بلوچستان ء ھکاں بہ دئیت 1و2 – کریم تهل

بلوچستان ء ھکاں بہ دئیت ! ( 1)

کریم تهل

گوادرء مردم بیست روچ ء کساس انت کہ سڑکاں نشتگ و گوانک جان انت : گوادرءِ مردمانی ھکاں بہ دئیت ۔ اے جنز ء مستریں کماش واجہ مولانا ھدایت الرحمان انت کہ آھانی مچی ء’ گوادرءِ جنین ، مردین ، وانندہ ، پوریات گر ، باپار ،مید و سرجمیں مہلوکی مچ کرتہ و اوشتاتگ انت ۔ آھانی لوٹ ھمیش انت کہ آواں ورگی و سلہیں آپ ، کهربا ( برق ) و گیس بدینت ، بلوچستان ءِ سیمسرانی سرا بندش ء’ بزور انت ، پئوجی و آی اس آی ءِ دست ء’ دزتگ و گاریں مردماں یلہ یا آوانی ھال پکا ببیت ، چینی و ایدگہ دریا روپیں ٹرالانی آیگ ء’ بلوچستان ءِ زر ء’ بند بکن انت ، پاکستانی چیک پوسٹان ء’ کہ ھر سد میٹر و چنت سد میٹر ء’ اوشتاتگ انت و گوں بیکاریں جست و پرساں مردماں تنگ کنگ انت ، چہ آھانی ملک و شہر ء’ دور کنئگ ببنت ۔ بیکاریں ھکومتی مردماں کہ مردمانی کاراں نکنگ انت ، چہ آھانی کاراں کشئگ ببنت ، چہ وانگجاہ و تالیمی ادارھاں پئوجی چیک پوسٹاں زورگ ببنت ، بلوچستان و گوادر ء’ ڈنی مردمانی آبات کاری بند کنئگ ببیت ، ھما ملازم کہ جرم یا وتی کار ء’ سستی اش کتہ عدالت ء’ دیگ ببنت و ۔۔۔

اے جہد ء’ بلوچستان ءِ سرجمیں مہلوک ءِ پلہ مرزی گون ات و آھاں ھم ھمے ھک ء’ پر وت و پہ سرجمیں بلوچستان لوٹگ انت و چو مرچی مولانا ھدایت الرحمان و آئی ء ھمراھانی برکت ء’ ، سرجمیں بلوچستان یک بوتگ و اوشتاتگ و * گوادر ءِ ھکاں بدئے * ء بدل ء’ هنون * بلوچستان ء ھکاں بدئے * ء جارش زرتہ ۔

اے لوٹاں ، مردمانی بنیاتی ھکاں ھوار انت ۔ اے لوٹاں مردمگری ء بنیات انت و اے لوٹاں منی ھیال ء’ تہنا رودراتکی بلوچستان ء بلوچانی لوٹ و واھگ و ھک نہنت ، بلکیں سرجمیں بلوچستانء مردمانی لوٹ و ھک انت ۔

روکپتی بلوچستان ء تیاب دپی مردماں آپ پہ ورگ نیست ، لکانی گجر و دگہ زاتانی مردماں آران و بلوچستان ءِ شهران و تیاب دپ ءَ آبات کنان انت ۔ بلوچستان ءِ مردماں کار و روزگار نہ دینت ، بلوچستان ءِ زر ء’ چینی و درآمدانی دگه مزنین کمپنیانی دریا روپیں ٹرال و لانچاں رپتگ و تباہ کرته ، گجرانی پاسداراں بلوچستان ء ھزانگاں کشگ و برگ انت ، بلوچ چکاں وانگجاہ ، وانگ ء سہولت و آسرات و وانینوک نیست ، بلوچستان ءِ بہر کرتگیں سیمسر ءِ سرا گجر ءِ پاسدار ، بلوچ ءِ زندمان تنگ و تباه کتہ ، بلوچستان ءِ راہ و شہراں گجرانی پاسدارانی بلوچ کشی و تیرانی میدانجاہ بیتہ ، لکانی بلوچ ء’ پجاری کاگد و سجل نہ دیگ انت تاں وتی کار ، روزگار ، دوا درمان و جاھے روگ و مساپرت یا آوانی چکاں وانگ ء اجازت ببیت ، ھزارانی بلوچ ء لوگاں لمبینگ و مردمانی زمین ء’ گجر و پاسدار وتیگ کتہ که اے سرکاری زمینے ، سدانی بلوچ جنین ءِ ازتش پلتگ و پامال کته ، ورنایاں مپت هدا بے جرم و میارے گوں دروگیں بهتاماں ، جناں و بند کناں و کشان انت ، بلوچانی مسیت و ابابتجاهاں ماں دزاپ ، چهبار ، و سنجرانیانی نزرت آباد ( زابل ) بیران کته … بلوچ ملا چماں بند و ترس ءَ گجرانی پاسدار و هونوارین هکومت ءَ هوار انت و وتی ایمان ءِ دیگ ءَ هم ترسش نیست و همے هونواران ءَ « صالح » و نیکیں گوئشنت …

=======================================================

Facebook