هوشنگ سرابندیءِ بیرانی په بلوچ راجی جهدءَ تاوان انت
باز گوں بژن و اپسوز سهیگ بیتیں که هوشنگ سرابندی دراں ڈیهیءَ ماں سویڈنءَ، بیران بیتگ. هوشنگ سرابندی که ماں رسانکدراں “آکاش براهوئی”ءِ نامءَ زانگ بیت ات، په بلوچستانءِ آجوئی و بلوچ راجی جهدءِ پڑءَ ، جهد کارانی دلبڈی و سکین دیوک ات.
هوشنگ سرابندی، یک دیمروی لوٹوکیں جهد کارے ات پمیشا ایرانءِ اسلامی جمهوریءَ هما اولسرا چو دگه بازیں جهد کاراں گپت و بندیگ کت. چه بندیگیءَ آزات بیگءَ رند هم آئیءَ وتی جهد نه اوشتارینت انت پمیشا دراں ڈیه بیت و کراچیءَ شت. آ وهداں گوں ” سازمان چریکهای فدائی خلق”ءِ یک رُمبےءَ هور ات. چه آئیءَ رند گوں ” سازمان آزادیخواهان بلوچ” هور بیت و اوگانستانءَ شت. گونڈیں مدتے اگانستانءَ ات و چه اوداں سویڈنءَ شت و تا بیرانیءَ هموداں دراں ڈیه ات.
هوشنگ سرابندی، بلوچستانءِ آجوئیءِ لوٹوک ات و ماں سوشل رسانکدراں همے سسّاءِ دیما بروک ات.
راست انت که آ وتی زندءِ گُڈّی بهرءَ عملی سیاستءَ هور نه ات بلے بلوچستانءِ آجوئی (استقلال)ءِ سیاست و رهبندءِ پلّه مرز ات.
“بلوچستانءِ آجوئی زرمبش”، هوشنگ سرابندیءِ بیرانیءَ په بلوچ راجی جهدءَ تاوانے زانت و گوں سرجمیں بلوچ جهدکار و گوں آئیءِ کهول و پُشپدانی درد و اندوهاں شریدار انت.
هوشنگ سرابندیءِ یات و نام ماں بلوچ راجی جهد و بلوچ ڈیهءَ ابدمان انت.
بلوچستانءِ آجوئی زرمبش
20 / جون 2024
