گچینکاریانی هوری بایکوت کنگ یک چکّاسے په ایردستیں راجانی آیوکیں وهد ءِ همکاری ءُ یک تواری انت
ڕۆژی کورد: گوں پَجّارے که شما را چه ایرانءِ سیستم هست انت جمهوری اسلامی ءَ آیوکیں گچینکاریاں چون زانیت ءُ شمئی هیال گچین کاریانی باروا ماں هنوگیں سیستم ءَ چے انـت ءُ باریں چشیں گچینکاری ءِ برورد هما انت که مردمان لوٹنت ءُ گچین کننت که یا که دگه وڑے ءً بیـت؟
پَسّو: گوں دروت ءُ درهبات شما را ءُ روژی کورد ءِ مڑاداریں وانوکان ءَ منت واروں که منی شنگ بوتگیں نبشتانکاں وانیت ءُ بلوچستان ءِ نگیگیں جاورانی باروا زانت ءُ بیداری ءِ نور شنگ کنیت۰ ایران ءِ گچینکاریانی باروا گوشگی انت که اے هاله ئیں گچینکاری نهنت۰
گچیں کنگ ءُ گچیں بیگ ماں یک آزات ءُ دمکراتیکیں سیاسی سیستمے مانا دنت۰ ماں چشیں آزاتیں سیستم گچینکاری بزاں گچیں کنگ ءُ وت ءَ په گچیں بیگءَ تیار کنگ ماں بُن رهبند ءَ مردمانی یک بنکی ءُ انسانی هکّے زانگ بیت۰
آزاتیں ملکانی بن رهبند ءِ یک بهرے گچینکاریانی باروانت۰ اے یک انسانی هکے انت که مردم وتی نمائنده ءُ کماش ءُ سرکماش وت گچیں بکننت تاں آهانی هزمت ءَ بکننت ءُ په آهانی زندجاورانی گهبودی ءَ کار ءُ کوشست بکننت۰ ماں چشیں ملکاں هچ کس په دین، زات ءُ زریات یا آهانی باورانی سَوب ءَ چه اے انسانی هَکاں بزاں گچیں کنگ یا کاندید بیگ ءَ زبهر کنگ نه بنت۰
په درور هست انت گچیں بوتگیں سیاسی مردم ماں سویدءُ دانمارک ءُ نروژءَ که ماں آ ملکانی مزن دیواناں باسک انت ءُ بُندرا چه آسیاءُ افریکایی ملکان انت۰
ایران ءِ پدمنتگیں بن رهبند نیمے چه ایرانی مردماں چه گچیں بیگ ءَ مهن کنت۰ ماں بن رهبند ءَ نبشته کنگ بوته که ملک ءِ سرکماش بایدانت چه شیهه ءُ دوازده امامی ٹولی ءَ به بیت۰
سی ءُ هشت سال انت که کورد ءُ بلوچ ءُ تورکمن ءُ بهرے چه پارسیاں وت ء که سُنّی انت گچیں بیگ ءِ هک نیست۰ گندایت که ایران ءِ بن رهبند جند گچینکاریان ءَ بے مانا کنت۰ سرکماشی ءِ گچینکاریان وتی جاگه ءَ هنوں بے لگامیں شورای نگهبان ءِ دوازده امامی ٹولی ءِ پیرجٹیں ملا لانچتگ تاں اهل سنت ءَ ماں شهرانی شورایاں چه گچیں بیگ ءَ هم زبهر بکننت۰۰
روژی کورد: شمئے هیال ءَ “خاتمی، احمدی نژاد و روحانی” ءِ سرکماشی دور ءَ په مردمءِ زندجاورانی گهبودی ءَ تبدیلی ئے بوته یا ایش که انسانی هکاں، کاری ءُ باری جاور ءُ دگه زندجاوراں گنتر بوتگنت؟ ماں چشیں گچیںکاریان بهر زورگ چے بروردے په مردماں هست ؟
