کربلا اِنت زاھدان اِنت

ھون ھاری شیپ گران اِنت کربلا اِنت زاھدان اِنت
ھر بلوچ تیر ءِ نشان اِنت کربلا اِنت زاھدان اِنت

پہ اے پاتْراپاں نہ ھلّ ایت جُنز راجی آجوئی ءِ
کاروان راہ ءَ روان اِنت کربلا اِنت زاھدان اِنت

جھل ءَ پُر ھونیں زمین انت گوں وتی زوراکیاں گوں،
بُرز ءَ نیلّیں آزمان اِنت کربلا اِنت زاھدان اِنت

چو یزیدؔ ءَ مان آتکگ دشمن ءِ زوراکیں لشکر،
چو حسینؔ ءَ ھر جْوان اِنت کربلا اِنت زاھدان اِنت

اے کلم کہ لنککاں گوں کسّھاں درشان ایت قاضیؔ،
المّ ءَ تئی دست مان اِنت کربلا اِنت زاھدان اِنت

مبارک قاضیؔ