ہژدہ نومبر2017بلوچ رہشونانی دیوان ۔۔۔۔۔ میجرمجید

شالا آ روچ بہ بات انت کہ منا جاہ بہ بیت

چو کہ آژناگءَ تئی لوگءَ منا راہ بہ بیت

اے جہاں پہ من چہ قبرءَ بہ بیت تنک تِراوں بَلے

تئی پیشانیگءِ ندْراں کہ پہ من پْراہ بہ بیت

(کریم دشتی)

تنگویں بیل ءُُ بْراہندگاں! شُما کُل سرپد اِت کہ 18نومبر2017ءَ کُلیں آجوئی لوٹوکیں گَل ءُُ رہشونانی گند ءُُ نندی دیوانے ماں سویزرلینڈ، جینواءَ برجم دارگءِ جار جنئگ بیتگ۔ اے پُرمہریں دیوانءَ بلوچستانءِ کُلیں آجوئی لوٹوکیں گلانی رہشون ءُُ جہگیر بہر زیرنت۔ اے دیوانءَ بلوچ قومی اتحاد ءُُ اشتراکء عملءِ بابتءَ گپ ءُُ تْران، شور ءُُ سلاہ بیت۔ چونائیءَ دانشمندیں قومءُُ خاص کر ہما قوم کہ گوں جنگی جاوراں دُچار انت۔ وہدءِ لوٹءُُ حالتانی حوالہءَ تہہ گِندی ءُُ جاورانی ٹپّاسگ، وتی نزوریانی ءُُ تمردیانی پٹّ ءُُ پول کنگ، نوکیں حکمتء عملی جوڑ کنگءُُ اے دابیں دیوانانی بلاہیں ارزشتے۔ جنگی جاورانی اندرا قومی بہر ءُُ بانگ ، تقسیم در تقسیم پْرشت ءُُ پْروشءُُ پلورائزیشن قوماں تباہ کننت، سک نزور کننت، دژمن سوب کنت۔ وہدے کہ ما وتی تحریکءِ گْوستءَ چاریں اے کُلیں پْرشت ءُُ پْروش فکری ءُُ نظریاتی نہ بیتگ انت، زاتی پسند ءُُ ناپسند، قبائلی، فرسودہیں دستور، اناپرستیءُُ دژمن ءِ رِپک ءُُ پندل، بیتگ انت۔ مروچی مئے راجءُُ مئے رہشوناں وتی گْوست سنگ ءُُ شاہم کنگ ءُُ پولگی انت، اے ہم چارگی اِنت کہ اے کُلّیں پْرشت ءُُ پْروشانی سببءَ بلوچ گلزمینءُُ آجوئیءِ جُنزءَ سیت رستگ یا تاوان، ہر یکے زانت کہ تاوان بیتگ، گُڑا بائد اِنت کہ بلوچ رہشون وتی پیشی ردیاں بہ مارنت ءُُ وتی نوکیں حکمتء عملیءَ ءُُ راہ ءُُ رہبنداں جوڑ بہ کننت، بلوچ گْوشیت:
یکیں ہونڈءِ دپءَ مار دو رَندا مہ وارت
مروچی بلوچ جہدءِ برکتءَ ءُُ دژمنءِ نزوریانی سببءَ مْیاں اُستمانی جاور بلوچءِ حقءَ اَنت، مروچی بلوچءِ دژمن ءِ مکاری ، دو تل ءُُ پوستی ، زلم ءُُ ناروائی زانگ بیتگ انت۔ دُژمن یک نیمگے چہ یورپی ملکاں زرّ گیپت کہ من دہشتگردیءَ پْروش دیاں، دومی نیمگا ہمے زرّ ءُُ جنگی اَزباباں لشکر ء جنگوی، طالبان، حقانی نیٹ ورک ءُُ اندگہ نام نہادیں بَنّامیں آئی ایس آئیءِ رودینتگیں جہادی گلانی گہبودی ءِ سرا حرچ ءُُ درچ کنت ءُُ یورپءِ خلافءَ ہمے جہادیاں جنگءَ دیم دات۔ مروچی یورپ ءُُ کُلیں جہان دژمنءِ اے مکاری سرپد انت ءُُ دُنیا زانت کہ پاکستان دہشتگردیءِ مستریں فیکٹری اِنت۔
