سال2018،آجوئیءِ سال انت

آجوئیءِ سال انت راج گلءَ بال اِنت
اے گُلامیءِ گُڈسری سال اِنت
چمّ منی دّزّاپءُُ چمّ منی شال اِنت
سبّیءُُ گنداواہ ھزارگنجیں
ھرگورءَ مرچی کہریں ڈکّال اِنت
پروش اِت گلامیءِ سانکلاں بیلاں
بندات کتارءَ ءُُ زیرات ھمیلاں

سال2018،آجوئیءِ سال انت …. میجرمجید
Jan 4, 2018, 1:14 pm

آجوئیءِ سال انت راج گلءَ بال اِنت
اے گُلامیءِ گُڈسری سال اِنت
چمّ منی دّزّاپءُُ چمّ منی شال اِنت
سبّیءُُ گنداواہ ھزارگنجیں
ھرگورءَ مرچی کہریں ڈکّال اِنت
پروش اِت گلامیءِ سانکلاں بیلاں
بندات کتارءَ ءُُ زیرات ھمیلاں
ڈیہہ مئے آجو بیت مُرادانی
شیردلءُُ شیربیمّیں مزارانی
کاریت آشوبے ھون شہیدانی
ھانلءِ شیدائیں مُریدانی
جہد مئے پُلّیں سرمچارانی
آجوئی نازینک مئے گہارانی
بُرّیت تہاریءُُ رژن بیت تالان
گُلزمین بانوری گُداں پوشیت
زُلمءِ ماڑیءُُ گواتگراں پْروشیت

