دیوانءِ بنگیجءَ، پہ شهیدانی یاد و احترامءَ یک دمانے، دیوان خاموش بوت و اوشتات. چه شهیدانی یاد و احترامءَ رند، دیوان وتی اجینڈاءِ ردءَ دیما شُـت. چہ درستاں پیش، دیوانءِ کماشءَ درستانی مِنت گپت کہ آتکگ انت و دیوانءَ بهراِش زرتگ. چہ آئیءَ پَد “زرمبش”ءِ پیسریگیں سروکءَ وتی رپورٹ دیوانءِ دیما پیش کت.
رپورٹءِ سرا گپ و ترانءَ پد؛ بلوچستان، ایران، همساهگیں دَمگ و جهانءِ جاورانی سرا چمشانک دیگ و گپ بوت.
دیوانءَ، هونواریں رجیمءِ دست ءَ ” دُزّاپ” و ” واش” ءِ کشت و کوش( جمعه خونین ) سکّ ڈوباراتنت؛ اشیءَ را بلوچانی الّمی حق زانت کہ پہ وتی انسانی حقاں توار چست به کننت. دیوانءَ، بلوچانی جهد ماں دزّاپ کہ ده ماهءَ گیش روان انت و نہ اوشتاتگ، باز ستا دات و اے جهدءَ را، راجی و عوامی جهدے زانت۔
دیوانءَ، بلوچانی پاهو دیگ گوں ترندیءَ ڈوبار ات و چہ دنیاءَ لوٹ ات اے پڑءَ، بے وسیں بلوچ عوام ءِ مدتءَ بہ کننت و په بلوچانی پاهو دیگءِ دیمگیری و بند کنگءَ، کوشش بہ کننت۔
دیوانءَ مَـنّگ بوت کہ پہ بلوچءِ راجی جُهدءِ دیما برگ و بلوچستانءِ آجوئیءَ، ایرانءِ اسلامی جمهوری رجیمءِ چپیگ کنگ اَلّمی انت. مَنّگ بوت کہ پہ اے رستریں رجیمءِ چپیگ کنگءَ گوں دگہ سیاسی هوربند، گل و واکاں هورکاری و همکاری اَلّمی انت. مَنّگ بوت، گوں هما درستیں آجوئی لوٹوکیں واکاں هورکاری بہ بیت؛ گوں هما درستیں واکاں کہ مئے جهدانی دیما اڑاند مَہ بنت همکاری بہ بیت و خاص گوں بلوچ واک و هوربنداں.
دیوانءَ مَنّگ بوت کہ پہ بلوچ جهدءِ آزاتیءِ فکرءِ هر چُـنت گیشتر تالان و عام کنگءَ چہ سوشل میڈیاءَ گیشتر و شرتریں وڑےءَ کار گِـرگ بہ بیت. دیوانءَ مَنّگ بوت، ایرانءِ رجیمءِ انسانی حقانی پادمال کنگ و بلوچءِ کُـشت و کوشءِ سیاست، ماں میان استمانی هوربند و مُلکانی دیما پاشک کنگ و شون دیگ بہ بنت.
دیوانءَ مَنّگ بوت کہ پہ بلوچستانءِ شهیدانی روچءِ دارگءَ گوں اے دگہ بلوچ هوربنداں، هورکاری و کوشش بہ بیت کہ اے روچ، هوری و یکجاهیءَ دارگ بہ بیت. مَنّگ بوت که ماں دِزّکءَ بلوچءِ پروش ورگ و دِزّک کلاتءِ گِـرگءِ روچ، سیاهیں روچ ماں بلوچستانءِ تاریخءَ نامینگ بہ بیت. اے دیوان(کنگره) هم، “دِزّک”ءِ نامءَ نامینگ بوت.
