« مـا هانُــل ءِ مُلـک ءَ نَـدؤں، جَوریں بَـداں دِلمانَگیـں »
پاکستانءُ ایرانی زورانسریں واکدارانی انسان دژمنيــں کارکرد بلــوچ ءُ بلوچستــان ءِ هلاپ ءَ ماں دگنيــاےءَ کم دروراِنت۰ بلـوچ ءِ هــزاراں تبل ءُ کسانسالیں زهگ، نـوک ورنــا، ورنـا ، کمـاش ءُ پيريــں مــردم اشانی رستری سياسـت ءُ کارکردانـی آماچ اَنـت. چه یک نیمگـــے ماں کیچ، پنجگور، آواران ءُ نصیرآباد بلوچانی لوگاں بُن دینـت ءُ چه دگه نیمگـے ماں ایرآپ بزاں دزآپ (زاهدان) ءُ چهبارءَ بلوچ راج ءِ لوگاں لمبینت تاں آهانی زمیناں وتیگی بکننت۰چه یک نیمگـــے پارسیاں کوشست کننت تاں ابد جازموریان ءِ هزاراں بلوچ ءَ وتی چانیگانی چَمدار بکننت ءُ چه دگه نیمگـــے دیره بگٹی ءُ کوهلوءِ بلوچانی گیس ءَ دزَنت ءُ گوں زورانسری ءُ توپ ءُ تپنگ دیم په لاهور ءُ کراچی به برنت۰ چه یک نیمگـــے بزمان ءِ تلاهیں ڈل ءُ ڈوکاں لڈانت ءُ کرمان ءُ اسپهانءَ بَرنت ءُ چه دگه نیمگـــے بلــوچ ءِ راجی سرمایه چه سیاهیں ڈک (سیندک) ءَ شپ ءُ روچ پل ءُ پانچ کننت.
چه یک نیمگــے پارسیاں په بلوچستــانءِ سبزیں زرءُ چهبـارءِ مدامی زوربرد کنگ ءَ هندوستانءِ هِنــدو گوں وت ءَ هور ترینتگ ءُ چه دگه نیمگــے پنجاپی جرنیل ءْ نوک مسلمانیں هندوستانی مهاجرپه گـوادر ءِ وتیگی کنگ ءَ زرپرستیں چین ءِ “کمونیست پارٹی” ءُ سینگاپورءَ گوں وت هَمشَـؤر کتگ اَنت.
دگنیا گِندَگ اِنت بلــوچ راج په وتی آوارجتگیــں گلزمیــنءِ پَچ گرگ ءُ آزات کنگءَ پـادآتکـگ۰مئی راجی جهدانی دپتـر پیش داریت که آزاتی ءِ سُهریں راه تچک ءُ بے کَنڈگ نهنتءُ سکی ءُ دیمپاںاں بازنت بلئے بلــوچ راج گوں تـَلاریں اراده ءُ ایمانے دیم په وت مستـری ءُ آجویی ( استقــلال و آزادی ) گام جنان اِنت۰
گلزمیـــن ءِ شهیدانی کاروان سَکّ دراج اِنت بزان بلوچستــان ءِ شهیداں بے شمار اَنت ۰ هچ کَس نزانت که چنت هزار بلــوچ پاکستانی پئؤج ءُ ایرانی سپاهیگ ءُ لشکـرکشتگ ءُ بیگواه کرتگ انت۰ هچ کس نزانت که چنت هزار بلــوچ اے درآمدان ٹپی ءُ ٹوری یا زدگ کتگ انت۰دسگرءُ بندی کتگیں بلوچاں هم چه هساب ءَ دراَنت۰
بلــوچ ورنايانی سرا تير گواری ،آهاں زندکا سوچــگ، پاهو دیگ ءُ شهيــد کنـگ ءِ یک دليلـے ايشنــت کـه آ بلـــوچ راج ءِ اوبادگان اَنــت ءُ آ وتـی شاهگـــان ءُ بـے درويـــنءُ پر نيامتيــــں وتـــن ( بلـوچستـان ) ءِ کانودی ءُ تاریخی واهنــد ءُ مالـک اَنت. ايرانـی ءُ پاکستانـی زرپرستيـــں واکــداراں پـه آوارجتگيــں گلزمیــن ءِ مدامــی وتيگی کنــگ ءَ بلــوچ ءُ بلوچستــان پاکيـــں سرزميــن ءِ ســرا رستـــری کنگاينــت.