انچوگش انت کہ وہدے اسرائیلی چہ سرائیلءَ درانڈیہہ کنگ بیت انت،اسرائیل ءِ زمین چہ اسرائیلیاں پُلگ بیت۔گڑا اسرائیلیاں ماں درانڈیہیءِ درگتءَ ہرسال وتی سرزمینءِ واترکنگءِ واب دیستءُُ ھرسال ھمے درگتءَ جژن ھم کت کہ دیمءِ سالءَ ما وتی سرزمینءَ واتربیں۔ گڑا ھزارانی سالءَ چہ پد اسرائیلی وتی سرزمینءَ سربیت اَنت۔ءُُ مروچی دنیاءِ نقشہءَ اسرائیل یک خودمختاریں مُلکے۔ ءُُ اسرائیلی مروچی ترقی یافتہ ایں ملکانی ردا زانگ بیت۔ بلے اے درانڈیہی ءِ درگتءَ اسرائیلی مہلوکءَ سکّ باز جہدکتگ ءُُ آخرکارسوبمندبیت انت۔
گلامینءُُ ایردستیں قومءِ مارشتانی باھند جدءُُ جہد ،تپاکی، جوانیں دیدانک،تمردءُُ مخلصیں رہشون آجوئی ءِ مستاگ اَنت۔ راجءُُ قومءِ بیداری ، سیاسی شعورءِ ھم بلاھے ارزشتے۔
بلوچ ءِ ھم آجوئی دیرنہ انت۔مروچی سامراجی دورءُُ نوبت وتی گُڈّی سیمسران انت۔مروچی پہ زھمءِ زہءُُ تپنگءِ زورءَ قوم گلام دارگ نہ بنت۔
بلوچ ھم مروچی ھمک نوکیں سالءَ وتی آجوئیءِ وابءَ گندگا انت۔ بلے ھشکیں وابءِ گندگءَ آجوئی نہ رسیت۔ وابءِ گندگءَ گوں وابءِ تعبیرکنگ لوٹ ایت، وتی جدءُُ جہد تیزکنگ لوٹ ایت۔ کربانی ءِ واستہ تیاربیگ لوٹ ایت۔ راجی جہدءَ گوں ھمراہداری کنگ لوٹ ایت۔ گُڑا تئی وابءِ تعبیر بیت۔ کُلّیں بلوچ راجءَ اے جہد وتی کنگی اِنت۔
تنگویں بیلاں ۔۔مروچی زورگریں قبضہ گیریءِ وھد ھم آسربیتگ۔ پدا مروچی بلوچءِ دژمن دنیاءِ دُژمن جوڑبیتگ،وتی ھمساھگانی دژمن جوڑبیتگ۔ ماں پاکستانءَ ایردستیں قوم لگتمال کنگ بیگءَ اَنت۔جَنَگءُُ کُشگ بیگءَ اَنت۔ ہمے دابءَ سندھی، پٹان ءُُ مہاجرھم زُلمءِ آماچ انت۔ اے مملکتء ھدادءَ ناں ھمساھگیں دوست استءُُ نیکہ ناں اندری دوست است۔ اے ملک دھشت گردانی سارتیں جنّت اِنت۔ پاکستانءِ ملاءُُ دھشت گرد میان اُستمانی مہلوک ھم پریشانءُُ تکانسر کتگ۔ مئے دژمنءِ اقتصادی، معاشی، تجارتی جاورھال سکّ بازنہ وشّ انت۔ اے ملکءِ ھاکم کے انت۔ ءُُ روچء مروچی ھم کسّے نہ زانت۔ ھاکم فوج انت۔ آئی ایس آئی انت،پارلیمنٹ انت یا عدلیہ۔مروچی ھپتادسال انت کہ کس نزانت کہ اے ملکءِ ھاکم کے انت۔
اگاں ایٹم بمبءَ قوتے بیتیں گڑا روس نہ پُرشتگ ات۔روسءَ چہ پاکستانءَ گیشتر ایٹم بمب است اَت بلے پرشتءُُ پروشءِ شکاربیت۔ ایٹم بمباں داشت نہ کت۔ اگاں فوجیءُُ عسکری قوتءَ زوربیتیں مروچی ویت نام آجو نہ بیتگ ات۔ قوم پہ زور گُلام دارگ نہ بنت۔ مروچی بلوچستانءِ کلّیں مہلوک زورگیریں ھاکمءَ کبول نہ کنگءَ انت۔ بلوچستانءِ درچکءُُ دار،موسم،مرگءُُ گنگدام زورگیرءَ برداشت کت نہ کن انتءُُ پہ زورءُُ زبردستی پہ تپنگءِ زورءَ تاکد بلوچ ءِ گلزمین گلام دارگ بیت۔
مروچی زورگیرءَ ءُُ لینگاٹاں بلوچ قوم را بیہار داتگ کہ بلوچ قومءِ نسل کشی بزاں چک چینی کنگ بہ بیت۔ گڑا بلوچءِ جنزپروش وارت شماازاناں کدی بلوچءِ چک چینی نہ کتگ۔ ءُُ شما کدی بلوچ یک قومے زانتگ۔ شما کدی بلوچستان بلوچءِ گُلزمین منّ اتگ۔ شما کدی بلوچ ،بلوچءِ گلزمینءِ مالءُُ مَڈّی بلوچءَ داتگ انت۔ شما کدی بلوچ شناختءُُ پجّار ،زبان، قبول کتگ۔ ءُُ شمئے زھم بلوچءِ سرءَ دائمءَ ساھیل بوتگ۔ شمئے تپنگءُُ ٹوپانی دپ مدام بلوچءَ سکّ بیتگ۔ تاریخ گواہ انت کہ ھر دورءَ بلوچءِ نسل کشی بیتگ۔مروچی بلوچ زانت ھم کہ توئے زورگیرءَ بلوچ دوست نہ بیت، بلے شمارا بلوچءِ پُرگنجیں گُلزمین دوست بیت۔ پرچاکہ اے گلزمین قدرتی مالءُُ مَڈّیانی ھمبارانت، دنیاءِ دل انت۔شمارا بلوچءِ گنجیں زرءُُ تیاب سکّ دوست بیت۔شمارا بلوچ زیرزمین مالءُُ مڈّی ھم سکّ دوست انت ۔مروچی بلوچ ھم چہ شمارا نفرت کنت۔ نی شما بلوچءِ پدرکُشتہءُُ پسرکُشتہ جوڑبیتگ ئے۔ ھون بلوچانی تا ں دوسدسالءَ لسّہیں آھوگءَ دودنتانیں۔
