ابراھیم یزدی مُرت
زی یکشمبے ۲۷ اگست ۲۰۱۷ ءَ ابرھیم یزدی ماں ترکیہ ءِ ازمیرءَ مرت۔
من ابراھیم یزدی یک رندےچہ نزیک ءَ دیتگ ۔ھما وھدَءَ کہ ملا خمینی پاریس ءَ برگ بوت ،سوپ ءِ چیرءَ نندینگ بوت ،ابراھیم یکے چہ سرسوج دیوکان خمینی بوتگ ءُ گوں امریکیان ملایانی آشوب ءِ رھروپ بزان جادہ صاف کن بوتگ ۔آ گوں ملا خمینی ءَ ایران ءَ آتک ۔وزیرخٓارجہ بوت ،سپاہ پاسدارانی جوڈینوک ھمے مردک بوتگ آ وھدءَ سے چار اصفھانی پاسدارک گِھ ءَ یارگ بوتگ ات کہ پاسگاہ ژاندارمری ءَ اتنت ، یک روچے یکے رسول بکش امیری ءَ تیلانکے دنت ۔ رسول بکش موسی پردل خان چک ءُ شھرداری ءَ کارءِ ات ، گوش ھم گران اتنت ۔گھ ءِ مردمان شارشور کت پازگاہ ءِ دپ ءَجم بوت انت کہ پاسدارءَ بجن انت ۔رئیس پاسگاہ ءَ پاسدار کوٹی یے بند کت انت بیسیم تار کت ،نیمروچ ءِ وھد ات کہ ابراھیم یزدی گوں چنت سیاہ پاگین ملایان پہ ھیلی کوپتر گھ ءَ اتک انت ۔ملا سیاھُک ءِ مسیت ءَ مردم مچ بوت انت ، یزدی گوں ھمراھان اودان اتک ،گوشتی پھل کن اِت کہ ھوا ھراب بوتگ پھمیشا من دیر سربوتگان ، من پہ جاک پسہ دات تو پہ ماشین بیتکینے بلوچستانءِ راھانی جاور زانتگ ات ،باز مردمان منی نیمگ ءَ چک ترینت ءُ لھتے ءَ من ءَ میاریگ کت ۔آ وھد ءَ گھ ءَ شیعہ مسیت نیست ات ،مردمانی لوٹ ات کہ پاسدار چہ گھ ءَ برگ ببنت ۔ بازیں گپ ترانے بوت ۔یزدی گوں سیہ پاگاں پدا سوار بوت ءُ شت انت ۔ھپتگے ءَ رند دہ پانزدہ پاسدار گھ ءَ دیم دیگ بوت ۔ ھمے مردک ءَ کہ پہ ملایانی بادشاہ کنگ ءَ مزنین لیب گوازی کتگ ات ،ھمے ملایان گپت ، زندانی کت ءُ روسیاہ کت ۔
