نکنت ۔
گند ءُ نندءِ کسہ دراج انت ءُ منءَ ھں شری ءِ سرءَ جزئیات یات نہ انت ۔ دیوان ءَ رند ما ھر یکےدیم پہ وتی لوگان رھادگ گِپتین۔
بلوچستان راجی زرمبش ءِ سنگت مان گل مھمدی لینءَ لوگے کرایہ کُتگ ات۔ مئے گندءُ نند ءُ گپءُ ترانءِ دیوان جاہ ات ۔ ھمدان من گون مرحوم یارمھمد بے وتن ،”حمید” “جیند” “افضل” “نصیر” اسماعیل امیرئ ، مرحوم جلال ءُ لھتے دگہ سنگت آشنابوتان ۔
سال۱۹۸۵ءِ آھری سرءَ ات ۔ زمستانءِ موسم و ھوا سارت ات۔ یک روچے گل مھمد پہ گندُکےآتک سید آباد (سید آباد منی سیادانی لوگ ات)، گوشتی سنگت لوٹے پہ وانگءَ شورویءَ بروے، من درائینت ، جی ھو۔
مدتے رند، روگءِ بندءُ بست بوت ۔ من ،گنگزار ءُ عبدالرحمان گون سنگت افضلءِ رھشونیءَ دیم پہ کوئٹہ روان بوت اِن۔ شپ ءَ کوئٹہ رست این ، واجہ افضل ءُ واجہ جیند چہ پیسرءَھوٹلءِ بندءُ بست کتگ ات ،واجہ جیندچہ پیسرءَ ھمودان ات تا مئےسپرءِ تیاریءَ دیم پہ اوگانستانءَ گون بی اس او ءُ اچکزئیءِ مردمان بکنت۔ (واجہ اچکزی پشتونخواہ تنظیم ءِ سروک ات )۔ جیئدءَ پہ ما چارین سنگت کشمیری شال زُرتگ ءُ آمادگ کُتگ ات۔
نوں وھد بیگاہ انت پیکپ آتک ھوٹلءِ دپءَ داشت ءُ ما پیکپءَ سوار بوتین۔ سنگت افضل ، مارا گوشت کہ راہ ءَ چِک پوستبازانت ءُ شمارا جُست کننت کہ کجا روات ؟ کئے ات ؟ ءُ چہ کجا پیداگ ات ؟، شما ھبر مکن ات ڈلیور وت پولیسانی پسوءَدنت۔
سھب ءَ مان چمنءِ( چمن بلوچستانءِ یک شھرے)بازارءَ رس ات ان۔ ڈلیورایر کپت ءُ دمانے رند گون دگہ پٹانین ڈلیورے آتک ،گوشتی ایر کپ اِت ، اے واجہ شمارا اسپین بولدکءَ بارت۔اسپین بولدک بلوچستان ءُ اوگانستانءِ باڈر انت۔ زوت زوت ءُ میدانمیدانءَ پٹھانءِ پیکپءَ سوار بوتین۔ سھبءِ سر انت منی ھیالا ساھت۸ اِنت ، گوریچءِ گوات شیک شیک کشگا انت سل سارتانت سھبءِ کساس ۹ بجا چمنءِ باڈر ما گوازینت و اوگانستانءِھاکءَ مان بوتین .