مروچی مئے رہشون اے کُلیں حالتانی تجزیہ ءَ بہ کننت، وتی نوکیں حکمتء عملیءَ تشکیل بہ دینت ءُُ اشتراکء عمل پروگرامءَ دیما بہ برنت۔ اے زانگ لوٹیت کہ پْرشت ءُُ پْروشءُُ ناتپاکی ءُُ وت ماں وتی کسان کسانیں جیڑہ قومءَ نزور کننت، قوم پرشت ءُُ پروشءِ نیمگا بارت، مہلوکءِ دلانی تہا دلپْروشی ودی بیت۔ اے پیمیں جنگی جاوراں ہرکس بلوچ بہ بیت، سردار، نواب، زردار ، گریب ءُُ پوریاگر، کل بلوچستانءِ بیرکءِ ساہگءَ یکدست ءُُ تپاک بہ بنت۔ زات ءُُ زُریات، ٹک ءُُ بولک، دین ءُُ مذہب آجوئی جنزءِ دیمءَ اڑنگ مہ بنت۔ جہدانی پِڑءَ کردانی چارگ ءُُ ٹپاسگ، سنگ ءُُ شاہم کنگ المی انت۔ مروچی آ نوابی ءُُ سرداری ءِ سْیاہیں روچ برکت بیتگ۔ مروچی اگاں کسے سردار یا نواب ءَ اہمیت دنت، گُڑا جہدءِ حوالہءَ، پہ نوابیءُُ سرداری ناں ۔اگاں مروچی نواب مری، نواب اکبر خان، نواب نوروز، بالاچ مری نمیران انت، اے واستا ناں کہ سردارءُُ نواب بیتگ انت۔ مروچی نواب غوث بخش رئیسانی، سردار دودا خان، جام غلام قادرہم سردارءُُ جام بیتگ انت، بلَے کس نہ زانت کہ قبر اِش کجا انت؟ اے ہم سردار ءُُ نواب بیتگ انت۔ لینگاٹ وَ سردار ءُُ نواب نہ اَنت، بلے بلوچ جُنز اِش ہمینچو تاوان داتگ کہ گْوستگیں 70سالءَ زالم ءُُ جابر تِریں سردار ءُُ نواباں نہ داتگ, اے ہاترا جہدانی پِڑءَ کرد چارگ بنت، نوابی یا سرداری چارگ نہ بیت، ہمے واستا واجہ کریم دشتی گْوشیت:
مئے ہدوک ءُُ واہگ ءِ حُبّانی چمداری نہ شُت
چہ منی نامءَ تئی ٹہلانی بیزاری نہ شُت
تو بچار شانءَ کہ مُرتگ، انگتءَ مَلّیت کریم
سر ماں حاکاں کپتگ ءُُ فکرءَ چہ سرداری نہ شُت
انچو کہ راجی کوّاس واجہ کریم دشتی گْوشیت کہ چے فرسودہ ءُُ وتگڑیں فکراں درکپگی اِنت ءُُ کُلاں بلوچ بئیگی اِنت۔ چونائیءَ بلوچ راجءَ سک دیر اِنت کہ تپاکی ءُُ اشتراکء عملءِ لوٹ کتگ، بلے ہرچیز پہ وتی وہدءُُ پاسءَ کیت۔ اے دیوانءِ مستر یں مُول ءُُ مراد بلوچ قومی اتحاد ءُُ اشتراکء عمل ءِ بابتءَ اِنت۔ مارا اُمیت اِنت کہ مئے رہشون اشتراکء عملءِ بابتءَ جْوانیں قدمےءِ چست کننت ءُُ بلوچ راجءَ دلپْروش نہ کننت۔
