بلوچ دژمنیں “سپاه قدس” بلوچ جُهدکاراں میڑینگ انت
بلوچستان ءِ راجدپترءِ تجربه ءُ اِندِرستانی شموشگ په راجی جنزءِ نپ ءُ سیت ءَ نهنت۰ ادان راجدپترءِ هما درسءَ نام گِر کنان که نبایداِنت یک رندے دگه چکاسگ به بیـت۰ دوار سوچیں وت ماں وتی جنگ ءُ جیڑه چه چاکر ءُ گوهرام ءِ دور بگر تاں هنوگیں دور یکی چه سَوَبان اِنت که ڈنی ءُ دژمن بلوچانی ملک ءَ آوار جتگ ءْ هنوں وتیگی کنگ ۰
بید بلوچانی وت ماں وتی جیڑه هچ دژمنے گلزمین ءَ آوار جت کت نه کت۰ بید بلوچانی میڑینگ ءَ انگریز اں نه توانت سوبین به بنت۰ اگاں بلوچ تپاک به بوتین انت گڑا رضا میرپنج پروش وارتگ ات ءُ مگربی بلوچستان ءَ اے “هالِ زار” نه بوت۰ اگاں جام بیله ءُ سردار خاران ءُ گچکی سردارگوں خان ءَ کلات هور ءُ تپاک به بوتین انت ءُ محمد علی جناح ءِ ابلیسی دام ءَ مه کپتین انت گڑا بلوچاں ماں ۱۹۴۸ ءَ پروش نه وارت ءُ رودراتکی بلوچستان هنوں آزاتیں ملکے اَت۰
هنوں بلوچ دژمنیں “سپاه قدس” ءُ پارس فاشیستاں چن ءُ لانچ انت تاں بلوچاں به میڑین انت۰ اے پدریں گپے انت که رودراتکی بلوچستان ءِ شمارے جهدکار مگربی بلوچستان ءَ آتکگ انت ءُ اداں ایرانی واکداراں بزاں سپاه پاسداران آهاں په یک ڈکّے ( شرطے) ماں بلوچستان ءِ سربازءُ سراوان ءُ چهبار ءُ دشتیاری ءَ جلّتگ اَنت۰
گجرانی ڈکّ بزاں “شرط” ایش انت که آ گوں بسیج ءُ سپاه ءَ همکاری بکننت اگاں ناں آهانی آسر شهید عابد زامرانی ءُ دو بلوچ ورناے وڑا بیت که ماں مگس ءَ شهید بوتنت۰
رونشتی بلوچستان ءِ جهدکارانی سلهبندیں هوربند “جیش عدل” ءَ جار جتگ که سئے جهدکار مدتے ءَ پیش گلزار نامیں بلوچے ءِ گروپ چه رودراتکی بلوچستان ءَ دسگر کتگ ءُ ماں رونشتی بلوچستان ءَ سپاه پاسداران ءِ دستا داتگ اَنت۰
چنت روچ پیش ءَ هم ماں زامران ءَ “جیش عدل” ءِ جهدکارانی سرا هلگر ءُ تیرگواری کنگ بوته ءُ هلگرکنوکاں سپاه قدس ءَ پرمائینتگ اَنت۰
اداں نبیسگی انت که اے گئیر بلوچی کِرد انت۰ آ سئیں ورنایانی پت ءُ مات ءُ لوگ مردمانی جوابءَ کئے دنت؟ اے دژمن پسندیں کارءِ زمه وار کئے انت؟
بلوچ رهشون ءُ جهدکاراں دلگوش گورکنگی انت که لائکیں راجی رهشون ءِ جوانیں درورے کوردستان ءِ جلال طالبانی انت۰ وهدے که تورکی ءِ واکدار ماں دیوانے چه آیی ءَ لوٹت تاں کوردستان ءِ باهوٹیں پ۰ ک۰ ک۰ پیشمرگان ءَ دسگر بکنت ءُ تورکانی دست ءَ بدنت گڑا آیی ءَ درّائینت : ” پیشمرگ که اناں من شما را یک کوردی پِشِّکے ( گُربگے) هم دستا نه دیاں”۰
بلوچ رهشون ءُ جهدکاراں زانگی انت که اے نئے بلوچی کار اَنت ءُ نئیکه راجی کِرد۰ بلوچاں دشمن ءِ دستا دیگ ءُ کوشارینگ په سرمچار ءُ راجی کماش ءُ رهشوناں پهرے نهنت۰ چشیں ردیں کار راجی جنز ءِ هُنڈالاں هشک کنت۰
ما را هژار بیگی انت که بلوچ دشمنیں سپاه ءِ برنامه ءُ لوٹ مگربی ءُ رودراتکی جهدکارانی میڑینگ انت۰ اگاں دوارسوچیں جنگے بنگیج به بیت گڑا راجی جنز ءِ کاروان سریں پروش بیت۰ چه دوئیں نیمگ ءَ بلوچ تاوان کننت ءُ مئے دشمن بزاں پارس ءُ پنجاپی په ملک ءِ مدامی زوربرد کنگ ءَ سوبین بنت۰
ما را هژار بیگی انت که بلوچ دشمنیں سپاه ءِ برنامه ءُ لوٹ مگربی ءُ رودراتکی جهدکارانی میڑینگ انت۰ اگاں دوارسوچیں جنگے بنگیج به بیت گڑا راجی جنز ءِ کاروان سریں پروش بیت۰ چه دوئیں نیمگ ءَ بلوچ تاوان کننت ءُ مئے دشمن بزاں پارس ءُ پنجاپی په ملک ءِ مدامی زوربرد کنگ ءَ سوبین بنت۰
اے درستیں بلوچانی انسانی ءُ راجی زمّه انت که “سپاه قدس” ءِ پلینڈی برنامه ءُ بلوچ دشمنیں کارکرداں پروش به دینت ءُ تهران ءُ اسلام آباد ءِ واکداراں موه مه دینت تاں دوارسوچیں جنگے ءِ آس ماں گلزمین ءَ روک بکننت۰
آزات ءُ آبــاد بات گنجيـــں بلـوچستـــــــــان
پروشـت ءُ پروش باتنــت ايران ءُ پاکستــان
محمــد کريــم بلــوچ
اگسـت ۲۰۱۷
