بلوچستانءِ راجی زرمبش، رستریں ایران و رستریں پاکستانءَ پـہ بلوچ جنین و کودکانی شهید کنگءَ سکّ ڈوبارایت و ایر جنت
بلوچستانءِ راجی زرمبش، رستریں ایران و رستریں پاکستانءَ پـہ بلوچ جنین و کودکانی شهید کنگءَ سکّ ڈوبارایت و ایر جنت.
بلوچ گلزمین بهر و ونڈ کنگ بیتگ؛ بلوچءِ وت واکی پُلگ بیتگ؛ بلوچ ڈگارءِ گنج و مڈّی روپگ و برگ بیگءَ انت. بلوچ که په وتی حق و آجوئی گرگءَ توار چست کنت، دوئیں رستر کردیں مُلک – ایران و پاکستان – بلوچءَ آهانی ملکانی دشمن زاننت و تروریست گشنت. همے دلیلءِ بنیادءَ، بلوچءَ چُکچین کنگءَ انت.
هنّیگیں دوئیں روچانی ٹوپ گواری ماں پنجگور و شستونءَ همے بلوچ چکچینیءِ دراجیں زمزیلءِ دو کڑی انت. ایران، پنجگورءَ ٹوپ و بمب جنت و بلوچ کودُک شهید کنت و په پهر گشیت که جیش العدلءِ مزنیں بنجاهے ویران ئی کتگ؛ پاکستان شستونءَ بمب گواری کنت و گشیت که بی ال اےءِ بنجاه آئیءِ ٹوپانی آماچ بیتگ. اے دوئیں رستر کردیں حکومتانی راشوکانی، اگاں مِنڈی ئیں چمّاں پِٹُکے آپ مان ببیت انت هم چشیں بے بُنیں گپ اش نه کتگ ات.
بی ال اف و جیش العدل ، هر دوئیں تنظیماں سهرا کتگ و گشتگ که آ وتی وتی دمگاں جُهد کنگءَ انت؛ البت آهانی چُکّ و جنین دوئیں نیمگاں رو آ کننت چیا که دوئیں نیمگ آهانی وتی مُلک انت و آهانی برات و گُهار و نزیکیں سیاد نشتگ و جاه مِنند انت.
بلوچ جنین و کودکانی شهید کنگءَ ما سکّ ڈوبارین و ایر جنیں. ما چه درستیں دمگی و میان استمانی انسان دوست و انسانی حقانی پانک جنوکیں هوربند و تنظیماں لوٹیں، ایران و پاکستانءِ چشیں کاراں په ترندی ایر به جننت و دیمترا په آهانی دیمگیریءِ جهد به کننت.
بلوچستانءِ راجی زرمبش
18 جنوری، 2024