۱۔ قومی لوٹ، بزاں راجءِ فکری موقف۔
۲۔ آجوئیءِ لوٹ۔
۳۔ جْوانیں دیدانک۔
۴۔ آزاتیں اِدارہ۔
۵۔ فکری ہمراہ داری۔
۶۔ ڈسپلین ، بزاں نظم و ضبط۔
اے جُنزءِ بنیادی نقطہ انت کہ اشانی نیمگا دلگوش دیگی انت۔ قومی موقف بزاں آجوئیءِ لوٹءِ سرا مصالحت پسندی مہ بیت، پرچا کہ قومی آجوئی ءِ لوٹ یا کہ موقف تئی جہدءِ بُن ہشت انت، تانکہ بُن ہشت مُہکم مہ بیت، آ گِس نزور بیت۔ اگاں دنیاءِ قومی جنزانی سرا چمشانک دیئے گُڑا گندگ بیت کہ ہر یک جنز یا کہ قومی موقفےءِ سرا نرمی ءُُ مصالحت پسندی کنگ بیتگ، آ جنزءَ پْروش وارتگ ءُُ سوبمند نہ بیتگ۔ چوش کہ تامل ٹائیگرءِ مثال دیما انت، حالانکہ تامل ٹائیگر سک تمردءُُ مُہکم اتنت ءُُ آجوئی گُڈی منزل اِش نزیک کتگ ات، بلے پْروش اش وارت، پرچا کہ وتی قومی موقف اِش پاد لپاش کت، پروکسی جنگاں دست اِش ماں کت، ڈنی ملکانی واہگءُُ لوٹءِ پدءَ وتی حکمتء عملی اِش جوڑ کت، پروش اِش وارت۔ وتی قومی موقف مُہکم دارگی انت کہ تئی جہدءِ بُن ہشت انت۔
تنگویں بیلاں! اپسوزءِ گپ ایش انت کہ چہ اے دیوانءَ پیش مئے لہتیں چو منی دابیں نابزانتیں دانشور ءُُ لکھاریاں وتی عقلءِ دپ پچ کتگ، اے واجہانی گُشگ اِنت کہ ’’بلوچ تپاک نہ بیت‘‘۔ ’’بلوچ ءُُ بد روچ‘‘۔ ’’بلوچءِ مزاج ناتپاکی انت‘‘۔ ’’بلوچ یک دومیءَ برداشت نہ کنت‘‘۔ ’’من نہ کُشتگ حِلار نہ انت‘‘۔ ہمے وڑیں لہتیں وتگڑیں چاچ ءُُ بتلانی مئے نیم بُندگیں دانشوراں حوالہ داتگ، بلے من ہمے نیم بُندگیں دانشوراں گُشگ لوٹاں کہ بلوچ راجءَ مروچی دُنیاءِ ہپتمی نمبرءِ یک ایٹمی ملکے نَپسّءَ رسینتگ، بلوچ جہدءَ مروچی زورگیر، لینگاٹ، کاسگ چٹ ءُُ ربال پونزءَ رسینتگ انت، اگاں تپاک مہ بیتیں گُڑا بلوچ جُنزءَ اے کسانیں مدتءَ اینچو دیمروی چون کتگ ات؟؟ مروچی اے زانگ لوٹیت کہ بلوچءِ جنگی محاذ یکے نہ انت، یکے زورگیر انت، یکے لینگاٹ انت ءُُ اندگہ ربال، کاسگ چٹ ءُُ زرخریدیں بے ضمیریں ءُُ بلوچ کُش ٹولی انت، تُن، گُژنءُُ بے روزگاری، دژمنءِ کید ءُُ بند، لٹّ ءُُ کُٹ، میر صادق، میرجعفر ءُُ میرالہیار ہم گوں دژمنءَ گون اَنت۔ تنے وہدی اے کُلیں اَڑنگءُُ ہِلّت مہ بیتیناں، مروچی دژمن ءَ دیری میدان یلہ کُتگ ات۔ بلوچءِ راجی شاعر واجہ انور صاحب خان گْوشیت:
