بلوچستــان ءِ آیوکیں دَور
بلوچستان ءِ آينـــده، راجی ادارہ ءُ مردمـــی شورایانی گچینکاری ءُ مُچی يان ءِ دؤرانت۰ هما وت مستر ( مستقل ) ءُ ديمروی پسندیں مُچــّی که په بلوچانی راجی هکـّان ءُ راج ءِ هاترا جد ءُ جهد کننت ءُ بلوچستان ءِ دیمروی لوٹنت ملک ءِ رھشونی ءِ لائک اَنت
زالمیں هامنه ای ءِ انسان دژمنیں ٹولی ءِ بادشاھی دراج کش نہ بیت۰ اگاں چے اے زوالکاریں واکدارانی ناشریں گلام گوں لدیگی سپاہ ءَ بلوچ ءُ بلوچستان ءَ باز تاواں داتگ بلئے پروش ورگاینت۰ اے درآمداں ھچ آیندہ اے ماں بلوچ ڈیہ ءَ نیست ءُ بلوچاں وتی وتن ءُ ھنکین ءِ واجہ وَت انت۰
بلوچ نبایدانت تھران ءِ چمدار بہ بنت یا کہ کسّے ءَ تماھے چہ مجاھدین ءُ شاھپرستان بہ بیت۰ ایشاں بلوچ ءِ دوست ءُ دوزواہ نھنت۰ بلوچستــان ءِ آينــده بلــوچانی واکــداری ءِ دؤر انت۰ سرپدیں بلوچاں پہ بلوچی شورايان ءُ بلوچستــان ءِ هداروکــی راجــی ديوان ( مجلــس ملــی موقــت بلوچستــان ) ءِ ٹاھینگ ءَ تیار بیگی انت۰
بلوچستــان ءِ هداروکــی راجی ديوان ءِ گچيــں بوتگين ءُ زانتکاريــں باسکاں که سجئيں بلوچستان ءِ مهلوک ءَ نمايندگی کننت تانکه مُلکداری ءُ دگه سياسی، اجتماعی ءُ اقتصادی مسئله يانی باروا ءَ گپ ءُ تران، ديوان ءُ پيسله بکننت ءُ گڈسرا بلوچستان ءِ کانود ءُ بن رهبندءَ تیار بکننت۰ بلوچ سرمچاران ءُ دمگی شـوراياں، کوم دوستیـں کماش ءُ راجــی سروکاں په ملک ءِ ايمـنی ءُ آرام دارگ ءَ تاں بلوچستان ءِ راجی حکومت ءِ اڈ بيگ ءَ مزنیں اگدہ اے ھست۰
دلگوش گور کنگی انت کہ سرداری ءُ نوابی ءِ مُـرتگیں سیستم مئے تاریخ ءُ راجدپتر ءِ گوستگیں دورانی پـُر جنجال ءُ بے سيتیں بهـرے ایت۰ اگاں چه تهرانءِ بلوچ دژمنیں فاشیست لهتیں وتگلائیں مردمءِ سرا سرداری ءِ پاگ بستگ بلئے کوشست اِش همے بوتہ که بلوچ ڈیہ ویران بکننت، مهلوک ءَ پدا بدارنت ءُ راجی دیمروی ءَ به اوشتاریننت۰ سردار ءُ نواب وتی چکّاس داتہ ءُ وتا را شرّ پیش داشتگ اَنت۰
اداں اے گپ هـم گوشگــی انت که همــا تگارلاپين ءُ وت گڑيــں مـلا که پـه بلوچانی لٹ کٹ ءُ کــوم ءِ ايردست دارگ ءَ گــوں ڈنـّی يـں پارس هم کوپگ بوتگ انت آ هـم وتی چکـــّاس داتگ انت۰ چشیــں مردمـان ءِ کارکـرد په بلوچ ءَ ننــگ انت ءُ آ که مئےکـوم ءُ بلوچستان ءَ تاوانبار کتگ، نئے مستــری ءِ لائک انت ءُ نئے کـه نيکراهی رهبندانی مــؤمـــن ءُ دوزواه انــت۰ ھما بلوچ ءُ بلوچ اوبادگاں که پهکدليــں کومـی زانتکار اَنــت ءُ مردم آهانی سياســی يا اجتماعی رهدربری ءَ به لوٹنت، هـَمــــا رهدربری ءُ کماشی ءِ لائک انت۰
بلوچستان ءِ آينـــده، راجی ادارہ ءُ مردمـــی شورایانی گچینکاری ءُ مُچی يان ءِ دؤرانت۰ هما وت مستر ( مستقل ) ءُ ديمروی پسندیں مُچــّی که په بلوچانی راجی هکـّان ءُ راج ءِ هاترا جد ءُ جهد کننت ءُ بلوچستان ءِ دیمروی لوٹنت ملک ءِ رھشونی ءِ لائک اَنت۰
آزات ءُ آباد بـــات گنجيـــــں بلـوچستــــان
محمــد کريم بلــوچ
ژوئن ۲۰۱۸
http://baluchistan47.blogspot.com/2018/06/blog-post_86.html
