رضا پهلویءِ طرفدار و لوٹوکاں، بلوچ جهد کار اَنگِرّ کت و مانتَرّینت انت

ماں لندنءَ، ایرانءِ لهتے سیاسی کارکنوک و گروپانی دیوانے ” کنگره آزادی ایران”ءِ نامءَ 28 و 29 مارچءَ برجم بیتگ ات. ماں اے دیوانءَ چنت بلوچءَ هم بهر زُرتگ ات. حال رستگ که دیوانءِ هلاسیءَ رند، وهدے که بهر زیروکیں بلوچ جنین درا درآتکگ انت، شاهپرست و رضا پهلویءِ طرفدار و لوٹوکاں، اَنگِرّ کتگ و مانتَرّینتگ انت. آهان‌اش، ایران ـ پروش و دشمن زانتگ، جاک و کوکّار کتگ و آ بیمّ و پاتراپ داتگ انت.

اے همے ایرانی انت که یک نیمگے وتارا دموکرات گشنت و دگه نیمگے، اے گپءِ منّوک نه انت که ماں انوگیں ایرانءِ سیاسی سیمسرانی تها دگه دگه راج هست انت. اگاں کسے وتی راجی حقانی گپءَ کنت، آئی/آهانی دیما اوشت انت و پر آهانی جَنَگءَ لانک بند انت. اے وڑیں مردم نه دموکرات ا نت ، نه سیاسی انت بلکیں ایرانءِ تها ایردستیں راجانی دشمن انت.

” بلوچستانءِ راجی زرمبش” آهانی اے کِردءَ په ترندی ایر جنت و بلوچ جنینانی توار و جهدءَ په راجی زرمبشءِ توارءِ چست کنگ و همراهیءَ ساڑائیت.

بلوچستانءِ راجی زرمبش –  ٣۰ مارچ ۲۰۲٦