پِگــری گُلامــی
اولی بهـر
هر زوراکیں واکے که دگرانی ملک ءَ آوار جتگ په وتا پگری گلام جوڑ کتگ تاں گوں همیشانی همکاری ءَ آوارجتگیں ملک ءَ زوربرد بکنت۰ اے کلونیالیسم ءِ یک انسان دشمنیں سیاستے بوته ءُ هست انت۰ البت اداں پدرکنگی انت که پارس کلونیالیسم گوں وهدیگیں کلاسیکی کلونیالیسم ءُ هنوگیں کلونیالیسم باز پَرک داریت ءُ یک هاسیں شکل ءُ کارکردے ءِ واهند انـت۰
ایرانی واکداران ءِ سياســت ءِ بـُـن هـِشـت چـه رضـا ميرپنـچ ءِ دؤرءِ پلينـڈی، دوتل ءُ دوپوستـی، بلوچـاں وت ماں وت ءَ میڑينـگ، زورانسری، کشتـار، کارزوالی ، بدنيتـی، دروگ، بلوچـاں ايرجـَنـَگ ءُ انسان دژمنیءِ سرا ايـر کنـگ بوت۰ چُشین کلونیالیسم ماں دگنیاےءَ کم درورانت۰
په شهديـں بلوچی زبان ءُ مئے راجی پجار ءِ گارکنگ ءَ هر پيميں پنـــدل اِش کارمرز کتگ۰ کم ءُ گيش نود ســـال انـــت که بیگناهیں بلـــوچ ورنايانی کشـــت ءُ کـــوش جاری انــــت۰ بلوچانـــی مال ءُ راجـــی سرمايه پل ءُ پانچ کنگاينت۰ بلوچ ورنايانی دسگر کنگ ءُ درنجگ، بلــوچ تبلانـی کشگ، نودربرانی زانگ ءُ وانگ ءِ واهشت ءَ تج کش کنگ ءُ چه وانگجاهاں در کنگ، هـزاراں پاسدار، بسيجی، پئوجی، بے لگامين زابلی ءٌ کٹريں هزاره ياں په بلــوچ ءُ بلوچستــان ءِ ايردست دارگ ءَ آرگ ءُ ماں بلــوچ گلزمين ءَ نندارينگ بوتنگنـت تنـکه بلوچستـان ءَ آرام آرام چه بلوچاں پـچ بگرانــت ءُ گئير بلوچانی دست ءَ بدينـت۰
ایرانی فاشیستانی سروک بزاں ملاهامنه ای ءِ مستریں پندل بزان « طرح توسعه سواحل مکران » بلوچ دشمنیں کلونیالیسم پارس ءِ شومیں مکسداں گیشتر پدر کتگ که لوٹنت بلـوچ راجءِ وجود ءُ راجی پجـّار ءُ نشان ءَ هم گار بکننـتءُ بلوچ ءِ زهـگ ءُ ورنايـاں آسيميلـه بکننـت۰ پرچا که هرچـے بلـوچ ورنا چـه وتـی راجـی پجـار ءُ چه وتی ماتــی زبـان ءَ دورتـر دارگ به بنـت گـڑا بلـوچ کـوم ءِ گـلام کنگ ءُ ايردسـت دارگ په پارس فاشيستاں آسانتر بيت۰
پارس کلونیالیسم ءِ سیاست فاشيسـتی اَنت ءُ ایردستیں راجانی بیگواهی ءَ لوٹنت ءُ آهانی راجی پجار ءِ دژمن انت۰ په همیش انت که بلوچ راج ءُ هاسکارنوک ورنا ءُ واننده آسیمیلاسیون ءِ آماچ اَنت۰
اگاں چه پارس فاشیستاں سد در سد ماں اے سياست ءَ کامياب نه بوتگ انـت بلئــے هســت انت لهتیــں نازانت که وتا را گـوں پارسیاں لچينـگ لوٹنت۰ اے چه بلـوچ راج ءِ پجـّـارءَ دور انـت ءُ بلوچستــان ءِ راجدپتـر ءَ ناسرپـد ءُ نامالـوم انـت۰ ماں ايرانی کتاباں په دروگيں تاريخے ءَ وانتگ اِش ءُ سرجمیں بلوچستـان ءَ بهــرے چه انگريـز اڈ کتگيـں « ايران » زاننـت۰