ما را گوشگ بوت کہ اے علاقہ مجاھدانءِ جڑ انت ۔ ڈلیور گاڑیءَ داشت ءُ مارا اشارہ کُت ، آ پیکپءَ گند ات که مان آ سراءِ دپءَ اوشتاتگ (سرا ۱۵۰ تا ۲۰۰ متر آ کشتر ات) پہ اشتاپ اشتاپءَ به روات آ شمئے انتزارءَ انت ۔ ما سنگت گون وتی سامانءَاشتاپ اشتاپءَ گاڑیءَ سوار بوت این۔ ڈلیورءَ گاڑی چالو کُت ءُ دیم پہ ادارہ مردمانءِ دپترءَ ۔ دمانے رند ما سر بوتین۔ واجہ افضل چہ گاڑیءَ ایر کپت ءُ گون نگھبانءَ وتی رمز گوشت ماراش توکا بورت۔
نون ظُھرءِ وھد انت ما چہ شُدءَ ھلاس این۔اوگانین سنگتان ورگے اڈ کت ءُ ما ورگ وارت۔ چُنت ساھت ءَ رند واجکارے آتک ءُ گون ما گپءَ لگت ءُ گُشتی کہ اے راہءَ شمارا دارنت ءُ جُستءُ پُرس کننت، کہ چہ کجا پیداگ ات؟ ءُچونین ات؟ و کئی مردم ات۔ شما به گوش ات کہ ما بلوچینءُ چہ ب۔اس ۔او ءِ مردمان اینءُ چہ کوئٹہ پیداگ اینءُ ھنچوش چہ محمود اچکزئئ ءِ مردمان این۔
اے دگہ روچ یا ھما روچ شریءَ یات نہ انت، مان یک ٹرکے کہ پرات چہ نیبگءَ سوارءُ دیم پہ کندھارءَ رھادگ گِپتین۔مئے رھشون ٹرکءِ دیما و ما اے دگہ سئین سنگت پشتا۔
ابید چہ ما دو کلنڈر گون ما پُشتءَ سوار ات۔ کلنڈرءَ پہ اردو گون وتی پھٹانی لھجهءَ جُست کت ۔ بائی آپ پنجاپی ھے۔ من پہ اردو زبانءَ،گون بلوچی لھجہءَ پسو دات ، نھین ھم بلوچ ھے ۔
سھبءِ سرانت گوریچءِ گوات شیک شیکءَ کشگ ات۔ دراجین راھے روگءَ رند، مان دولتیانءِ مزنین چِک پوستءِ سرءَ مار اش داشت۔سربازے گون پھٹانی زُبانءَ گون ما پھٹانی ھبرءَ لگِات ما سرپد نبیتین ، کلنڈرءَ دیم گون سربازءَ گون وتی پھٹانی زباناگوشت کہ اے بلوچ انت ما سئین سنگت اش چہ ٹرکءَ ائیر کپت ءُ کارٹونے پُرتغال چہ ٹرکءَ کش ات ءُ سڑکءِ کِرٌءَ مئےدیمءَ داتءُ ما ورگءَ لگتئین سربازے آتک ءُ عبدالرحمن اش گون وت برت پایگاهءِ توکا ۔ افضل آتک دیستی عبدالرحمن گون ما نہ انت چہ من جُستی کت عبدالرحمن؟ من دراینت کہ عبدالرحمنءَ سربازوکے گون وت برت توکءَ ۔
واجہ افضل چُنت رند پیسرءَ اے راہءَ رَؤ آ کُتگ زانتی کہ چون بکنت۔عبدالرحمنءُ افضل مان پایگاهءِ تھا من ءُ ستار سڑکءِ سرءَ نشتگین ۔ بزان نکنئے کہ اے منطقہءِمسترین کُماندان کہ نامی حسمت اللہ ات ءُ گون حکومتءَ ھورانت مان ھمئے پایگاهءِ تھاانت۔ افضل دمانےءَ رند آتک مئے نیمگءَ ءُ گوشتی کہ حسمت اللہ روگ انت کندھار ما و شمارا گون وت بارت ۔ دل کمئے ڈڈ بوت
دوساھت رند حسمت چه پایگاہ در بوت افضل ءُ عبدالرحمن کماندانے ماشین کہ یک ولگا اے ات سوار ءُ من گنگزار پیکپے گون۷ءُ۸ ناسرپدین نپرءَ ءُ ھر نپرےءَ یک کلاش ءُ یک آ رپی جی بڈءَ ات سوار ءُ دیم پہ کندھارءَ رھادگ گِپتین۔ منی دنتانان یکے چہ سارتیءَ ءُ دومی چہ تُرسءَ چوش کہ آسیابیے ءِ پئیمءَ کٹھک کٹھک ءَ لگت انت ۔
