نشنلیزم ئا دنیاے دروشم عوض گتگ

Dr Taj Breseeg

چنت روچ ساری، سنگتی ئا بلوچ سماج و ذات و زریات ے بحث دیما آورتگ ات۔ ھئو، در حقیقت اے یک جوانین بنگپے انت۔ بلئے، اے ھبر ھم زانگ لوٹیت کہ مروچیگین دنیاھا، اے جیڑہ، دان مزنین کساسی ئا، تاریخ ے بھرے جوڑ بیتگ۔ نشنلیزم ئا دنیا ے دروشم عوض گتگ۔

البتہ، کھنین کلچر انگت گندگ بیت، پھک نہ مرتگ۔ چیاکہ، دود و ربیدگی سک سری، مان بازین دیما شتگین ملکانی تھا، چو کہ مغربی یورپ انت ھم گندگ بیت۔ زندگترین مثال “شگان جنگ” و “کلاگ زیرگ” ے مثال انت۔ پمشکا، یورپ ے ھر ملکا، اے بابتا قانون جوان کنگ بیتگ۔ سویڈن، یورپ ے یکے چہ دیما شتگین ملکان زانگ بیت، بلے، ادا ھم، “شگان” و “کلاگ”، رنگ و پوسٹ ے بہ بیت و یاکہ کار و کسب ے، چو رژنائین روچا پدرا انت۔ آگن کسے اے ھبرا باور نہ کنت، وتی ھما زھگان کہ اسکولا روگا انت، جست بہ کنت۔

زانگ لوٹیت کہ بلوچ سماجا، انگت کہ انگت، ھر کس سر ے وت انت۔ ھمے بے قانونی ئا، کھنین رسم و رواجانی حیات مئسر کتگ۔ باید انت اشارہ کنگ بہ بیت کہ مروچیگین دنیا یا، “قوم سازی و وقومی اتحاد” ے اصلیئن لوٹ انتقام نہ انت، بلکین “قومی سھل” (National Reconciliation) انت و بس۔ اے مسئلہ وت، یکے چہ نشنلیزم بنیادی اصولان زانگ بیت۔ اے ردا، جوانترین مثال، مروچیگین جنوبی افریقا انت۔