ایشان هنچو پارس ءِ پگری گلام بوتگ انت که بلوچانی جنگی سُوب گوں اسکندر بزرگ ءِ لشکر ایران ءِ سوب زاننت۰ اے ناسرپداں میر همل ءُ میر کمبر ا ایرانی زاننت۰
آ نه منّ انــت که رضا میرپنچ گوں انگریزانی همشوری ءَ « ايران » ءِ نام ماں ۱۹۳۵ عیسائی ءَ اے ملک ءِ سرا ایر کُرت، البت گوں کابلءِ اوگانانی اجازت ءَ۰ آ هنچو چه پارسیاں ایرانی تر بوتگنـت که نبیس انت “بلوچم، ایرانی ام از نژاد آریایی” اے پارس ءِ نازانتیں پگری گلام انگت ءَ سرپد نهنت که « آریایی » یک وهم ءُ بے بنیاتیں کسّه ایت که پارسءِ ناسیونالیست ءُ آهانی هم شوریں ڈنی یاں اڈ کتگ۰
اپسوزی گپ ايش انـت که اگاں بلوچـے چه وتی راجی هکان ءُ بلوچستــان ءِ وت مستری ءَ هبــرے یا که نبشته بکنـت، پارسیانی همـے بـے لگاميــں پگری گلام په آيی ءِ گٹ تروس کنگ ءَ پيش کپنـت۰ يکـے چه آهانی پنــدلاں ايش انت که وتا زانوگری ءُ زانتکاری دروشمے دينـت۰ آ نبشته کننت ءُ گوشنت که “چه ايران ءَ سندگ ءُ بلوچستــان ءِ وت مستری يه بلوچانی نپ ءُ پائــده نهنـت”۰ اگاں بلــوچ وت مستــر به بنت گـڑا بلوچستــان ءَ چـون داشت کننـت؟ ” مـاں بلوچستـان کوشت ُ کوش بيت، بـے مياريـں پارسیاں کشـگ بنـت”۰
لهتیں چريشـاں کـه بلوچ ءِ سرا باز زهـرکـِن انت ءُ زبان اِش نه کَشِّتَگيــں ســواس ءِ پيما دراج انـت گوشنــت : ” اگاں رونشتـی بلوچستـان چـه ايران ءَ به سدايـت ءُ وت مستــرهم به بيـت گـڑا چه اوگانستـان ، سومالـی يا کـه دگـه پشـت کپتگيـں ملـکاں گهتـر وَ نـه بيــت” ءُ فاشيستانی اے تبليغ ءَ گاجائيل کننت که « بلوچستـان ءِ وت مستری ءِ لوٹ ڈنـّـی واکانی برنامه انـت»۰
البــت اے پارس دروشميـں بلوچـاں که وتا را زانوگـرزاننت ءُ وتا مـزن گندنـت چه بلوچستــان ءِ راجدپتـرءَ پـوه ءُ سرپـد نهنـت۰ شمارے چه ایشان گوں وتی چکاں پارسی گپ کننت ءُ هنچو پارس ءِ پگری گلام جوڑ بوتگ ءُ آسيميله انت که گـوں بلـوچانی دژمــن ءُ بلوچستـان ءِ بدواهــاں مـاں يک ردے ءَ اوشتاتگ انــت۰
چه بلـوچ ورنايانی آگاهـی ءُ بيـداری ءَ نا وش ءُ کينگــی انـت۰ وتا را گـوں پارس نزيک زانـنـت ءُ فاشيستانـی بے بنياتيــں دليل ءُ هبـر بلوچانی هلاپ ءَ گاجائيل کننـت۰ بلــوچ ءِ راجی هک ءُ وت مستری لوث ءَ انکار کننت۰ ايشاں پارس ءِ « آسيميلاسيون » سیاستءِ شوميــں بــرورد انت که پگری پـِڑا بلــوچانی آزاتی کاروان ءِ ديمــا اوشتارينگ بوتگ انــت۰
آزات ءُ آباد بات گنجيــــں بلوچستـــــــــان
پروشت ءُ پروش باتنـــت ايران ءُ پاکستان
محمد کريم بلــوچ
ماهِ مئی۲۰۱۷
