کسانسال و کودکیں یوسف شهلی بُـرءِ ، کوشءَ سک ڈوباریں

یک دگه معصومیں بلوچ کودکے، ایرانءِ نام گپتیں اسلامی جمهوریءِ سلاحبندانی تیرانی آماچ و شهید کنگ بیت. اے اولی بر نه انت که بلوچ زهگ و کودک، رستریں رژیمءِ دستءَ شهید و ٹپیگ بیگءَ انت. گوستگیں چُنت سالءِ تها، چه پنجاهءَ گیش کسانسالیں بلوچ زهگ کُشگ و یا زَدگ بیتگ انت.

اے کُشت و کوش، دو سئے سرگوست نه انت که ایرانءِ رژیم مدام کوشش کنت و لوٹیت شون به دنت که په رَدی و اناگاهیں تیرانی آماچ بیتگ انت. بلوچ زاننت که ایرانءِ حکومت و آئیءِ سلاحبند، بلوچ راجءَ وتی دشمن زانت پمیشا آهانی دلءَ په بلوچ زهگ و کودکاں هم تُشے رحم نه کننت.

” بلوچستانءِ راجی زرمبش” گوں کسانسال و کودکیں شهید یوسف شهلی برءِ کهول و عزیزانی درد و اندوهاں شریدار انت. اے درد، سرجمیں بلوچ راجءِ درد انت و آهانی کم کنگ و گار کنگ بلوچ راجءِ وتمستری و آجوئیءَ گوں بیت کنت.

بلوچستانءِ راجی زرمبش – 27 فروری 2025