شما اتکگ ئے؟ مرچی برو اِت شمئے موکل اِنت جمبر سک سیاہ اِنت، ھور ءِ پیم ءَ اِنت اگاں سک بگواریت گڈا شما جنجال بئے۔ شت نہ کن ئے پدا لوگ ءِ مردم پریشان بنت۔ بس وانگجاہ ءِ بانداتیگیں کاراں بکن اِت ایدگراں شماراں باندا وانیناں۔
شاری وتی میتگ ءِ چْکاں ٹیوشن وانینگ ءَ اَت بلے اے روچ ءَ جمبر ءِ ترس ءَ گونڈو ئےِ موکل دات اَنت۔
جمبر ءَ سرجمیں آزمان بشانگ کتگ اَت۔ ترمپ ہاست ہاست ءَ زمین ءَ تر کنگ ءَ اَت اَنت ءُْ جمبر ءِ گوت ءَ شیکّگے مان اَت۔ شاری تاپ ءَ داتگیں گْداں چن ءُْ لانچ اَت ۔ ھور ہم گیش بوان اَت پساں آ ءُْ زار اَت ہمے دمان ءَ بلّی آمنہ ءَ وتی لٹ چت ءُْ ڈن ءَ در اتک شاری ءَ را توار کت ءُْ گشت مئی مات اے بْز گل ءَ واڑ ءَ سر دئے کہ ڈک ءِ دپ پچ اِنت رواں گار بنت۔

Oct 18, 2017, 1:18 pm

(آزمانک)

شما اتکگ ئے؟ مرچی برو اِت شمئے موکل اِنت جمبر سک سیاہ اِنت، ھور ءِ پیم ءَ اِنت اگاں سک بگواریت گڈا شما جنجال بئے۔ شت نہ کن ئے پدا لوگ ءِ مردم پریشان بنت۔ بس وانگجاہ ءِ بانداتیگیں کاراں بکن اِت ایدگراں شماراں باندا وانیناں۔
شاری وتی میتگ ءِ چْکاں ٹیوشن وانینگ ءَ اَت بلے اے روچ ءَ جمبر ءِ ترس ءَ گونڈو ئےِ موکل دات اَنت۔
جمبر ءَ سرجمیں آزمان بشانگ کتگ اَت۔ ترمپ ہاست ہاست ءَ زمین ءَ تر کنگ ءَ اَت اَنت ءُْ جمبر ءِ گوت ءَ شیکّگے مان اَت۔ شاری تاپ ءَ داتگیں گْداں چن ءُْ لانچ اَت ۔ ھور ہم گیش بوان اَت پساں آ ءُْ زار اَت ہمے دمان ءَ بلّی آمنہ ءَ وتی لٹ چت ءُْ ڈن ءَ در اتک شاری ءَ را توار کت ءُْ گشت مئی مات اے بْز گل ءَ واڑ ءَ سر دئے کہ ڈک ءِ دپ پچ اِنت رواں گار بنت۔
جی اماں من کنن ایں تو برو لوگ ءَ نند ھور تیز اِنت۔ شاری پساں سر دیان اَت ھور گیش بوان اَت شاری ہم تر بوان اَت۔ واڈ ءِ پترگ ءَ گوں شاری ءِ گشان دارے ءَ گپت چانک دات۔ بزّگ ءِ گشان ساری ءَ جنڈے اَت ءُْ شش تل اَت باریں چنچو شول ئےِ مان اَت۔۔۔۔۔۔۔۔۔۔۔۔۔
ہمے چست ءُْ ھیرانی تہا لین شت اَنت شاری ءَ رہ سک تور اِت اے ھاتر ءَ نہ کہ ملک مارا لین نہ دنت بلکیں اے واستہ کہ کاسگ چٹیں ہمساہگانی جنریٹر چالو بنت ءُْ مارا واب نیلنت وت وَ لوگ ءَ وپس اَنت پشّہگ ڈن ءِ وپسگ ءَ ءُْ گرم لوگ ءِ وپسگ ءَ مارا کشنت۔
مئی مات بیا اے داناں شود ءُْ پر کن کہ حاجی کیت شدی بیت مرچی سبارگ ءَ ہم نہ یتکگ۔ حاجی شاری ءِ مزنیں پت اَت شاری ءِ مات ءِ مرگ ءَ رند شاری ئےِ وتی گور ءَ آؤرتگ اَت کہ شاری ءِ پت تریاکی یے اَت آئی ءَ وتی سْد نیست اَت شاری ءِ سما ءَ کجا بیت۔ شاری ءَ موبتی یے روک کت ءُْ داناناں پر کت۔ ھورَ نو شر گورگ ءَ اَت ٹیپْک ءِ سر ءِ گورپات ءَ ھور ءِ توار دو کد کتگ اَت۔ میتگ کوراسی ءَ ھیر بْرتگ اَت بس ھور اَت کہ ریچگ ءَ اَت ءُْ گوات اَت کہ کشگ ءَ اَت دگہ ہچ۔۔۔۔۔۔۔۔۔۔!!!