عصُرءِ وھد مان کندھارءِ بازارءَ رستین۔ کسانین رستورانگے ءِ کِرءَ مار اش ایر کُت ءُ آ شت انت۔ دمانے رند ماشینے آتک رستورانگءِ کرءَ داشت سربازوکے آتک برادرءَ سوار شید۔ افضل شُت گون سربازوکءَ ھبر کُت وتی رمز گون یک دگرءَ ردءُ بدل کنگءَ رند، افضلءَ گون دستءَ اشارہ کُت سوار بیت مان سوار بوتین ءُ دمانے رند گاڑی گورنر ھاوسءِ دروازگءَ مان بوت۔
نون سارتین گینسارتے ما کش ات ءُ دنتانانی کٹھک کٹھگ ھن بند بوت۔ بلئے سک چہ شُدءَ مرک این ۔ شامءِ تیاری بوت ورگ وارت ۔ مارا گوشگ بوت کہ ھر وھد بالیگ آتک ءُ شمارا جاھے رس ات ما شمارا کابلءَ روان دئین۔
نون دومی روچ انت ، بالیگءِ انتظار این ۔ اے روچ ھن گوست ءُ بالیگ نیاتک ۔ سمئے روچ مار اش برت کندھارءِ ائیرپوٹءَ ۔شپے مان ائیرپوٹ مھتل بوتین ۔ چارمی روچءِ بیگاہ ءَ ارتشی بالیگے نشت ۔ مارءَ گوشگ بوت کہ وتا زوت زوت آمادگ بکن ات کہ اے بالیگ ساھتے رند چست بیت ۔ مارا چہ پئسرءَ تیاری ھست ات ۔
ساھتے رند ما بالیگءَ سوار بوتین۔ نون وھد شپ انت ۔ بزان نکنئے کہ بالیگ پُر انت چہ ٹپیگءُ ٹوریگین مردم۔آ وھدءَاوگانستانءِ حکومت گون مجاھدان جنگ ات سجئین راہ گون اشانی آہ نالہ زاریان گوازینت۔ رند چہ سے یا چار ساھتےکساسءَ پائیلٹءَ بلند گوءَ توار پر دات کہ مان کابل رستگین ءُ ۱۰ تا ۲۰ ملٹءَ بالیگ نندیت۔ چم چہ بالیگرابءِ شیشگءَ درءَشانگ دات اے لوگانی لئٹ کہ دیست انت ھیران بوتان، پکر کُت کہ چوشین مزنین ءُ بُرزین ماڑی مان کابلءَ!!!؟؟؟۔ بزان نکنئےکہ اے ھنچین کسانین لوگ انت کہ مان کوھانی سرءَ بستگ انت۔
سنگت داداللہ گون ماشینے آتک ءُ ماراش کابل ھوٹل برت، ماھے گئیش مان کابل ھوٹلءَ بوتین رند چہ اودان لڈ ات ءُ دیم پہ وزیراکبرخانءِ منطقہ مان یک ویلاے برت اش ۔ ستار ءُ من مدتےءَ رند دانشکدہ پولیتیکنیکءَ شروع کُت۔ چار سال رند وانگ ھلاس کت۔
سنگت ”حمید” چہ یوروپءَ آتکگ ات ۔ ھمے مدت ءَ سنگت “نصیر” واجہ “دادالله” کمُکے رند ترءَ سنگت اسماعیل امیرئ گون وتی چُکان شت انت دیم پہ کراچی .سنگت حمید کابلءِ مسئول ائیر کنگ بوت۔ مدتےءَ رند واجہ حمیدءَ کابلءِ مسئول منءَ کت ءُوت شُت دیم پہ سوئدءَ ۔
منی مسئولیت تماس گرگ گون شورای وزیران، کمیتہ مرکزی حزب دمکراتیک خلق اوگانستان ءُ ھنچوش گون لھتین دگہ بلوچی ،ایرانیءُ اوگانی تنظیمان ات ۔