پَسّو: په بلوچ راج ءُ بلوچستان ءَ “خاتمی، احمدی نژاد و روحانی” یکے چه آدگرا زالم تر ءُ آهانی گنده تریں نالائکیں احمدی نژاد اَت۰ آ هر سئے ملا هامنه ای نزیکیں مردم ءُ همایی ءِ گچیں کتگین اتنت۰ آ هر سئیں گوں سپاه ءِ همکاری ءَ بلوچستان ءِ زندجاوراں چه جهندم ءَ گنتر کتگ۰
هر سئیں گوں بلوچ راج ءَ کینگی ءُ دژمنی کار کتگ ءُ آهانی کوشست همے بوتگ که بلوچستــان ءِ سرزمین سپاه ءِ دست ءَ دیگ به بیت ءُ دو لَکً (۲۰۰۰۰۰ ) لشکری ءُ ڈنّی سپاهیگ په همے مکسد بلوچستان ءَ آرگ بوتگ اَنت۰ ا ے رسترین سپاهیگ هر دمان ء په مئے کشت ءُ کوش ءَ تیار اَنت۰
تهران ءِ واکدارانی وتی گپ انت که اے لشکری ءُ سپاهیگانی هرج چه بلوچستــان ءِ بودجه ءَ گیشترانت۰ ا ے گپ پدر کنت که ایران ءِ واکدار مان هرسرکماش ءِ دؤرے په بلوچانی ایردست دارگ ءُ لٹ کٹءُ کشت ءْ کوش گیش چه بلوچستان ء بودجه ءَ هرچ کتگ۰ البت آ زرے که په « بودجه بلوچستان» ءَ نام گر بیت آ هم بلوچانی هلاپءَ کار مرز بیت ءُ گیشتر زابلی ٹولیانی دست ءَ کپیت۰
ماں احمدی نژاد ءِ دورا زابلی ٹولیانی لگام په بیه دور کنگ بوت ءُ آهاں بلوچانی هلاپ ءَ گیشتر کارمرز کنگ بوتنت۰ ماں احمدی نژاد ءِ سرکماشی ءِ سیاهیں هشت سالاں بے شمار بلوچ دسگر ءُ کشگ بوتنتءُ رستریں زابلی ٹولی یاں بلوچانی مزنیں زمین ءُ جاگه آوار جت انت ءُ درستیں بلوچاں بید هچ دلیلے “وهابی ” گوشگ بوتنت ءُ مان آ دؤرا زالمیں شهریاری ءُ نورا ءُ علی محمد آزاد گجر بادشاهانی دیم سیه تر کتنت ۰
ماں احمدی نژاد ءِ دور اَت که سدانی سد بلوچ چه وتی کاراں درکنگ بوتنت ءُ آهانی جاگه ڈنی یں زابلی ایرکنگ بوتنت۰ نوکیں کار هم ڈنی ءُ گئیر بلوچاں دیگ بوتنت۰ هما نالائک دوراَت که کٹریں زابلی ءُ شیهه ٹولی ماں دزآپ (زاهدان) ءِ شهرا بلوچانی هلاپ ءَ کوکار ءُ سلوات کت ءُ سپاه ءُ بسیج آهانی پشتبان اَتنت۰ سدانی سد بیگناهیں بلوچ دسگر ءْ بندی کنگ بوتنت ءُ مئی بے شمار ورنایا پاهو دیگ بوتنت۰ گوشت کناں که رستریں احمدی نژاد چه “صفوی” بادشاهاں گیشتر زلم ءُ زیادتی ماں آوارجتگیں بلوچستان ءَ کت۰
بهر زورگ ماں اے گچیں کاریاں هچ نپ ءُ سیتے په مردماں نیست انت۰ اے چه بندرا گچینکاری گوشگ نه بیت پرچا که ملا هامنه ای ءُ سپاه پاسداران ءُ روس ءِ پوتین پیسله کتگ که رند چه “روحانی” ءَ سرکماش کئے به بیت۰ ماں اے په دروگیں گچینکاریاں بهر زورگ مردمانی تاوان انت ءُ بس۰
روژی کورد: لهتیں چه سیاسی چار ءُ بیچار کنوک ءُ کَوّاسانی باور ایش انت که دمگی ءُ میان استمانی جاورانی دلگوش گور کنگ ءَ بهر زوروکین ءُ گچین کنوکیں مردمانی شمار باز مهم انت ءُ ماں گچینکاری ءَ بهر نه زورگ بزاں “بایکوت” با ارزشیں گپے انت ۰ په شمئے هیالءَ چے راه ءُ چاره اے گیشترنتیجه ءُ گهتریں برورد دنت؟