نی توئے زورگیرءُُ لینگاٹ،دگہ چنچو بلوچ کُش ات۔دگہ چنچو محرمیں کاڑجنوزام کن ات۔دگہ چنت ماتانی چُکّاں چہ کُٹّءَ سِندات۔دگہ چنت پیریں پتانی پیریءِ اساءَ پُل ات۔ دگہ چنچو بلوچ پُسّگ چوروکن ات۔ دگہ چنچو ھون ریچ ات۔بلوچ گُلزمین مروچی چہ بلوچءِ ھوناں سُہرانت۔ اے آجوئیءِ سہریں ھون رُژنءِ مستاگ انتءُُ دژمنءِ مُرگءِ کلوہ انت۔
ھمنچو کہ تو زُلم کن ئے آشوب دیمروی کنت۔ تئی خلافءَ بلوچ ءِ نفرت گیش بیت۔ نفرت کہ گیش بیت تئی خلافءَ مہلوک سلاہ بند بیت۔
تو بلوچءِ راجدپتر نہ ونتگ۔ بلوچ راجءَ بلاھیں زالمءُُ جابرانی مقابلہ کتگءُُ وتی گُلزمین وتی زبان، وتی پجّارءُُ شناخت برجاہ داشتگ۔ قوم پہ کُشگ ھلاس نہ بیت بلے تئی تیرھلاس بنت تئی تُپنگ ھلاس بنت ، منی راجءِ تپنگءُُ تیر آجوئیءِ باھند انت کہ ھجبرھلاس نہ بنت۔بلکیں روچ پہ روچ گیش بوہان بنت۔
عمرمختارگوشیت:
’’ما ھجبر وتی سلاہاں دُژمنءِ دیمءَ دورنہ دئیں۔ما شہیدبیں یاکہ آجوبیں۔ دژمنءَ گوں مئے نوکیں پدریچ ءَ جنگ کنگی انت۔ چرآئیءَ پد مئے دومی سیمی پدریچ سلاہ بندبیت۔ ءُُ دژمنءِ مقابلہ کنت۔ پدا چہ منی پاھو دیگءَ منی اُمرگیشتربیت پرچاکہ من نمیران باں ، منی مرگءُُ زند دوہیں پہ دژمنءَ تاوان انت۔‘‘
مروچی بلوچ ءِ دومی پدریچ گوں دُژمنءَ جنگ کنگا انت۔ بلے اے بلوچءِ گُڈسری جنگ انت۔اے جنگءِ فیصلہ بلوچءِ ھکّءَ بیت۔
پرچاکہ مروچی بلوچ زانت من گلاماں ءُُ گلامیں قومءَ کہ وتی گلامی مارات گڑا دیراں آقوم گلام دارگ نہ بیت۔ گلامی ءَ انسان وَ انسان انت حیوانءُُ مرگ ءُُ گنگدام ھم برداشت نہ کن انت۔ چہ پنجاپیءُُ گجرءِ گلامیءَ ازت داریں مرگ گہترانت۔ مروچی بلوچءِ زالبول نیاڑیءُُ جنین زہگ رنجیت سنگءِ نماسگانی بندیگ انت۔ پہ بلوچءَ ازت داریں مرگءَ دگہ چے پشت کپتگ۔ زانتکار گوش انت: چہ روباہی سدسالءِ زندءَ شیرءِ یک روچی زندگی جوان ترانت۔ اے ھاترا بلوچءِ شیریں پُسّگان پوریا گراں گریبءُُ بزگراں کلیں بلوچ راجءَ بلوچءِ شیرزالیں مات گہاراں ھم وتی فیصلہ کتگ۔وطن یا کفن۔
پمیشکہ من گشاں 2018،بلوچءِ آجوئیءِ سال انت۔
تنگویں بیلاں۔مروچاں لہتیں سیاسی چورہ،سیاسی پناہگیرءُُ سیاسی بگوڑہاں طبقاتی نعرہ بنگیج کتگ۔ھمے نعرہ پیشءَ لہتیں نام نہادیں مڈل کلاس ڈاکٹرحئی، مالک، یاسینءُُ ایدگہ لینگاٹ ٹولیان بندات کتگ اَنت۔بلے بے سوب بیت انت۔ بلوچءِ جنگ قومی جنگے۔ قومی جنگاں زاتءُُ زریات،ٹکءُُ بولک چارگ نہ بنت۔ کرد چارگ بنت۔ بلوچ نیشنلزمءِ وتی یک تاریخے چوپچیں کتابءَ مئے دیما انت۔ اے درگتءَ سردارءُُ نواباں ھم قربانی داتگ۔ میریوسف عزیز مگسی، میرمھراب خان،شھید بلوچ خان،شھید نواب اکبرخان بگٹی، شھید نواب نوروز،شھید اسلم گچکی، شھید میربالاچ مریءُُ خیربخش مری، عبدالکریم خانءِ قربانی چو ں شموشگ بنت۔
سرکاری سردارءُُ نواب است،ھمے وڑا سرکاری مڈل کلاس ھم است۔ لینگاٹانی مروچی کرد شمئے دیما انت۔ اے قومی جہد ءَ راطبقاتی جہدءِ نیمگءَ برگءَ گوں جہدءَ نا انساپی یے۔ گوں بلوچ قومءَ زُلمے۔ جہدانی تہءَ کرد چارگ بنت۔ سردارءُُ نواب بیت شرّیاکہ مڈل کلاسے بیت شر۔ ھرکس کہ گوں جھدءَ مخلص ءُُ ایماندار انت ۔آئیءَ را زور دژمنءِ نیمگءَ تیلانک دیگ مہ بیت۔ مئے دژمن ھمے لوٹ ایت کہ بلوچ تقسیم بہ بیت۔ لہتیں قدیم وار پاکستانءَ داتگ۔ ھمے کارانی واستہ مروچی بلوچءَ سکّ شیواربیگ لوٹ ایت۔ دوستءُُ دژمن پجّارگ لوٹیت۔ تپاکیءُُ یکدستی لوٹ ایت۔ جہدءَ را بلوچءِ نیشنلزمءِ حوالہءَ دیما برگ لوٹیت۔2018ءَ بلوچءِ آجوئیءِ سال انت۔ بلوچ راجءَ را نوکیں سالءِ آجوئی مرادبات۔
من گُڈسرا پاکستانءِ قدیم واریں بلوچ لیڈرءُُ دانشوراں گشگ لوٹاں کہ بلوچ ءَ تقسیم مکن ات۔ اگاں شما راستءِ ھمراہ داری کت نہ کن ات دروگءِ پلہ مرزی مکن ات۔
کرم چند موھن لال گاندھی گوشیت: اگاں کسے ءَ راستءِ ھمراداری کنگءِ ھمّت نیست گڑا دورگءِ ھم ھمراھداری مکنت پرچاکہ دروگءَ را دراجیں امر نیستءُُ راستءِ امرسکّ دراج انت۔

تپاکی آجوئیءِ مانزمان انت
بلوچستان آجو بات
زورگیرءُُ لینگاٹ مردگ بات

http://dailysangar.com/home/page/9020.html