یک روچے مھمد جان کہ یکے چہ بی اس او ءِ سنگتان ات ءُ چہ مسکوءَ پہ ترءُ تابے کابلءَ آتکگ ات،منی ھال دات کہ واجہ شیر مھمد مری(مرحوم) سپرے چہ کندھار، کابل ءَ آتکگ . شیر مھمد مری(جنرل شیرو) مشرقی بلوچستانءِ مزنین ءُنامدارین کمانڈرے ات ۔
من ءُ مھمد جان گون لھتے دگہ سنگتانی ھمراھیءَ واجہ شیر مھمد مریءِ گندگا شتین ، دراہ ءُ جوڑیءَ رند بلوچستانءِسیاسی جاورانءِ باروءَ گپءُتران شروع بوت ما چہ خودمختاری گپ جت ءُ واجہ شیرو چہ آزاتی ءُ استقلالءَ. مرحومءَ دراینتکہ منی چوکان بلوچستانءِ آزاتیءِ سیاستءَ بکن ات خودمختاری شمئے دردءَ دوا نکنت ۔
ھمئے دورانءَ بی اس اوءِ توکءَ اختلاف کپتگ ات ءُ دوبھر( بی اس او- پجار ءُبی اس او -سهب) بوتگ ات۔ واجہ مرحوم سرداراسلم گیچکی پہ بی اس او ءِ سنگتانی وشان کنگءَ سپرے کابل ءَ آتکگ ات ۔ سردار اسلم گیچکی پروار( پروار مان مشکہءِ دمگءَ یک گونڈین شھرے ءُ مان مشرقی بلوچستان ءَ اِنت ) مھمد جان گون مرحوم اسلم گیچکیءَ زرمبشءِ مھمان بوت انت ءُ بلوچستان ءِسیاسی جاورانءِ سرءَ بازین گپءُ ترانے بوت ۔ اسلم جان گیچکی باز زانتکارءُ دانشورین واجہ اے ات ۔
کابلءَ منی ءُ واجہ الکساندر روتسکوی پجاہ آروکی مان واجہ سید مھمدءِ لوگءَ بیت ۔ سید مھمد حزب دموکراتیک خلق افغانستانءِ کمیتہ مرکزی ءِ باسکے ات۔ واجہ الکساندر روتسکوی دری زُبانءَ شرّ بلد ات ءُ ھنچوش جنگی بالیگرابءِ پائیلٹے ات پادی کمے لنگ ات. واجہ الکساندر روتسکوی منءَ پہ ترءُتابے مسکوءَ دعوت کُت ۔ یک ھپتگی سپرے مسکو شتان۔واجہءَ منءَ برت مان شوکین ھوٹلے ءُ گوشتی کہ مان اے ھوٹل ءَ واجہ غوث بخش بیزنجو ھم آتکگ ءُ منی خاصین مھمان بوتگ۔ یک روچے ھن ھوریءَ لنینءِ کبرءِ سرءَ شُتین ءُ واجہ ءِ کبرءَ زیارت کُت۔
واجہ الکساندر روتسکوی شورویءِ پرشگءَ رند ،یلسینءِ دورءَ دو سالءَ، معاون رئیس جمھور روسیہ بوت. ھنچوش ھمدا منی ملاقات گون واجہ دکترگلام درخشندہءَ بوت ۔ دکتر گلام درخشندہ مان اے ساھتءَ بلاروسءَ انت ءُ مان بیمارستانءِ تھا کارءَ انت ۔ دل باز لوٹ ات کہ اے دگہ سنگتان بگندان بلئے وھدءِ کمی ءَ سنگت گندگ نبوت انت ۔ھپتگے رند کابلءَ واتر کُت ۔
سال ۱۹۸۹فبروری ۱۵ تاریخءَ شورویءِ آھری فوجی کہ نامی جنرال بوریس گرونف ات چہ اوگانستانءَ در کپت ۔ گون شورویدرکپگ ءَ ھالات دیم پہ ناامنیءَ روگ ات۔ یک روچے مئے شورای وزیرانءِ مسئول من ءَ وتی دپترءَ لوٹاینت، من اے دگہ روچینءَشتان، سنگت گپءَ لگت ءُ گوشتی سنگت وھاب ھالات مئے مُلکءِ روچ پہ روچ ھراب بوان انت دو سئے سال گیشتر مُلک دارگنبیت شما چوش کن انت چہ ھنون وتی درایگءِ پکرءَ به بئیت۔ پہ سوسیالیستی مُلکانی روگءَ ءُ ھنچوش ھندوستان ما شماراکُمک کنین۔ من شتان بلوچستانءِ راجی زرمبش دپتر گون سنگتان شور ءُ صلاح کت کہ چطور بکنین۔
