ڈاڈائے بلوچ شہید نواب اکبر خان بگٹیءِ سالروچءِ درگتءَ…..میجرمجید

تو منا بیہارءَ مہ دئے مرگءِ
مرگ لرزیت چہ منی بیمءَ
تو نمیران ءُُ تو ابدمان ئے
تو منی راجءِ عزت ءُُ شان ئے

ڈاڈائے بلوچ شہید نواب اکبر خان بگٹی زندگیں بلوچے ات کہ زورگیرءَ 26اگست2006 ءَ شہید کت۔ اے روچ پہ بلوچءَ تہاریں روچے ات، بلے نواب صاحبءِ زگریں ہوناں بلوچ راجءَ را یک نوکیں رُژنے بکشات۔ بلوچ راجءَ را یک جْوانیں پنت ءُُ سکینے دات۔ بلوچ راج نواب صاحبءَ تاں جہان است انت شمشت نہ کنت۔

ڈاڈائے بلوچ شہید نواب اکبر خان بگٹیءِ سالروچءِ درگتءَ…..میجرمجید

Sep 1, 2017, 12:22 pm

’’تو منا بیہارءَ مہ دئے مرگءِ
مرگ لرزیت چہ منی بیمءَ
تو نمیران ءُُ تو ابدمان ئے
تو منی راجءِ عزت ءُُ شان ئے‘‘
ڈاڈائے بلوچ شہید نواب اکبر خان بگٹی زندگیں بلوچے ات کہ زورگیرءَ 26اگست2006 ءَ شہید کت۔ اے روچ پہ بلوچءَ تہاریں روچے ات، بلے نواب صاحبءِ زگریں ہوناں بلوچ راجءَ را یک نوکیں رُژنے بکشات۔ بلوچ راجءَ را یک جْوانیں پنت ءُُ سکینے دات۔ بلوچ راج نواب صاحبءَ تاں جہان است انت شمشت نہ کنت۔ انسانی تاریخ بزاں راجدپتر کہ وانگ بیت نواب صاحبءِ کُربانی پہ انسانی سربلندی ءُُ زندءَ حق ءُُ انصافءِ بابتءَ مستریں کربانی اِنت۔ زُلم ءُُ ناروائی ءِ خلافءَ واجہءِ کربانی ابدمان انت کہ آئیءِ سرا بلوچءِ راجدپتر پہر کنت۔ نواب صاحبءِ کربانیءَ بلوچ بامرد بالاچ گورگیج پدا زندگ کت ءُُ پیش داشت کہ بلوچءِ غیرت ءُُ ننگ ءُُ پجارءِ پانک جنوک است انت۔ بلوچ گلزمین رُنگ نہ اِنت۔ بلوچ مکہیں ماتاں بہادر ءُُ میار جلّیں بلوچ بچ پیداگ کتگ۔ بلوچءِ راجدپتر اے دابیں کربانیءَ چکار انت۔
2005ءَ یک احوالکارےءَ نواب صاحبءَ را جست کت کہ اگاں پاکستانءِ فوج گوں بلوچءَ جنگ بہ دات، گُڑا تئی کرد چے بیت؟؟
نواب صاحب ءَ جواب دات کہ من بالاچءِ گورگیجءِ دپترءَ پدا نوک کناں۔
وتی بلوچی کول ءِے کول کت، بالاچ گورگیجءِ دپترءِے پدا نوک کت۔
بلوچ گْوشیت ’’سر بہ روت بلے کول مہ روت‘‘
آ وہدءَ پاکستانی احوالکار نواب صاحبءِ دُرّیں دانکءَ سرپد نہ بیت اَنت، بلے بلوچءَ زانت کہ نواب صاحب بلوچ قومءَ را گوریلا جنگءِ سکین ءَ دئیگا انت ءُُ مروچی ہم واجہءِ سکینءِ پدءَ اے گوریلا جنگ جاری ءُُ ساری انت۔ نواب صاحبءَ بالاچ گورگیجءِ جنگی حکمتِ عملی سک باز دوست بیتگ ءُُ دائما ماں بزیں بلوچی دیواناں نواب صاحبءَ بالاچءِ جنگی حکمتِ عملیءِ زکر کتگ۔ وہدے بلوچ راجدپترءَ چارئے ماں بلوچ دودمانءَ گوریلا جنگءِ پجار بالاچ گورگیجءَ کتگ، پرچا کہ بالاچءِ دژمن بیبگر پُژّ سک تمرد ءُُ تیار اَت۔ بیبگرپُژءِ لشکر باز اَت۔ جنگی ساز وسامان ءِے ہم است ات۔ بالاچءِ لشکر سک کم ات۔ بالاچءَ چاراِت کہ ابید گوریلا جنگءَ سوبمندی سک گْران انت۔ اے سَوبءَ بالاچءَ گوریلا جنگ بندات کت ءُُ وتی دژمن پْروش دات۔ پرچا کہ گوریلا جنگءِ واستا لشکرءِ بازی المی نہ انت۔ جذبہ ءُُ نظریہ لوٹیت۔ گوریلا جنگءِ واستا جنگی رِپک ءُُ ہنرءُُ گوریلا جنگءِ دستور ءُُ رہبندانی پاسداری المی انت۔ گوریلا جنگ واستا جْوانیں ٹریننگ Trainingالمی انت۔
نواب اکبرخانءِ دیدانک ، سماءُُ سسّا ءُُ جنگی حکمتِ عملی ستار کرزیت۔ آئیءَ زانت کہ بلوچ ابید چہ گوریلا جنگءِ حکمتِ عملیءَ سوبمند نہ بیت ءُُ مروچی بلوچ ءِ جنگی حکمتِ عملی ءَ دژمن سربتگ کتگ۔ بزاں Confuse کتگ۔ جنگءِ بنداتءَ 2005ءَ نواب صاحبءَ گوں احوالکاراں گشت کہ من بالاچءِ دپترءَ پدا نوک کناں، بزاں من ءُُ منی بلوچ قوم بالاچءِ گوریلا جنگی حکمتِ عملیءَ کاربند باں۔ نواب صاحبءِ دیدانکءُُ ہونانی لِیک مروچی ہم بلوچءِ رہشون انت۔ اے دابیں بامرد راجانی تہا سک کم پیداک بنت۔ کرناں چہ پد پیداک بنت۔ من گْوشاں کہ نواب صاحبءِ دابیں کماش ءُُ رہشون بہتاوریں راجانی نصیبءَ بنت۔ نواب صاحبءِ کربانی ءِ سوب انت کہ مروچی اینچو زُلم ءُُ زور ءَ چہ پد ہم راجی لشکر جُنزان انت۔ روچ پہ روچ تمرد ءُُ تیار بیان انت۔ نواب صاحبءِ ہوناں بلوچءِ جُنز جُنزینت۔ نواب صاحبءِ ہونانی سیلابءَ آشوبے آؤرت کہ اے آشوب، اے توپان زُلمءِ کلاتءَ الم پْروشیت۔
من پیشترءَ گْوشت کہ نواب اکبرخان بلوچے ات۔ منی مقصد ایش ات کہ شہید نواب اکبر خان ءِ کرد بلوچی کرد ے ات، آئیءِ اوصاف بلوچی اوصاف انت، میارجلی، بہادری، مہمان شناسی، ایمانداری، گْران ءُُ سنگینی ، وطن دوستی، غیرت ، ننگ۔۔۔ نواب صاحب اے کُلیں اوصافانی مالک ات۔ یک رندے بلوچ رہشون ءُُ عالم ء دین واجہ مولانا عبدالحق زامرانی ءَ گشت: اگاں ما بلوچ بہ بیں مئے بازیں جیڑہانی گیش ءُُ گیوار بیت، گُڑا سنگتےءَ گْوشت کہ واجہ ما کُل بلوچ ایں۔ واجہءَ پسو دات بلوچ اے نہ انت کہ ما بلوچی گپ ءُُ گال کنیں یا کہ ما بلوچی پچ ءُُ پوشاک پوشیں۔ واجہءَ گْوشت کہ بلوچ یک کردےءِ نام انت۔ مارا ہما کرد وتی کنگی انت، ہما کردانی پاسداری کنگی انت، ہما کردانی مطابقءَ وتی اجتماعی، سماجی زند گْوازینگی انت، گُڑا ما وتا بلوچ گْوشت کنیں۔
