آیت الله اعـدام ” ایران ءِ سرکماش بیگ انت”
پدمنتگیں ایرانءِ سرکماشانی لیست ءَ ” آیت الله اعـدام ” بزاں هونواریں ملا ابراهیم رئیسـی ءِ نام هم گیش بیگ انت۰ آیت الله اعدام بیست ءُ هشت سال ءَ پیش یکے چہ تهـران ءِ هونواریں کازیان اَت ءُ په همینی ءِ هکم ءَ یک جَلاّدی کمیٹی ءِ باسک نامینگ بوت۰ آ کمیٹی کم ءُ گیش سی هزار سیاسی بندیگ ءَ یک سالےءِ درگت ءَ ماں ایران ءِ بندیجاهاں کشت انت۰ پہ همے سوب ءَ آ کمیٹی ءِ نام « کمیتهٔ مرگ » ءُ ملا ابراهیم رئیسی نام ” آیت الله اعـدام ” بزاں آیت الله پاهو ایر کنگ بوت۰
هنوں هامنه ای ءُ آیی ءِ سپاه ءُ کٹریں مهلوک گوں پوتین ءِ همشوری ءَ لانچتگ ءُ پیسله کتگ تاں رند چه مکّاریں روهانی ءَ ” آیت الله اعـدام ” ایران ءِ سرکماش به بیت۰ اگاں چه ایرانءِ درستین سرکماش چه شیهه ءِ ٹولی ءُ پارس بوتگ انت بلئے ” آیت الله اعـدام “ چه درستاں زالمتر ءُ هونوار تراِنت۰ گوں همے رستریں ملاءِ هکم ءَ پاسداران گوں هزاراں سیاسی بندیگیں جنیں چکاں هر وڑیں زیادتی کت ءُ رندا پاهو اِش داتنـت۰ اے هُکم بُندرا همینیءَ داتگ اَت که نِکاه پرنکتگیں جنکانی پاهو دیگ گناه ایت ءُ آ پیش چه کُشگ ءَ بایدانت گوں پاسداران نِکاه کنگ به بنت۰ سی هزار بندیگ ءِ کُشت ءُ کشار ءُ بندیگیں جنین آدمانی بی اِزّت کنگ پارس اپوزیسیون ءَ هنچو سرین پروش کت ءُ توسینت که هنگت ءَ بود نکنـت۰ ” آیت الله اعـدام ” همینی ءُ هامنه ایءِ مُریـد انت ءُ سپاه ءِ هونواریں مُـلا۰
علی هامنه ای ءِ یک پادے ماں کبرا انت ءُ ساه گریں ملکمـوت آیی ءِ کش ءَ تیارنت ءُ بوت کنت باز مهتل مه بیت۰ گوں” آیت الله اعـدام ” ءِ سرکماشی ایران ءِ کدهـدا روس ءُ سپاه پاسداران بنت۰
الم انت که واکدارانی وت ماں وتی جنگ ترند تر بیت۰ هما پارس مهلوک که واکدارانی زدّ انت وڑے ناں وڑے وتا سُریننت ءُ ایران ءِ توکی جاوران ءُ میاں استمانی هالات په تهـران ءِ کٹریں شیهه واکدارانی بادشاهی ءِ هلاس کنگ ءَ باز جوانیں موکلّے انت۰
ایردستیں راجانی سیاسی بیداری گیش بوتگ ءُ آجویی ءِ جنگ ءُ جهد ماں کوردستانءُ آزربایجان ءُ بلوچستان ءُ الاحواز جاری انت ۰ اے بیگے انت که ماں آیوکیں وهدا انگریزءِاڈکتگیں ایران به پروشیت ءُ ایردستیں راج چه پارس ءِ گلامی ءَ آزات به بنــت۰
آزات ءُ آباد بات گنجيــــں بلوچستـــــــــان
پروشت ءُ پروش باتنـــت ايران ءُ پاکستان
محمد کريم بلــوچ
آپریل ۲۰۱۷