پئسلہ ھمے بیت کہ سازمان مللءِ دپترءَ وت ءَ معرفی بکن انت ۔ گیشترین سنگت سازمان مللءِ روگءَ ھب ات انت۔ واجہ مھندس“ستار بلوچستانی” ءَ گوشت کہ من روان سوسیالیستی مُلکےواجہ“ستاربلوچستانی” گون وتی چکان شت پرتقال ۔ من پئسلہ کت کہ بروان کراچی۔ چه ھمے دوران ءَ کمے پیسر واجہ اسماعیل امیریءَ گون شورای وزیرانءِ مردمان گپ کتگ ات کہ لھتےسنگت پہ وانگءَ شورویءَ بروانت،آھان سنگتءَ گُشت کہ آ راہ دات نکننت،واجہ اسماعیلءَ واجہ ستار پردلی گندیت، آئی گُشیت کہ چہ اتحادیہ صنفی ءِنیمگءَ مئے سنگتانءَ پہ وانگ راہ دات کننت۔کرار ات کہ سنگت علی اکبر بلیدہ گون سئے ھمراہءَ پہ وانگءَ چہ کابل ءِ راہءَشورویءَ به روانت
چہ پئسرا مئی واجھین سنگت واجہ اسماعیل امیری و سنگت مرحوم جلال مان کراچیءَ گون حزب تودہ مسئول ءَ گند و نند کتگ ات و چہ ایان کمک لوٹتگ ات۔
آئی وتی سنگتے ءِ تلفون دنت ءُ واجہ اسماعیل پدءَ دیم پہ دھلیءَ واتر کنت ءُ کراچی سنگتانءِ کاران شر بکنت۔ چہ کراچیءَسنگت علی اکبر بلیدہ گون سئے دگہ سنگتءَ اتکنت دھلی۔
مدتے گوست شورای وزیرانءِ مردمان دیپلماتی پاسپورتے پہ من گِپتءُ چہ من لوٹگ بوت کہ دھلی کہ سر بوتے پاسپورتءَ مئےسفارتءَ تحویل بدے۔ حزب تودہ مسئول مان کابلءَ وتی سنگتانی تلفون نمبرءُ لوگءِ آدرس منءَ دات ءُ من گون اوگانستانی دیپلمات پاسپورتءَ دھلی شُتان . حزب تودہ ءِ سنگتانی لوگ شرین جاھی ات۔ گرین پارکءِ نزیک ات برے برے گون علی اکبر ءُاے دگہ سنگتان پہ سئیلءَ گرین پارکءَ شُت ءُ قدم جت۔
دومی روچءَ من ءُ واجہ “علی” ( حزب تودہ مسئول) پاسپورٹ زرت ءُ اوگانستانءِ سفارتءَ تحویل دات ءُ ھمے یکین روچءَ منءَگون ھندءِ حزب کمونیست ءِ مسئولےءَ معرفی کُت کہ چہ دھلیءَ ، منی سفرءِ بندءُ بستءَ پہ کراچیءِ روگ ءَ بکن انت۔ حزب کمونیستءِ مسئولءَ منءَ گون دگہ واجکارے کہ راجستانءِ حزب کمونیستءِ مسئولے ات دیم پہ دیم کُت۔
دو روچءَ رند واجہ کُمارءَ بسءِ ٹکٹ گپت ءُ دیم پہ راچستانءَ رھادگ گپتین۔ پیش چہ بسءِ سوار بیگءَ واجہ کارءَ درائینت اگان ترا ایرانی یا کہ پاکستانی مدرک گون ، من اش بدے چیا کہ اگن پولیسے ترا جُسءُ پُرس بکنت ءُ مدرکانءَ بگندیت ، تو چہ وتی کیسگءَ شُتگئے۔ من پاکستانی شناختی کارٹ واجہءَ دات ۔
