بلوچستانء بھار: شائر سعیدبرھان زئی رند
بیا کہ نازئینان مہ بلوچانا
تئی وڑئین ماہ گوں چنگئین زلپانا
شائران واننت مھرء شئرانا
گوں زھیروک و وشئین ترزانا
شھدر نازئینی گل کھئیبانا
دلبرء کبگی آ رواجانا
مھگلئین دلبر بیا پہ تپتانا !
بیا بگند پلئین ائے بھارانا
بیا کہ نوروز یھت پہ بلوچانا
گوں گل و بلبل، صید و آسکانا
گرونبگنت ڈھلان گون آ سازانا
گوں رباب،بینجو،چنگ و سرودانا
بیا گرائین سھبت تا سباھانا
گوں یلان رندئین،ماھئین کاڑانا
وانگنت بلبل مں سباھانا
پہ گل و پلان مں بھارانا
من ھم نازئینان گلبھارانا
تئی وڑئین ماہ گوں چنگئین زلپانا
مخملان گوئرکن لھمئین پچانا
گوں بلوچانی زرئین دوچانا
عنبری وشئین بوء بمش جانا
پن و مزوانک جن لھمئین لنٹانا
سرو مگ ئے جن پہ آسکی چمانا
آ مچاچ تئیزئین، زھمئین بروانا
پادکن نژنژئین پوستی کوشانا
مھپران شنگ کن،بیا نوں لڈانا
شوک و شانا بیا، وش و شادانا
شانک بدے چمان پلئین دشتانا
بیا گون کبگی ئین آ رواجانا !
گوں ھما نازان و کھئیبانا
بیا بگند دلبر ! بم و سیستانا
باگئین ھیلمندء آ بھارانا
باگچھئین نیمروز، بند کمالخانا
بلبلان واننت گوں کپوتانا
بیا پہ دالبندن ! حب و خارانا
مکران،شال و ژوب و بولانا
ھرگوئرا سئل کن پلئین ملکانا
نایگون،زردکوہ گون بھارانا
بیا بچار رودبار،جیرپت،دلگانا
جاسک و بشکرد و میناب،گیابانا
زر بلوچانی گون تیابانا
سئلی انت چھبار گون آ لانچانا
بیا پہ سربازء کور و کوھانا
عنبرئین پلان سئل کن لڈانا
ڈمنء کور و مچ و باگانا
ھرگوئرا گندے بالی مرگانا
برائین پرا پیشن،پلئین باپتانا
باگئین دشتیاری،باھو،پلانا
شائرا گندائین میرکمالخانا
نامی ئین ھوتء وشئین دیوانا
سئل کن آ باگئین جازموریانا
قلعہ گنج،کھنوج و منوجانا
شات بیت دل شہ پلئین ملکانا
گوادر و گمبران گون تیابانا
سئل کن سرحد و برزئین تپتانا
آھوران،دزآپ،پنوچ،ھیچانا
ھودیان،بزمان، دشت آبخانا
زئیب دنت گردگ مئی بلوچانا
پھر و بنپور رندء شھرانا
لاھکء سئل انت گوں کلاتانا
گون گل ئے سئل کن ڈئیھء پھرانا
بومھ و برجان و حصارانا
بیابیا دلبر ! شات و حندانا
بیا پرا پلئین سرکھورانا
زور وتی درئین دزگھارانا
گوں منا بوان ات مھرء سوتانا
بیا پہ ترڈئے تہ چو کہ آسکانا
باگئین سورآپء زرئین رئیکانا
بیا کہ نازئینان مہ بلوچانا
تئی وڑئین ماہ گوں چنگئین زلپانا
شائران واننت مھرء شئرانا
گوں زھیروک و وشئین ترزانا
شھدر نازئینی گل کھئیبانا
دلبرء کبگی آ رواجانا
سعید برھان زئی رند Saeed Borhanzahi Rind سوئد،استکھلم (سویڈن) Sweden 2005/09/17
