زنگیءَ زور مان، بَلے نیکہ پہ وت……میجرمجید

گوں بلوچانی کُرتگیں کولاں
شَور ءِے بستگ پہ دہلیءِ سیلاں
چِل ہزار رند ءُُ دہ ہزار راپچی
ُُسی ہزار نوہانی مزن زہمیں
پنجہ ہزار لاشاری بلند شانیں

Jan 9, 2018, 2:59 pm

گوں بلوچانی کُرتگیں کولاں
شَور ءِے بستگ پہ دہلیءِ سیلاں
چِل ہزار رند ءُُ دہ ہزار راپچی
ُُسی ہزار نوہانی مزن زہمیں
پنجہ ہزار لاشاری بلند شانیں
چاکری بے راہیں سرءَ گوناں
بلوچ راجدپترءَ یا مْیاں اُستمانی راجدپترءَ وہدے کہ سیل کنئے اے الّما زانگ بیت کہ بلوچ را ج چہ قدیمءَ یک فاتحین ءُُ جنگجوئیں راجے بیتگ۔ بلوچءَ چہ اولی روچءَ دگرءِ گلامیءُُ ایردستی قبول نہ کتگ۔ اے درگتءَ بلوچءَ سک باز سری ءُُ مالی تاوان بیتگ، بلے بلوچ وتی وتواکی ءُُ سربلندیءِ ہاترا پُشتا نہ کنزتگ، وتی پجار، شناختءُُ ارزشتءِ سرا سودا بازی ءِے نہ کتگ، ہر وہدءَ کہ بلوچءِ سرا گْرانیں وہدے اتکگ، بلوچءَ گوں جْوانمردی ءُُ تپاکیءَ ہما نہ وشیں جاورانی مقابلہ کتگ، سوبمند بیتگ ءُُ دومی بلوچءَ پہ وتی ہمساہگیں راجانی ہاترا ماں دری جنگاں ہم دور کتگ۔ پہ میار جلیءُُ باہوٹی ءِ ہاترا دری راج ہم مدت ءُُ کمک کتگ انت، 150سالءَ بلوچءَ اسلامءِ نامءِ سرا عرب فاتحانی ہمرکابیءَ گوں فارسءَ جنگ داتگ۔ اے جنگءَ سک باز بلوچ شہید بیتگ، ہمے جنگءِ سوبءَ ایرانی حاکماں بلوچءِ سرا سک باز زُلم ءُُ ناروائی کتگ، بلے بلوچءَ وتی اصولانی سرا سودا بازی نہ کتگ۔ بلوچ ہر دورءَ وتی حاکم وت بیتگ۔ سری ءُُ مالی تاوان ءِے سک باز وارتگ، بلے دگرءِ ایردستی قبول ءِے نہ کتگ۔
منگولانی دورءَ دہلی ءِ حاکم ہمایون بابر کہ ظہیرالدین محمد بابرءِ زہگ ءُُ آئیءِ جاہ نشین بیتگ۔ یک ہندو راجایےءَ شکست داتگ ءُُ دہلی ءِ حاکمی چہ ہمایون بابرءَ پہ زورء شمشیر پُلتگ، گُڑا ہمایون بابرمیر چاکر رندءِ باہوٹ بیتگ ءُُ چہ میر چاکر رندءَ عسکری مدت ءُُ کمک ءِے لوٹتگ۔ میر چاکر رندءَ بلوچ دودانی پاسداری کنانءَ وتی باہوٹ ءَ را کمک کنگءِ قول کتگ۔ بلوچانی یک بلاہیں لشکرے تیار کتگ کہ آ لشکرءَ گیشتر رند، لاشاری، نوہانی ءُُ دگہ بازیں بلوچ ٹک ہم ہوار بیتگ انت ءُُ اے لشکرءِ کماندار میر چاکر رند بیتگ ءُُ ہمے جنگءَ میر چاکر رندءِ گْوہار بانڑی کماندار میرانءِ مات ہم گون بیتگ۔ ہندو راجاءَ شکست وارتگ ءُُ ہما یون بابر پدا وتی حاکمیءِ تہتءَ تہت نشین بیتگ۔ اے بابتءَ ہمایون بابرءِ گْوہارءَ یک کتابے نبشتہ کتگ، اے واقعہءِ زکر ءِے ہم کتگ۔
بلوچ فاتحان ءُُ جنگجوہاں دومی جنگء جہانیءَ انگریزءِ فوجانی ہمراہ داری کتگ ءُُ بلوچانی لشکرءِ ماں عراقءَ راس حدءِ موجودگیءِ ثبوت است انت، بزاں کہ ماں دومی جنگء جہانیءَ بلوچاں انگریزءِ پلہ مرزی کتگ۔ فوج ءِ لشکر پہ جنگءَ ماں ہندوستانءَ ہم شتگ۔