بیگاهءِ چار بجءَ جئیپور ءَرستین ( جئپور راجستانءِ بُنجاھی شھر انت)۔ شپ ما جئپورءَ داشت ۔ اے دگہ روچین عصُرے وھدءَگون ماشین واجہ کُمارءِ میتگءَ شُتین۔ سنگت کُمارءَ یک چِرِکے چہ جئیپورءَ پہ من زرت ءُ منءَ گوشتی کہ ادان چرک بجن تا کہ ترا کس پجاہ میاریت ۔ کُمارءَ دراینت ، سنگت وھاب ھمارا علاقہ کُبرا بُھتهے ( کُبرا ھما سیہ مار انت)اپ سھمبال کر ۔ گون اےھال دیگءَ منی تُرس گیشتر بوت۔ سنگت کُمار ءَ منءَ گوشت ، اے منطقہ اگن ترا کسے جُست کُت کجاھیگئے بگوش کہ کشمیری۔ ھمے درگتءَ واجکارءَ چرکءِ گرھن دیگءَ منءَ سوج دات نون چرکءِ بندگءَ بلد بوتان۔ ما ھر روچ گون چرکان اے میتگ و آ میتگ جھلادءُ بُرزادین ۔
دو ھپتگءَ رند سنگت کُمارءَ درائینت ، سنگت وھاب ، دو آلترناتیو یا دو راہ انت۔ یکے میرپورخاص انت ، ما ترا سندءِ باڈرءِ نزیکءَ برین اودان وڈیرہ اے ءِ زمین باچوکہ کارے ھپتگےءَ رند مئی سنگت ترا باڈرءِ آ کپ ءَ برانت۔ دومی آلترناتیو کراچی انت۔ ماترا گون نظامی ھلی کوپتر مان وتی کشتیءَ پایگاہ دریاییءَ رسینین، چہ دریاءَ گون ماھی گیری لانچان کراچیءَ دیم دئین۔اےسجئین شپ منءَ واب نیاتک۔ سُھبءِ سر کہ بیت سنگت کُمار گون چاہ ءُ روغنی نگنان آتک ۔ ھان سنگت ، بارین تو وتی پئسلہ کت ؟ ۔ من دارئینت سنگت کُمارتئی زھمت ستاءِ لائک انت بلئے اے ھر دوئین آلترناتیو گون من نبنت۔ من پدا آتکان دھلی۔
واجہ علیءَ(حزب تودہ مسئول) لھتے چریک فدائیانءِ سنگت مان دھلیءَ ھست ات چہ سنگت علی نیمگا گون آھان تماس گرگ بوت تا پہ من پاسپورتے شوھاز بکننت۔ مدتےءَ رند ، یات نہ انت چُنت روچ ، ایرانی پاسپورتے درگپت ءُ ۲۰۰ ڈالر دات۔ منءَ گوشگ بوت کہ نپالءِ ویزاءَ بگر ءُ برو کھٹماندو چہ اودان گون پاکستانی ویزا برو کراچی ۔
اچانگ منءَ دگہ ھمراھے گون کپت۔ ما دوئین چہ دھلیءَ قطار گپت ءُ دیم پہ نپالءِ باڈرءَ رھادگ گپتین۔ عصُرءَ نپالءِ باڈرءَ رسیتین۔ چہ اودان بس ءَ سوار دیم پہ کھٹماندو۔ شپءِ یک ءَ کھٹماندو رسیتین۔ ھوٹلے درگپت سھبءَ جان شُشت ءُ رکشہءَسوار دیم پہ پاکستانءِ سفارت۔ ویزاءِ فورم پُر کت ءُ دات مارا گوشگ بوت کہ ھپتگے رند شمئے ویزا امادہ انت ۔ ھپتگے رندبالیگءِ ٹکٹ گپت ءُ دیم پہ کراچی۔ ما دوئین تاکسی گپت دیم پہ لیاری۔ سید اباد مئے سیادانی لوگ ات سبارگ ءَ رند واجہ زمان چہ من جتا بوت و تا روچ مروچی منءَ گون اے سنگتءَ ھچ پیمین تماسے نیست بلئے اشکُنگءَاے سنگت مان آمریکہءَ جھمنندانت۔ سنگت اسماعیل امیری اے مدتءَ ھن کراچی ات ۔ ماھتاک تپتان درایگ ات ۔ برے برے بیگاھان تپتان افیسءَ سرے جت۔ھمئے درگتءَ سنگت ناصر بلیدہ پہ سازمانی ترءُ تابے کراچی آتکگ ات۔ واجکار سھیگ بوتگ ات کہ من چہ اوگانستانءَ آتکگان۔ یک روچے سنگت ناصر بلیدہ ایءُ مرحوم جلال اتکنت یک دمانے منی لوگءَ ما نشت ءُ زرمبشءُ بلوچستانءِ جاورانی باروءَگپ ءُ تران کت ۔