بالاچ مدام کوہءَ ہِیکانی شکارءَ اِنت
دوستے کہ بہ بیت دژمن سد دژمنءِ کارءَ کنت
بلے اِے دابیں لینگاٹ ءُُ ربال ہمک آجوئی لوٹوکیں راجانی یا گلانی اندرا بیتگ، بلے راجاں آجوئی گپتگ، پرچا کہ راجءِ مستریں بہرے آجوئیءِ حقءَ انت۔ شما دیست کہ 2013 ءِ الیکشناں لینگاٹاں سرکار ءُُ فوجءِ کُمکءَ 10مردم پہ ووٹ ءِ دیگءِ ہاترا چہ لوگاں در کت نہ کُت، بلے راجی لشکرءِ کماندار ’’مردء آہن‘‘ ڈاکٹر اللہ نظرءُُ اندگہ آجوئی لوٹوکیں گلانی یک توارےءَ گوں بلوچءَ ووٹ نہ دات۔ کس چہ وتی گساں درنہ کپت۔ ادا زانگ بیت کہ راجءِ موقف چی انت؟؟ راجءِ لوٹ چی اِنت؟؟ ءُُ بلوچ راج کئی ہمراہ انت؟ ؟ تپاکی ہمیشیءِ نام انت۔ سد در سد ہچ راج تپاک نہ بیت۔ ہمک راجءِ تہا لینگاٹ ءُُ ربال است۔ من بلوچ راجءَ گشگ لوٹاں کہ اے دابیں کورمیم ءُُ منفی سوچ ءِ دانشورانی نبشتانکاں چہ سربتگ مہ بنت، پرچا کہ بلوچءِ جنزءَ 10 سالءِ اندرا 50سالءِ دیمروی کتگ۔ اے گپءَ من انچو پہ دیم نہ گشاں, بلوچستانءِ زمینی راستی منی دلیل ءِ گْواہ انت۔ مروچی بلوچءِ توارکساس گیشتر مْیاں اُستمانی ہلکواں سربیتگ۔ اے کار کےَءَ کتگ؟؟ اگاں بلوچ تپاک ءُُ یکدست مہ بہ بیتیں بلوچءِ جنز مروچی اے حدءَ چون سربیتگ ات؟؟ من سرپد باں بلوچ تپاک انت ءُُ لینگاٹ، ربالءُُ کاسگ چٹّ تاں روزء مہشرءَ گوں بلوچءَ تپاک نہ بنتءُُ ناں کہ بلوچءِ تپاکیءَ وش بنت، پرچا کہ لینگاٹ ءُُ ربالانی لوٹ آجوئی نہ انت، آیانی لوٹ واجہءِ گلامی انت، آیانی لوٹ زرّ، مال، دولت، تہت ءُُ تاج انت۔ مروچی لینگاٹانی ہمے رہشون کہ ارب پتی انت، ڈنی ملکاں اشانی کاروبار اَست انت، ہمے رہشوناں 1980ءِ دہکءَ تربت تاں کراچیءَ بالی گُرابءِ ٹکٹ ہم چہ سنگتاں پِنڈتگ، من زاتی صورتءَ اے گپانی گواہاں ءُُ من دلجماں کہ دگہ بازیں سنگتاں المی ءَ یات بیت، گُڑا اے کسانیں مدتءَ چون ارب پتی بیت انت ءُُ آ وہدی کسءَ نہ زانت کہ اے وتی دیمءَ چو سیاہ کننت، آ وہدی اشانی نعرہ اَت:
’’ ما ووٹ نہ لوٹیں، ہون لوٹیں‘‘
تنگویں بیلاں! اے لینگاٹاں بلوچءِ قومی موقف، راجی پجار ءُُ ارزشت گوں زورگیرءَ بہا کت۔ ڈاکٹرءُُ طبیب گْوشنت کہ انسانءِ جسم ءِ کجام جاہءَ کہ کینسر بزاں شومک بیت، جسمءِ ہما بہر بُرّگ ءُُ دَور دیگ بہ بیت، حالانکہ جسم بُرّگی چیزے نہ انت، بلے چوش کہ کینسر لاعلاج انت۔
