بلوچ ورنایانی کشت ءُ کوش تروریستی سپاه ءِ کارانت
تهران ءِ واکداراں گیش چه دو لکّ سپاهی، پلیس ءُ پئوجی آورتگ ءُ ماں آوارجتگیں مگربی بلوچستان ءَ نندارینتگ ءُ اشانی مستری رستریں سپاه ءِ دستا انت۰ همے جهانی تروریستی ٹولی همک روچ مئے ورنایانی سرا تیرگواری کنت ءُ آهاں کشگ انت۰ بے گناهیں ورنایانی کشت ءْ کوش هامنه ای ٹولی ءُ مافیایی سپاه ءِ برنامه یانی سرا بیت –
گوستگیں ده روچانی درگت ءَ نعیم ساهگانی، حسین ملاحی کرگانی، چراغ جت نگوری ، مولوی محمد انور براهویی ءُ علیم پُرکی ءِ کشگ ءُ دلگان ءِ مردمانی سرا تیرگواری ءُ مئے مات گهاراں تیری ءُ زدگ کنگ ءُ آ دمگءِ ورنایانی لٹ کٹ ءُ دسگر کنگ هما لدیگی کارکرداَنت که برنامه اِش مافیایی سپاه ٹاهینتگ اَنت۰
چشیں لدیگی مردم کشی بید برنامه ءُ مکسد نهنت۰ چل سال اِنت که اے تروریستاں بے شمار بلوچ ماں بندیجاهاں، ڈن چه بلوچستان ءُ ماں ڈیه ء شهر ءُ میتگاں کشتگ اَنت۰ هنوں پارس فاشیستاں سپاه ءِ سروکی ءَ کنگ اَنت ءُ آهانی تپنگ زابلی ءُ هزاره ءُ لهتیں دمگی بسیجی یانی دست انت۰ اِے تروریستاں بلوچانی کشگ ءِ اجازت هست۰
مئے بے گناهیں ورنا په بے بنیادیں دلیل ءُ وڑوڑیں بهتام کشگ ءُ زدگ بنت۰ سدانی سد ورنا گوستگیں چل سالاں ڈیه ءِ راهانی سرا کشگ ءُ زدگ بوتگنت۰ اگاں کسے هم جست به کنت پرچا مئے ورنایاں تیر جننت ءُ کشنت گڑا آهاں پسّه دینت “ایست دادیم نه ایستاد” یا که ” قاچاقچی و اشرار بود “۰ هال آنکه دگنیاے ءِ مستریں ” قاچاقچی” مافیایی سپاه ءِ جند انت۰
اے هما بلوچ کشی انت که هونواریں نوشروان ساسانی هزارءُ پنچ سد سال پیش بنگیج کت ءُ آیی ءِ رستریں پدریچ انگت ءَ ما را کشگاینت تنکه آیی ءِ ناهودگیں واب ءَ پوره بکننت۰ نوشروان ءِ رستری کارکرد ءِ باروا ءُآیی کوشست په بلوچانی چک چیں کنگ ءَ شاهنامه گشیت:
“از ایشان فراوان و اندک نماند ۰۰۰۰ زن و مرد جنگی و کودک نماند”
بلوچ دژمنیں نوشروان مرت ءُ آیی ءِ پلیتیں هڈ هم ریزاِتگ انت بلئے بلوچ انگت ءَ زندگ انت۰ آیی ءِ رستریں پدریچ بے شمار بلوچ کشته ءُ همایی ءِ وڑا لوٹتگ اِش تاں ما را چک چیں بکننت۰ اے ناشریں رستر هچ بر سرپد نه بنت که راج په کشگ گار نه بنت۰ رستریں هامنه ای ءُ بلوچ دژمنیں سپاه ءِ مافیایی ٹولی روگی انت ءُ اشاں هم نوشروان ساسانی ءِ وڑا ناکام بنت بلئے بلوچ راج ءُ بلوچستان ابدمان انت۰
بلوچستان ءِ پلیں شهیدان ءَ هزاراں سلام
محمد کریم بلوچ
جنوری ۲۰۱۸
http://baluchistan47.blogspot.co.uk/2018/01/blog-post_27.html