پسّو: اداں پّدرکنگی انت که هامنه ای ءُ آیی ءِ دوازده امامی ٹولی ءُ سپاه گوں کی۰جی۰بی ءِ همشوری ءَ سرکماش درچتگ۰ بلئے اگاں دو پـڑآ کار کنگ به بیت تهـران ءِ زورانسریں واکدارانی مکّاری ءُ مردمانی ریپینگ گیشتر پدّر بیت۰
یکے میان استمانی پڑانت ءُ اگاں جمهوری اسلامی ءِ اپوزیسیون که ڈَنّ جه ملکءَ باهوٹ انت ملا ابراهیم رئیسی ءِ شکایت ءَ میان استمانی دادگاه پیش بکننت که آ یک جنگی مجرم ءُ سی هزار بے گناهیں بندیگ په آیی ءِ هکم ءَ کشگ بوتگنت، جوانیں نتیجه دنت۰
دومی ایران ءِ توک ءَ پارس مهلوک ءُ ایردستیں راجانی بهر نه زورگ ماں اے ناهودگیں گچینکاریان انت۰ آگاں پارسیانی اپوزیسیون هِمت بکنت ءُ پارس مهلوکءَ بگوشنت که گچینکاری ءِ روچ ءَ ماں وتی لوگاں بنندانت ءُ په دپارے نگن رَد مه ورنت ءُ ایردستیں راجانی جهدکار هم بتواننت وتی مردماں په بایکوت کنگ ءَ رازی بکننت باز نتیجه ءُ برورد دست کپیت۰
دومی ایران ءِ توک ءَ پارس مهلوک ءُ ایردستیں راجانی بهر نه زورگ ماں اے ناهودگیں گچینکاریان انت۰ آگاں پارسیانی اپوزیسیون هِمت بکنت ءُ پارس مهلوکءَ بگوشنت که گچینکاری ءِ روچ ءَ ماں وتی لوگاں بنندانت ءُ په دپارے نگن رَد مه ورنت ءُ ایردستیں راجانی جهدکار هم بتواننت وتی مردماں په بایکوت کنگ ءَ رازی بکننت باز نتیجه ءُ برورد دست کپیت۰
البت جهدکاریں سیاسی ءُ سلهبندیں هوربند سوسیال میدیاے ءَ گیشتر کارمرز کت کننت ءُ دلگوش گور کنگ لوٹیت که ایران ءِ توک ءَ اینترتنت ءِ کد ءُ کلید سپاه پاسداران ءُ چاروگانی دست ءَ اَنت۰ گوں نوکیا سیمنزءِ همکاری ءَ اینترنت ءِ سرا وڑوڑیں دیوال ءُ “فیلتر” اِش ایر کتگ ءُ اے زوت په زوت پروشگ لوٹنت۰
روژی کورد: کوردستان ءِ هوربند ءُ گلّ که چه پیش ءَ باز یکدست تر ءُ تپاک ترانت جار جته که گچینکاری یاں بایکوت کننت۰ شمئے هیالءَ گوں آدگه راجاں یک توار بیگ ءُ تپاکی چونکا بیگی انت؟
پسّو: شمئے تپاکی په کورد ءُ کوردستان ءُ دراهیں جهدکاراں یک مستاگے ءُ شما را تپاکی ءُ یکویی مبارک بات۰ گوں تپاکی ءُ هوریں جهداں هامنه ای ءُ سپاه پاسدارانی انسان دژمنیں پندلاں پروش دیگ بنت۰ اگاں شما گوں بلوچستان ءُ الاحواز ءُ تورکمنستان ءُ آزربایجان ءُ لرستان ءِ هوربنداں هوری ءَ چست ائیر به کنیت گڑا گچینکاری یانی بایکوت مزنیں کاربد ءُ برورد دنت۰ گپ ایش انت که رهشون ءُ هوربندانی باسکاں دیرچاری بکننت ءُ گوں نیک نیتی وتی کوشست ءَ په گیشتریں همکاری بکننت۰ هنوگیں گچینکاریانی هوری بایکوت کنگ یک چکّاسے په ایردستیں راجانی آیوکیں وهد ءِ همکاری ءُ یک تواری انت۰
سوبیں باتیت