شہید نواب اکبر خان ہما کردانی مُہکمیں بادگیرے ات کہ 80سالءِ عمرءَ پہ بلوچءِ گلزمین، ننگءُُ ناموسءِ ہاترا تپنگ ءِے چست کت ءُُ کوہاں شت، بلے دژمنءِ دیما لگور نہ بیت۔ دژمنءَ پیش سلام نہ بیت، وتی سلاہ ءِے دژمنءِ پادانی دیما دور نہ دات انت، اے دابیں بامرداں گْوشنت بلوچ۔ اے نہ چارنت کہ دژمنءِ لشکر باز انت، دژمنءَ مزنیں سلاہ است۔
بلوچ جنگی ہیرویے نورا مینگل پہ بلوچءِ آجویءِ ہاترا گوں انگریزءَ جنگءَ ات، گُڑا نورا مینگلءَ گْوشت اگاں سلاہ کم بہ بنت، دژمن تمرد بہ بیت، بلے جذبہ ء آزادی، وطن دوستی، دژمنءَ پْروش دات۔ بزاں کہ سلاہ ءُُ لشکر ءِ بازی جنگءَ کٹّ اِت نہ کنت، جنگءَ جذبہ ء وطن کٹّیت۔ شہید نواب اکبر خان ءَ چو لینگاٹانی دابءَ زرّءُُ تہت ءُُ تاجءِ لوٹ نہ کت۔ بلوچ گلزمینءُُ ننگ ءُُ ناموس ءِے بہا نہ کت۔ وہدے یزیدی لشکرءَ ماں ڈیرہ بگٹیءَ آئیءِ کلات بمباری کت، گُڑا واجہ ہشترےءَ جماّز بیت، کوہءَ شُتءُُ جنگءِ جار ءِے جت ءُُ گوں دژمنءَ جنگ ءِے دات۔ چو ہم زانت ءِے کہ یزیدی لشکر باز انت، بلے:
چو نہ زانت بدواہاں لگوریناں
کہ ما بلوچیں ءُُ مرگ بہا زیریں
مرگ بہا زیرگی چیزے نہ انت، بلے بلوچ پہ ننگ ءِ ہاترا، وتی گلزمینءِ آجوئیءِ ہاترا ، وتی شناخت، پجارءُُ سربلندیءِ ہاترا مرگءَ بہازیریت۔ تْراتانی ءِ کوہاں دژمنءِ بالی گُراباں ، ٹوپاں تیر چو ہورءَ گْورت۔ وہدے دژمن ہر نیمگا تْراتانی ءِ کوہ انگرّءَ کُت انت، گُڑا نوابءَ ماراِت کہ دژمن مئے جاگہءَ زانت ءُُ نی مئے سرا زمینی حملہ کنت، شہیدءِ بہادریءَ بچار کہ وتی کُلیں ہمبل، بیل ءُُ سرمچار ءِے حکم دات انت کہ شما درکپ اِت، من وت گوں دژمنءَ جنگ دیاں۔ پرچا کہ چو زانت ءِے کہ من در اَتک نہ کناں، جند کماش انت ، یک پادے ہم نزور انت ءُُ ہمراہ نہ انت، بزاں واجہءَ مرگ پہ چمء وت دیست کہ پیداک انت، مرگ ءِے وش اَہت کت ءُُ مرگءَ را مڑاہے گون کت:
’’تو منا بیہارءَ مہ دئے مرگءِ
مرگ لرزیت چہ منی بیمءَ‘‘
گوں دژمنءَ تہنا مقابلہ ءِے کت۔ یزیدی لشکرءِ یک کرنلے، دو میجر، دوکیپٹنءُُ دگہ بازیں فوجی یے مُردار ءِے کُت ءُُ وت شاہ ء شہیدانی لڑءَ ہوار بیت، وتی ماتیں وطنءِ دلبندءَ واب اِنت۔ بلوچ شاعرے گْوشیت:
مردے اگاں بندیت خسروءِ تاجءَ
تہنا گوں سی مردءَ نہ بارت باجءَ
بلے نواب صاحبءَ باج بُرت، بزاں کہ وتی کول ءِے کول کت ءُُ شہادت ءِے نوش کت ءُُ نمیران بیت۔ کُلّ بلوچ قومءَ را بلاہیں نامے دات ءِے۔ بلوچءِ راجدپترءِے گوں زگریں ہوناں نبشتہ کت۔ بلوچ قوم تاں است انت نواب صاحبءِ اے احسان ءُُ اے کربانیءَ نہ شموشیت۔
