من بلوچی نہ ونتگ
مئے راج ءِ بازیں واِنندہ دلپروش اَنت۔ اگاں تو کَسے ءَ بہ گْوش ئے کہ بْیا وت ءَ بلوچی وٹس ایپی وانگجاھاں ھوار بکن ءُ وتی راجی زُبان ءَ بوان گُڑا آ تچک ءَ گْوش ایت “بہ بکش، من بلوچی نہ ونتگ پمیشکا بلوچی وانگ نہ زان آں، اگاں من ھوار بِہ بَہ آں گُڑا زاناں من چے کُت کن آں؟”
ھمے پیم ءَ ماں وانگجاھاں لھتیں نوک ھوار بیتگیں بلوچ نودربر بلوچی دَرونتاں وت ھچ چمشانکے نہ دے اَنت، بے دَرونتانی وانگ ءَ یکشل ءَ رَد نبشتہ کن اَنت ءُ گْوش اَنت “من بلوچی نبیسّگ ءَ سُست آں پمیشکا رَدی وَ بیت”
گِند ئے اِے وڑیں دلپروش، ناسرپد ءُ اشتاپکاریں نودربراں سرپدی دیگ لوٹ ایت کہ ما وَ زان ایں کہ تو بلوچی ماں اسکولاں نہ ونتگ پمیشکا تو بلوچی ءَ ھچ نہ زان ئے، ما وَ سرپد ایں کہ تو بلوچی نبیسّگ ءَ ھم سُست ئے یا نزور ئے گُڑا زاناں ترا کَے گْوش ایت تو چہ اولی روچ ءَ بلوچی نبشتہ بکن ئے؟ چوناھا تو بلوچے ئے پمیشکا تو وتی ماتی ءُ راجی زُبان ءَ وت ونت کن ئے، سرپد ھم بہ ئے گُڑا اِے ھم پہ ما گنج اِنت۔ اگاں ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں گُڑا باید اِنت کہ ما یک ماھے وتی زُبان ءِ وانگ ءُ دربرگ ءَ ھم بدے ایں کہ بلوچی مئے مات ءِ داتگیں انامت اِنت پمیشکا گْوش اَنت کہ بلوچی مئے ماتی زُبان اِنت۔
البت وھدیکہ تو یک بلوچی وٹس ایپی وانگجاھے ءَ ھوار بوتگ ئے گُڑا اول بلوچی درونتاں بوان پد ءَ کم کم ءَ وت ھیل کن ئے۔ باید اِنت تو اول بلوچی دَرونتاں بوان ئے ءُ پد ءَ کم کم ءَ نبشتہ بکن ئے۔ یک روچے ءِ تہ ءَ کس مُلا جوڑ نہ بیت پمیشکا شمارا کَس نہ گْوش ایت کہ بلوچی ءِ دْراھیں دَرونتاں یک روچے ءِ تہ ءَ بوان اِت یا شُما رَد نبشتہ بکن اِت۔ گِند ئے راستی وَ ایش اِنت کہ شُمئے وڑ ءَ پیسر ما دْراہ بلوچی وانگ ءُ نبیسّگ ءَ نزور اِت ایں بلے ما وتی جُھد برجاہ داشت ءُ مرچی ما وتی راجی زُبان ءَ وش ءُ راست نبشتہ کُت کن ایں۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں پہ لھتیں روچ ءَ وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔
گُڑا ما گوں شما زُبان دوست ءُ راجدوستاں دزبندی کن ایں کہ گوں ما ھمراھداری بکن اِت، مئے وانگجاہ ءَ مُدام بھر بہ زُور اِت ءُ ھر روچ بلوچی ءِ یک دَرونتے لازُم بوان اِت کہ شُما بلوچی نبشتہ ءِ بُنرھبند(گرائمر) ءَ سرپد بِہ بَہ اِت۔ ھر وھد ءَ چیزے نبیسّ اِت گُڑا وتی نبشتگیں لبز ءُ گالرِداں دوبر وت لازم بوان اِت ءُ وتی رَدیاں راست بہ کن اِت۔ چوناھا دُنیا ءِ ھر شریں نبشتہ کار، کالج ءُ یونیورسٹیانی پروپیسر، شھزانت ءُ کارسر(آپیسر) بے چمشانک ءَ وتی کلوہ ءُ نبشتگیں چیزاں راہ نہ دے اَنت، بزانکہ اشتاپ نہ کنگی اِنت بلکیں مارا وتی رَدی وت راست کنگی اَنت، چہ وتی رَدیاں دربرگی اِنت اگاں ما رَدیانی راست کنگ ءِ جُھد بِہ کن ایں گُڑا ما وتی راجی زُبان ءَ وت دربر ایں۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ مارا بلوچی وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگ اِنت۔
سلامت بات اِت، بلوچ ءُ بلوچی شالا دیمروی بکنات۔