دومی جنگء جہانی ءَ میرخداداد بلوچءَ شریں جنگی ایوارڈ گپتگ، اے واقعہ ءِ زکر تاں روچء مروچی ماں لندنءِ وار میوزیمءَ است انت۔ میرخداداد بلوچءِ عکس ہم جتگ اے درگتءَ بلوچءِ درگتءَ بلوچءِ نمیرانیں شاعر ملا بہادر عومرزئی گْوشیت:
جَلّ ہما ماتانی دلءَ باتیں
کہ بچ اِش ماں ہندوستان سپا ہیگ انت
تاں روچء مروچی بلوچانی بازیں مہلوکے ماں ہندوستانءَ جہمنند انت۔ اے ہم بلوچ راجدپترءِ بہر انت کہ بلوچ لشکرءَ ہوت شہداد چوٹا ءُُ ہوت مراد، جمادار چارشمبےءِ سرکماشیءَ ممباسہءُُ زنجبار ہم فتح کتگ انت ءُُ اُودا تاں دیراں السعیدانی حاکمی بیتگ۔ انچو کہ من پیش ءَ گْوشت بلوچ فاتحاں وتی ہمساہگیں راجانی مدت ءُُ کمک کتگ۔ 1698ءَ وہدے ایرانءِ شاہ مستونگءُُ قلاتءِ سرا کہ حملہ کنگءِ تیاریءَ کنت، شاہ ایران لوٹیت کہ قلات، مستونگ، بولان تاں کچھیءَ گوں ایرانءَ ہوار بہ کنت، گُڑا ایرانءِ شاہءَ یک لشکرے طہماسپ بیگءِ سرکماشیءَ دیم پہ بلوچستانءَ دیم دات۔ اے وہدءَ خان قلات میر سمندر خان ات، بلے میر سمندرخان اے وہدءَ پہ ترّ ءُُ گردءَ ملتانءَ بیت۔ وہدے کہ ایرانءِ لشکرءِ حال میرسمندر خانءَ سر بیت، گُڑا میرسمندر خانءَ شپ ءُُ روچ یک کت انت، کھڈ کوچہ مستونگءَ سر بیت ءُُ سی ہزارءِ لشکرے پہ مقابلہءِ واستا تیار کت۔ اے درگتءَ ایرانءِ لشکرءَ چاغی، نوشکیءُُ کردگاپءِ نزیک گْورءِ علاقہ تہت ءُُ تاراج کت انت۔ میر سمندر خان ءِ لشکر (سریاب) مستونگءَ ایرانءِ لشکرءِ مقابلہءَ کنت۔ سَے روچءَ سک مقابلہءَ بیت، گُڑا چارمی روچءَ میرسمندر خانءِ چم پہ ایرانی لشکرءِ کماندار طہماسپ بیگءَ کپنت۔ میرسمندر خان ایرانی سپاہءَ پْروشان کنت ءُُ وتا پہ ایرانی سپاہءِ کماندارءَ سر کنت ءُُ کماندارءَ زہم جنت ءُُ کُشیت۔ ایرانی لشکر پْروش وارت، پدا دیم پہ ایرانءَ واتر کنت۔ وہدے میرسمندرخان ءُُ بلوچ لشکر ءِ سوبمندیءِ حال شہنشاہء ہندءَ سربیت، گُڑا شہنشاہء ہند دولکھ کلدار سالانہ گرانٹ پہ بلوچ لشکرءِ واستا اعلان کنت۔ اے وہدءَ ہندءِ حاکم اورنگ زیب عالمگیر بیت۔
(تاریخ بلوچستان، تاکدیم 27ءُُ 28)
بلوچ وتی سرزمینءِ سرا آجوئیں راجے بیتگ، البتہ بازیں وہداں بلوچءِ گوں انگریزاں اتحادی بیتگ۔ کوئٹہ کہ پیشءَ برٹش بلوچستان گْوشگ بیتگ، اے علاقہ قلات ءِ حاکم میر نصیر خان نوریءَ پہ لیز داتگ۔
بلوچستانءِ آجوئیءِ جار
لارڈ ماؤنٹ بٹن وائسرائے ہند محمدعلی جناح مسلم لیگ ہندءِ صدر، گلءَ گوں گپ ءُُ تْرانءَ چہ پد بلوچستانءِ آجوئیءِ جار جنئگ بیتگ۔ اے یک مشترکہ اعلانے بیتگ کہ کُلیں فریق، بزاں انگریز وائسرائے ہندءُُ پاکستانءِ نام نہاد نمائندہ محمد علی جناحءِ موجودگیءَ بیتگ۔