تہنا بلوچ ناں سرجمیں انسانی تاریخ شہیدءِ سُہریں ہوناں گوں نبشتہ کنگ بیت۔ مروچی ہر بلوچ ماتے کہ بچے پیداک کنت، آ مات پہ پہر ءُُ شان وتی بچءَ اکبرخانءِ نامءِ پر کنت۔
تنگویں بیلاں! دژمنءَ گل کت کہ نواب صاحب ما شہید کتگ، ڈکٹیٹر جنرل پرویز مشرف ءَ مٹھائی ، حلوا ءُُ بسکوٹ بہرو بانگ کت، ڈُہل ءُُ ڈومب، ناچ ءُُ سُہبت کت کہ ما بلوچءِ جُنز ہلاس کتگ۔ بے ماشءَ چو نہ زانت کہ نواب اکبر خان یک فکرےءِ نام انت، یک جنزےءِ نام انت، یک آشوبےءِ نام انت، یک فلسفہ یےءِ نام انت۔ شہید نواب اکبر خانءِ زگریں ہوناں دگہ ہزارانی حسابءَ من گُشاں کہ لکھانی حسابءَ ورنا، سرمچار ءُُ راج پہاز پیداک کتگ۔ مروچی ہم چو نواب اکبر خانءِ وڑا گوں دژمنءَ دیم پہ دیم انت۔ مروچی مئے مات ءُُ گْوہار ، کماش، پوریاگر، دہکان، بزگر، شپانک، زردار، میر ءُُ امیر، کہدا، تمندار، سردارءُُ نواب، نواب اکبر خانءِ فکر ءُُ فلسفہءِ منّوگر انت۔
تنگویں بیلاں! مروچی ہم بلوچ شاعر ءُُ ادیب، نوب صاحبءِ شرپءَ شعر، گال، پربند ءُُ دُریں دانک درشان کننت، مروچی ہم بلوچ زالبول ماں سیری مراگش ءُُ دیواناں نواب صاحبءَ را پہ وزمے نازیننت۔ اے مہر ءُُ دوستی ، تپاکی گوں وتی شہید ءُُ بامرداں زندگیں راجانی نشانی انت۔
سنگتاں! ما ءُُ شما ہر سال بلوچ شہیدانی سالروچءَ داریں۔ اے یک جْوانیں عملے، بلے شہیدءِ ارواہ ہما وہدءَ تاہیر گیپت گہ راج شہیدءِ فکرءَ دیما بہ بارت۔ شہید ءِ فلسفہءِ پلہ مرزیءَ بہ کنت، شہیدءِ پروگرامءَ بلوچءِ گس گسءَ سر بہ کنت، شہیدءِ کاروانءَ مہکم بہ کنت، شہیدءِ نیم بُندگیں وابءَ تعبیر بہ کنت، شہیدءِ واب آجوی انت۔ وہدے راجءَ آجوی گپت، بزاں شہیدءِ ارواہ ماں کبرءَ تاہیر گپت۔ شہیدانی پیگام بزاں کلوہ اے وڑ انت:
پیرکوہءِ پازگاہ مُہکمیں
سُہر کت گوں ہوناں اکبرءَ
مہراب شہیدءِ درورءَ
ارواہ شہیدءِ زندگ انت
پُرسیت روچے سد برا
شہیدءِ ارواہ روچے سد برا مارا پرسیت، چے گْوشیت۔ وتی پدریچءَ سکین دنت، شہیدءِ سکین:
’’حقءَ وتی پُل چہ بداں
بدواہ ءُُ جدّی دژمناں
ہپ پُشتی مال ءُُ ملکتاں
زور گپتگیں تئی سیمسراں
سوب انت ماں جنگاں شکلیں
ارزان بنت کار مشکلیں
پد کنزگءَ تاوان بیت
مُرگاپ ءِ تلّاں رِتکگیں
ہون مئے شہیدءِ زْیان بیت
*
تپاکی آجویءِ مانزمان انت
بلوچستان آجو بات

http://dailysangar.com/home/page/7224.html