سنگتاں! مروچی لینگاٹ، ربال ءُُ کاسگ چٹ ہمے زرّ، مال، تہت ءُُ تاج دولتءِ کینسر بزاں کہ شومک ءَ گْور جتگ انت، بلے مروچی ہم غیرت مند ءُُ عزت داریں بلوچ گوں دژمنءَ دیم پہ دیم انت۔ من چہ وتی بُنگپءَ گسر بیتاں، پرچا کہ من اے گشگ لوٹاں، مئے لہتیں دانشورانی نظر ءُُ دیدانک سک کنٹ انت، نی حُدا بہ زانت کہ اے پہ زانتکاری چوش کننت یا پہ نہ زانتکاری یا آستیگءِ مار اَنت۔ ہرچی انت بے سوبءُُ نامراد بات انت۔
تنگویں بیلاں! قومی اتحاد ءُُ اشتراکء عملءِ میکنزم جْوانیں وڑےءَ ٹہینگ بہ بیت، اشتراکء عمل یک آزاد ءُُ خودمختاریں ادارہے ءِ حوالہءَ کنگ بہ بیت، بلے ادارہ بااختیار بہ بیت، ادارہ فردانی پابند مہ بیت، زات ءُُ زریات، ٹک ءُُ بولک، دینءُُ مذہب اڑنگ مہ بنت، ادارہ اشتراکء عملءِ واگاں وتی دستءَ بہ کنت، یک جہانی جہگیر ءُُ سربراہے بہ بیت ءُُ جْوانیں کابینہ یے بہ بیت۔ ہرسال یا ہر سے سالءَ یک گلےءِ رہشون سربراہ بہ بیت۔ ہمک سے سالءِ سرا گچینکاری بہ بنت۔ اشتراکء عملءَ وتی دستور ءُُ رہبندے بہ بیت، ادارہ کلیں گلاں ادارہءِ آئین ءُُ قانونانی پابند بہ کنت، اشتراک ء عمل سوبمندبیت۔ اے درگتءَ سنگتاں بلوچ تھنک ٹینک ءُُ دانشورانی قلمی مدت ءُُ کمکءِ ضرورت بیت۔ یورپی ملکاں مئے بلوچ تھنک ٹینک است ءُُ جْوانیں دانشور است، اشتراکء عمل ءَ مدت ءُُ کمک بہ کننت، بلے ہمے موسمی قلمکارانی خیال دارگی انت کہ دگہ تاوانے مہ دینت۔ مروچی کلیں بلوچءِ ننگ ءُُ ناموس دژمنءِ دستءَ پادمال اِنت۔ اے شما سرپد بہ بئت کہ لینگاٹانی ڈیتھ اسکواڈ بزاں بلوچ کُش ٹولی روچ پہ روچ مُہکم بیان انت، بلوچ کُش ٹولیءَ را سرکار ءُُ لینگاٹ زرّ، مال ءُُ جنگی اَزباب بے حساب دئیگا انت۔ اے اشتراکء عمل یا قومی اتحاد پہ زورگیر، لینگاٹ ءُُ لینگاٹءِ مردم کش ٹولی ءِ واستا مرگءِ کلوہ انت۔
گُڈسرا من وتی نبشتانکءَ گوں وتی یک شعرےءِ چیزے گالءَ آسر کناں:
من نہ منّاں تئی واجہ کاریءَ
دُز ءُُ ڈنگانی ہمراہ داریءَ
تو ستر زوراک ءُُ گروناک ئے
رُژن نہ بیت اندیم گوں تہاریءَ
من نہ دیستگ ناں دپتراں ونتگ
چم پچے کورءِ دَزمہاریءَ

تپاکی آجوئیءِ مانزمان انت
بلوچستان آجو بات

http://dailysangar.com/home/page/8282.html

Share this:

Related