سپاه پاسـدارانءِ تروریستی ٹولـی
ماں گوستگیں سی ءُ هشت سالاں ایرانی سپاه پاسداران ءِ ٹولی گوں وتی درملکی بهر بزاں سپاه قدس دگنیاے ءَ پیش داشتگ که یک تروریستی ءُ انسان دژمنیں ٹولی انت۰ اے لدیگی ٹولی تهران ءِ واکدارانی پرهونیں پنچگ اَنت که ماں بلوچستان ءُ کوردستان ءُ الاحوازالعربی ءُ آزربایجان ءُ تورکمنستان ءُ دگه باز ملکانی ته ءَ انسان کشی کنگ ءُ گوں وتی تهارپگری ءُ بے بنیاتیں مذهبی باوراں انسانی تمـدن ءِ دیما اوشتاتگ۰
هزاراں بی گناهیں بلوچ ءِ لٹ کٹ، ترور ءُ کُشگ ماں بلوچانی وتی ڈیه ءُ شهید شیخ علی دهواری ءُ شهید مولانا محمد عمر سربازی ءُ شهید مولوی عبدالمالک ملازاده ءُ شهید مولوی عبدالرئوف ریگی ءُ شهیدتاج محمد گمشادزهی ءُشهیدحاجی بلوچ خان ءُ دگه بلوچ کماشانی ترورکنگ ، کوردانی کلانیں سروکانی کشگ ماں اتریش (شهید عبدالرحمان قاسملو) ءُ جرمنی (شهید صادق شرفکندی) ، شاپور بهتیارءِ کارچ کُش کنگ ماں پاریس ءْ دگه بازیں اپوزیسیونءِ سروکانی کشگ ماں اروپایی ملکاں سپاه پاسداران ءِ تروریستانی کاراَنت۰
سپاه قدس گوں وتی ناشریں سروک سلیمانی ءَ په دوارسوچیں جنگانی آس ءِ بُن دیگ ءَ ماں عربی ملکان گوں دمگی مجرم شریک اَنت۰ بید سپاه قدس ءُ هامنه ای ءِ کمکاں لبنانی نصرالله ءِ ٹولی هـچ اِنت۰ لبنان ءِ تروریستانی سروک وت منّ اِتگ که حزب شیتان ءِ درستیں درچ ءُ تیر ءُ توپک ءُ دگه جنگی ازباب آهاں چه ایران ءَ رسیت۰
یمن ءِ حَوثی ٹولی گوں سپاه قدس ءِ کمکاں یمن ءَ هما دوارسوچیں وت ماں وتی جنگےءِ تہ ءَ دور داتگ که لکّانی لکّ بیگناهیں انسان ءِ زندماں تباه بوتگنت۰ چه سپاه قدس ءِ پلینڈی یاں بگداد ءُ شام جهندم ءِ وڑا بوتگ انـت۰ ناشریں بشراسد گوں سپاه ءُ هامنه ای ءِ کمک ءَ انگت ءَ ماں شام ءَ انسان کشی کنگاینت۰ اوگانستان ءِ هزاره یانی بهـرے هم گوں هامنه ای ءِ تروریستی ٹولی ءَ ماں تراِتگ اَنت۰ شمارے چه آ بدنسیباں گوں سپاه ءِ تروریستی لشکرا بگداد ءُ شام ءَ راه دیگ بوتگنت که کشگ یا که ٹپی ءُ زدگ بوتگنت۰
مافیایی سپاه بید چه پَدّریں تروریستی چست ءُ ائیر گوں میاں استمانی شپکی یاں هم شریک اِنت۰ تریاک ءُ هروئین ءِ سوداگری یکے چه سپاه ءِ انسان دژمنیں کاران اِنت۰ ایرانی سپاه قدس ماں تاجیکستان ءُ اوزبکستان ءُ تورکمنستان ءُ گوریچی آزربایجان هم وتی تروریستی “نِت ورک” ءَ تالان کتگ ءُ آ ملکانی وت مستری ءُ اودءِ مردمانی هلاپ ءَ پلینـڈی
کنگاینت۰
پرچے سپاه پاسداران انگت ءَ یک تروریستی
ٹولی یے جار جنگ نه بوتگ؟
اگاں چه تروریستی سپاه ءِ کارپد په دگنیاے ءِ درستیں سیاسی ءُ آزات هیالیں مردم هاسکار په اروپایی مردم پدّرانت بلئے انگت ءَ یک تروریستی ٹولی یے جارجنگ نه بوتگ ءُ اے گپ ءِ مستریں سَوَب ایش انت که مگربی ملکانی سدانی سد کمپنی گوں ایران ءِ واکداراں وڑوڑیں بازاری کرارداد نبشته کتگ ءُ سرمایه کاری همکاری اِش هست اِنت۰ اے کراردادانی گیشتریک په آوارجتگیں بلوچستـان ءُ رودراتکی کوردستـان ءُ الاحـواز العـربی ءُ زرباری آزربایجان ءُ زرباری تورکمنستان ءِ مال ءُ مڈی یانی پل ءُ پانچ انـت ءُ لدیگی سپاه ءِ نشان ماں درستیں کـرارداد گون انت۰ پرچا که آوارجتگیں ملکاں سپاه ءِ پرهونیـں پنجگانی چیراَنت ءُ په درورسپاه پیسله کته که ماں بلوچستـانءِ تیاب دپی شهـر ءُ بندناں روسی ، هندوستانی ، اوگانستانی ، کوریاییءُ اروپایی سرمایه دار په بلوچانی راجی سرمایه یانی پل ءُ پانچ ءَ هور کنگ به بنت۰
اروپایی ءُ مگربی ملکانی سیاستدان نه لوٹنت که آ ملکانی زردارءُ کمپنی یانی کرارداد گوں ایران ءَ اوشتارینگ به بنت۰ اگاں سپاه یک تروریستی ٹولی یے جار جنگ به بیت گڑا آ درستیں کرارداد بے ارزش بنت۰ چشیں کارپه آهیریں یوروپی ملکانی واکدارءُ زردارانی نپ ءُ سیت نهنت۰
ماں هنوگیں میاں استمانی جاوراں بوت کنت که امریکایی دیما بکنزنت ءُ سپاه پاسداران ءَ یک تروریستی مچی یے جار بجننت۰ گڑا بلکیں اروپایی یاں مجبوربه بنت ءُ وتی زرپرستی ءُ آهیری ءَ لگام بجننت ءُ پاسدارانی تروریستی کارپدان گیشتراِنکار مه کننت۰
ایرانی سپاه پاسداران یک انسان دژمنیں مذهبی ءُ تروریستی ٹولی اِنت که پارس ءِ مذهبی امپراتوری ءِ ناهودگیں واب ءَ گندگآِنت۰
په انسانیت ءُ درستیں ملکانی نپ اِنت که اے تروریستی ٹولی اوشتارینگ به بیت۰
پروشت ءُ پــروش باتنـت ايران ءُ پاکستـان
آزات ءُ آبـــــاد بات گنجيـــــں بلوچستــــان
محمــد کـريــم بلـــوچ
جون ۲۰۱۷
آزات ءُ آبـــــاد بات گنجيـــــں بلوچستــــان
محمــد کـريــم بلـــوچ
جون ۲۰۱۷