شاری ہاموشی ءَ آس ءِ کش ءَ نشتگ اَت ءُْ گوں ھور ءَ گلگ کنگ ءَ ات۔ اناں تو زانہ نزانئے مئے ہزاراں مردم کوہاں کپتگ ءُْ زلیل اَنت پہ وتی زمین ءَ۔ تو نہ زانئے تی اے رنگیں گورگ ءَ آ چوں زلیل بنت۔ کجا برو اَنت اے کہر ءِ تہا؟
کئے بزانت باریں تو چنچو کس مرچی گٹ ءُْ گرانی تہا کوار کتگ ءُْ چنچو کس چنچو کار ءَ داشتگ؟ بس نہ اِنت مرچی تو گونڈوہانی وانگ ھراب کت۔ بگش باریں دگہ چنچو ازاب کنئے۔۔۔۔۔۔۔۔۔۔۔۔؟
ترا مئے واستہ ہمنچو گوارگی اِنت کہ مئے مردم پہ ترمپے آپ ءَ گٹ مہ بنت تی اے کہراں انو ما اوپار کت نہ کناں۔۔۔۔۔۔۔۔۔۔۔۔
جنئے درّ ءَ یکے ٹْکّگ اِنت باریں بچارئے کئے اِنت؟ بلی ءَ شاری ءَ را آواز دات ءُْ گشت۔
شاری ءِ ھیال برگشت زوت زوت ءَ شْت ءُْ درّ ءَ را پچ کت داں حاجی اَت ھور ءَ شر میچل کتگ اَت۔ شاری ءَ کاہاناں پچ گپت ءُْ دیم پہ واڑ ءَ پسانی نیمگ ءَ شت ءُْ حاجی ءَ تگ بست دیم پہ کْل ءَ۔ کْل آپ ءَ نوک اَت حاجی ءَ نزانت من کجا بہ ننداں بلّی ءَ میستگیں کمبلے پچ کت ءُْ نادینت۔
سجا تر ئے۔ تو کہ دیستگ اَت ھور ریچگ ءَ اِنت تو وت ءَ زوت گیشنت ایں۔ بلّی ءَ جوڑاہے گْد پہ آئی ءَ کشیت ءُْ گشت۔
اے شیپ زاناں وار دنت ترمپے زمین ءَ کپگ نیلت۔ شیپ ءَ آپ آؤرتگ پہ مرگے وت ءَ در کتگ ءُْ آؤرتگ۔
دہکان شمبے ءِ کور ءِ سر ءِ ڈگار گرک کت آپ ءَ۔۔۔۔۔۔۔۔
من زاناں مئے واستہ ہم ہچ نیلیت۔
ابا بٹّاں بیاراں کمال اوں اتکگ۔ شاری کْل ءِ دپ ءَ اوشتات ءُْ حاجی جست کت۔
حاجی ءَ ھو کت گشت مرچی چٹنی ہارگ نہ بوت کہ دکان بند اَت۔
شاری لچ ءُْ مینانی تہا لگت دیان ءَ شت ءُْ بٹاناں کشیت۔
بٹ کورک اَت اَنت نہ ڈالے تشے ہست اَت نہ کہ چٹنی۔ شاری ءَ پمیشکہ ھور ءِ سر ءَ زد اتک کہ حاجی ءَ ھور ءِ شومی ءَ ھچ آؤرت نہ کتگ۔ بزّگ سک دلوارگ اَت وتی بزگری ءِ سر ءَ گریوگی اَت۔
گڈا اینچو بزگی ہنچو تنگ دستی نو ما کئی گور ءَ دست ءَ دراج بکن ایں اے نباشتیں ملک ءَ مارا کئے ہست۔۔۔۔۔!!!
