منی ارواہ
گشئے کِرم کپتگیں جونے
لگوریں زند ءِ ہاکوٹ ءِ سرا کپتہ
پہ چونیں اُزر ءُ نیمونے
چُکُرّیت ریم ناں ھونے
سر ءِ کامپول گوشت ءَ ھم یلہ داتگ
دل ءِ دْریکگ ھوں اوشتاتگ
لگوریں وھد ءِ دنتاناں
منا چیلّینتگ ءُ جاتگ
دپ ءَ اَنت پیشّیاں مازگ
دل ءُ لاپیگاں کشّنت ھونواریں سَگ
گُراگ ءُ گوتو ءُ تولگ
منی ارواہ ‘
گشئے کِرم کپتگیں جونے
لگوریں زند ءِ ہاکوٹ ءِ سرا کپتہ
پہ چونیں اُزر ءُ نیمونے
چُکُرّیت ریم ناں ھونے
”””””””’
سر ءِ کامپول گوشت ءَ ھم یلہ داتگ
دل ءِ دْریکگ ھوں اوشتاتگ
لگوریں وھد ءِ دنتاناں
منا چیلّینتگ ءُ جاتگ
دپ ءَ اَنت پیشّیاں مازگ
دل ءُ لاپیگاں کشّنت ھونواریں سَگ
گُراگ ءُ گوتو ءُ تولگ
سرا پِرّرِتکگنت ہنچُش
ہزار ونڈ ءَ کتہ تُش تُش
منی نیم مُردگیں ارواہ
گُشئے کِرم کپتگیں جونے
زمیں نادراہ
دپونکہ دْراہیں کشک ءُ راہ
نپس کشّ اِت نہ کنت دنیا
گَہینتہ ہستی ءِ پیژگاہ
نہ وشّیں باتن ءِ بوواں
چو گْوات ءَ مانروپان اِنت
توامیں گْریشگ ءُ کوھاں
تلان اِنت ھار مَلّیں کَور ءُ شہجواں
سَڑان اَنت ھَڈّ ,
ریزان اِنت منی کامپول
تنی وھدی ھما اَنت
جنتریں چَہرانی گرد ءُ گول
ھما پیشّکانڈ , پَٹّ ءُ پول
جنوزامیں شپ ءَ انگت نہ مَٹّینتہ
تہاریں تالہ ءِ سیاہیں وتی گردول
زبان ءِ آچیں اُفّاراں
چُکُرّیت ریم ناں ھونے
لگوریں زند ءِ ھاکوٹ ءِ سرا کپتہ
پہ چونیں اُزر ءُ نیمونے
منی ارواہ گشئے کِرم کپتگیں جونے
زمیں نادراہ مہ چِنت پونے
Source
Majíd Ájiz
