رستری کرد- بلوچستانءِ راجی زرمبش پانزده سالیگیں بلوچ جنکے سرا جنسی زوراکیءَ سک ایر جنت

رستری کِـرد

چُنت روچ انت، حالے شنگ انت که یک ایرانی فوجی افسرےءَ، یک پانزده سالیگیں بلوچ جنکے، دشتیاریءَ وتی رستری کردءِ آماچ  و کسانسالیں جنکءِ سرا جنسی زوراکی کتگ. شبره آماچیں جنکءِ مات و پت و نزیکیں مردم تُرسینتگ انت که آ، حالءَ شنگ مکن انت و گپءَ به واپین انت. اگاں آ، همے افسرءِ خلافءَ گام گیج به زیر انت و مُچی و زهرشانی بکن انت گڑا آ درست گرگ و بند و لٹّ و کُٹّ کنگ بینت.

اے اولی رند نه انت که معصومیں بلوچ کودک، ایرانءِ ظالمیں افسرانی زوراکیانی آماچ بیتگ انت. پیسرا هم، ایرانءِ حکومتءَ گوں پاترپّ و مردمانی ترسینگءَ، چشیں انسان دشمنیں سرگوست، چیر داتگ انت و هما افسر گرگ و سزا دیگءِ بدلءَ تاچینتگ و دگه جاهاں برتگ و کار داتگ انت. هنّی هم گمان همیش انت که هنچو کنگ ببیت. په بلوچءَ دگه راهے پَشت نه کپتگ بید چه اشی که زوراکیانی دیما به اوشت انت و حقءِ رندگیریءَ به کننت.

“بلوچستانءِ راجی زرمبش”، اے رستری کردءَ، ایر جنت و بلوچ راجءَ کڈّن کنت که گوں زور آماچیں جنکءِ مات و پت و عزیزاں همراه داری بکن انت.

بلوچستانءِ راجی زرمبش –  ۲۰ سپتمبر ۲۰۲۲