ما ھم انسان ایں مارا ھم ھک ھست: سمی بلوچ
انسانی اُگبالانی میان اُستمانی روچ ھمُک 10 دسمبر ءَ دارگ بیت۔ اے روچ ءِ دارگ ءِ مول ءُ مراد ھمے بوتگ کہ زمین ءِ سر ءَ نندوکیں انساناں , رنگ ءُپدریچ( نسل) ، نیکراھی(مزھب) ءُ زبان ءِ پَرک ءُ دَرک ءَ اَبید آجوئی ءِ ھک، انساپ ءُ ایمنی ، اِے دْراھیں لوٹ ءُ آسراتیانی یک ھساب ءَ ھَک بِہ رس ایت، اے روچ انسانی ھستی(وجود) ءِ ارزشت ءُ وتی ھَکانی لوٹگ ءِ سنچ ودی کنگ ءِ ھاتر ءَ دارگ بیت۔
بلے پاکستان ءَ ھمّک روچ انسانی اُگبالانی جنازہ چست بیت ناں کہ دنیا ءِ گُوشاں اے پریات کپ اَنت ناں کہ ایندگہ انسانی ھکانی پاسداراں اے پریات رو انت ءُ سر بنت، اے روچ تھنا پہ ھما راج ءُ انسانانی ھاتر ءَ اِنت کہ اود ءَ دنیا ءُ ایندگہ ادارھانی وتی سیت ءُ نپ بندوک اَنت۔
بلوچ ءِ ھروچ لوگ ماندارگ بنت، زھگ ، زالبول، کماش ءُ ورنا آوار جَنگ بنت، آیانی ژانگولیں جون ماں ویرانگاں دزکپ اَنت، سالانی سال آیانی زند ماں تھاریں کوٹیانی تہ گوز ایت، چہ ایشی ءَ مستریں ازیت کجام انت کہ تو زلم ءُ زوراکی ءِ آماچ ءِ ءُ وتی کُرتگیں گناہ ءَ نہ زان ئے۔۔۔
دنیا ءَ اگاں یک درچکے گُڈگ بیت آئی کیس ماں آمیدگِساں(عدالتاں) روت ءُ آئی ءَ وتی ھَک رس ایت بلے بلوچ ءِ ھروچ لاشانی ٹُکر ھم مردم ءَ دز نہ کپ اَنت، اے پریات چہ بلوچ ءِ سیمسراں آ دیم گوست نہ کن اَنت، اے کجام گناہ ءِ سزا اِنت کہ بلوچ ءَ وتی زمین ءِ سر ءَ زندگی کنگ ءِ ھک نیست، چہ زمین ءِ ھمراھی ءَ آیاں زندگی کنگ ءِ ھک ھم پچگرگ بیتگ اد ءَ وتی زند ءِ گوازینگ ھم گناھے زانگ بیت۔
اے روچ ءَ سرجمیں دنیا انسانی ھکانی روچ ءِ نامے سر ءَ دار ایت بلے اے روچاں بلوچ وتی پُرسانی پَتّر ءَ نشتگ ءُ دست ءِ دارگ وتی جاہ ءَ ھرکس کیت وتی بھر ءِ زوراکی ءَ وڑے ناں وڑے ءَ کنت ءُ روت مے سال ءِ سرجمیں روچ انسانی ھکانی لوٹ ءَ کن انت بلے کسے ھست کہ مئے توار ءَ دلگوش بہ کنت۔؟
بگند ئے کہ بلوچ انسانانی کیٹگری ءَ گون نہ اِنت ءُ دنیا مارا انسان سرپد نہ بیت۔ کجا اَنت، ھمے انسانی ھکانی پاسدار ، کجا انت ھمے ادالت ، کجا انت ھَمے گَل کہ وتی کرنی ئیں گُنگی ءَ زبانے بہ دے انت، مئے مات ءُ گْوھارانی توار ءَ اِش بکن اَنت ما ھم انسان ایں مارا ھم ھک ھست۔
Copied:Facebook کامریڈ رخسانہ بولانی