پہ گندوکے مُلکا شُتان ، واجہ ھکیم ءَ ھال رستگ ات کہ من مُلکءَ اتکگان یک روچے آتک منی گندوکان دو روچءَ رند منی گون وت بُرت نیکشھر. ھکیم بانک ملی نیکشھرءِ مستر ات ۔
واجہ ھکیم منی سیادے ءُ ھنون مان امریکا جاہ منند انت۔ ھکیم یک بیگاھے چہ کارءَ آتک پہ گل ءُ بچکندءَ گوشتی پہ تو کارےدرون گپتگ، من چہ گلءَ چہ زمینءَ چِست بوتان گوشتی ادان شرکتے ھست نامی شرکت تاق پوش انت کاری پُمپ بنزینءِ اڈکنگ انت تو چے بلدئے؟ من دراینت کہ سیم کشی ءِ کار بلدان ھکیمءَ دراینت کہ برقی کار ءُ بارانءَ آئی چوک کنگ انت ۔ آھانءَھسابدارے لازم انت۔
کمے دو دِل بوتان سنگتءَ گوشت مشکلین کارے نه انت یک روچے یات گرئے، گون ناکامین دلے ھو گشت ۔
بیگہ کہ بوت دوئین شتین واجکارءِ لوگ ءَ۔ شرکت پئمانکار کرمانی ات ،منی گوشت چہ باندا کارءَ شروع کن ۔ پہ تُرس ءُلرزءَبانداتین روچءَ شُتان۔ منی ترس چہ پاسدار ءُ بسیجی ءَ انت ۔ باندات کہ بیت رپتان منی برت مان یک کسانین کوٹی ءِ تھا ،یک میز ءُ یک صندلییے ایر ات منی گوشت اے تئی دپتر انت ۔
ماھے کپے کار کُت یک روچے سھبءِ سرءَ میزءِ کِشو پچ کُت ، دیستان مزنین ڈکے تریاک منی ھیالا یک کیلوے ات ھیران ءُ ھبکہبوتان نون منءَ کلامان گِپت من قاچاق ءُ نون اے تریاک ھن قاچاق اگن پاسدارے یا بسیجییےادان بئیت ءُ اے کِشوءَ پچ بکنت گُڑا منچہ وتی کیسگءَ شُتگان۔ دل داشت تان ظھر بیت شتان لوگءَ تان سُبارگے پچ بگران .ھکیم ھن چہ وتی کارءَ آتک ما ھوریءَسُبارگ وارت ۔
من ھکیمءَ گوشت کہ من دگہ ادان کار نکنان ،آ ھیران بوت . گوشتی پرچے؟ من دراینت کہ میزءِ کِشوءَ یک کیلو تریاک ایر ات ۔ منجرأت نکنان پدا کارءَ بروان۔ ھکیمءَ بچکندے جت ءُ گوشتی مہ تُرس اے واجہ کارکرمانی ، وت تریاکی یے تریاکھمشیگ انت من دارینت کہ من زانان اے ھر روچ تریاک کشگ انت بلئے من وت قاچاق ءُ اےتریاک ھن قاچاق اگہ پاسدارے یابسیجی ے ادان سر بکپ ایت گڑا؟ واجہ ھکیمءَ دراینت کہ تو وتی مستر وتئے ۔
من دراینت کہ دگہ ادان کار نہ کنان ۔ ھکیمءَ اے دگہ روچ ءَ منی یک ءُ نیم ماهءِ زر پچ گپت ءُ منءَ دات انت ھپتگے رند واجہ ھکیم گون وتی ماشینءَ منءَ آرت جکیگور، چہ جکیگور دگہ ماشینے گپت دیم پہ مند ءُ چہ مند دیم پہ کراچی۔ کراچی ءَ گون سنگت جلال(راج زرمبشءِ مسئولءَ) پئیسلہ کت کہ یو ۔ ان ءَ وتءَ معرفی بکنان ۔ کار بوت انت ۔ ۲۲ اگست ۱۹۹۰ءَ سر کپت مان سوئدءَ ۔
ھر کُجا کہ ھست ات ،گون وتی کارءُ بارءُ اے دگہ جھدان سوبین بات ات
وھاب کریمزھی
۲۰۲۱-۱۱-۲۷