12 اگست 1947جمعہءِ روچءَ قلاتءِ مکمل آجوئیءِ جار جنئگ بیت ءُُ خان میر احمد یار خان قلات اسٹیٹ ءِ حاکم منّگ بیت۔ ہمے روچءَ جامع مسیت قلاتءَ جمعہءِ نمازءِ خطبہ حاکمء وقت خان میراحمد یار خانءِ نامءَ وانگ بیت۔ جمعہءِ نمازءَ پد مسیتءِ پیژگاہءَ بلوچستانءِ بیرک لِک کنگ بیت۔
آجوئی ءِ مراگش
12 اگست 1947 جمعہءِ نمازءَ چہ پد خان قلات خان میر احمد یار خان وتی دستاں گوں بلوچستانءِ بیرکءَ لِک کنتءُُ کُلیں بلوچ راجءَ را آجوئیءِ مبارک بادی دات ءُُ وتی اولی تْرانءَ کنت ءُُ گْوشیت کہ اے روچ پہ بلوچ راجءَ مبارکیں روچے کہ مروچی بلوچستان مکمل آجو بیتگ۔ بلوچستان مروچی دنیاءِ نقشہءَ یک وتواکیں ریاستے کہ کُلیں بلوچستانءِ جاہ منندیں مہلوکءِ وطن انت۔
تنگویں بیلاں! اے کسانیں چمشانک بلوچءِ گْوستءِ بابتءَ ات، بلے ہمے وتواکیں ریاست مروچی پدا گلام کنگ بیتگ۔ ہمے فاتحیں قومءَ کہ دنیاءِ اندگہ راجانی آجوئیءِ مدت ءُُ کمک کتگ مروچی وت یک گلامیں قومےءِ گلام انت۔ اے بلاہیں تاریخی جبرے، زلمے۔
تنگویں بیلاں! مروچی کہ آجوئیءِ جہدے بئیگاانت، اے جہدءِ سوبمندی کلیں بلوچ ءِ سوبمندی انت۔ بلوچءِ پجار، شناختءُُ ارزشتءِ سوبمندی انت۔ ہرکس وتی وس ءُُ واکءَ جہدءِ ہمراہ داریءَ بہ کنت۔ اے ہر بلوچءِ قومی فرض انت۔آجوئیءِ ہاترا قومانی تپاکی المی انت۔ بلوچ تپاک بہ بیت، کاروان مہکم بیت، آجوئیءِ منزل نزیک بیت۔ دژمن، لینگاٹءُُ ربال بلوچءِ قوتءَ بہر ءُُ بانگ کنگ لوٹیت۔
چیزے روچ پیش بلوچ راجی رہشون استاد واحد کمبر ءِ بیانے منی دیما گْوست آئیءَ گْوشت کہ بلوچ جنز جْوانیں وڑےءَ دیما روان انت، دژمن پْروش وران انت۔ استاد ءَ تْران کنانءَ گْوشت کہ دژمن وڑ وڑیں پندل سازی کنت ءُُ بلوچءَ وت ماں وت جنگ دیگءِ جہدءَ انت۔ گوں کُلیں بلوچ قوم ءَ دزبندی انت کہ ماں سوشل میڈیاءَ وتی دوستاں، سنگتاں نشانگ مہ کننت۔ بلوچءَ تپاکیءِ سکینءَ بہ دینت۔ سنگت شیوار بہ بنت کہ لینگاٹ ءُُ ربالاں بازیں فیک آئی ڈی جوڑ کتگ ءُُ آجوئی لوٹوکیں سنگتاں زاہ ءُُ بد گشنت تاکہ سنگت وت ماں وت ناراز بہ بنت۔ بازیں لینگاٹانی فیک آئی ڈی زانگ بیتگ انت، بازینے انگت زانگ نہ بیت۔
سنگتاں! استاد واحد کمبر ءِ دُرّیں دانکاں دلگوش بہ کن ات، انچو کہ واجہ گْوشیت سوشل میڈیا ءَ وتی حقءَ کارمرز بہ کن ات، وتی خلافءَ کارمرز مہ کن اِت۔ لینگاٹاں سرکارءَ باقائدہ ٹاسک داتگ کہ بلوچ وت ماں وت ناتپاک کنگی انت، پرچا کہ :
تپاکی آجویءِ مانزمان انت

بلوچستان آجو بات
***

http://dailysangar.com/home/page/9100.html