اسلام آبادءُ تهــران ءِ واکــداراں مـا را مـاں مئـی وتــی هنکيـــن ءُ بـُن پيـرُکـی مُلک په آسراتیں زند گی ءَ نئيلنت! مئـے ملـک ءَ پــل ءُ پانچ کننـتءُ مـا را چه مئـے وتی راجـی سرمايه یاں زبـهراِش کـتگ. چه مئی وتی ناتپاکی ءَ پارسءِ سپاه ءُ لشکر ءُ آهانی زابلی ٹولی هنچوگُستاه بوتگنت که بلوچستان ءِ پلیں نام ءَ هم وتی کاگدانی سرا نه نبیس انت ءُ په گلزمین ءِ بَهر بَهر کنگا شپ ءُ روچ گوں ناشرین امینی فرد ءُ دپارواریں هدایت میرمرادزی ءَ پندل سازَنت۰
هم شوریں پاکستان ءُ ایران – بلوچستــان ءَ ويران کـتــگ ءُ چـه لاهـور، اســلام آباد، تهــران ءَ اسپـهـان ءَ بازپـدتـرا داشتــگ. مــاں وتــی هـَـند ءُ دمگاں په پارس ءُ پنجـاپ ءِ مردمـانءِ زندجاورانــی گهبــودی ءُ آهانـی آسراتــی ءَ بے هسـاب کتـاب زر هــرچ کنگاينــت. همـا زر ءُ سرمایه که چه بلوچستــان ءِ راجــی مال ءُ مڈی ءَ گــوں رپک ءُ زبر دستــی ءَ پل ءُ پانــچ اِش کتگ۰
گـوں مئی راجـی مال ءُ ملـی سرمايه يانی پــل پانچ کنـگ ءَ همـے واکدارانی گُـلُــڈان ءُ چک زاتـکاں مـاں کانادا ءُ اروپايـی مزن شهــراں چـوش که پاريس، لنــدن، رُم، مادريــد، هامبــورگ، فرانکفــورت ءُ مونيـخ ءَ گرانيـں لوگجاه ءُ مِـِلک په بها رزتـگ۰اے آهیریں واکدار ميلياردانی دُزتَگیں دلار ماں پاناماءِ دروگیں بینک ءُ کمپنیءُ يوروپی بورسی بازار ءُ بینکاں اير کتگ اَنـت. مزنین بهرـے چه همــے دُزکـی زرّ هنــّـون اوشتارينـگ بوتگنـت ءُ بوت کنـت انت که گڈسـرا صدام حسين، کرنل قذافی، حسنی مبـارک ءُ تونسءِ بن علــی ءِ دُزُکــی ميلياردانـی پيمــا بے پَــد ءُ رند بـه بنــت۰
پارس ءُ پنجاپـی زورانسریــں واکــداراں، پاکستانی انسان دژمنیں پئوج ءُ ایرانی سپاه ءُ لشکـراں هــور گوں نوک مُسلمانیـں هندوستانی مهاجــر ءُ ناشریں زابلی یاں زانگی انــت که بلــوچ تبلانی اولـی هبر بــزان «هــام ءُ هــوم »، مئی هزاراں بے تواریں کماشانی دلی گپ، بلـوچ سیاسـی بندیگانی کلوه، مئی ماتانی نازینک ءُ گوهارانی زهیروکاں ، گلزمین ءِ هـزاراں شهیـدءِ گُـڈی کـول ءُ لبـز، سرمچارانءِ تپنگانی توار،مئی ڈیه ءِ پاشپادیں چوره یانی آه ءُ ارس، بلوچستـــان ءِ زیبداریں ندارگانی بے دَروَری، کوه سلیمانءِ برپانی ندارگ ءُ تپتـان ءِ برزیں کـوهءِ باپ ءُ گَرمی، شـال ءِ گوریـچ ءِ سارتی ءُ پهــره ءِ لَوارءِ سُوچْک، کؤرسرباز ءُ نهنـگ ءِ هیروپ ءُ هار، بلوچستــان ءِ زِرءِ شرتــگ ءُ توپـان، نمیرانیـں ستـار ءُ شفـی ءِ الهـان، آزات جمالدینی ءُ مولانا عبدالله پیشنی ءِ شائری، بشیر بیدار ءُ مبارک کازیءِ آشوبی شئيـر، استاد کمالان ءُ گلام کادرءِ آسمانـی توار، گلزمینءِ شانتُلانـی کُـوکُـو ءُ بنپورءِ بُلبُلانی وشیں توارـ نمیرانیـں میر گل خـان نصیـرءِ اے گال ءِ گـوانک اَنت:
« مـا هانُــل ءِ مُلـک ءَ نَـدؤں، جَوریں بَـداں دِلمانَگیـں »
آزات ءُ آباد بات گنجيــــں بلوچستـــــــــان
پروشت ءُ پروش باتنـــت ايران ءُ پاکستان
محمـد کريــم بلــوچ
فروری ۲۰۱۷
http://baluchistan47.blogspot.co.uk/2017/02/blog-post_13.html