وت وَ بزّگ اِنت بلے مارا اوں وتی پاداں برتگ ئےِ گوں۔ یاھدا تو کجا ئے۔۔۔۔۔۔۔۔۔۔۔۔۔؟
جل ءَ اسلام ءِ نام ءَ جوڑ بوتگیناں مارا زلیل کتگ ءُْ بْرز ءَ تی ابرم ءَ۔ ما نو کجا برو ایں شاری ءَ ہنسگ دست ءَ اَت ءُْ گوں وت ءَ گپ ءَ اَت ہمے دمان ءَ حاجی ءَ توار کت ءُْ گشت زوت کن من سک شْدی آں شاری ٹگلیت بٹّاناں چست کت ءُْ شت۔
ابّا ھور مرچی دارگ ءِ وڑا نہ اِنت ہما اِنت کہ یک شل ءَ رچگ ءَ اِنت حاجی ءَ دستانی شودگ ءِ وھد ءَ ڈنّ ءَ سر کشیت ءُْ گشت۔
جی ابّا اے ھور گواریت پدا اے جمبر ھر ھند ءُْ دمگاں گپیت بلے شر اِنت ڈیھ سبز ءُْ آباد بیت ھر کس وشہال بیت ملک بہار گاہ بیت۔ انو مئے ھال اِنت۔۔۔۔۔۔
شاری ءَ را کمال ءِ اے گپ سک درد بوت بلے ھچ گشت ئےِ نہ کت بس ہمے زد ءَ لستیں لْنکا ءَ پد بس ئےِ کت گشت ئےِ منی دل ہائیگ ءَ نہ اِنت۔
شاری ءَ اسل ءَ وتی یکیں برات ءُْ آیائی ءِ سنگتانی گم اَت کہ پہ ڈیھ ءِ آجوئی ءَ مات کوہاں رپتگ اَت اَنت۔ اگاں ڈیھ پہ ھور سبزیت اِنت گڈا کس ءَ جنگ نہ کتگ اَت۔ ھور پہ مارا وبا ءِ جان اَنت۔ کْل ءَ نہ گندیت کہ چار چوکور اِنت، بْنڈکاں نہ گندیت چوں میستگ اَنت۔ نہ نندگ ءِ جاگہ ہست نہ وپسگ ءِ چو سرپد نہ اِنت کوہ ءِ سنگت کجام ھال ءَ اَنت۔ ایدگہ بزگر ءُْ گریبانی سد ءُْ نہ اِنت آ بیچارگ وَ مارا چہ گنتر اَنت۔ ھور ءَ ہما مردم گل بکنت کہ پکّائیں ماڈیاں واب اَنت بوپ ءُْ بکملان اَنت ما نزان ایں وتی آس ءَ چتو روک بکن ایں کہ دار چوں تر اَنت چم مئے دوتاں کور کتگ اَنت۔ مئے بزگی ءَ ھور بارت؟؟؟
ھور مارا گنتر کنت۔ ھور ءَ کجام ڈیھ سبز بوتگ کہ مئے ڈیھ سبزیت۔ ھور ءَ وشہالی گون نیست پہ پدمنتگ ءُْ گلامئیں راج ءَ۔ ھور ءَ پرچہ منی مات ءِ شومْک (کینسر)وش نہ کت؟ ھور پرچہ منی تریاکیں ایں پت ءَ شر نہ کنت؟ ھور پرچہ مئے میتگ ءِ تریاک ءُْ ایروینانی ھڈّیاں بند نہ کنت؟ ھور پرچہ مئے نان ءَ نانے پر نہ کنت؟ کد مئے مردم سرپد بنت اے بزّگی، واری، دِرتگ پْچی ءُْ پدمنتگی ڈکال ءِ نہ اَنت، گلامیئگ اَنت ءُْ ڈیھ ءِ جند ءِ ڈکالی ہم گلامیئگ اِنت۔ ڈیھ ھون لوٹیت پہ سبزگ ءَ ھور نہ۔۔۔۔۔۔۔۔
ڈیھ ءَ وشہالی ءُْ بہارگاہ آجوئی ءَ پد کیت ھور پد نہ۔۔۔۔۔۔۔۔۔۔
شاری گوں کمال ءِ گپ ءَ تہنا شر نورْنڈگ ءَ اَت ھور کمی ءِ وڈا ہم نہ اَت لوگ ءِ پیشگاہ ءِ آپ چْل ءَ ہاست ہست ءَ پْترگ ءَ ات۔ آپ ءَ شاری ءِ گشان تر کتگ اَت۔ آپ نو شاری ءَ داں سر اَت بلے شاری زد ءَ نہ سْریت داں دیراں شاری نشت ءُْ کوئیگانی بارو ءَ جیڑیت ءُْ دل ءِ گشت باریں ھدا بزانت اے کہر ءَ آ کجام ھال ءَ اَنت باریں ورگ اِش کتگ یا نہ۔۔۔۔۔۔۔۔
ہمے ھیال ءُْ جیڑگانی تہا گوربام بوت بچارگ پدا ہمے لوگ ءِ کاراں سر مہ سر بوت ھور تَرّ اِت ءُْ سارت بوت لوگ ءِ پیشگاہ ھور ءَ سرجم ءَ آپ کتگ اَت۔ ماسٹر وتی لوگ ءِ کپتگیں دیوال ءِ جاگہ ءَ تگرد جنئگ اَت ءُْ کمال لوگ ءِ پیشگاہ ءِ آپ ءَ شنمپگ ءَ اَت۔ کمال کمو ڈن ءَ سیل کن بچار شاری ءَ پہ شیگانی کمال توار کت ءُْ گشت۔
وھدے کمال ءَ ڈنّ ءَ سر کشت داں میتگ ءِ میر ءُْ امیر گوں جن ءُْ چکاں سیل ءُْ سواد ءَ روگ ءَ اَنت ءُْ پریاتون گوں وتی پساں ڈگاررانی سر ءَ رپتگ۔۔۔!!!
***

http://dailysangar.com/home/page/7788.html